Dìtɔ̀wáɖánámɛ̀ 30 - Ɓǎsɔ́ɔ̀ Báɓòɔ̀

Ɖɛ ɓě ɓɛ́ Éézùɖùɛ̀-nyɔ̀ ɓěɔ̀ ké nyu hwɛ̀ ɓɛ́ Bounɓoɔ̀ ké wa jè dyi kpɔ̃, ɓɛ́ ɔ ké wa mana kɔ̃ poɛ

¹ “Ḿ ɖǎ mana séín ɓěɛ̀ kè hwòɛ̌-wùɖù séín ɓěɛ̀ ɓó ɓě dyúa dyi pɛ̃́ìn ɓó zɛ̃̌ɛ̀. Ɔ jǔ ké hwòɛ̌-wùɖù ɓěɛ̀ dyi ɓě kɔ̃ dyi, ké ɓě dyi wa jè hwìɖǐi poìn ɖé ɓóɖó séín ɓě kɔ̃̀ kɔ̃ ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà ɓě dyi gbɛ̀ìn nyɛɛ kɔ̃,

² ké ɓě kè ɓěɛ̀ xwíníín-dyù ɓěɔ̀ dyi ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo gmɔ̀ìn, ké ɓě dyi ɔ wuɖu séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ hwòɖǒɛ̀-ɖé-hwɛ̀-kà ní,

³ nìí, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě wìǐn dyéìn, ké ɔ mu ɓě ɓóɖó-dù séín ɓě kɔ̃̀ kɔ̃ ɓɛ́ ɔ gbɛ̀ìn kà ɓě dyiɛɛ kɔ̃in zàùn, ɓɛ́ ɔ ké ɓě ɖe dyà, ké ɔ mu ɓě páún poùn ɖe.

⁴ Kɛbì ɓě mɛ nì ɓóɖó-kpàà gã tɔ̀mɔ̀ǔn-tɔ̀mɔ̀ǔn ɓěɔ̀ gboɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě dyí poìn, ɓɛ́ ɔ ké ɓě ɖe dyà.

⁵ Ɔ mu ɓě ɓóɖó ɓɛ́ ɔ mɔ̀à ɓě ɓǎ nììn ɓǎ ɓěɛ̀ kɔ̃̀ɔ̀-ɖɛ̀ kɛɛ kɔ̃ ɖe dyàùn, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ké ɔ muɛ nyuùn ɓɛ́ ɓě ké dyí vò, ɓɛ́ ɓěɛ̀ nyuu-ɖɛ̀ ké dúún zaìn ɓɛ́ ɔ ké ɓě ɓǎ nììn ɓǎ ɓěɔ̀ dyí zi.

⁶ Bounɓo mɔ̀à ɓěɛ̀ Gèɖèpɔ́ɔ̀ kɛɛ muɛ nyuùn ɓɛ́ ɓě kè ɓěɛ̀ xwíníín-dyù ɓěɔ̀ hwòɖǒ-dyùà ɓěɔ̀ ké dyí ɓɛɖɛɛ̀, ɓɛ́ ɓě ké ɔ mú ɖɛ̀ɓɛ̀ hwòɖǒɛ̀-ɖé-hwɛ̀-kà, ɓɛ́ ɓě ké cĩ́.

⁷ Ké Bounɓoɔ̀ mu hwòɛ̌-wùɖù séín ɓěɔ̀ ɓěɛ̀ mú-nyɛ́-nyɔ̀ ɓě ɓɛ́ wa pĩ́àà ɓě dyiɛɛ kɔ̃ tòùn.

⁸ Ké ɓě mu Bounɓoɔ̀ wuɖu nyuùn ɖe, ké ɓě mu ɔ gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ùn.

⁹ Ké Bounɓoɔ̀ muɛ nyuùn ɓɛ́ ɓěɛ̀ nyuu-ɖɛ̀ séín ké mú wóɖó. Ɓě mu dyú ɓáún-ɓáún wóɖóìn, ké ɓěɛ̀ nyúà-ɖɛ̀ ɓěɔ̀ kè ɓěɛ̀ geɖe ɓěɔ̀ mu bãùn mìɔ. Sepóɛɖé ɔ mu múàǔn kpáùn, ɓɛ́ ɔ ké ɓě mana kɔ̃ po kà ɔ kpáó zɔ̃̌ɔ̀ kà múàǔn, ɓɛ́ ɔ dyià ɓě ɓǎ nììn ɓǎ ɓěɔ̀ mana kɔ̃ poɛ.

¹⁰ Kɛɛ ɓě mɛ nyu Bounɓoɔ̀ wuɖu, ɓɛ́ ɓě ké ɔ gma-dù kò-kò séín ɓě céèà céè-ɖɛ̀ nìà kɛ múɛɛ dyi kpɔ̃. Ɓě mɛ gmɔ̀ìn Bounɓoɔ̀ gbo hwòɖǒɛ̀-ɖé-hwɛ̀-kà.

¹¹ “Gma ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ se mú kàmà mìɔ ɓó ɓě bìì, mɔɔ ké ɔ se ɓě bũ̌in tɔmɔìn.

¹² Ɔ se ɖé dyɔɔ̀ dyí nì, ɓɛ́ ɓě ké ɖɛi diè, ɓɛ́ ɓě ké níiń, ‘Nyɛ́ mu ɖé à bìì dyɔɔ̀ dyí muùn, ɓɛ́ ɔ ké gmaɔ̀ dyà, ɓɛ́ ɔ kéɛ à gbo cɛ̃, ɓɛ́ à kéɛ dyi kpɔ̃ kɛ́?’

¹³ Ké ɔ se ɖé dyóó ɖeín nì, ɓɛ́ ɓě ké ɖɛi diè, ɓɛ́ ɓě ké níiń, ‘Nyɛ́ mu dyóóɔ̀ péɖéìn, ɓɛ́ ɔ ké gmaɔ̀ dyà, ɓɛ́ ɔ kéɛ à gbo cɛ̃, ɓɛ́ à kéɛ dyi kpɔ̃ kɛ́?’

¹⁴ Gbào, gmaɔ̀ nì dà ɓě gbo. Ɔ nì ɓě wĩín, ké ɔ nì ɓě hwòɖǒ bũ̌. Ɔ jèɛɛ, ɓě kpɔ̃ɔ dyi.

¹⁵ “Ɓě dyéɛ, ɓó zɛ̃̌ɛ̀ kɛɛ, ḿ pɛ̃́ìn ɓě hwìè sɔ̃́ dyúa dyi, ɓɛ́ ɓě ké ɖò gã. Hwìè ɓěɔ̀ mɔ̀ fɛ̀ɛ̀ kè mana, mɔɔ gĩɔ kè mú-gbɔɔ̀-gbɔɔ̀.

¹⁶ Ḿ ɖǎa ɓě gbo cɛ̃ ɓó zɛ̃̌ɛ̀, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ mú ɖɛ̀ɓɛ̀, ɓɛ́ ɓě ké ɔ kpeɖe ɓěɔ̀ kíɖíí sí, ɓɛ́ ɓě ké ɔ gma-dù kò-kò ɓěɔ̀ dyi kpɔ̃. Ɓě dyiɛ náa nyuín, nìí, ɓě mu cĩ́ìn, ɓɛ́ ɓě ké dúún zaìn, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě mana kɔ̃ poùn ɖé ɓóɖó ɓɛ́ ɓě nìà kɔ̃ muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

¹⁷ Kɛɛ ɔ jǔ ké ɓě dyi Gèɖèpɔ́ɔ̀ kɔ̃ín pòìn, ké ɓě se ɔ wuɖu nyu, ké ɓě dyi gèɖèpɔ́ɔ̀ kà kò ɖò ɓě gbo gmɔ̀ìn, ké ɓě dyi wa ɓiè ní,

¹⁸ nìí, ḿ nìɛ̀ ɓě gbo cɛ̃iń jǎà cá ɓó zɛ̃̌ɛ̀ kà ɓě mu mú gbɔɔ̀ùn wɛ̃. Ɓě se hwèɖèɛ̌n mu ɖé ɓóɖó kɔ̃̀ jè ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

¹⁹ Ɓó zɛ̃̌ɛ̀ kɛɛ, ḿ nì dyɔɔ̀ kè ɓóɖó-kpàà ɖáuń, ɓɛ́ wa ké ḿ kè ɓěɛ̀ zàse jǔ kà ɓɛ́ ḿ pɛ̃́ìn ɓě fɛ̀ɛ̀ kè gĩɔ ɔ kè Gèɖèpɔ́ɔ̀ mana kè hwòɛ̌-wùɖù ɓě dyúa dyiɛ. Ɓó kàǔn wɛ̃ɛ, ɓě mɛ gã fɛ̀ɛ̀, ɓɛ́ ɓě kè ɓěɛ̀ xwíníín-dyù ɓěɔ̀ ké cĩ́.

²⁰ Ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú, ɓɛ́ ɓě ké ɔ wuɖu nyu, ɓɛ́ ɓě ké ɓó ɔ gboi kpɔ̃ kóɖó-kóɖó, sepóɛɖé Bounɓoɔ̀ mɔ̀ ɓěɛ̀ fɛ̀ɛ̀ɔ̀, ké ɔ mu ɓě zɔ̃ ɓáún-ɓáún nyíìn, ɓɛ́ ɓě ké hwèɖèìn ɖé ɓóɖó ɓɛ́ ɔ ɖáìn zɔ̃̌ɔ̀ kà ɓě ɓǎ nììn ɓǎ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kɛɛ nyɛ́nɛ́ín nyɛɛ kɔ̃.”