Dìtɔ̀wáɖánámɛ̀ 2 - Ɓǎsɔ́ɔ̀ Báɓòɔ̀

Zɔ̃ ɓě wa nyuà ɖé gbǎùn-fúɖúáɔ̀ kɔ̃ɛ

¹ “Hwɛ̀ ké à sɔ̀ ma dyí, ké à mu ma ɖé gbǎùn-fúɖúáɔ̀ kɔ̃ ɖe, ké à mùìn ma ɖé Dyóó Zĩ-zãɔ̀ wĩín kà Bounɓoɔ̀ nyuɛ ma kà ḿ gbo cɛ̃ɛ kɛ. Ké à bĩ ma Séì Toɖo-ɓòɖòɔ̀ gboi ɓó wé ɓáún-ɓáún mú.

² “Hwɛ̀ ké Bounɓoɔ̀ cɛ̃ɛ ma ḿ gbo, ké ɔ ɖá,

³ ‘Ɓě ɖǎ toɖo-ɓòɖò nìà kɛ gboi bũɛń hwèɖèìn. Ɓó kàǔn wɛ̃ɛ, ɓě mùìn ɖé ɓóɖóɔ̀ xwía.

⁴ Cɛ̃ɛ nyɔ ɓěɔ̀ gbo, ɓɛ́ m̀ ké níiń, “Bounɓoɔ̀ ɖá, ‘Ɓě nìǎ ɓěɛ̀ ɖíí ɓě mɔ̀à Íìsɔ́ɔ̀ɛ̀ xwíníín-dyù ɓěɔ̀ kɛɛ nììn ɓóɖóɔ̀ mú zĩ̀ɛ̌n muɛń. Wa mɔ̀ nyɔ ɓě cĩ́à nɔ̄ Séì-ɓòɖòɛ̀ kɔ̃ɛ̀. Ké wa mu ɓě jè fã̀à peɖeìn jèɛɛ, ɓě mɛ ma mú ɓó wa jè.

⁵ Ɓě ní vɔ̃ wa gbo, sepóɛɖé ḿ se waà ɓóɖóɔ̀ ɖò ɓě nyíɛ mu. Ḿ se ɓě nyɔ ɓěɛ̀ ɓo ɓɛ́ìn kɔ̃ nyànàà kɛɛ nyíɛ mu fóɖóún, sepóɛɖé ḿ ɖǎ ma Íìsɔ́ɔ̀ɛ̀ xwíníín-dyù ɓěɔ̀ Séì Toɖo-ɓòɖòɔ̀ nyí, ɓɛ́ ɔ ké waà kɔ̃̀ɔ̀-ɖɛ̀ jǔ.

⁶ Ɓě mɛ dɔ̃ wa ɖii-ɖɛ̀ ɓɛ́ ɓě ké ɖiɛ kè ní ɓě ké náa gbo.’ ” ’

⁷ “Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓěɛ̀ kũ̀à-sɔ̃̀ séín mana kɔ̃ po. Ɔ dyuò ma ɓěɛ̀ gbǎùn-fúɖúá vɛ̀nɛ̀ nìà kɛ mú zĩ̀ìn-zĩ̀ìnɔ̀ dyí. Ɓó zɔ̃ kpáɖá-nyɔ sɔ̃́ ɓěɛ̀ xwíníín nyɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ma ɓó ɓě gbo, ké ɓě se ma ɖɛ ɖòɛ̀ gǎ dyé.

⁸ “Ti ɓɛ́ Bounɓoɔ̀ ɖǎ ma à náún po ɓó à ɖíí ɓě mɔ̀à Íìsɔ́ɔ̀ɛ̀ xwíníín-dyù ɓěɔ̀ jèɛɛ, à zĩ̀ìn ma ɖé waà ɓóɖóɔ̀ mú. Ké à sɔ̀ ma Àwáɖáɓà-hwìè ɓɛ́ ɔ sɔ̀ìn kà ɖé Éɖàà-hwɔ̀ɖɔ̀ɔ̀ kè Ɛ́zìɔ̀ùn-Géɓɛ̀-hwɔ̀ɖɔ̀ɔ̀ múɛɛ dyí, ké à mùìn ma ɖé xwía, hwɔ ɖé Móà-ɓòɖòɔ̀ gbǎùn-fúɖúáɔ̀ kɔ̃ dyí.

⁹ Ké Bounɓoɔ̀ cɛ̃ɛ ma ḿ gbo, ké ɔ ɖá, ‘Ɓě ɓɔ́ Móà-nyɔ̀ ɓěɔ̀ fũ̀à-fṹá ɖò nyùɛ̀n, mɔɔ ɓě mɛ ɓɔ́ wa to kpaa, sepóɛɖé ḿ se waà ɓóɖóɔ̀ ɖò ɓě nyíɛ mu, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ḿ ɖǎ ma Ɖáà xwíníín-dyù ɓěɔ̀ Áà-hwɔ̀ɖɔ̀ɔ̀ nyí, ɓɛ́ ɔ ké waà kɔ̃̀ɔ̀-ɖɛ̀ jǔ.’ ”

¹⁰ Hwɛ̀ ɓɛ́ Móà-nyɔ̀ ɓěɔ̀ ké ma ɖé Áà-hwɔ̀ɖɔ̀ɔ̀ mú cĩ́ɛɛ, Émì-nyɔ̀ ɓě cĩ́ zɔ̃̌ɔ̀ ɖé kĩ́ín. Wa mɔ̀ ma gàa-zà-nyɔ̀ ɓě, ké wa vò ma dyí. Wa tɔ̀mɔ̀ dya kà Ánàkì-nyɔ̀ ɓěɔ̀ mɔ̀ùn tɔ̀mɔ̀à dya kɛ.

¹¹ Wa ɖáìn ma Émì-nyɔ̀ ɓěɔ̀ kè Ánàkì-nyɔ̀ ɓěɔ̀ Wɛ́ɖɛ́fà-nyɔ̀, kɛɛ Móà-nyɔ̀ ɓěɔ̀ ɖáìn ma wa Émì-nyɔ̀.

¹² Ké Hówìɖì-nyɔ̀ ɓěɔ̀ mɔ̀ùn cĩ́ó zɔ̃̌ɔ̀ ɖé Séì-ɓòɖòɔ̀ kɔ̃, kɛɛ Íìsɔ́ɔ̀ɛ̀ xwíníín-dyù ɓěɔ̀ mɔ̀ nyɔ kúmú ma wa ɓóɖóɔ̀ kɔ̃in, ké wa ɖáɓá ma wa, ké wa cĩ́ ma ɖé ɓóɖóɔ̀ kɔ̃. Kà dyúáɖòɔ̀ kǎà Éézùɖùɛ̀-nyɔ̀ ɓěɔ̀ nyu ma kà ɓóɖó ɓɛ́ Bounɓoɔ̀ nyí ma kà wa kɛɛ nììn nyɔ ɓěɔ̀, hwɛ̀ ké ɔ mɔ̀à waà kɔ̃̀ɔ̀-ɖɛ̀ kɛ̀.

¹³ Ké Mózè kpa ma wuɖu dyúa, ké ɔ ɖá, “Ti ɓɛ́ à nyini ma ɖé Móà-ɓòɖòɔ̀ wĩín nyɛɛ, Bounɓoɔ̀ cɛ̃ɛ ma, ké ɔ ɖá, ‘Ɓě sɔ̀ dyí, ɓɛ́ ɓě ké Záwɛ̀ɖɛ̀-nìɔ̀ péɖé.’ Ɔ jèɛɛ, à péɖé ma Záwɛ̀ɖɛ̀-nìɔ̀.

¹⁴ Ké sɔ̀ Káɖɛ̀-Bànéà-hwɔ̀ɖɔ̀ɔ̀ mú ɓɛ́ ɔ ké ti ɓɛ́ à péɖéà Záwɛ̀ɖɛ̀-nìɔ̀ kɛɛ dyɛ̀ìn nyɛɛ, ɔ ɖú ma zɔ̃ kpáɖá-nyɔ ɓaɖa-bùè sè mɛ̀nɛ̌ìn-tã dyí. Ɓó tia ɓaɖaa, gàa ɓě ɓɛ́ Bounɓoɔ̀ gboò ma kà kà wa seà nyɛ́nɛ́ín-ɖáìn-ɓòɖòɔ̀ mú muɛ́ muɛɛ ɖǎ ma mɛ́ɛ hwɛ̀ ɖé à hwìɛ̀. Wa mɔ̀ gàa séín ɓɛ́ìn to gbo muɛ kɛ.

¹⁵ Bounɓoɔ̀ nyuɛ ké wa gbɔɔ̀ mú tee ké wa hwɛ̀ ma à hwìɛ̀ dyi mɛ́ɛ.

¹⁶ “Ti ɓɛ́ gàa séín ɓɛ́ìn ma to gbo muɛ, ɓɛ́ wa sɔ̀ ma Íjè-ɓòɖòɔ̀ kɔ̃ɛɛ ɖǎ ma à hwìɛ̀ dyi mɛ́ɛ hwɛ̀ɛ,

¹⁷ púɛɛ, Bounɓoɔ̀ cɛ̃ɛ ma ḿ gbo, ké ɔ ɖá,

¹⁸ ‘Ɓó zɛ̃̌ɛ̀ kɛɛ, ɓě mɛ zĩ̀ìn Áà-hwɔ̀ɖɔ̀ɔ̀ wáún, ɓɛ́ ɓě ké Móà-ɓòɖòɔ̀ bã̀àɔ̀ péɖé.

¹⁹ Ké ɓě dyi Ámànà-nyɔ̀ ɓěɔ̀ ɓóɖóɔ̀ mú nyini ní, nìí, ɓě mɛ ɓɔ́ wa fũ̀à-fṹá ɖò nyùɛ̀n, mɔɔ ɓě mɛ ɓɔ́ wa to kpaa, sepóɛɖé ḿ se Ámànà-nyɔ̀ ɓěɔ̀ ɓóɖóɔ̀ ɖò ɓě nyíɛ mu, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ḿ ɖǎ zɔ̃̌ɔ̀ ɓóɖóɔ̀ Ɖáà xwíníín-dyù ɓěɔ̀ nyí, ɓɛ́ ɔ ké waà kɔ̃̀ɔ̀-ɖɛ̀ jǔ.’ ”

²⁰ Hwɛ̀ ɓɛ́ wa ké ma ɓóɖóɔ̀ Ámànà-ɓòɖò ɖáìn nyɛɛ, ɓóɖóɔ̀ mɔ̀ zɔ̃̌ɔ̀ Wɛ́ɖɛ́fà-ɓòɖò, sepóɛɖé Wɛ́ɖɛ́fà-nyɔ̀ ɓěɔ̀ cĩ́ó zɔ̃̌ɔ̀ ɖé ɓóɖóɔ̀ kɔ̃ kĩ́ín. Kɛɛ Ámànà-nyɔ̀ ɓěɔ̀ ɖáìn wa Zã̀zúmì-nyɔ̀ ɓě.

²¹ Wa mɔ̀ ma gàa-zà-nyɔ̀ ɓě, ké wa vò ma dyí. Wa tɔ̀mɔ̀ dya kà Ánàkì-nyɔ̀ ɓěɔ̀ mɔ̀ùn tɔ̀mɔ̀à dya kɛ. Kɛɛ Bounɓoɔ̀ gbɔɔ̀ ma wa mú ɓó Ámànà-nyɔ̀ ɓěɔ̀ dyúa, ké Ámànà-nyɔ̀ ɓěɔ̀ ɖú waà ɓóɖóɔ̀ dyí, ké wa cĩ́à kɔ̃ɛ̀,

²² kà dyúáɖòɔ̀ kǎà Bounɓoɔ̀ nyuà Íìsɔ́ɔ̀ɛ̀ xwíníín-dyù ɓě cĩ́à ɖé Séì-ɓòɖòɔ̀ kɔ̃ɛɛ bììɛ. Ɔ gbɔɔ̀ ma Hówìɖì-nyɔ̀ ɓěɔ̀ mú ɓó wa dyúa, ké wa ɖú ma waà ɓóɖóɔ̀ dyí, ké wa cĩ́ɛ kɔ̃ ke ɓó zɛ̃̌ɛ̀.

²³ Ɖɛ dyúáɖòɔ̀ kpá ma Ávà-nyɔ̀ ɓěɔ̀ gbo ɖekè. Kátɔ̀-nyɔ̀ ɓě sɔ̀ ma ɖé Kátɔ̀-ɓòɖòɔ̀ kɔ̃ɛɛ dyi, ké wa gbɔɔ̀ ma Ávà-nyɔ̀ ɓě ɓɛ́ wa cĩ́ ma ɖé Gázà-hwɔ̀ɖɔ̀ɔ̀ kè hwɔɖɔ ɓě nì ɖé gbɛ̌ɛ̀ɔ̀ múɛɛ mú, ké wa cĩ́ ma ɖé waà hwɔɖɔ ɓěɔ̀ mú.

²⁴ Ké Mózè kpa wuɖu dyúa ɖe, ké ɔ ɖá, “Ti ɓɛ́ à ɖǎ ma Móà-ɓòɖòɔ̀ péɖéɛɛ, Bounɓoɔ̀ cɛ̃ɛ ma ḿ gbo, ké ɔ ɖá, ‘Ɓě sɔ̀ dyí, ɓɛ́ ɓě ké Áánɔ̀-nìɔ̀ péɖé. Gmɔ̀ nɔ̄, ḿ ɖǎ Síhɔ̃̀ mɔ̀à Ámɔ̀-nyɔ̀ ɓěɔ̀ kã́á, ɓɛ́ ɔ cĩ́à ɖé Hɛ́ɓɔ̀ùn-hwɔ̀ɖɔ̀ɔ̀ múɛ kè ɔ ɓóɖóɔ̀ ɓě xwaún dyi po. Ɓě po ɔ to kɔ̃, ɓɛ́ ɓě ké ɔ ɓóɖóɔ̀ dyí ɖúɛ gbɔ dè.

²⁵ Sɔ̀ìn ɓó zɛ̃̌ɛ̀ gboɛɛ, ní mu ɓěɛ̀ díɖí kè fã̀à nyɔǔn séín nì dyóɖó-ɓòɛ̀ xwíɖíiɛɛ mú poùn. Ti ɓɛ́ wa dyi ɓě jè wɔ̃́ùn wɛ̃ɛ, wa mu tɛɖɛìn, ké fã̀à mu wa hwòɖǒ xwíníín zàùn ɓó ɓě jè.’

Éézùɖùɛ̀-nyɔ̀ ɓěɔ̀ ɖu Kã́á Síhɔ̃̀ toún

²⁶ “Ti ɓɛ́ à ɖǎ ma Áánɔ̀-nìɔ̀ péɖé, ké à ɖǎ ma à jàɖàìn-gbò ɓěɔ̀ dyi nyànàìn ɖé Kɛ̀ɖémɔ̀ Gbǎùn-fúɖúáɔ̀ kɔ̃ɛɛ, ḿ tò ma wuɖu pɛ̀ɛ̀-pɛ̀ɛ̀ ɖé Síhɔ̃̀ mɔ̀à Hɛ́ɓɔ̀ùn-kã̀ǎɔ̀ kɛɛ gbo, ké ḿ ɖá,

²⁷ ‘Ní ɓaà m̀ ní, wɔ̃́ ɓɛ́ ḿ kè ní nyɔ ɓěɔ̀ ké nì ɓóɖóɔ̀ mú zĩ̀ìn. À mu hwìè vɛ̀nɛ̀ɔ̀ xwíníín sèìn, ké à se dà ɖò pàǐn mu.

²⁸ Ké ɖii-ɖɛ̀ à ké ɖiɛ kè ní à ké náa, à muɛ dɔ̃ùn ɖé m̀ gbo. Ní ɓaà m̀ ní, wɔ̃́ ɓɛ́ à ké ɓo kɔ̃in nàìn, ɓɛ́ à ké nì ɓóɖóɔ̀ mú zĩ̀ìn nyɛ̀nɛ̀ɛ̀ pū.

²⁹ Íìsɔ́ɔ̀ɛ̀ xwíníín-dyù ɓě cĩ́à ɖé Séì-ɓòɖòɔ̀ kɔ̃ɛɛ kè Móà-nyɔ̀ ɓě nìà ɖé Áà-hwɔ̀ɖɔ̀ɔ̀ múɛɛ wɔ̃́ ma ké à zĩ̀ìn ma waà ɓóɖó ɓěɔ̀ mú. À mɔ́ ɓɛ́ m̀ ké ɖɛ dyúáɖòɔ̀ à bìì nyu, ɓɛ́ à ké Jɔ́nì-nìɔ̀ péɖé, ɓɛ́ à ké ɓóɖó ɓɛ́ Bounɓo mɔ̀à à Gèɖèpɔ́ɔ̀ kɛɛ nìà à nyíɛń nyɛɛ kɔ̃ mu.’

³⁰ “Kɛɛ Síhɔ̃̀ mɔ̀à Hɛ́ɓɔ̀ùn-hwɔ̀ɖɔ̀ɔ̀ kã́áɔ̀ kɛɛ se ma wɔ̃́ ɓɛ́ à ké ma ɔ ɓóɖóɔ̀ mú zĩ̀ìn fɔɔ cá, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɔ zùùɔ̀ xwa kùìn, ké ɔ ɖǎ ɔ hwòɖǒ-dyùàɔ̀ kùmùìn, ɓɛ́ dyììn ɖéɛ múɛɛ, Bounɓoɔ̀ ké ɔ ɓě xwaún dyi po kà ɔ nìà ɓó zɛ̃̌ɛ̀ kɛ.

³¹ “Ké Bounɓoɔ̀ cɛ̃ɛ ma ḿ gbo, ké ɔ ɖá, ‘Gmɔ̀ nɔ̄, ḿ ɖǎ Kã́á Síhɔ̃̀ kè ɔ ɓóɖóɔ̀ ɓě xwaún dyi po. Ɓě dèɛ̀ dyí ɖúɛ gbɔ, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.’

³² Hwɛ̀ ké Kã́á Síhɔ̃̀ kè ɔ nyɔ séín ɓěɔ̀ dyà ma à to kɔ̃ ɖé Jáhàzì-hwɔ̀ɖɔ̀ɔ̀ mú.

³³ Ké Bounɓo mɔ̀à à Gèɖèpɔ́ɔ̀ kɛɛ po ma Kã́á Síhɔ̃̀ kè ɔ dyú-gàà ɓěɔ̀ ɔ kè ɔ nyɔ séín ɓěɔ̀ à xwaún dyi, ké à ɖu ma wa toún.

³⁴ Ɓó tia ɓaɖaa, à ɖú ma ɔ hwɔɖɔ séín ɓěɔ̀ dyí, ké à gbɔɔ̀ ma nyɔ séín nì hwɔɖɔ ɖò-ɖò séín múɛɛ mú nyɛ̀nɛ̀ɛ̀. À se ma nyɔ ɖò ɓíɖíi sè fɔɔ.

³⁵ Kɛɛ à ɖú ma nyúà-ɖɛ̀ ɓě nì ɓóɖóɔ̀ kɔ̃ɛɛ dyí, ɓɛ́ wa ké à to-gbo-zà-ɖɛ̀ ɓě jǔ, ké à hwu hwɔɖɔ ɓě ɓɛ́ à ɖúà dyíɛ.

³⁶ Sɔ̀ìn ɖé Àwóɖóè-hwɔ̀ɖɔ̀ nìà ɖé Áánɔ̀-nìɔ̀ wĩín nyɛ kè hwɔɖɔ nìà ɖé Áánɔ̀ Bɔɔ-kpàɔ̀ hwòɖǒǔn wɛ̃ɛ gbo, ɓɛ́ ɔ kéà ɖé Gíɖèà-ɓòɖòɔ̀ kɔ̃ muɛɛ, hwɔɖɔ ɖò se ma ɖé nì, ɓɛ́ ɔ ké ma gmɔ tɔ̀mɔ̀ dya ɓéɖé ɓó à bìì. Bounɓo mɔ̀à à Gèɖèpɔ́ɔ̀ kɛɛ po ma à hwɔɖɔ séín ɓěɔ̀ xwaún dyi.

³⁷ Kɛɛ à se ma Ámànà-nyɔ̀ ɓěɔ̀ hwɔɖɔ ɓě ɓɛ́ Bounɓo mɔ̀à à Gèɖèpɔ́ɔ̀ kɛɛ ɖǎ ma à jè gbo cɛ̃ɛ bũ̌in xwɛ̃́ìn. Hwɔɖɔ ɓěɔ̀ nì ma ɓó Jáɓò-nìɔ̀ wĩin kè ɖé Ámànà Toɖo-ɓòɖòɔ̀ kɔ̃.