Kɔ̀ɖɔ́sĩ̀à 2 - Ɓǎsɔ́ɔ̀ Báɓòɔ̀

¹ Ḿ mɔ́ ɓɛ́ ɓě ké kà ḿ vɔ̃ ɓě kè nyɔ ɓě nìà ɖé Ɖéòdùsíà-hwɔ̀ɖɔ̀ɔ̀ múɛ ɔ kè nyɔ séín ɓě ɓɛ́ wa séè ḿ dyé ɖòɛɛ bìì mìɔ kɛɛ dyí dyuò.

² Ḿ nyuɛ náa, ɓɛ́ wa hwòɖǒ ké kpéí kpá, ɓɛ́ wa ké gbo kpɔ̃ìn ɖé ɖɛ̀ɓɛ̀ǐn-ɖɛ̀ɓɛ̀ǐn mú, ɓɛ́ ɖɛ-dyí-dyuò-dyuò ɓɛ́ ɖɛ-múin-wɔ̃́-wɔ̃́ dyàà kɛɛ ké wa mú bã. Ké kǎà wa mu kǎa ɖɛ ɓɛ́ Gèɖèpɔ́ɔ̀ vǐè ma kĩ́ín nyɛɛ dyí dyuòùn. Ɔ mɔ̀ Kɛ́ɖɛ́ì mìɔùn.

³ Gèɖèpɔ́ɔ̀ bã-ɖɛ̀ séín ɓě ɓɛ́ wa mɔ̀ ɔ hwòɖǒ-fɔ̀nɔ̀-fɔ̀nɔ̀ kè ɔ ɖɛ-dyuò-dyuò kɛɛ dèìn ɖé Kɛ́ɖɛ́ì mú dyi, ké nyɔ ɖò se wa dyéɖé kɔ̃ poɛ ɓɛ́ìn.

⁴ Ḿ mɛ cɛ̃ ɓě ɖɛ nìà kɛ gbo. Ɓěǐn ɖá ɓɛ́ nyɔ ɖò ké ɓě cá ɖé nyɔǔn-pɛ́í-po-po mú.

⁵ Ní kpóɖó-dyùàɔ̀ se ɖé ɓě gbo nì dyɛo, kɛɛ ní zùùɔ̀ nì ɖé ɓě gbo. Ké ḿ kpá múàǔn mìɔ, sepóɛɖé ḿ dyé kà ɓě nyu ɓěɛ̀ ɖɛ ɓě nyuɛ kɛ ɔ kè kà ɓě nyànà dyi gãun-gãun ɖé ɓěɛ̀ Kɛ́ɖɛ́ì hwìɖǐǐ-taɓa-taɓaɔ̀ múɛ.

À fɛ̀ɛ̀ɔ̀ hwɛ̀ gbɔ ɖé Kɛ́ɖɛ́ì mú

⁶ Kà ɓɛ́ ɓě ɖǎà Kɛ́ɖɛ́ì Jízɛ̀ mɔ̀à Bounɓoɔ̀ kɛɛ dyi kpɔ̃ɛɛ, ɓě mɛ cĩ́, ɓɛ́ ɓě kèɔ̀ kè ké nyɔ dyúáɖò jǔ.

⁷ Ɔ hwɔìn ɓě mɛ kpa gmɛ̀nɛ̀ɛ̀ ɖé ɔ mú. Ɓě mɛ kùìn ɓě mìɔùn dyi ɖé ɔ mú, ké ɓěɛ̀ hwìɖǐǐ-taɓa-taɓaɔ̀ mɛ ɓúá dyí kà wa nyuɛ ma kà ɓě tɛ̀mɛ̀ìn nyɛ. Ké ɓě mɛ po Gèɖèpɔ́ɔ̀ zùo mìɔ.

⁸ Ɓě mɛ ma mú, ɓɛ́ nyɔ ɖò ní kɔ̃̀ ɖà nyɔǔn-dyùɛ̀ hwòɖǒ-fɔ̀nɔ̀-fɔ̀nɔ̀ ɓě mɔ̀à nyɔǔn-mú-cáìn-ɖɛ̀ fóɖóún wɛ̃ɛ dyí ɖú, ɓɛ́ wa kéɛ nyu ɓɛ́ ɓě ké gǐì jǔ. Ɖɛ ɓě nìà kɛ sɔ̀ ɖé nyɔǔn-dyùɛ̀ kpeɖe mú ɔ kè ɖé ɖɛ ɓě ɓɛ́ wa kɔ̃̀à ɓóɖó-kpàà wuɖuíɛɛ gbo. Wa se ɖé Kɛ́ɖɛ́ì gbo sɔ̀.

⁹ Sepóɛɖé Gèɖèpɔ́ɔ̀ gbɔ-hwɛ̀-hwɛ̀ gànáɔ̀ nì ɖé Kɛ́ɖɛ́ì mú, ɖé ɔ nyɔǔn-dyù-kpòɖò-dyùàɔ̀ mú.

¹⁰ Ké kà ɓě kèɔ̀ kè mɔ̀à nyɔ dyúáɖò kɛɛ, ɓě ɖǎ fɛ̀ɛ̀ ɓɛ́ ɔ hwɛ̀ gbɔ kɛɛ ɓéɖé. Ɔ nì nyɔ-wuɖuí-kɔ̃̀-nyɔ̀ séín ɔ kè kpé séín kɔ̃in.

¹¹ Kà ɓɛ́ ɓě kèɔ̀ kè mɔ̀à nyɔ dyúáɖò kɛɛ, ɓě mɛ́ ma sàà. Ɔ se nyɔǔn-dyù nììn sàà-mɛ́-mɛ́, kɛɛ ɔ mɔ̀ Kɛ́ɖɛ́ì nììn sàà-mɛ́-mɛ́. Ɔ mɔ̀ nàmàǔn-kpòɖò-dyùàɔ̀ kpéɔ̀ xwaún-pó-pó.

¹² Ti ɓɛ́ ɓě kpá ma níɔ kɛɛ, wa zà ma ɓě kè Kɛ́ɖɛ́ì dyóɖóún. Ké ɖé níɔ-kpá-kpáɔ̀ múɛɛ, ɓě kè Kɛ́ɖɛ́ì sɔ̀ ma dyí ɖekè dyììn ɖé Gèɖèpɔ́ɔ̀ mɔ̀ nyɔ zà ma ɔ gĩɔ kɛɛ kũ̀à-nyu-nyuɔ̀ hwìɖǐǐ-taɓa-taɓaɔ̀ mú.

¹³ Ɓěɛ̀ ɖɛ-gbà-nyu-nyuɔ̀ ɔ kè seɛ ɓě se ma kà sàà mɛ́ɛ nyuɛ ké ɓě se ma fɛ̀ɛ̀ ɖò ɓéɖé. Kɛɛ Gèɖèpɔ́ɔ̀ zà ma ɓě kè Kɛ́ɖɛ́ì gĩɔ. Gèɖèpɔ́ɔ̀ ɖǎ à ɖɛ gbà séín ɓěɔ̀ kɔ̃in zĩ̀ìn.

¹⁴ À kpa se dyíin nɔ̀mɔ̀ ɓě ɓɛ́ à kpɔ̃ ma, ɓɛ́ wa céèà ɓíɖíi, ɓɛ́ ɔ ɓéɖéà gma kpa ɖɛ ɓě kɛɛ, Gèɖèpɔ́ɔ̀ ɖǎ wa jè dyi táà. Ɔ zĩ̀ɛ̀n ma jè dyi cá ɖé ɔ kɔ́ɖɔ́sìɔ̀ dyéɖéín dyi-kɔ̀ìn-kɔ̀ìn mú.

¹⁵ Ké ɓó kɔ́ɖɔ́sì nìàǒ wɛɛ kɔ̃, ɓóɛ̀ Kɛ́ɖɛ́ì zàìn ma nyɔ-wuɖuí-kɔ̃̀-nyɔ̀ ɓěɔ̀ kè nyɔ-kɔ̃in-nì-nyɔ̀ ɓěɔ̀ kpé ɓěɔ̀ wa xwa. Ɔ nyuɛ ké ɔ mɔ̀ ma ɖɛ ɓɛ́ nyɔǔn ké ma wa dyi dyéɛ. Ɔ nàìn ma wa kà gǐì ɓě nìà kɛ, sepóɛɖé ɔ ɖǎ ma to ɖu jè.

Ɖɛ ɓě mɛ kpɔ̃ ɓě hwòɖǒɛ

¹⁶ Ɔ jèɛɛ, ɓěǐn ɖá ɓɛ́ nyɔ ɖò ké ɓě bìì gma ɖò nyu ɓá ɖɛ ɓě ɖiɛ ɔ kè ɖɛ ɓě ná kɛɛ dyí. Wa ní ɖá ɓɛ́ wa ké gma ɓá wé kpa ɖɛ ɓě kè dɛ̀nɛ̀ ɖìè nììn ti ɔ kè Gèɖèpɔ́ɔ̀ fɔ̀-wèɔ̀ dyíɛɛ ɖò nyu.

¹⁷ Ɖɛ ɓě nìà kɛ mɔ̀ ɖɛ ɓě nì ɖé dyúa kɛɛ hwɔìn-ɖɛ̀. Ɖɛ jɛ́ɛ́ɔ̀ ɓá Kɛ́ɖɛ́ì dyí.

¹⁸ Ɓěǐn ɖá ɓɛ́ ɓě ké wɔ̃́ ɓɛ́ nyɔ ɓě ɓɛ́ wa ɓɔ́ɖɔ́ìn wa mìɔùn dyí ɓó dyí-tɛ̀mɛ̀ìn-ɖɛ̀ ɓě ɓɛ́ wa ɖǎ dyé kɛ jèɛɛ ké ɓě zaa dúún wáɖá. Ɖɛ wa nɛ́ìn jìì kɔ̃ kɛɛ mɔ̀ nyɔ-mìɔùn-ɓíɖíi-dyà-dyà se jǎà kɛ ɔ kè ínjà ɓěɔ̀ ɓiè-ɓiè. Nyɔ ɓě nì kà ɓěa kɛɛ, wa poìn nyɔǔn-dyù-kà hwìɖǐi, ké ɔ nyuɛ ké wa ɓúáìn wa mìɔùn dyí, ké ɔ se xwíníín ɖò kɔ̃̀.

¹⁹ Wa ɖǎ Kɛ́ɖɛ́ì mɔ̀à kpóɖó-dyùàɔ̀ dúɔ̀ kɛɛ jè dyi kpɔ̃ɔ ɓɔ́. Kɛ́ɖɛ́ì gmɔ̀ kpóɖó-dyùà gànáɔ̀ dyí, ké ɔ nyuɛ ké kpá-dyí-deìn-naín ɓěɔ̀ kè tɛ̃̀ìn-kpà ɓěɔ̀ kpɔ̃à kpóɖó-dyùàɔ̀ dyiɛ̀. Ké ɔ ɓúá kà Gèɖèpɔ́ɔ̀ mɔ́ ɓɛ́ ɔ ké ɓúáa nyuɛ.

À kè Kɛ́ɖɛ́ì mɛ́-mɛ́ kè cĩ́-cĩ́

²⁰ Ɓě kè Kɛ́ɖɛ́ì ɖǎ mɛ́, ké ɓě ɖǎ ɖɛ ɓě kɔ̃̀ ɓóɖó-kpàà wuɖuíɛɛ xwaún pó. Nìí, ɖɛ́ kɔ̃̀ jè ɓě cĩ́à ke kà ɓě mɔ̀ɔ̌ kà ɓóɖó-kpàà nyɔ ɓě keɛ́? Ɖɛ́ kɔ̃̀ jè ɓě kpɔ̃à gma ɓě nì kà kɛɛ dyiɛ́? Gma ɓěɔ̀ mɔ̀,

²¹ “Ɓěǐn ɖá ɓɛ́ ɓě ké ɖɛa xwa ɓéɖé, mɔɔ ɓě ní dɔ̃̌ ɖɛa wɔ̃, mɔɔ ɓě ní tó ɖɛa dyi.”

²² Ɖɛ séín ɓě nìà kɛɛ, ɓě dyi wa ɖɛ ɖò mú nyùìn ní, wa jè zi dyi. Ɖɛ ɓě nìà kɛ mɔ̀ gma ɓě ɓɛ́ nyɔǔn-dyù po, ké wa tɛ̀mɛ̀ìn nyɔǔn wɛ̃.

²³ Wa nì kà wa mɔ̀ɔ̌ kà hwòɖǒ-fɔ̀nɔ̀-ɖɛ̀ ɓě kɛ. Wa nyuɛ ké nyɔǔn nɛ́ wa mìɔùn kɔ̃, ɓɛ́ wa ké ínjà ɓě ɓiè, ɓɛ́ wa ké wa mìɔùn ɓíɖíi dyà, ɓɛ́ wa ké waà kpóɖó-dyùàɔ̀ gana-ɖɛ̀ ɓě bũ̌ nyu. Kɛɛ wa se ɖɛ kpa ɓɛ́ wa ké ɖɛ-gbà-nyu-tò nyuà nyɔǔn wɛ̃ɛ dyí kpɔ̃.