Dìtɔ̀wáɖánámɛ̀ 28 - Ɓǎsɔ́ɔ̀ Báɓòɔ̀

Mana ɓě nì nyɔ ɓě nyu wuɖuɛɛ kɔ̃ɛ

¹ “Ɔ jǔ ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ gma séín ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ kóɖó-kóɖó ní, nìí, ɔ muɛ nyuùn ɓɛ́ ɓě ké ɓóɖó-dù vɛ̀nɛ̀ jǔ ɓɛ́ ɓě ké ɓóɖó-dù tɔ̀ɔ̀ séín nì ɓóɖó-kpàà kɔ̃ɛɛ dyí zi.

² Ɓě mɛ nyu Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖu, ké mana ɓě nìà kɛ mu ɓě kɔ̃ nììn.

³ “Bounɓoɔ̀ mu ɓěɛ̀ hwɔɖɔ ɓěɔ̀ kè ɓěɛ̀ geɖe ɓěɔ̀ mana kɔ̃ poùn.

⁴ “Bounɓoɔ̀ mu ɓě mana kɔ̃ poùn, ɓɛ́ ɓě ké dyú ɓáún-ɓáún wóɖóìn, ɓɛ́ ɓěɛ̀ geɖe ɓěɔ̀ kè ɓěɛ̀ ɓìɖǐ ɓěɔ̀ kè ɓěɛ̀ ɓáɖáá ɓěɔ̀ ɔ kè ɓěɛ̀ wiɖi ɓěɔ̀ ké bã.

⁵ “Bounɓoɔ̀ mu ɓěɛ̀ tìě ɓěɔ̀ mú-sɔ̀-ɖɛ̀ ɓěɔ̀ kè ɓěɛ̀ bɛɖɛɛ̀-mú-nyùìn-ɖɛ̀ ɓěɔ̀ mú-sɔ̀-ɖɛ̀ ɓěɔ̀ mana kɔ̃ poùn.

⁶ “Bounɓoɔ̀ mu ɓě mana kɔ̃ poùn dɛ̀ kã̀ìn séín ɓě mu dyi zĩ̀ìn nyɛ.

⁷ “Bounɓoɔ̀ muɛ nyuùn ɓɛ́ ɓě ké ɓěɛ̀ mú-nyɛ́-nyɔ̀ ɓě mu ɓě gbo vɔ̃uń dyiìn nyɛɛ toún ɖu. Wa mu hwìè dyúáɖò dyàùn, ɓɛ́ wa ké ɓě gbo vɔ̃uń dyi, kɛɛ wa mu dyi gbɛ̀ìn, ɓɛ́ wa ké ɓě dyúa gbǔ.

⁸ “Bounɓoɔ̀ mu ɓěɛ̀ kũ̀à-sɔ̃̀ séín ɓěɔ̀ mana kɔ̃ poùn, ké ɔ muɛ nyuùn ɓɛ́ ɓěɛ̀ sáɖá ɓěɔ̀ ké ɖii-ɖɛ̀ múin dyíìn. Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě mana kɔ̃ poùn ɖé ɓóɖó ɓɛ́ ɔ nìà ɓě nyíɛń nyɛɛ kɔ̃.

⁹ “Ɔ jǔ ké ɓě dyi Bounɓo mɔ̀à ɓěɛ̀ Gèɖèpɔ́ɔ̀ kɛɛ gma ɓěɔ̀ dyi kpɔ̃, ké ɓě dyi ɔ kpeɖe ɓěɔ̀ kíɖíí sí ní, nìí, ɔ mu ɓě wáká poùn, ɓɛ́ ɓě ké ɔ mìɔùn nììn nyɔ ɓě jǔ kà ɔ nyuà ɓě nyɛ́nɛ́ín ɖáìn nyɛ.

¹⁰ Ké nyɔǔn séín nì ɓóɖó-kpàà kɔ̃ɛɛ muɛ dyéìn kà Bounɓoɔ̀ ɖǎ ɓě gã ɓɛ́ ɓě ké ɔ mìɔùn nììn nyɔ jǔɛ, ké wa mu ɓě dyi peɖeìn.

¹¹ Ké Bounɓoɔ̀ mu ɓě mana kɔ̃ poùn, ɓɛ́ ɓě ké dyú ɓáún-ɓáún wóɖóìn, ɓɛ́ ɓěɛ̀ nyúà-ɖɛ̀ ɓěɔ̀ kè ɓěɛ̀ geɖe ɓěɔ̀ ké bã ɖé ɓóɖó ɓɛ́ Bounɓoɔ̀ ɖǎà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ kɔ̃.

¹² Bounɓoɔ̀ mu dyɔɔ̀ mɔ̀à ɔ bãa-ɖɛ̀ ɓěɔ̀ dyi-dèìn-naínɔ̀ kɛɛ dyí kaàùn, ɓɛ́ ní ké ɖaɓa ɖé ɓěɛ̀ ɓóɖóɔ̀ kɔ̃, ɓó ɔ ɖaɓa-tì jɛ́ɛ́ɔ̀ mú, ké ɔ mu ɓěɛ̀ kũ̀à-sɔ̃̀ séín ɓěɔ̀ mana kɔ̃ poùn. Ɓě mu ɓóɖó-dù ɓáún-ɓáún kpaún poùn, kɛɛ ɓě se ɓóɖó ɖò gbo kpa kpɔ̃ɔ́ mu.

¹³ Ké Bounɓo mɔ̀à ɓěɛ̀ Gèɖèpɔ́ɔ̀ kɛɛ muɛ nyuùn ɓɛ́ ɓě ké hwìèɔ̀ nya nì, ké ɓě se ɖe ziɛ́ mu. Ɔ jǔ ké ɓě dyi ɔ gma ɓě ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃ kóɖó-kóɖó ní, nìí, ɓě mu ɖé kɔ̃in nììn, ké ɓě se ɖé xwíɖíi nìɛ̌ mu.

¹⁴ Kɛɛ ɓě mɛ ɓɔ́ gma ɓě ɓɛ́ ḿ cɛ̃à zɛ̃̌ɛ̀ ɓě gboɛɛ ɖò dyi táà, ké ɓě ní ɖá ɓɛ́ ɓě ké ɖé ɖiaún mɔɔ kunuaún kpáìn, ɓɛ́ ɓě ké gèɖèpɔ́ɔ̀ kà kò ɖò ɓě kíɖíí sí, ɓɛ́ ɓě ké wa ɓiè.

Hwòɛ̌-wùɖù ɓě nì nyɔ ɓě se wuɖu nyuɛɛ kɔ̃ɛ

¹⁵ “Ɔ jǔ ké ɓě se Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖu nyu, ɓɛ́ ɓě ké ɔ gma séín ɓě ɓɛ́ ḿ cɛ̃à zɛ̃̌ɛ̀ ɓě gboɛɛ dyi kpɔ̃ kóɖó-kóɖó ní, nìí, hwòɛ̌-wùɖù séín ɓěɛ̀ mu ɓě kpɔ̃ùn.

¹⁶ “Bounɓoɔ̀ hwòɛ̌-wùɖù mu ɓěɛ̀ hwɔɖɔ ɓěɔ̀ kè ɓěɛ̀ geɖe ɓěɔ̀ kɔ̃ nììn.

¹⁷ “Bounɓoɔ̀ hwòɛ̌-wùɖù mu ɓěɛ̀ tìě ɓěɔ̀ mú-sɔ̀-ɖɛ̀ ɓěɔ̀ kè ɓěɛ̀ bɛɖɛɛ̀-mú-nyùìn-ɖɛ̀ ɓěɔ̀ mú-sɔ̀-ɖɛ̀ ɓěɔ̀ kɔ̃ nììn.

¹⁸ “Bounɓoɔ̀ hwòɛ̌-wùɖù mu ɓěɛ̀ xwíníín-dyù ɓěɔ̀ kè ɓěɛ̀ ɓáá-ɖɛ̀ ɓěɔ̀ kè ɓěɛ̀ ɓìɖǐ ɓěɔ̀ kè ɓěɛ̀ ɓáɖáá ɓěɔ̀ ɔ kè ɓěɛ̀ wiɖi ɓěɔ̀ dyú ɓěɔ̀ kɔ̃ nììn.

¹⁹ “Bounɓoɔ̀ hwòɛ̌-wùɖù mu ɓě kɔ̃ nììn dɛ̀ kɔ̃̀ìn séín ɓě mu dyi zĩ̀ìn nyɛ.

²⁰ “Ɔ jǔ ké ɓě dyi ɖɛ gbà nyu, ké ɓě dyi Bounɓoɔ̀ dyi táà ní, nìí, ɖé ɖɛ séín ɓě mu nyuùn wɛ̃ múɛɛ, Bounɓoɔ̀ hwòɛ̌-wùɖù kè fũ̀à-fṹá ɔ kè fɔ̀nɔ̀-hwòɖǒ-kɔ̃in-cá-cá mu ɓě kɔ̃ nììn tee, ɓɛ́ ɓě ké mú gbɔɔ̀ wàɖà.

²¹ Bounɓoɔ̀ mu ɓě wɛ́-dù kò-kò ɓě kɔ̃ tòùn tee, ké ɓě hwɛ̀ ɓóɖó ɓɛ́ ɓě nìà kɔ̃ muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃in mɛ́ɛ hwɛ̀.

²² Bounɓoɔ̀ mu ɓě saà-saà-wɛ̀ kè sɔ̃́-nì ɔ kè bũ̌-bũ̌-wɛ̀ kɔ̃ tòùn. Ké ɔ muɛ nyuùn ɓɛ́ ɓěɛ̀ ɓáá-ɖɛ̀ ɓěɔ̀ ké kpã, ɓɛ́ waà mí ɓěɔ̀ ké kɔ̃in páɖáìn, ɓɛ́ zùzù ké wa ɖáɓá, ɓɛ́ ɓóɖóɔ̀ ké kɔ̃in dyɛ. Nyɔ-mú-gbɔɔ̀-ɖɛ̀ ɓěɛ̀ mu ɓě bũ̌ dyi gã̀ùn tee, ké ɓě hwɛ̀ mɛ́ɛ.

²³ Ní ɖò se ɖaɓaá mu fɔɔ, ké ɓěɛ̀ ɓóɖóɔ̀ mu kùmùùn kà sɔ́ɔ́ nìà kɛ.

²⁴ Bounɓoɔ̀ mu ní kéɔ́ má kà ɓěɛ̀ ɓóɖóɔ̀ mú ɖaɓaa púu-púu mú zĩ̀ɛ̀n. Ɔ mu dyɔún sɔ̀ùn tee, ké ɓě hwɛ̀ mú gbɔɔ̀.

²⁵ “Bounɓoɔ̀ muɛ nyuùn ɓɛ́ ɓěɛ̀ mú-nyɛ́-nyɔ̀ ɓěɔ̀ ké ɓě toún ɖu. Ɓě mu hwìè dyúáɖò kpaùn, ɓɛ́ ɓě ké wa gbo vɔ̃ɔ́ mu, kɛɛ ɓě mu dyi gbɛ̀ìn, ɓɛ́ ɓě ké wa dyúa gbǔ. Ké ɓě mu nyɔ-fã̀àǔn-po-ɖɛ̀ jǔùn ɓó ɓóɖó-dù séín ɓě nì ɓóɖó-kpàà kɔ̃ɛɛ bìì.

²⁶ Ɓě dyi mɛ́ín, ɓěɛ̀ xwɛ́ ɓěɔ̀ mu naà séín ɓěɔ̀ kè nimii séín ɓěɔ̀ ɖii-ɖɛ̀ jǔùn, ké nyɔ ɖò se nìɛ̌ mu, ɓɛ́ ɔ ké wa ɓěɛ̀ xwɛ́ ɓěɔ̀ ɖei kúmú.

²⁷ Ké Bounɓoɔ̀ muɛ nyuùn ɓɛ́ kpo wáɖáó zɔ̃̌ɔ̀ kà Íjè-nyɔ̀ ɓěɔ̀ múɛɛ ké ɓě mú wáɖá. Kpo mu ɓě dèìn, ké jě kè sámá-wɛ̀ se ɓɔ́ɔ ɓɛ́ìn nyɛɛ mu ɓě kpɔ̃ùn.

²⁸ Ké Bounɓoɔ̀ muɛ nyuùn ɓɛ́ sã̀à ké ɓě nyu, ɓɛ́ ɓě ké dyéɖéín dyi kpè, ɓɛ́ ɓěɛ̀ fɔ̀nɔ̀-hwòɖǒ ké kɔ̃in cá.

²⁹ Ɓě mu dyi ɓɛɛ̀ìn ɓó dyóɖóaún sá-sá kà dyéɖéín-dyi-kpè-nyɔ̀ ɖò ɓɛɛ̀à dyi ɖé tíe-kpò múɛ. Ké ɖɛ séín ɓě mu nyuùn wɛ̃ɛ se mú wóɖóɛ mu. Ké wa mu ɓě dyi pĩ́àùn, ké wa mu ɓě gbo dyíɖíìn kánáá pū, ké nyɔ ɖò se ɓě gbo kpáa mu.

³⁰ “Ɓě mu màa-dyù ɖò ɓéeín kpɔ̃ùn, kɛɛ gàa kà kò ɖò mɔ̀ nyɔ mu ɔ gbǒǔn poùn. Ké ɓě mu gbǒ poùn, kɛɛ ɓě seɛ mú pɛ̃́ɛ mu. Ké ɓě mu géɖéè ɓáùn, kɛɛ ɓě seɛ ɓo ɖiɛ́ mu.

³¹ Ké wa mu ɓěɛ̀ ɓìɖǐ ɓó ɓě mìɔùn dyéɖé waí ɖáɓáìn, kɛɛ ɓě se ɖò tàǎ mu. Ké wa mu ɓěɛ̀ jǎkasì ganaún kpɔ̃̀ìn, ɓɛ́ wa kéɛ kpa, ké wa seɛ ɖe tòɛ̌ mu. Ké ɓěɛ̀ mú-nyɛ́-nyɔ̀ ɓěɔ̀ mu ɓěɛ̀ ɓáɖáá dyí ɖúùn, ké nyɔ ɖò se nìɛ̌ mu, ɓɛ́ ɔ kéɛ wa xwa zà ɓó ɓě bìì.

³² Ɓóɖó-dù ɖò mu ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ gǐì-kũ̀à mú kpaùn, ké ɓě mu hwìǐ gmɔ̀ùn wé séín ɓó wa ɖe dyi jè ɓɛ́ ɓě ké sa, kɛɛ wa se ɖe dyiɛ́ mu. Ké ɓě mu kpéí hwɛ̀ìn, ké ɓě se ɖɛ ɖò nyuɛ ɓɛ́ǐn mu ɓáa dyí.

³³ Nyɔ ɓě ɓɛ́ ɓě se dyí dyuòɛɛ mu ɓáá-ɖɛ̀ ɓě ɓɛ́ ɓě ɓá ɓóɖóɔ̀ múɛɛ ɖiìn, ké wa mu ɓě dyi pĩ́àùn kànàǎ-kà tee.

³⁴ Ké gǎ-ɖɛ̀ ɓě ɓɛ́ ɓě mu dyéɖé kɔ̃ poùn wɛ̃ɛ mu ɓě sã̀à síìn.

³⁵ Bounɓoɔ̀ muɛ nyuùn ɓɛ́ kpo ké ɓěɛ̀ kɔ́-dù ɓěɔ̀ kè ɓěɛ̀ ɓo ɓěɔ̀ mú wáɖá. Ké kpoɔ̀ mu ɓě ɓo xwíɖíi sɔ̀ìn, ɓɛ́ ɔ ké ɓě dú-hwìɛ̀ nyini, ké ɔ se ɓɔ́ɔ mu.

³⁶ “Bounɓoɔ̀ mu ɓě kè ɓěɛ̀ kã́á ɓɛ́ ɓě gãà kɛɛ ɓóɖóɔ̀ kɔ̃ zàùn, ɓɛ́ ɔ ké ɓě ɓóɖó-dù kà kò ɖò ɓɛ́ ɓě kè ɓě ɓǎ nììn ɓǎ ɓěɔ̀ se dyí dyuò kɛɛ kɔ̃ kpa. Ké ɖéɛ̀ ɓě mu gèɖèpɔ́ɔ̀ kà kò ɖò ɓě mɔ̀ cu kè sɔ́ɔ́-kpò kɛɛ ɓièìn.

³⁷ Ké ɓě mu nyɔ-díɖí-tàɓàìn-ɖɛ̀ kè nɔ́ɔ́-dyi-pòìn-ɖɛ̀ ɔ kè dyɔ́-cù jǔùn ɖé ɓóɖó séín ɓě ɓɛ́ Bounɓoɔ̀ muà ɓě kɔ̃ dyi gbɛ̀ìn nyɛɛ nyɔ ɓěɔ̀ gbo.

³⁸ “Ɓě mu ɖɛ ɓáún-ɓáún ɖé ɓěɛ̀ geɖeɔ̀ gbo ɓáùn, kɛɛ ɓě mu ɖé ɖii-ɖɛ̀ tííwè zàùn, sepóɛɖé kpã̌ùn mu ɓěɛ̀ ɓáá-ɖɛ̀ ɓěɔ̀ ɓɛìn.

³⁹ Ké ɓě mu géɖéè ɓáùn, ɓɛ́ ɓě kéɛ xwa nɔ̀mɔ̀ìn, kɛɛ ɓě seɛ wã́ìnɔ̀ ɖò náa mu, mɔɔ ké ɓě seɛ ɓo dya kpã́a mu, sepóɛɖé sɔ̀mɔ̀ɔ̌ muɛ ɖiìn.

⁴⁰ Ké ɔ́ɖè-cù mu ɓěɛ̀ ɓóɖóɔ̀ dà séín mɛìn, kɛɛ ɓě se ɔ́ɖè-cànà ɖò ɓéɖéɛ mu, sepóɛɖé ɔ́ɖè ɓěɔ̀ ɓo mu nɛ́ɛ́ mú sèìn, ɓɛ́ wa ké keè.

⁴¹ Ké ɓě mu gàa-dyù ɓě kè màa-dyù ɓě wóɖóìn, kɛɛ wa seó ɓě gbo nìɛ̌ mu, sepóɛɖé wa mu toɛ̀-kpɔ̃-nyɔ̀ ɓě jǔùn.

⁴² Ké kpã̌ùn-tò mu cu séín kè ɓěɛ̀ ɓáá-ɖɛ̀ séín ɓě nì ɓóɖóɔ̀ múɛɛ ɓɛìn.

⁴³ “Ɖíà ɓě ɓɛ́ wa cĩ́à ɖé ɓě hwìɛ̀ kɛɛ mu dyií ɖúɛń nììn kánáá pū, kɛɛ ɓě mɔ̀ùn mu ɓíɖíi dyiɛń nììn kánáá pū.

⁴⁴ Wa mu ɓě kpaún poùn, kɛɛ ɓě se wa mɔ̀ùn kpaún poɛ ɓɛ́ǐn mu. Wa mu nya nììn, ké ɓě mu ɖe ziìn.

⁴⁵ “Hwòɛ̌-wùɖù séín ɓěɛ̀ mu ɓě kɔ̃ dyiìn. Ɓě mu ɖɛ ɓěɛ̀ dyí dyéɛń dyi gã̀ùn tee, ké ɓě hwɛ̀ mú gbɔɔ̀, sepóɛɖé ɓě se Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖu nyu, ké ɓě se ɔ gma séín ɓě ɓɛ́ ɔ nyíà ɓěɛɛ dyi kpɔ̃.

⁴⁶ Hwòɛ̌-wùɖù ɓěɛ̀ mu ɖàɓàìn-ɖɛ̀ kè díɖí-ɖɛ̀ jǔùn ɓó ɓě kè ɓěɛ̀ xwíníín-dyù ɓěɔ̀ bìì kánáá pū.

⁴⁷ Ɔ jǔ ké ɓě dyi nɔ̀mɔ̀ dyíin mú cĩ́, ké ɓě se ma Bounɓo mɔ̀à ɓěɛ̀ Gèɖèpɔ́ɔ̀ kɛɛ kũ̀à nyu múà-kà kè hwòɖǒ-wáɖáá-kà ní,

⁴⁸ nìí, ɓě mu ɓěɛ̀ mú-nyɛ́-nyɔ̀ ɓě ɓɛ́ Bounɓoɔ̀ muà ɓě kɔ̃ tòùn wɛ̃ɛ kũ̀à nyuùn ɖé mɔ́ nyu-nyu kè ní-ná-tò nyu-nyu kè gbɔ-fɔ̀nɔ̀-fɔ̀nɔ̀ ɔ kè gǎ vɛ̀nɛ̀ dyé-dyé mú. Ɔ mu ɓě nɛɛ̀-kpà-gɛ̀ɛ̀ ɖɔ poùn, ké kǎà ɔ mu nììn tee ɓɛ́ ɓě ké mú gbɔɔ̀ hwɔ hwɛ̀.

⁴⁹ “Bounɓoɔ̀ mu ɖé ɓóɖó-kpàà sèìn-naín ɓóɖó-dù ɖò kɔ̃̀ wuɖu ɓě se dyuò kɛɛ zàùn, ɓɛ́ wa ké ɓě gbo vɔ̃. Wa mu ɓíɖíi dyiìn ɓó ɓě kɔ̃ kà ke ɖò dyià ɓíɖíi ɓó ɖɛ ɖò kpɔ̃ jèɛ.

⁵⁰ Ɔ mɔ̀ ɓóɖó-dù kɔ̃̀ nyɔ ɓě nì fã̀à, ké wa se nyɔ vɛ̀nɛ̀ ɖò kpéín dyé, mɔɔ ɓɛ́ wa se nyɔ gmɔ̀ ɖò wìì kɔ̃ ɓéɖéɛ.

⁵¹ Wa mu ɓěɛ̀ nyúà-ɖɛ̀ ɓěɔ̀ tàùn, ké wa mu ɓěɛ̀ ɓáá-ɖɛ̀ ɓěɔ̀ ɖiìn tee ké ɓě hwɛ̀ mú gbɔɔ̀. Wa se ɓě ɖii-ɖɛ̀ ɖò mɔɔ wã́ìn ɖò mɔɔ ɔ́ɖè-cànà ɖò mɔɔ ɓěɛ̀ ɓìɖǐ ɓěɔ̀ ɖò mɔɔ ɓěɛ̀ ɓáɖáá ɓěɔ̀ ɖò mɔɔ ɓěɛ̀ wiɖi ɓěɔ̀ ɖò ɓó sèɛ̌ mu, ké ɖɛ nìà kɛ muɛ nyuùn ɓɛ́ ɓě ké mú gbɔɔ̀.

⁵² Ké wa mu hwɔɖɔ séín ɓě nì ɓóɖó ɓɛ́ Bounɓoɔ̀ nìà ɓě nyíɛń nyɛ múɛɛ wɔ̃ gbǎìn, ké ɓěɛ̀ gmɔ tɔ̀mɔ̀ dya kui-kui séín ɓɛ́ ɓě dèà hwòɖǒ kɔ̃ɛɛ mu wáɖáùn. Wa mu hwɔɖɔ séín ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyíà ɓěɛɛ wɔ̃ gbǎìn.

⁵³ “Gǎ ɓɛ́ ɓěɛ̀ mú-nyɛ́-nyɔ̀ ɓěɔ̀ muà ɓě dyéìn ɓó hwɔɖɔ ɓěɔ̀ wɔ̃-gbǎìn-tìǐn nyɛɛ muɛ nyuùn ɓɛ́ ɓě ké ɓě mìɔùn nììn xwíníín-zà-dyù ɓě tà. Ɓě mu ɓěɛ̀ dyú-gàà ɓě kè ɓěɛ̀ dyú-màà ɓě ɓɛ́ Bounɓoɔ̀ ɖǎà ɓě nyíɛɛ tàùn.

⁵⁴ Ké gàa ɓɛ́ ɔ nɔ̀mɔ̀ kpéɖéín, ké ɔ mɔ̀ síí-dyù ɖé ɓě hwìɛ̀ kɛɛ mu hwòɖǒ nyìnììn ɖé ɔ mìɔùn nììn ɖíí-gàà kè ɔ gmàà ɓɛ́ ɔ ɖɛ̀ɓɛ̀ múɛ kè ɔ dyú ɓě nì cĩ́ɛń keɛɛ gbo.

⁵⁵ Ɔ ná nì jèɛɛ, ɔ se wa ɔ dyú ɓě ɓɛ́ ɔ nìà tàǔn wɛ̃ɛ ɖò nyíɛ mu, sepóɛɖé wa ɖòùn mɔ̀ ɖii-ɖɛ̀ ɔ ɓéɖéɛ. Ɔ mu ná nììn ɓó gǎ ɓɛ́ ɓěɛ̀ mú-nyɛ́-nyɔ̀ ɓěɔ̀ mu ɓě dyéìn ɓó ɓěɛ̀ hwɔɖɔ séín ɓěɔ̀ wɔ̃-gbǎìn-tìǐn nyɛɛ jè.

⁵⁶ Ké màa ɓɛ́ ɔ nɔ̀mɔ̀ kpéɖéín, ké ɔ mɔ̀ síí-dyù ɖé ɓě hwìɛ̀, ké ɔ séè ɓíɖíi dyi nà ɖòɛɛ mu hwòɖǒ nyìnììn ɖé ɔ dyú-ɓǎ ɓɛ́ ɔ ɖɛ̀ɓɛ̀ múɛ kè ɔ dyú ɓě nì cĩ́ɛń keɛɛ gbo ɖekè.

⁵⁷ Ɔ ná nì jèɛɛ, ɔ se wa ɔ dyú-pɛ̀ɖɛ̀ bèɖě wóɖó ɖieɛ kè ɖɛ sèà dyúɔ̀ ɖeín nyɛɛ ɖò nyíɛ mu, sepóɛɖé ɔ muɛ tàùn ɖé gã gbo. Ɔ mu ná nììn ɓó gǎ ɓɛ́ ɓěɛ̀ mú-nyɛ́-nyɔ̀ ɓěɔ̀ mu ɓě dyéìn ɓó ɓěɛ̀ hwɔɖɔ ɓěɔ̀ wɔ̃-gbǎìn-tìǐn nyɛɛ jè.

⁵⁸ “Ɔ jǔ ké ɓě se wuɖu ɓɛ́ wa céèà nɔ̄ gma-cèè-ɖɛ̀ nìà kɛ múɛɛ dyi kpɔ̃ kóɖó-kóɖó, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ nyɛ́nɛ́ dĩ́ín-dĩ̀ìnɔ̀ kè ɔ nyɛ́nɛ́ gã̌-gã̌ɔ̀ dya dè ní,

⁵⁹ nìí, Bounɓoɔ̀ mu ɓě kè ɓěɛ̀ xwíníín-dyù ɓěɔ̀ wɛ́ nyìnììn dyíin ɓě se ɓɔ́ɔ ɓɛ́ìn nyɛ kè nyɔ-gǎ-dyéìn-ɖɛ̀ ɓě nì fã̀à kɛɛ kɔ̃ tòùn kánáá pū.

⁶⁰ Ɔ mu wɛ́ séín ɓě ɓɛ́ wa kpɔ̃ó zɔ̃̌ɔ̀ kà Íjè-nyɔ̀ ɓěɔ̀, ɓɛ́ ɓě fɛ̃̀ìn zɔ̃̌ɔ̀ kà dyiɛɛ ɓě kɔ̃ dyàùn, ɓɛ́ wa ké ɓě kpɔ̃, ké ɓě se dyi kánáa mu.

⁶¹ Bounɓoɔ̀ mu wɛ́-dù kò-kò séín kè nyɔ-gǎ-dyéìn-ɖɛ̀ kò-kò séín ɓě kɔ̃̀ jè se gma-cèè-ɖɛ̀ nìà kɛ mú céèɛɛ ɓě kɔ̃ tòùn tee, ké ɓě hwɛ̀ mú gbɔɔ̀ hwɛ̀.

⁶² Ɓě mɔ̀ nyɔ ɓě vòǒ zɔ̃̌ɔ̀ dyí kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛɛ nìà kɛɛ se dyí vòɛ̌ mu ɖe, sepóɛɖé ɓě se Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖu nyu.

⁶³ Kà ɔ dèà Bounɓoɔ̀ hwòɖǒ dyi, ɓɛ́ ɔ kéà ɓě mana kɔ̃ po, ɓɛ́ ɔ kéà ɓě dúún zaìn nyɛɛ, kǎà ɔ hwòɖǒ mu dyi dèìn, ɓɛ́ ɔ ké ɓě mú gbɔɔ̀, ɓɛ́ ɔ ké ɓě ɖáɓá. Wa mu ɓě ɓóɖó ɓɛ́ ɓě nìà kɔ̃ muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ dyi zàùn.

⁶⁴ “Bounɓoɔ̀ mu ɓě ɓóɖó-dù séín ɓěɔ̀ kɔ̃ dyi gbɛ̀ìn, sɔ̀ìn ɖé ɓóɖó-kpàà máná ɖò gbo, ɓɛ́ ɔ ké máná ɖò gbo muɛ. Ɖé ɓóɖó ɓěɛ̀ kɔ̃ɛɛ, ɓě mu cu kè sɔ́ɔ́-kpò gèɖèpɔ́ɔ̀ ɓě ɓɛ́ ɓě kè ɓě ɓǎ nììn ɓǎ ɓěɔ̀ séè ɓiè ɖòɛɛ ɓièìn.

⁶⁵ Ké ɖé ɓóɖó ɓěɛ̀ kɔ̃ɛɛ, ɓě se gìɖìǐ ɖò mɔɔ pá ɖò ɓɛ́ ɔ ké ɓěɛ̀ ɓo-síìn-naín jǔɛɛ ɓéɖéɛ mu. Ké Bounɓoɔ̀ mu fã̀à-hwòɖò-dyùà kè wìì-hwòɖò-dyùà ɓě nyíìn, ké ɓěɛ̀ dyéɖé mu hwìǐ sèìn.

⁶⁶ Ɓěɛ̀ fɛ̀ɛ̀ɔ̀ mu nàdǐ mú nììn, ké fã̀à mu ɓě múin dyíìn ɓó máaún kè dyóɖóaún, ké ɓě se dyuò kɛbì ɓě mu cĩ́ìn ɓó gàɖàà ní.

⁶⁷ Ké fã̀à muà ɓě hwòɖǒ bũ̌ dyíìn nyɛ kè ɖɛ gbà ɓě muà ɓě gbo kpáùn wɛ̃ɛ jèɛɛ, ɓě mu kpéɖéìn ɓó zɔ̃ wĩín, ɓɛ́ ɓě ké níiń, ‘Ɔ dyiɔ́ má hwìo jǔǐn.’ Ké ɓě mu kpéɖéìn ɓó hwìo, ɓɛ́ ɓě ké níiń, ‘Ɔ dyiɔ́ má gànà-kṹún jǔǐn.’

⁶⁸ Ké Bounɓoɔ̀ mu ɓě méè ɓě mú dyíìn, ɓɛ́ ɔ ké ɓě Íjè-ɓòɖò kɔ̃̀ kɔ̃ ɓɛ́ ḿ ɖá ɓě mɛ ɓɔ́ ma kà kɔ̃ ɖe muɛ kɛɛ ɖe kpa. Ɖéɛ̀ ɓě mu ɓě mìɔùn ɓěɛ̀ mú-nyɛ́-nyɔ̀ ɓěɔ̀ gbo pèɖèɛ̀n mɔ́ùn, ɓɛ́ ɓě ké waà gǐì ɓě jǔ, kɛɛ wa se ɓě dɔ̃ɔ́ mu.”