Dìtɔ̀wáɖánámɛ̀ 20 - Ɓǎsɔ́ɔ̀ Báɓòɔ̀

Gma ɓě ɓá to vɔ̃ jè dyíɛ

¹ “Ɓě dyi ɓěɛ̀ mú-nyɛ́-nyɔ̀ ɓěɔ̀ to kpa, ké ɓě dyi sǒ ɓě kè hwíì-sǒ ɓě ɔ kè sójà ɓě ɓɛ́ wa vò dyí ké wa zi ɓě dyíɛɛ dyé ní, nìí, ɓě mɛ ɓɔ́ wa fɛ̃̀ìn, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ mɔ̀ nyɔ zàà ɓě ɖé Íjè-ɓòɖòɔ̀ kɔ̃ɛɛ muó ɓě gbo nììn.

² Ti ɓě mu to gbo muɛń nììn nyɛɛ, sáa-zà-nyɔ̀ ɓěɔ̀ ɖò mɛ dyi, ɓɛ́ ɔ ké sójà ɓěɔ̀ gbo wùɖù.

³ Ɔ mɛ cɛ̃ɛ, ɓɛ́ ɔ ké níiń, ‘Éézùɖùɛ̀-gàà ɓěo, ɓě tò ḿ gbo ɖùǔo. Ɓó zɛ̃̌ɛ̀ kɛɛ, ɓě nì ɓěɛ̀ mú-nyɛ́-nyɔ̀ ɓěɔ̀ gbo vɔ̃uń muɛń. Ɓěɛ̀ hwòɖǒ mɛ ɓɔ́ kpéí hwɛ̀ɛ̀, mɔɔ ké ɓě mɛ ɓɔ́ ɓěɛ̀ mú-nyɛ́-nyɔ̀ ɓěɔ̀ fɛ̃̀ìn, mɔɔ ké ɓěɛ̀ hwòɖǒ ní ɓaɖa,

⁴ sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ muó ɓě gbo nììn, ɓɛ́ ɔ ké ɓěɛ̀ mú-nyɛ́-nyɔ̀ ɓěɔ̀ gbo vɔ̃ ɓó ɓě bìì, ɓɛ́ ɔ ké ɓě to-ɖu-ɖu nyí.’

⁵ “Ɔ ɖǎ ná nìǐn, sójà-nàìn-nyɔ̀ vɛ̀nɛ̀ ɓěɔ̀ mɛ diè sójà ɓěɔ̀ dyi, ɓɛ́ wa ké níiń, ‘Gàaɔ̀ nyɛ́ nì dà ɓɛ́ ɔ po gbǒ ɖie, ké ɔ séè ɔ gbǒɔ̀ mú pɛ̃́ keɛ́? Ɔ dyi ná nìǐn, nyɔɔ̀ mɛ kɔ́ìn ɖé ɔ gbǒɔ̀ gbo ɖe, ɓɛ́ ɔ ní kɔ̃̀ ɖà toɔ̀ sè ní, nìí, nyɔ kà kò ɖò ní kɔ̃̀ ɖà ɔ gbǒɔ̀ ɖie zà.

⁶ Ké nyɛ́ nì dà ɓɛ́ ɔ ɓá géɖéè-gbǎ, ké ɔ séèɛ̀ ɓo ɖi keɛ́? Ɔ dyi ná nìǐn, nyɔɔ̀ mɛ mu ɔ ɓíɖí-taún ɖe, ɓɛ́ ɔ ní kɔ̃̀ ɖà toɔ̀ sè ní, nìí, nyɔ kà kò ɖò ní kɔ̃̀ ɖà ɔ géɖéèɔ̀ ɓo kĩ́ín-kĩ́ínɔ̀ ɖi.

⁷ Ké gàaɔ̀ nyɛ́ nì dà ɓɛ́ ɔ kpɔ̃ màa ɖò ɓéeín, ké wa séè dyi kpɔ̃ìn keɛ́? Ɔ dyi ná nìǐn, nyɔɔ̀ mɛ mu ɔ ɓíɖí-taún ɖe, ɓɛ́ ɔ ní kɔ̃̀ ɖà toɔ̀ sè ní, nìí, gàa kà kò ɖò ní kɔ̃̀ ɖà màaɔ̀ dyi kpɔ̃.’

⁸ “Ɔ ɖǎ ná nìǐn, sójà-nàìn-nyɔ̀ vɛ̀nɛ̀ ɓěɔ̀ mɛ diè ɖɛi ɖe, ɓɛ́ wa ké níiń, ‘Gàa ɖò nì dà ké ɔ fɛ̃̀ìn ké ɔ hwòɖǒ hwɛ̀ kpéíì? Ɔ dyi ná nìǐn, nyɔɔ̀ mɛ mu ɔ ɓíɖí-taún ɖe, ɓɛ́ ɔ ní kɔ̃̀ ɖà nyu ɓɛ́ hwòɖǒ ní kɔ̃̀ ɖà ɔ ɖíí-gàà ɓěɔ̀ xwíníín sɔ̀.’

⁹ Ké ti ɓɛ́ sójà-nàìn-nyɔ̀ vɛ̀nɛ̀ ɓěɔ̀ ɖǎ sójà ɓěɔ̀ gbo wùɖùɛ̀ hwɔɛɛ ní, nìí, wa mɛ po sójà ɓěɔ̀ nàìn-nyɔ̀ ɓě kɔ̃in.

¹⁰ “Ti ɓě mu ɓóɖó-dù kà kò ɖòɛ̀ hwɔɖɔ ɖò to kɔ̃ kpaùn wɛ̃ɛ, ɓě mɛ nyí ɔ nyɔ ɓěɔ̀ ti, ɓɛ́ wa ké wa mìɔùn xwáɖáún zà ɖé ɓě gbo.

¹¹ Ɔ jǔ ké hwɔɖɔɔ̀ nyɔ ɓěɔ̀ dyi wɔ̃́, ké wa dyi waà hwɔɖɔɔ̀ gmɔ-wɔ̃̀ ɓěɔ̀ kaà, ké wa dyi wa mìɔùn xwáɖáún zà ní, nìí, nyɔ séín ɓě mu ɖé hwɔɖɔɔ̀ mú nììn nyɛɛ mɛ mɔ̀ ɓěɛ̀ gbo-nì-nyɔ̀, ɓɛ́ wa ké ɓěɛ̀ pɔ́ɖɔ́sɔ́ jǔ.

¹² Kɛɛ ɔ jǔ ké nyɔ ɓě nì hwɔɖɔɔ̀ múɛɛ se wa mìɔùn xwáɖáún zà jèɔ̀ gbo wɔ̃́ìn, ké wa dyi ɓě gbo vɔ̃ín, nìí, ɓě mɛ gbǎìn hwɔɖɔɔ̀ wɔ̃.

¹³ Ké Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi hwɔɖɔɔ̀ ɓě xwaún dyi poín, nìí, ɓě mɛ ɖáɓá gàa séín nì ɖé hwɔɖɔɔ̀ múɛɛ gàsíà dyí.

¹⁴ Kɛɛ ɔ dyi màa ɓě kè dyú ɓě kè nyúà-ɖɛ̀ ɓě ɔ kè ɖɛ séín ɓě nìà ɖé hwɔɖɔɔ̀ múɛɛ jè jǔǐn, ɓě mɛ ɖú wa dyí. Wa mɔ̀ ɓěɛ̀ to-gbo-zà-ɖɛ̀ ɓě. Ɓě mɛ nyu wa kà ɓěɛ̀ hwòɖǒ mɔ́ wa nyuɛ dyiɛ, sepóɛɖé wa mɔ̀ ɓěɛ̀ mú-nyɛ́-nyɔ̀ ɓěɔ̀ kɔ̃̀ɔ̀-ɖɛ̀ ɓě, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎà ɓě nyíɛ̀.

¹⁵ Kǎà ɓě mɛ nyu hwɔɖɔ ɓě ɓɛ́ wa nìě nya, ɓɛ́ wa se ɓóɖó ɓě cĩ́à kɔ̃ɛɛ bũ̌in xwɛ̃́ìn nyɛ.

¹⁶ “Kɛɛ ɓě dyi ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ hwɔɖɔ ɓěɔ̀ zà ní, nìí, ɓě mɛ ɖáɓá nyɔǔn séín kè ɖɛ séín ɓéɖé fɛ̀ɛ̀ ɖé wa múɛɛ nyɛ̀nɛ̀ɛ̀.

¹⁷ Ɓě mɛ ɖáɓá Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ nyɛ̀nɛ̀ɛ̀ kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyuà ɓě gbo cɛ̃ɛ kɛ.

¹⁸ Ɔ se ná nìǐn, wa muɛ nyuùn ɓɛ́ ɓě ké ɖɛ séín ɓě nyàìn Bounɓoɔ̀ dyi, ɓɛ́ wa nyuà ɖé waà gèɖèpɔ́ɔ̀ ɓěɔ̀ ɓiè-ɓièɔ̀ múɛɛ kíɖíí sí, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ nàmàǔn bũ̌ nyu.

¹⁹ “Ɔ jǔ ké ɓě dyi hwɔɖɔ ɖò wɔ̃ gbǎìn, ɓɛ́ ɓě ké ɔ zàǐn, nìí, kɛbì hwɔɖɔɔ̀ zà-zàɔ̀ mɛ ɖú ti pàɖǎ dyíɛɛ, ɓě mɛ ɓɔ́ hwɔɖɔɔ̀ ɖii-cù ɓěɔ̀ ɖei ɖaɓaa. Ɓě mɛ ɖi waà ɓo, kɛɛ ɓě mɛ ɓɔ́ wa mú gbɔɔ̀, sepóɛɖé cu ɓěɔ̀ seà ɓěɛ̀ mú-nyɛ́-nyɔ̀ ɓěɔ̀ kɛ̀.

²⁰ Kɛɛ wɛ̃́ɛ́ kɛɛ, ɓě mɛ ɖaɓa cu ɓě ɓɛ́ ɓě dyuò dyí, ɓɛ́ wa se ɖii-cù ɓěɛ. Ɓě mɛ ɖú cu ɓěɔ̀ dyí, ɓɛ́ ɓě ké wa gbɔ́ɔ́ mú nyu, ɓɛ́ ɓě kéɛ hwɔɖɔ nìà ɓě gbo vɔ̃uń wɛ̃ɛ gmɔɔ̀ dyéɖéín tè, ɓɛ́ ɓě ké hwɔɖɔɔ̀ wáɖá hwɛ̀.