Dìtɔ̀wáɖánámɛ̀ 22 - Ɓǎsɔ́ɔ̀ Báɓòɔ̀

¹ “Ɔ jǔ ké nyɔ ɖò dyi ɔ mǔè Éézùɖùɛ̀-nyɔ̀ ɖòɛ̀ ɓìɖǐ mɔɔ ɔ ɓáɖáá ɓɛ́ ɔ sí xwáɖá xwíɖíi dyiɛɛ dyé ní, nìí, ɔ mɛ ɓɔ́ ɔ dyíin ziɛ. Ɔ mɛ kpɔ̃ nyúà-ɖɛ̀ɔ̀, ɓɛ́ ɔ kéɛ ɔ kɔ̃̀-nyɔ̀ gbo kpa.

² Kɛɛ ɔ jǔ ké nyúà-ɖɛ̀ɔ̀ kɔ̃̀-nyɔ̀ se ɔ bũ̌in xwɛ̃́ìn, mɔɔ ké ɔ se nyɔɔ̀ dyí dyuò ní, nìí, ɔ mɛ kpa nyúà-ɖɛ̀ɔ̀ ɖé ɔ ɓíɖí-taún, ɓɛ́ nyúà-ɖɛ̀ɔ̀ ké ɖé nì tee, ɓɛ́ nyúà-ɖɛ̀ɔ̀ kɔ̃̀-nyɔ̀ ké ɔ dyi mɔ́ hwɛ̀ ɓɛ́ ɔ ké ɔ nyúà-ɖɛ̀ɔ̀ ɖe nyí.

³ Ké ɓě mɛ nyu ɖɛ dyúáɖò nìà kɛ ɓó ɓě mǔè ɖòɛ̀ jǎkasì mɔɔ ɔ ɖɔ mɔɔ ɖɛ tɔ̀ɔ̀ séín ɓɛ́ ɔ sè xwáɖáún wɛ̃ɛ jè ɖekè. Ɓěǐn ɖá ɓɛ́ ɓě kéɛ dyíin zi.

⁴ “Ɔ jǔ ké nyɔ ɖò dyi ɔ mǔè ɖòɛ̀ jǎkasì mɔɔ ɔ ɓìɖǐ dyé, ké ɔ dyi ɓuɖu ɓó hwìè gbà ní, nìí, ɔ mɛ ɓɔ́ ɔ dyíin ziɛ. Ɔ mɛ kpá ɔ mǔèɔ̀ gbo, ɓɛ́ wa ké ɔ nyúà-ɖɛ̀ɔ̀ dyí sɔ̀ìn.

⁵ “Màa ɖò mɛ ɓɔ́ gàa-ɖɔ̀ mú poɛ, mɔɔ ké gàa ɖò mɛ ɓɔ́ màa-ɖɔ̀ mú poɛ, sepóɛɖé nyɔ ɓɛ́ ɔ nyuɛ náa kɛɛ jè nyàìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi.

⁶ “Ɔ jǔ ké ɓě dyi naà téɖé ɖò dyé ɖé cu dya mɔɔ ɓó ɓíɖíi, ké naà kɔ̃̀à téɖéɔ̀ kɛɛ dyi ɔ gɛ̃ɔ̀ mɔɔ dyú bèɖěɔ̀ kɔ̃ jìɖìǐn, nìí, ɓě mɛ ɓɔ́ naà-ɖɛ̌ɔ̀ ɓó zàà.

⁷ Ɓě ɓɛ́ìn naàɔ̀ dyú mɔɔ gɛ̃ xwíɖíi zàà, kɛɛ ɓě mɛ táà naà-ɖɛ̌ɔ̀ dyi, ɓɛ́ ɔ ké mu. Ɓě dyiɛ náa nyu ní, nìí, mana mu ɓě kɔ̃ nììn, ké ɓě mu hwèɖèìn-fɛ̀ɛ̀ ɓéɖéìn.

⁸ “Ɓě dyi gbǒ ɖìè poín, ɓě mɛ dè gbǒɔ̀ dúún ɓɔ wĩin, ɓɛ́ ɓě ké se kú-ɖáɓá-zàà dyé, ɔ jǔ ké nyɔ ɖò dyi ɖé gbǒɔ̀ dúún ɓuɖu ní.

⁹ “Ɓě mɛ ɓɔ́ ɓáá-ɖɛ̀ kà kò ɖò ɖé ɓěɛ̀ géɖéè-gbǎɔ̀ mú ɓáa. Ɔ dyi ná nìǐn, ɖɛ ɓě ɓáà kɛɛ ɓo kè ɓo géɖéèɔ̀ tòɖòà kɛɛ mu se-mú-hwɛ̀-ɖɛ̀ jǔùn.

¹⁰ “Ɓě mɛ ɓɔ́ ɓìɖǐ kè jǎkasì gɛ̀ɛ̀ dyúáɖòɔ̀ ɖɔ peɖeɛ̀n, ɓɛ́ wa ké geɖe gbo ɓóɖó dya po.

¹¹ “Ɓě mɛ ɓɔ́ ɖɔ-cù dyúáɖò ɓɛ́ wa ɖàɓàìn ɓáɖáá-mì kè ɖénì kɛɛ mú poɛ.

¹² “Ɓě mɛ ɓá kpo ɓéɖé bù-bù ɓěɛɛ ɖé ɓěɛ̀ mú-po-ɖɔ̀ ɓěɔ̀ gã hĩinyɛ ɓěɔ̀ kɔ̃ dyi.

Bùǐ-gmà wáɖá-wáɖá

¹³ “Ɔ jǔ ké gàa ɖò dyi màa-dyù ɖò dyi kpɔ̃, ké wa ɖǎ ti wè nyu, ké gàaɔ̀ hwòɖǒ dyiɛ gbɔ po kà ɓɛ́ ɔ se màa-dyùɔ̀ mɔ́ ɖeɛ,

¹⁴ ké ɔ dyi màa-dyùɔ̀ ɖɛ gbà kɔ̃ún cɛ̃, ké ɔ dyi ɔ nyɛ́nɛ́ dyíin nyìnììn, ké ɔ dyi níiń, ‘Ḿ kpɔ̃ ma màa nìà kɛ dyi, ɓɛ́ ɔ ké ma ní gmàà jǔ, kɛɛ ti à nì ma ɓó daa, ḿ seɛ dyé ɓɛ́ ɔ ké màa séè toɖo kɔ̃ jè dyuò keɛɛ jǔ.’

¹⁵ “Ɔ dyi ná nìǐn, màa-dyùɔ̀ ɖe kè ɔ ɓǎ mɛ dyàà dyí-tɛ̀mɛ̀ìn-ɖɛ̀ kà waà dyú-mààɔ̀ se ma toɖo kɔ̃ jè dyuò kɛɛ ɓó hwɔɖɔɔ̀ nyɔ vɛ̀nɛ̀ ɓěɔ̀ dyúa, ɖé hwɔɖɔɔ̀ gmɔ-wɔ̃̀ɔ̀ gbo.

¹⁶ Ké màa-dyùɔ̀ ɓǎ mɛ cɛ̃ɛ hwɔɖɔɔ̀ nyɔ vɛ̀nɛ̀ ɓěɔ̀ gbo, ɓɛ́ ɔ ké níiń, ‘Ḿ nyí ma ní dyú-màà gàa nìà kɛ, ɓɛ́ ɔ ké ɔ gmàà jǔ, kɛɛ ɔ se ní dyú-mààɔ̀ mɔ́ ɖe.

¹⁷ Dyéɛ, ɓó kàǔn wɛ̃ɛ, ɔ ɖǎ ɔ ɖɛ gbà kɔ̃ún cɛ̃, ké ɔ cɛ̃ɛ ḿ gbo, ké ɔ ɖá, “Ḿ seɛ dyé ɓɛ́ nì dyú-mààɔ̀ ké màa séè toɖo kɔ̃ jè dyuò keɛɛ jǔ.” Kɛɛ kà ɖɛ ɓɛ́ìn ɓě dyí tɛ̀mɛ̀ìn kà ní dyú-mààɔ̀ mɔ̀ ma màa se toɖo kɔ̃ jè dyuò kɛɛ nìɛ.’ Ɔ ɖǎ ná nìǐn, màa-dyùɔ̀ wóɖóìn-nyɔ̀ ɓěɔ̀ mɛ pɛ́ɛ̀ ɖɔ ɓɛ́ waà dyú-mààɔ̀ kè gàaɔ̀ pɛ̃́à kɔ̃ kĩ́ín nyɛɛ kɔ̃in ɓó nyɔ vɛ̀nɛ̀ ɓěɔ̀ dyúa.

¹⁸ Ké nyɔ vɛ̀nɛ̀ ɓěɔ̀ mɛ ɖú gàaɔ̀ dyí, ɓɛ́ wa ké ɔ kpeɖe zà.

¹⁹ Ké gàaɔ̀ mɛ pɛ́ɛ̀ séɓàɖà-cɛ̀kò hɔ̃dɛ̀ɖɛ̀ dyúáɖò, ké wa mɛ nyíɛ màa-dyùɔ̀ ɓǎɔ̀, sepóɛɖé gàa nìà kɛ ɖǎ Éézùɖùɛ̀-màà ɓɛ́ ɔ se toɖo kɔ̃ jè dyuò kɛɛ nyɛ́nɛ́ dyíin nyìnììn. Kɛɛ wɛ̃́ɛ́ kɛɛ, màa-dyùɔ̀ mɛ mɔ̀ ɔ gmàà ke kánáá pū. Gàaɔ̀ mɛ ɓɔ́ màaɔ̀ ɓɔ́ɔ ɖé ɔ fɛ̀ɛ̀-wè séín mú.

²⁰ “Kɛɛ ɔ jǔ ké ɖɛ gàaɔ̀ cɛ̃à kɛɛ dyi jǎà jǔ, ké ɖɛ ɖò se nì ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ ɔ mɔ̀ màa séè ma toɖo kɔ̃ jè dyuò keɛɛ ní,

²¹ nìí, wa mɛ dyà màa-dyùɔ̀ ɓó ɔ ɓǎà gbǒɔ̀ wɔ̃ɔ̀ gbo, ɓɛ́ gàa ɓě nìà ɖé hwɔɖɔɔ̀ múɛɛ ké ɔ sɔ́ɔ́-kpò dyi taɓaìn, ɓɛ́ ɔ ké mɛ́, sepóɛɖé ɔ ɖǎ dɛ̃-ɖɛ̀ nyu ɖé Éézùɖùɛ̀-nyɔ̀ ɓěɔ̀ hwìɛ̀, dyììn ɖé ɔ ɓǎ ɓíɖí-gbǒǔn gbàɖàùn-pòìn-pòìn mú. Kǎà ɓě mɛ zà ɖɛ gbàɔ̀ ɖé ɓě hwìɛ̀.

²² “Ɔ jǔ ké ɓě dyi gàa ɖò ɔ mǔè-gàà ɖòɛ̀ gmàà gbo pɛ̃́ɛ dyé ní, nìí, gàa pɛ̃́à màaɔ̀ gboɛ kè màaɔ̀ mɛ mɛ́. Kǎà ɓě mɛ zà ɖɛ gbàɔ̀ ɖé Éézùɖùɛ̀-nyɔ̀ ɓěɔ̀ hwìɛ̀.

²³ “Ɔ jǔ ké gàa ɖò dyi màa ɓɛ́ ɔ séè toɖo kɔ̃ jè dyuò, ɓɛ́ gàa ɖò kpɔ̃ ɓéeín nyɛɛ hwɔɖɔ ɖò mú dyé, ké ɔ dyi ɔ gbo pɛ̃́ ní,

²⁴ nìí, ɓě mɛ kpa wa sɔ̃́ɔ̀ ɖé hwɔɖɔɔ̀ gmɔ-wɔ̃̀ɔ̀ gbo, ɓɛ́ ɓě ké wa sɔ́ɔ́-kpò dyi taɓaìn, ɓɛ́ wa ké mɛ́. Ɓě mɛ taɓaìn màa-dyùɔ̀ sɔ́ɔ́-kpò dyi, sepóɛɖé ɔ nì hwɔɖɔún, ké ɔ se ɖá. Ké ɓě mɛ taɓaìn gàaɔ̀ sɔ́ɔ́-kpò dyi, sepóɛɖé ɔ ɖǎ ɔ mǔè-gàà ɖòɛ̀ gmàà ganaún kpɔ̃̀ìn. Kǎà ɓě mɛ zà ɖɛ gbàɔ̀ ɖé ɓě hwìɛ̀.

²⁵ “Kɛɛ ɔ jǔ ké ɔ dyi xwáɖá xwíɖíi jǔ, ké gàa ɖò dyi màa-dyù ɓɛ́ gàa ɖò kpɔ̃ ɓéeín nyɛɛ ganaún kpɔ̃̀ìn, ké ɔ dyi ɔ gbo pɛ̃́ ní, nìí, gàa nyuà ná ɖɛɔ̀ kɛɛ ɖòùn mɛ mɛ́.

²⁶ Kɛɛ ɓě mɛ ɓɔ́ màa-dyùɔ̀ ɖɛ ɖò bũ̌ nyuɛ. Ɔ se nàmàǔn ɓɛ́ ɔ ɓɛ́ìn ɔ gĩɔ kpaa kɛɛ nyu. Ɖɛ kpáà kɛɛ hwɔìn-ɖɛ̀ mɔ̀, ɓɛ́ gàa ɖò ké ɔ mǔè ɖò gbààǔn po, ɓɛ́ ɔ ké ɔ ɖáɓá kɛ.

²⁷ Sepóɛɖé gàaɔ̀ kpɔ̃̀ìn màaɔ̀ ganaún ɖé xwáɖá xwíɖíi, ké ɔ pɛ̃́ ɔ gbo. Màa-dyùɔ̀ ɖá ma dyɛo, kɛɛ nyɔ ɖò se ma ɖé xwáɖáɔ̀ xwíɖíi nì, ɓɛ́ ɔ ké ma ɔ gbo kpá.

²⁸ “Ɔ jǔ ké gàa ɖò dyi màa ɓɛ́ ɔ se toɖo kɔ̃ jè dyuò, ɓɛ́ gàa ɖò séè ɓéeín kpɔ̃ɛɛ dyé, ké ɔ dyi ɔ ganaún kpɔ̃̀ìn, ké ɔ dyi ɔ gbo pɛ̃́, ké ɓě dyi wa dyé ní,

²⁹ nìí, ɔ mɛ nyí màa-dyùɔ̀ ɓǎ séɓàɖà-cɛ̀kò kpáɖá-nyɔ sɔ̃́ ɓaɖa-bùè, ké ɔ mɛ kpɔ̃ màa-dyùɔ̀ dyi, sepóɛɖé ɔ ɖǎ ɔ ganaún kpɔ̃̀ìn. Ké ɔ mɛ ɓɔ́ màaɔ̀ ɓɔ́ɔ ɖé ɔ fɛ̀ɛ̀-wè séín mú.

³⁰ “Gàa ɖò mɛ ɓɔ́ ɔ ɓǎà gmàà gbo pɛ̃́ɛ, sepóɛɖé ɔ mɔ̀ ɔ ɓǎ zùǔn-zàìn-zàìn.