Dìtɔ̀wáɖánámɛ̀ 32 - Ɓǎsɔ́ɔ̀ Báɓòɔ̀

¹ “Ɓóɖó-kpà kè dyɔɔ̀, ɓě wɔ̃́ ní wuɖuo. Ɓě tò ɖɛ ḿ cɛ̃à kɛɛ gbo ɖùǔ kóɖó-kóɖó.

² Ní tɛ̀mɛ̀ìn-ɖɛ̀ɔ̀ mu nììn kà ní poà fíɖí-fíɖí kɛ, ké ɔ mu ɓóɖó-kpàà kɔ̃ nììn kà dunu kpɔ̃à dyiɛ. Ní wuɖuɔ̀ mu dyiìn kà ní-kpà se mú ku ɖàɓàìn kà ɓáá-ɖɛ̀ ɓěɛ, ké ɔ mu nììn kà ní ɖàɓàìn kà pìǐ ɓɛ̀ɖɛ̀ɛ̀-ɓɛ̀ɖɛ̀ɛ̀ kɛ.

³ Ní mu Bounɓoɔ̀ nyɛ́nɛ́ɔ̀ zio mú pòìn. Ɓě mɛ ɓàìn à Gèɖèpɔ́ɔ̀ dĩ́ín-dĩ̀ìnɔ̀.

⁴ “Bounɓoɔ̀ mɔ̀ à dyí-gmɔ̀ìn-sɔ̀ɔ̌-kpò. Ɔ nyuu-ɖɛ̀ ɓě nɔ̀mɔ̀ kɔ̃in, ké ɔ kpeɖe séín sɛ́ɖɛ́ìn dyí. Ɔ mɔ̀ jǎà Gèɖèpɔ́ɔ̀ ɓɛ́ ɔ ní nyu ɖɛ gbà ɖò kɛ. Ɔ mɔ̀ dyí-sɛ́ɖɛ́ìn-Gèɖèpɔ́ɔ̀.

⁵ Ɓě ɖǎ ɔ nàmàǔn bũ̌ nyu. Ɓě se Bounɓoɔ̀ nyɔ ɓě jǔɛ mu ɖe ɓó ɓěɛ̀ nàmàǔn ɓěɔ̀ jè, kɛɛ ɓě mɔ̀ǎ nàmàǔn kè nyɔ-cá-xwèɖè-dù.

⁶ Fùɖù-fùɖù-nyɔ̀ ɓě kè zuɖuu-nyɔ̀ ɓě, kǎà ɓě mu kà Bounɓoɔ̀ ɖe pɛ́ɛ̀ nyuùne? Má, Bounɓoɔ̀ mɔ̀ ɓěɛ̀ ɓǎ kè ɓěɛ̀ mɛ-nyɔ̀e? Má, ɔ ɖǎ ɓě ɓóɖó-dù ɖò mú nyue?

⁷ “Wé ɓě ɖǎǒ zɔ̃̌ɔ̀ ziɛɛ jè mɛ nì ɓě hwìɖǐi. Nyɔ ɓě cĩ́ó zɔ̃̌ɔ̀ kĩ́ín nyɛɛ jè mɛ nì ɓě hwìɖǐi. Ɓě diè ɓě ɓǎ ɓěɔ̀ dyi, ké wa muɛ ɓě gbo cɛ̃ìn. Ɓě diè ɓě nyɔ vɛ̀nɛ̀ ɓěɔ̀ dyi, ké wa muɛ ɓě gbo kɔ̃in zaìn.

⁸ Ti ɓɛ́ Ɖɛɓíɔ́ ge ma nyɔǔn-dyù séín mú, ké ɔ tò ma wa nììn ɓóɖó ɓěɛɛ, ɔ po ma wa bã̀à pṹa, kà waà ínjà ɓěɔ̀ nyu ma jĩ̀ɛ̀ kɛ.

⁹ Kɛɛ Bounɓoɔ̀ gã ɓě ɓɛ́ ɓě ké ɔ nììn kɔ̃̀ɔ̀-ɖɛ̀ jǔ. Ɓě mɔ̀à Jékɔ̀ɛ̀ xwíníín-dyù ɓěɛɛ, ɓě mɔ̀ Bounɓoɔ̀ nììn kɔ̃̀ɔ̀-ɖɛ̀.

¹⁰ “Ɔ dyé ma ɓě da ɖé gbǎùn-fúɖúáɔ̀ kɔ̃. Ɔ mɔ̀ dɛ̀ ɖɛ ɖò se mɛɛ ɓɛ́ìn, ké pìɔ̌ nì ɖéɛɛ ku wɔ̃ɛ. Ɔ po ɓě xwíɖíi, ké ɔ kɔ̃̀ ma ɖé ɓě jè gbo. Ɔ gmɔ̀ ma ɓě dyí kà ɔ gmɔ̀à ɔ dyéɖé-dyùɔ̀ dyíɛ.

¹¹ Bounɓoɔ̀ gmɔ̀ ɓě dyí kà ke nìà ɔ dyú wãa tɛ̀mɛ̀ǐn nyɛ. Hwɛ̀ ɓɛ́ keɔ̀ dyúɔ̀ ké ɓíɖíi kpáa, ɔ pɛ́ɛ̀ ɔ pìɔ̌-kpà ɓěɔ̀ kɔ̃in, ké ɔ kpɔ̃̀ìn ɔ hwìè kɔ̃.

¹² Bounɓoɔ̀ ɖòùn mɔ̀ nyɔ nàìn ma ɓě. Gèɖèpɔ́ɔ̀ kà kò ɖò se ma ɔ gbo kpá.

¹³ “Bounɓoɔ̀ nyuɛ ké ɓě kɔ̃̀ ma ɓóɖó-kpàà toɖo-ɓòɖò ɓěɔ̀ wuɖuí, ké ɔ nyí ma ɓě ɖii-ɖɛ̀ sɔ̀ ɖé geɖe ɓěɔ̀ gboɛ. Ɔ nyí ma ɓě ɖo sɔ̀ìn ɖé sɔ́ɔ́-kpò ɓě múɛ, ké ɓě ɖi ma ɔ́ɖè-cànà sɔ̀ìn ɖé sɔ́ɔ́-ɓòɖò kóɖó-kóɖó mú.

¹⁴ Ɓěɛ̀ ɓìɖǐ ɓěɔ̀ kè ɓěɛ̀ wiɖi ɓěɔ̀ ɓéɖé ma nɛɛ̀-nì ɓáún-ɓáún. Ɓě ɓéɖé ma ɓáɖáá kè wiɖi nɔ̀mɔ̀ kɔ̃in ɓě sɔ̀ìn ɖé Básàùn-ɓòɖòɔ̀ kɔ̃ɛ. Ɓě ɓéɖé ma hwítì kè wã́ìn nɔ̀mɔ̀ dyíin.

¹⁵ “Éézùɖùɛ̀-nyɔ̀ ɓě, ɓě ɓúá ma ní, kɛɛ ɓě po Bounɓoɔ̀ kɛ́ɛ́ dyí. Ɖii-ɖɛ̀ ɖoɓo ma ɓě dyí, ké ɓě ɓúá. Ɓě ɖǎ Gèɖèpɔ́ɔ̀ mɔ̀à ɓěɛ̀ mɛ-nyɔ̀ɔ̀ kɛɛ kíɖíí sɔ̀. Ɓě ɖǎ ɓěɛ̀ dyí-gmɔ̀ìn-sɔ̀ɔ̌-kpò ɓɛ́ ɔ póìn ɓě kɛɛ dyi táà.

¹⁶ Ɓě po Bounɓoɔ̀ dyoɖoún dyììn ɖé gèɖèpɔ́ɔ̀ kà kò ɖò ɓě ɓiè-ɓiè mú. Ɓěɛ̀ kũùn-kpò ɓě ɓɛ́ wa nyàìn Bounɓoɔ̀ dyiɛɛ jè ɖǎ ɔ dyoɖoún po.

¹⁷ Ɓě zà sáa ɖé zùù gbà ɓě ɓɛ́ wa se jǎà gèɖèpɔ́ɔ̀ kɛɛ gbo. Wa mɔ̀ gèɖèpɔ́ɔ̀ ɓě ɓɛ́ ɓě séè ɓiè ɖòɛ. Wa mɔ̀ gèɖèpɔ́ɔ̀ ɖìè ɓě. Wa mɔ̀ gèɖèpɔ́ɔ̀ ɓě ɓɛ́ ɓě ɓǎ nììn ɓǎ ɓěɔ̀ se ma kpéín dyéɛ.

¹⁸ Ɓě táà ɓěɛ̀ dyí-gmɔ̀ìn-sɔ̀ɔ̌-kpò ɓɛ́ ɔ mɔ̀à ɓě ɓǎa dyi. Gèɖèpɔ́ɔ̀ wóɖóìn kà ɓě kɛɛ jè sɔ̀ ɓě hwìɖǐi.

¹⁹ “Bounɓoɔ̀ dyé ma ɖɛ nìà kɛ, ké ɔ ɓɔ́ ma ɓě, Ɓě mɔ̀à ɔ dyú-gàà ɓě kè ɔ dyú-màà ɓěɛɛ nyuu-ɖɛ̀ po ma ɔ dyoɖoún.

²⁰ Bounɓoɔ̀ ɖá, ‘Ní mu wa dyúa xwáɖáún pòìn. Ní muɛ dyéìn kà waà sèìn-naín jè mu nìɛ̀ nyuùn wɛ̃. Sepóɛɖé wa mɔ̀ hwòɖǒ-kɔ̃in-nyìnììn-nyɔ̀ ɓě. Wa mɔ̀ dyú ɓě ɓɛ́ wa ní nyu ḿ jǎà gboɛ.

²¹ Waà gèɖèpɔ́ɔ̀ ɓě seà jǎà gèɖèpɔ́ɔ̀ ɓěɛɛ jè ɖǎ ḿ dyoɖoún po. Waà kũùn-kpò ɓiè-ɓièɔ̀ jè ɖǎ ḿ dyoɖoún po. Ɔ jèɛɛ, ní mu ɓóɖó-dù se ɖɛ kpaa dyí ɖúùn, ɓɛ́ ḿ kéɛ wa hwɛ̀nɛ̌ǐn pòìn. Ní muɛ nyuùn ɓɛ́ wa ké ɓóɖó-dù ɓɛ́ ɔ seà hwòɖǒ fɔ̀nɔ̀ɛɛ jè dyoɖoún kpá.

²² Ní dyoɖo-hwòɖòɔ̀ ɖǎ nyɛ jǔ, ké ɔ ɖǎ dyí kpɔ̃, ké ɔ mu ɓáá-ɖɛ̀ séín nì ɓóɖó-kpàà kɔ̃ɛɛ fɔ̃ùn. Ɔ mu ɖé ɓóɖó-hwùɖù nyiniìn, dɛ̀ ɓɛ́ nyɔ ɖǎà mɛ́ɛ nìà kɛ, ɓɛ́ ɔ ké toɖo vɛ̀nɛ̀ ɓěɔ̀ gbɔ-sí-naín ɓěɔ̀ fɔ̃.

²³ “ ‘Ní mu ní nyɔ ɓěɔ̀ gǎ deìn kɔ̃in kɔ̃ tòùn kánáá pū, ké ní mu ní sé-kpìì séín ɓěɔ̀ wa pòìn.

²⁴ Mɔ́ mu wa ɖáɓáùn, ké sɔ̃́-nì mu wa mú gbɔɔ̀ùn. Nyɔ-mú-gbɔɔ̀-wɛ̀ dú kò-kò ɓě mu wa mú gbɔɔ̀ùn. Ní muɛ nyuùn ɓɛ́ xwáɖá-xwíɖíi-nìmìì ɓěɔ̀ ké wa kpɔ̃, ké cɛ̃́-sɛ̀ ɓě mu wa numuùn.

²⁵ Gàsíà muɛ nyuùn ɓɛ́ waà dyú ɓěɔ̀ xwɛ́ ké hwɔɖɔ-gboi-hwìè ɓěɔ̀ gba dyi wáɖáìn, ké fã̀à mu waà taà ɓěɔ̀ mú dyi dyíìn. Gàa-dyù gmɔ̀ kè màa-dyù gmɔ̀ ɓě mu mú gbɔɔ̀ùn. Dyú-pɛ̀ɖɛ̀ kè dyùì-dù ɓě mu mú gbɔɔ̀ùn ɖekè.

²⁶ Ké ḿ ɖǎa cɛ̃ kà ní mu wa dyi gbɛ̀ìn, ɓɛ́ ḿ ké wa jè dyi zĩ̀ìn nyɛ.

²⁷ Kɛɛ ní hwòɖǒ poìn ma waà mú-nyɛ́-nyɔ̀ ɓěɔ̀ wa wuɖu dyíin po jèɔ̀ hwìɖǐi, ɓɛ́ waà mú-nyɛ́-nyɔ̀ ɓěɔ̀ kɔ̃̀ ɖà ké seɛ múin wɔ̃́ ní, wa ní kɔ̃̀ ɖà níiń, “À sɔ̃ ɖǎ ɖé kɔ̃in nì. Bounɓoɔ̀ mɔ̀ nyɔ se ɖɛ séín ɓěɛ̀ nyu.” ’

²⁸ “Éézùɖùɛ̀-nyɔ̀ ɓě, ɓě mɔ̀ ɓóɖó-dù ɖò ɓɛ́ ɔ se ɖɛ-múin-wɔ̃́-wɔ̃́ ɖò ɓéɖéɛ. Ɓě se fɔ̀nɔ̀-hwòɖǒ ɖò ɓéɖé fɔɔ cá.

²⁹ Nyɛ́ ɖá ɓě fɔ̀nɔ̀ má hwòɖǒ, ké ɓě wɔ̃́ɔ́ má ɖɛ nìà kɛ múin, ké ɓě dyuòɔ̌ má ɓěɛ̀ sèìn-naín dyíɛ́?

³⁰ Xwɛ̌ gàa dyúáɖò ɓɛ́ìn ɓěɛ̀ gàa táázĩ̀ìn kíɖíí kpáa kɛ́? Ké xwɛ̌ gàa sɔ̃́ ɓɛ́ìn nyuɛ ɓɛ́ ɓěɛ̀ gàa táázĩ̀ìn ɓaɖa-bùè ké wa dyúa gbǔ kɛ́? Ɔ sèìn ɓěɛ̀ dyí-gmɔ̀ìn-sɔ̀ɔ̌-kpòɔ̀ peɖe dyɛ ɓě hwɛ̀. Ɔ sèìn ɓěɛ̀ Bounɓoɔ̀ táà dyɛ ɓě dyi hwɛ̀.

³¹ À mú-nyɛ́-nyɔ̀ ɓěɔ̀ nììn dyí-gmɔ̀ìn-sɔ̀ɔ̌-kpòɔ̀ se nì kà à nììn dyí-gmɔ̀ìn-sɔ̀ɔ̌-kpòɔ̀ nìà kɛ. Wa mìɔùn wɔ̃́ìn mú ɖekè.

³² Wa nì kà Sáɖɔ̀ùn kè Gòmɔ́ɖɔ̀-nyɔ̀ ɓěɔ̀ nìà kɛ. Wa nì kà géɖéè-ɓò ɓě ɓɛ́ wa nɛɛ̀, ké wa dyí cɛ̃́ín nyɛ.

³³ Wa wã́ìn nì kà sɛ-cɛ̃̀ nìà kɛ. Ɔ nì kà guù-dyúɖúú-cɛ̃̀ nìà kɛ.

³⁴ “Má, ɖɛ ɓěɛ̀ mú-nyɛ́-nyɔ̀ ɓěɔ̀ nyuà ɓě bũ̌ɛɛ nì Bounɓoɔ̀ hwìɖǐie? Má, ɔ dèɛ̀ dyi ɖé ɔ ɖɛ-dyi-dèìn-naínɔ̀e?

³⁵ Bounɓoɔ̀ ɖá, ‘Mɔ̄ kɔ̃̀ kpa-zà-zà kpé gbo. Mɔ̄ mu wa kpa kɔ̃in zàìn. Wé ɖò nì dyiɛń, ɓɛ́ wa ké dyi zɛ̀nɛ̌. Wa mú-gbɔɔ̀-wèɔ̀ ɖǎ dyi xwɛ̃́ìn. Ɔ nì wa kɔ̃ dyiɛń wàɖà.’

³⁶ Bounɓoɔ̀ mu ɓě kɔ̃ zàà ziìn, ké ɔ mu ɓě wìǐn dyéìn, ti ɓɛ́ ɔ dyéɛ ké kpé ɖò se ɓě dyí nì ɖe, ké ɓěɛ̀ nyɔ ɖò se ɓíɖíi sè, kɛbì ɔ mɛ mɔ̀ gǐì, mɔɔ kɛbì ɔ mɛ se gǐì kɛ.

³⁷ Bounɓoɔ̀ mu ɓě dyi dièìn, ɓɛ́ ɔ ké níiń, ‘Dɛ̌ ɓěɛ̀ gèɖèpɔ́ɔ̀ ɓě mɔ̀à sɔ́ɔ́-kpò ɓě kɔ̃̀ ɖeín ɓɛ́ ɓě vǐè kà kɛɛ nì ɓó kàǔn wɛ̃́?

³⁸ Dɛ̌ ɓěɛ̀ gèɖèpɔ́ɔ̀ ɓě ɖià ɓěɛ̀ sáa-zàìn-ɖɛ̀ ɓěɔ̀ cáná-dà, ɓɛ́ wa dyià ɓěɛ̀ wã́ìn mɔ̀ náá-ɖɛ̀-sàǎ-zàìn-ɖɛ̀ ɓěɔ̀ náa nì kɛ́? Wa mɛ sɔ̀ǎ dyí, ɓɛ́ wa kéá ɓě gbo kpáe. Wa mɛ nyuá vǐè-naín ɖò ɓó ɓě bììe.

³⁹ “ ‘Ɓě mɛ dyuòɛ̀ dyí jɛ́ɛ́ kà ḿ ɖòǔn mɔ̀ Gèɖèpɔ́ɔ̀, ké gèɖèpɔ́ɔ̀ kà kò ɖò se ɓó ḿ wáún nì ɖeɛ. Ní ɖáɓá nyɔ, ké ní zà nyɔ gĩɔ. Ní puà nyɔ, ké ní kánáìn nyɔ dyi. Ké nyɔ ɖò se nì, ɓɛ́ ɔ ké ɖɛ ḿ ɖǎ dyi kpɔ̃ɛɛ ḿ xwa zà.

⁴⁰ Kà ḿ mɔ̀à nì-nì Gèɖèpɔ́ɔ̀ kánáá pūɛɛ, ḿ tò ní sɔ̃ɔ̀ dyií, ké ḿ gboò ḿ mìɔùn dyí,

⁴¹ kà ní mu ní gàsíà fã-fãɔ̀ samaùn, ɓɛ́ ḿ ké ní mú-nyɛ́-nyɔ̀ ɓěɔ̀ gǎ kɔ̃ tòɛ. Ní mu wa kpa kɔ̃in zàìn. Ní mu wa gǎ kɔ̃ tòùn.

⁴² Ní sé-kpìì ɓěɔ̀ mu nyɔmɔɔ náùn, ké ní gàsíàɔ̀ mu fɔ́ tàùn. Nyɔ ɓě ɓɛ́ wa ɖáɓáa kè toɛ̀-kpɔ̃-nyɔ̀ ɓěɔ̀ nyɔmɔɔ mu dyi ziìn, ké mú-nyɛ́-nyɔ̀ ɓěɔ̀ dú muɛ xwa sèìn.’

⁴³ “Ɓóɖó-dù ɓěo, ɓě kè Bounɓoɔ̀ nyɔ ɓěɔ̀ mɛ nyu múà, sepóɛɖé ɔ mu ɔ gbo-nì-nyɔ̀ ɓěɔ̀ nyɔmɔɔ̀ kpa zàùn. Ɔ mu ɔ mú-nyɛ́-nyɔ̀ ɓěɔ̀ kpa kɔ̃in zàìn, kɛɛ ɔ mu ɔ ɓóɖóɔ̀ ɔ kè nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ nyuùn.”

⁴⁴ Kǎà Mózè kè Jasúé mɔ̀à Núùnɛ̀ dyú-gààɔ̀ kɛɛ nyu ma wɛ́ɖɛ́ nìà kɛ wuɖuɔ̀ kɔ̃in kpaìn, ké Éézùɖùɛ̀-nyɔ̀ ɓěɔ̀ wɔ̃́ɔ ma.

Mózèɛ̀ náún-po-wùɖù hwɛ̀ìn-gbɔ

⁴⁵ Ti ɓɛ́ Mózè ɖǎ ma wuɖu séín ɓěɛ̀ Éézùɖùɛ̀-nyɔ̀ séín ɓěɔ̀ gbo cɛ̃ɛ hwɔɛɛ,

⁴⁶ ɔ wùɖù ma wa gbo ɖe, ké ɔ ɖá, “Ɓě mɛ kpɔ̃ gma séín ɓɛ́ ḿ ɖǎà zɛ̃̌ɛ̀ ɓě nyíɛɛ dyi, ké ɓě mɛ cɛ̃ɛ ɓěɛ̀ dyú ɓěɔ̀ gbo tee, ɓɛ́ wa ké gma ɓěɛ̀ dyi kpɔ̃ kóɖó-kóɖó ɖekè.

⁴⁷ Gma ɓěɛ̀ se wuɖu fóɖóún, kɛɛ wa mɔ̀ ɓěɛ̀ fɛ̀ɛ̀ jɛ́-jɛ́ɔ̀. Ɓě kpɔ̃ wa dyi, ké ɓě mu hwèɖèìn ɖé ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.”

⁴⁸ Ɓó wé dyúáɖòɔ̀ ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá,

⁴⁹ “Mu ɖé Àbáwìɖììn-tòɖò ɓě nìà ɖé Móà-ɓòɖòɔ̀ kɔ̃, hwɔà ɖé Jɛ́ɖèkóò-hwɔ̀ɖɔ̀ɔ̀ dyúa dyíɛɛ gbo. Dyá toɖo mɔ̀ Néɓò kɛ, ɓɛ́ m̀ ké Kénà-ɓòɖò ɓɛ́ ḿ nìà Éézùɖùɛ̀-dyù ɓěɔ̀ nyíɛń, ɓɛ́ ɔ kéà waà kɔ̃̀ɔ̀-ɖɛ̀ jǔɛɛ kɔ̃in gmɔìn.

⁵⁰ Ké nì mu ɖé toɖoɔ̀ dya mɛ́ìn, ɓɛ́ m̀ ké nì nyɔ ɓěɔ̀ gbo mu kà m̀ ɖíí-gàà Eɖóún mɛ́ìn ma kà ɖé Hóɔ̀-tòɖòɔ̀ dya, ké ɔ muà ɔ nyɔ ɓěɔ̀ gboɛ.

⁵¹ M̀ se Kénà-ɓòɖòɔ̀ kɔ̃ muɛ́ mu, sepóɛɖé ti ɓě ɓɛ̀ɖɛ̀ìn ma ɖé Mɛ̀wíɖíɓà-nì nìà ɖé Káɖɛ̀-hwɔ̀ɖɔ̀ɔ̀ wáún wɛ̃ɛ wĩín dyí ɖé Zĩ́ìn Gbǎùn-fúɖúáɔ̀ kɔ̃ɛɛ, m̀ kè Eɖóún se ma ḿ jǎà gbo nyu, ké ɓě zàìn ma ḿ zùǔn ɓó Éézùɖùɛ̀-dyù ɓěɔ̀ dyúa.

⁵² Nì mu ɖé nya nììn, ɓɛ́ m̀ ké ɓóɖó ɓɛ́ ḿ nìà Éézùɖùɛ̀-dyù ɓěɔ̀ nyíɛń nyɛɛ kɔ̃in gmɔìn, kɛɛ m̀ se ɖéɛ kɔ̃ muɛ́ mu.”