Dìtɔ̀wáɖánámɛ̀ 23 - Ɓǎsɔ́ɔ̀ Báɓòɔ̀

Nyɔ ɓě ké se Bounɓoɔ̀ nyɔ ɓěɔ̀ hwìɛ̀ nìɛ

¹ “Gàa ɓɛ́ ɔ se gàa dyììn ɖé ɔ gɔ̌-kpàɖà gànáɔ̀ dyi-wɛ̀ìn-wɛ̀ìn mɔɔ ɖé zà-zà múɛɛ mɛ ɓɔ́ ɖé dɛ̀ ɓě ɓièìn kà Bounɓoɔ̀ kɛɛ dyáa.

² “Ké gmaɖe-dyù mɔɔ ɔ nììn xwíníín-dyù ɓě mɛ ɓɔ́ ɖé dɛ̀ ɓě ɓièìn kà Bounɓoɔ̀ kɛɛ dyáa, hwɛ̀ ḿ po níiń, ɓɛ́ ɔ ké waà xwéɖé-dù deìn dúún ɓaɖa-bùè dyɛ̀ìn nyɛ.

³ “Ké Ámànà-nyɔ̀ ɖò mɔɔ Móà-nyɔ̀ ɖò mɔɔ waà xwíníín-dyù ɓěɔ̀ mɛ ɓɔ́ ɖé dɛ̀ ɓě ɓièìn kà Bounɓoɔ̀ kɛɛ dyáa, hwɛ̀ ḿ po níiń, ɓɛ́ ɔ ké waà xwéɖé-dù deìn dúún ɓaɖa-bùè dyɛ̀ìn nyɛ.

⁴ Sepóɛɖé wa nɔ́ɔ̀ ma ɓɛ́ wa ké ma ɓě ɖii-ɖɛ̀ kè ní nyí, ti ɓě nì ma ɖé Íjè-ɓòɖòɔ̀ kɔ̃ sɔ̀ǔn wɛ̃, ké wa pɛ́ɛ̀ ma Bɛ́òɛ̀ dyú-gàà Béɖàùn ɓɛ́ ɔ sɔ̀à ɖé Pɛ́fɔ̀-hwɔ̀ɖɔ̀ nìà ɖé Mɛ̀sɔ̀pɔ̀témìà-ɓòɖòɔ̀ kɔ̃ɛɛ múɛ, ɓɛ́ ɔ ké ma ɓě gboò.

⁵ Kɛɛ wɛ̃́ɛ́ kɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ se ma Béɖàùnɛ̀ wuɖuɔ̀ ɖùǔ gbo tò. Ɔ zɛ̃̀ìn ma gboò-wùɖùɔ̀ mana-kɔ̃-po-po mú ɓó ɓě bìì, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖɛ̀ɓɛ̀ ɓě mú jè.

⁶ Kà ɓě mu cĩ́ìn nyɛɛ, ɓěǐn ɖá ɓɛ́ ɓě ké wa gbo kpá ɓó waà gìɖìǐ ɓéɖé jè, mɔɔ ɓó waà sɔ̃ún zaìn jè.

⁷ “Kɛɛ ɓěǐn ɖá ɓɛ́ ɓě ké Íɖɔ̀ùn-nyɔ̀ ɖò mú nyɛ́, sepóɛɖé wa mɔ̀ ɓěɛ̀ ɖíí ɓě. Ké ɓěǐn ɖá ɓɛ́ ɓě ké Íjè-nyɔ̀ ɖò mú nyɛ́, sepóɛɖé ɓě cĩ́ó zɔ̃̌ɔ̀ ɖé waà ɓóɖóɔ̀ kɔ̃.

⁸ Sɔ̀ìn ɓó waà xwíníín-dyù ɓěɔ̀ xwéɖé-dù deìn dúún tã nììnɔ̀ gboɛɛ, wa ɓɛ́ìn ɖé dɛ̀ ɓě ɓièìn kà Bounɓoɔ̀ kɛɛ dyáa.

Kà sójà ɓěɔ̀ jàɖàìn-hwɔ̀ɖɔ̀ɔ̀ ké mú hwɛ̀ɛ̀ nyuɛ

⁹ “Ɓě dyi ɓěɛ̀ mú-nyɛ́-nyɔ̀ ɓěɔ̀ gbo vɔ̃ɔ́ mu, ké ɓě dyi ɖé ɓěɛ̀ jàɖàìn-hwɔ̀ɖɔ̀ɔ̀ mú nìǐn, nìí, ɓě mɛ po ɖɛ séín se mú hwɛ̀ɛ wáká sɔ̀ìn ɓó ɓě bũ̌.

¹⁰ Ɔ jǔ ké gàa ɖò se mú hwɛ̀, sepóɛɖé ɔ dya nyíɔún-pòǐn jè ní, nìí, ɔ mɛ sɔ̀ ɖé jàɖàìn-hwɔ̀ɖɔ̀ɔ̀ mú.

¹¹ Kɛɛ ɔ dyiá hwìo jǔɛń nìǐn, ɔ mɛ dèɖè ɔ mìɔùn, ké dyóɖó dyi dyi kpá nyɛ̀nɛ̀ɛ̀ ní, nìí, ɔ mɛ dyi ɖé jàɖàìn-hwɔ̀ɖɔ̀ɔ̀ mú ɖe.

¹² “Ɓě mɛ gã pá ɖò ɖé jàɖàìn-hwɔ̀ɖɔ̀ɔ̀ ɖeín, ɓɛ́ ɔ ké ɓěɛ̀ hwìè-xwíníín-mùìn-naín jǔ.

¹³ Ké ɓóɖóún-ɓúɖúìn-cù mɛ nì ɓěɛ̀ toún-vɔ̃̀ìn-ɖɛ̀ ɓěɔ̀ hwìɛ̀, ɓɛ́ ti ɓě mu hwìè xwíníín muùn wɛ̃ɛ, ɓɛ́ ɓě kéɛ ɓúɖúìn, ɓɛ́ ɓě ɖǎ hwìè xwíníín muɛ hwɔ ní, ɓě kéɛ ɓóɖó kɔ̃in wáɖá.

¹⁴ Ɓěɛ̀ jàɖàìn-hwɔ̀ɖɔ̀ɔ̀ mɛ hwɛ̀ mú, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɖé ɓěɛ̀ jàɖàìn-hwɔ̀ɖɔ̀ɔ̀ mú, ɓɛ́ ɔ ké ɓě dyí gmɔ̀, ɔ kè ɓɛ́ ɔ ké ɓěɛ̀ mú-nyɛ́-nyɔ̀ ɓěɔ̀ ɓě xwaún dyi po. Ɓě mɛ ɓɔ́ dɛ̃-ɖɛ̀ ɖò nyuɛ, ɓɛ́ ɔ ní kɔ̃̀ɔ̀ ɖà nyuín, Bounɓoɔ̀ ní kɔ̃̀ ɖà ɓě kɔ̃ín pòìn.

Gma-dù kò-kò ɓě

¹⁵ “Ɔ jǔ ké gǐì ɖò dyi ɔ gǐì-ɓǎɔ̀ xwaún xwáɖáún kpá sɔ̀ìn ɖé ɓóɖó kà kò ɖò kɔ̃, ké ɔ dyi ɖé ɓě gbo pèɖèìn ní, nìí, ɓě mɛ ɓɔ́ ɔ ɖé ɔ kɔ̃̀-nyɔ̀ɔ̀ gbo ɖe ɖoɓoɛ.

¹⁶ Ɔ mɛ cĩ́ ɖé ɓěɛ̀ hwɔɖɔ ɓěɔ̀ nyɔ ɔ mu gãùn wɛ̃ɛ mú, ké ɓě mɛ ɓɔ́ ɔ kànàǎ-kà kpɔ̃ɔ.

¹⁷ “Éézùɖùɛ̀-màà ɖò mɔɔ Éézùɖùɛ̀-gàà ɖò ní ɖá ɓɛ́ ɔ ké ɔ mìɔùn nyɔ ɓɛ́ gbàɖàùn-po-po mɔ̀ ɔ kũùn-kpò-gèɖèpɔ́ɔ̀ ɓiè-ɓièɛɛ mú nyu.

¹⁸ Ɓě mɛ ɓɔ́ wíɖí ɓɛ́ gbàɖàùn-màà mɔɔ gbàɖàùn-gàà ɖò dyé ɖé ɔ gbàɖàùn-po-poɔ̀ kɔ̃ún wɛ̃ɛ ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǒɔ̀ mú dyàà, ɓɛ́ ɓě kéɛ ɖɛ ɓě kɔ̃̀ wuɖu ɓě ɖià ɓó Bounɓoɔ̀ dyúa kɛɛ mú nyùìn, sepóɛɖé nyɔ ɓě nìà kɛ jè nyàìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi.

¹⁹ “Ɓě dyi ɓě mǔè Éézùɖùɛ̀-nyɔ̀ ɖò wíɖí mɔɔ ɖii-ɖɛ̀ mɔɔ ɖɛ kã̀ìn séín ɖò kpaún pòìn ní, nìí, ɓě mɛ ɓɔ́ɔ kpáná ɖò kɔ̃in poɛ.

²⁰ Ɓě dyiɛ ɖíà ɖò kpaún poín, nìí, ɓě ɓɛ́ìn kpáná kɔ̃in poɛ. Kɛɛ ɓě ní po ɓě mǔè Éézùɖùɛ̀-nyɔ̀ ɖòɛ̀ kpaɔ̀ kpáná ɖò kɔ̃in, ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ké ɓěɛ̀ nyuu-ɖɛ̀ séín ɓěɔ̀ mana kɔ̃ po ɖé ɓóɖó ɓɛ́ ɓě nìà mú muɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃.

²¹ “Ɔ jǔ ké ɓě dyi ɖɛ ɖòɛ̀ wuɖu ɖi ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa ní, nìí, ɓě mɛ nyuɛ wàɖà, sepóɛɖé Bounɓoɔ̀ mu ɓě ɖɛɔ̀ xwai mɔ́ùn, ké zaa mu ɓě kpɔ̃ùn ɓóɛ jè.

²² Kɛɛ ɔ jǔ ké ɓě dyi ɓě mìɔùn dyí kpɔ̃, ké ɓě se ɖɛ ɖòɛ̀ wuɖu ɖi ɓó Bounɓoɔ̀ dyúa ní, nìí, zaa se ɓě kpɔ̃ɔ́ mu ɓóɛ jè.

²³ Ɖɛ séín ɓěɛ̀ wɔ̃ mu cɛ̃ìn nyɛɛ, ɓě mɛ nyuɛ, sepóɛɖé ɓě ɖǎ ɖɛɔ̀ wuɖu ɖi ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa ɖé hwòɖǒ wáɖáá mú.

²⁴ “Ɔ jǔ ké ɓě dyi ɓě mǔè ɖòɛ̀ géɖéè-gbǎ mú zĩ̀ìn ní, nìí, ɓě ɓɛ́ìn géɖéè jĩ̀ kà ɓěɛ̀ hwòɖǒ mɔ́ ɖiɛ dyiɛɛ ɖiɛ, kɛɛ ɓě mɛ ɓɔ́ ɖò ɖé ɓěɛ̀ tìěɔ̀ mú poɛ.

²⁵ Ɔ jǔ ké ɓě dyi ɓě mǔè ɖòɛ̀ geɖe gbo zĩ̀ìn ní, nìí, ɓě ɓɛ́ìn ɖii-ɖɛ̀ jĩ̀ kà ɓɛ́ ɓěɛ̀ sɔ̃ ɓɛ́ìn kpã́a kɛɛ ɖiɛ, kɛɛ ɓě mɛ ɓɔ́ ɔ ɓáá-ɖɛ̀ɔ̀ ɖò ɖǎ-dyù cɛ̃̀ìn.