Dìtɔ̀wáɖánámɛ̀ 18 - Ɓǎsɔ́ɔ̀ Báɓòɔ̀

Ɖɛ sáa-zà-nyɔ̀ ɓěɔ̀ mɔ̀ùn kɔ̃̀ wa ké dyéɛ

¹ “Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ se Éézùɖùɛ̀-ɓòɖòɔ̀ pá ɖò kɔ̃̀. Ɔ jèɛɛ, wa mɛ ɖi nyíí-ɖɛ̀ ɓě kè sáa-zàìn-ɖɛ̀ ɓě ɓɛ́ ɓě muà Bounɓoɔ̀ nyíìn nyɛ. Ɔ mɔ̀ ɖɛ wa kɔ̃̀ wa ké dyéɛ.

² Wa mɔ̀ùn se ɓóɖóɔ̀ pá ɖò dyé, ɓɛ́ ɔ ké waà kɔ̃̀ɔ̀-ɖɛ̀ jǔ kà xwéɖé-dù tɔ̀ɔ̀ ɓěɔ̀ nìà kɛ, sepóɛɖé Bounɓoɔ̀ cɛ̃ɛ Ɖíìváà xwéɖé-dùɔ̀ gbo, ké ɔ ɖá, ‘Ɓě nììn kɔ̃̀ɔ̀-ɖɛ̀ mɔ̀ kpé ɓɛ́ ḿ nyíà ɓě, ɓɛ́ ɓě kéà ní sáa-zà-nyɔ̀ ɓě jǔɛ.’

³ “Ti séín ɓɛ́ ɓě mu ɓìɖǐ mɔɔ ɓáɖáá sáa zàìn nyɛɛ, ɓě mɛ nyí ɔ sɔ̃-wĩ̀àɔ̀ kè ɔ tìà-kpàɔ̀ ɔ kè ɔ mɛ́ɔ̀ sáa-zà-nyɔ̀ ɓěɔ̀.

⁴ Ké ɓě mɛ nyí wa ɓěɛ̀ ɖii-ɖɛ̀ kĩ́ín-kĩ́ín ɓě sɔ̀à ɖé ɓěɛ̀ geɖe ɓěɔ̀ gboɛ kè ɓěɛ̀ wã́ìn kĩ́ín-kĩ́ín ɓěɔ̀ kè ɓěɛ̀ ɔ́ɖè-cànà kĩ́ín-kĩ́ín ɓěɔ̀ ɔ kè ɓěɛ̀ ɓáɖáá-mì-ɖɔ̀ kĩ́ín-kĩ́ín ɓěɔ̀.

⁵ Ɓě mɛ nyuɛ náa, sepóɛɖé Bounɓoɔ̀ gã ma Ɖíìváà xwéɖé-dùɔ̀ ɖé ɓěɛ̀ xwéɖé-dù séín ɓěɔ̀ hwìɛ̀, ɓɛ́ wa kè waà xwíníín-dyù ɓěɔ̀ ké ɓó ɔ dyúa dyi, ɓɛ́ wa ké ɔ kũ̀à nyu kánáá pū.

⁶ “Ɔ jǔ ké Ɖíìváà-nyɔ̀ ɖò dyi ɖé Éézùɖùɛ̀-hwɔ̀ɖɔ̀ ɓěɔ̀ ɖò mú jaɖaa mɔ́, ɓɛ́ ɔ ké ɖé pá ɓɛ́ Bounɓoɔ̀ muà gãùn wɛ̃ɛ mú cĩ́ ní, nìí, ɔ ɓɛ́ìn náa nyuɛ,

⁷ ké ɔ mɛ nyu Bounɓo mɔ̀à ɔ Gèɖèpɔ́ɔ̀ kɛɛ kũ̀à kà ɔ mǔè Ɖíìváà-nyɔ̀ ɓěɔ̀ nyuà kũ̀à ɓó Bounɓoɔ̀ dyúa kɛ.

⁸ Ɔ ɓɛ́ìn wíɖí ɓɛ́ wa ɖǎ gbǒ-xwíníín-ɖɛ̀ ɓɛ́ wa peɖeɛɛ kɔ̃ún dyéɛɛ ɖò dyéɛ dyɛo, kɛɛ ɓě mɛ nyí ɔ ɖii-ɖɛ̀ dyúáɖò ɓɛ́ ɓě nyíà sáa-zà-nyɔ̀ tɔ̀ɔ̀ ɓěɔ̀ kɛɛ ɖekè.

Náún-po-wùɖù ɓá ɓóɖó ɓě se Gèɖèpɔ́ɔ̀ dyí dyuò kɛɛ nyuu-kpèɖè jè dyíɛ

⁹ “Ti ɓɛ́ ɓě mu ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà ɓě nyíìn nyɛɛ kɔ̃ muùn wɛ̃ɛ, ɓě mɛ ɓɔ́ ɓóɖóɔ̀ nyɔ ɓěɔ̀ nyuu-kpèɖè ɓě nyàìn kà Bounɓoɔ̀ dyiɛɛ kíɖíí síɛ.

¹⁰ Ké ɓě ɖò ní po ɓěɛ̀ dyú-gàà mɔɔ dyú-màà dyéɖé, ɓɛ́ ɔ ké sáa-zàìn-ɖɛ̀ jǔ. Ké ɓě nyɔ ɖò ní mɔ̀ sɛ̀ɛ̀-po-nyɔ̀ mɔɔ jìɖǐ-ɓuɖu-hwĩ̀ɔ̀ mɔɔ kɔ̀ìn-kɔ̀ìn-nyu-nyɔ̀ mɔɔ hwe-kpèɖè-nyu-nyɔ̀

¹¹ mɔɔ nyɔ-dyí-gmɔ̀ìn-kũùn-kpò-nyu-nyɔ̀ mɔɔ wɔ-pa-nyɔ̀ mɔɔ gĩɔ-nyɔ̀-gbo-wùɖù-nyɔ̀.

¹² Sepóɛɖé nyɔ séín ɓě ɓɛ́ wa nyu ɖɛ ɓě nìà kɛɛ jè nyàìn Bounɓoɔ̀ dyi, ké ɓó dyi-nyàìn-ɖɛ̀ ɓěɛ̀ nyu jèɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓóɖóɔ̀ nyɔ ɓěɔ̀ ɓó ɓě dyúa dyi kúmúɛń nyɛ̀.

¹³ Ɓě mɛ ɓɔ́ kɛɛ ɖò ɓéɖéɛ ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa.

Nyɛ́nɛ́ín-ɖáìn-ɖɛ̀ ɓá kpáá-ɖɛ̀-cɛ̃-nyɔ̀ ɖò Gèɖèpɔ́ɔ̀ mu tòùn wɛ̃ɛ jè dyíɛ

¹⁴ “Ɓóɖó ɓɛ́ ɓě nìà dyí ɖúɛń muɛń nyɛɛ, ɓóɖóɔ̀ nyɔ ɓěɔ̀ tò jìɖǐ-ɓuɖu-hwĩ̀ɔ̀ ɓě kè sɛ̀ɛ̀-po-nyɔ̀ ɓěɛ̀ wuɖu ɖùǔ gbo, kɛɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ se mɔ́ ɓɛ́ ɓě ké ɖɛ nìà kɛ nyu.

¹⁵ Bounɓo mɔ̀à ɓěɛ̀ Gèɖèpɔ́ɔ̀ kɛɛ muɛ nyuùn ɓɛ́ ɓě ɖíí ɓěɔ̀ ɖò ké kpáá-ɖɛ̀-cɛ̃-nyɔ̀ jǔ ɖé ɓě hwìɛ̀ kà ḿ nìà kɛ, ké ɓě mɛ tò ɔ wuɖu ɖùǔ gbo.

¹⁶ “Ɓó wé kɔ̃̀ ɓaɖa ɓɛ́ ɓě poìnǒ zɔ̃̌ɔ̀ kà dyí ɖé Hówèɖè-tòɖòɔ̀ gboɛɛ, fã̀à nyu ma ɓě, ké ɓě ɓaà ma Bounɓo mɔ̀à ɓěɛ̀ Gèɖèpɔ́ɔ̀ kɛ, ké ɓě ɖá, ‘À mɛ ɓɔ́ Bounɓo mɔ̀à à Gèɖèpɔ́ɔ̀ kɛɛ wuɖuɔ̀ wɔ̃́ɔ ɖe, mɔɔ ké à mɛ ɓɔ́ nyɛ-ɓɔ́ɔ́ vɛ̀nɛ̀ nìà kɛ dyéɛ ɖe, ɓɛ́ à ní kɔ̃̀ ɖà mɛ́.’

¹⁷ “Ké Bounɓoɔ̀ cɛ̃ɛ ma ḿ gbo, ké ɔ ɖá, ‘Ɖɛ wa ɖǎà cɛ̃ɛ sɛ́ɖɛ́ìn dyí.

¹⁸ Ké ní muɛ nyuùn ɓɛ́ wa ɖíí ɓěɔ̀ ɖò ké kpáá-ɖɛ̀-cɛ̃-nyɔ̀ jǔ kà m̀ nìà kɛ. Ké ní mu ní wuɖuɔ̀ ɔ wĩín poùn, ké ɔ mu ɖɛ séín ní mu ɔ gbo cɛ̃ìn nyɛɛ wa gbo cɛ̃ìn.

¹⁹ Ɔ jǔ ké nyɔ ɖò se wuɖu ɓɛ́ ɔ muà cɛ̃ìn ɖé ní nyɛ́nɛ́ɔ̀ múɛɛ dyi kpɔ̃ ní, nìí, ḿ mìɔùn mu nyɔɔ̀ gǎ kɔ̃ tòùn.

²⁰ Kɛɛ ɔ jǔ ké kpáá-ɖɛ̀-cɛ̃-nyɔ̀ ɖò dyi ḿ wuɖu wĩín kpã́, ké ɔ dyiɛ nyɔ ɓěɔ̀ gbo cɛ̃, mɔɔ ké ɔ dyi kpáá-ɖɛ̀ cɛ̃ ɖé gèɖèpɔ́ɔ̀ kà kò ɖò ɓěɛ̀ nyɛ́nɛ́ín ní, nìí, ɔ ɓéɖé ɓɛ́ ɔ ké mɛ́.’

²¹ “Ké ɓě ɓɛ́ìn ɖɛi dièɛ̀, ɓɛ́ ɓě ké níiń, ‘Xwɛ̌ à ɓɛ́ìn dyí dyuòɛ̀ kà bɔ̃̌ ɔ cɛ̃à kɛɛ sɔ̀ìn ɖé Bounɓoɔ̀ gboɛ́?’

²² Ɔ mɔ̀, ɔ jǔ ké ɖɛ ɓɛ́ kpáá-ɖɛ̀-cɛ̃-nyɔ̀ɔ̀ muà cɛ̃ìn ɖé Bounɓoɔ̀ nyɛ́nɛ́ɔ̀ múɛɛ se jǎà kpá ní, nìí, ɖɛ ɔ cɛ̃à kɛɛ se Bounɓoɔ̀ wuɖu. Kpáá-ɖɛ̀-cɛ̃-nyɔ̀ɔ̀ ɖǎ Bounɓoɔ̀ wuɖu wĩín kpã́, ké ɔ ɖǎà cɛ̃ kɛ̀. Ɓě mɛ ɓɔ́ ɔ dyi fɛ̃̀ìn.