Àzédyà 8 - Ɓǎsɔ́ɔ̀ Báɓòɔ̀

Àzédyàà dyú-gààɔ̀ mɔ̀ ɖàɓàìn-ɖɛ̀ ɖé nyɔ ɓěɔ̀ gbo

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma ḿ gbo, ké ɔ ɖá, “Ɖú céè-ɖɛ̀-mì vɛ̀nɛ̀ ɖò dyí, ɓɛ́ m̀ kéɛ kɔ̃ céè. Céèɛ̀ pùɖùé. Ɖɛ m̀ mɛ céèà ɓóɛɛ, ɔ kɛà kɛ̀. Ɔ mɔ̀ Máhè-Sáɖàò-Hásì-Bázì.

² M̀ mɛ kpa zàse sɔ̃́ ɓɛ́ nyɔ ɓɛ́ìn hwòɖǒ kɔ̃ dèɛ̀ kɛ, ɓɛ́ wa ké ní zàse jǔ. Wa mɔ̀ Dyùwáɖádyà mɔ̀à sáa-zà-nyɔ̀ vɛ̀nɛ̀ɔ̀ kɛ kè Zɛ́kɔ̀wáɖádyà mɔ̀à Jɛ́bɛ̀wɛ́ɖɛ́kíàà dyú-gààɔ̀ kɛ.”

³ Sɔ̀ìn ɓóɛ gboɛɛ, ḿ kè ní gmàà ɓɛ́ ɔ mɔ̀ ma kpáá-ɖɛ̀-cɛ̃-màà ɖò kɛɛ nì ma ɓó da. Ké ɔ nì ma zùù kɔ̃, ké ɔ wóɖóìn ma gàa-dyù ɖò. Hwɛ̀ ké Bounɓoɔ̀ cɛ̃ɛ ma ḿ gbo, ké ɔ ɖá, “Jǔìn ɔ Máhè-Sáɖàò-Hásì-Bázì-nyɛ̀nɛ̀.

⁴ Sepóɛɖé gàa-dyùɔ̀ kéá mú tɔ, ɓɛ́ ɔ kéá ‘Ḿ ɓǎ’ mɔɔ ‘Ḿ ɖe’ nyuɛ dyuò ní, nìí, Àsíwíɖíà-kã̀ǎɔ̀ ɖǎ Dìmásìkɔ̀-hwɔ̀ɖɔ̀ɔ̀ kè Sɛ̀mɛ́ɖìà-hwɔ̀ɖɔ̀ɔ̀ hwuɛ hwɔ.”

Àsíwíɖíà-kã̀ǎɔ̀ nì dyiɛń

⁵ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma ḿ gbo ɖe, ké ɔ ɖá,

⁶ “Nyɔ ɓě nìà kɛ ɖǎ mɔ̄ hwɔìn kà Sìɖóà-nì ɓɛ́ ɔ zià dɔ̃̀ɔ̀ kɛɛ ɓɔ́, ké waà hwòɖǒ ɖǎ Wɛ́ɖɛ́zììn kè Wɛ̀ɖɛ̀máɖídyàà dyú-gààɔ̀ gbo gmɔ̀ìn.

⁷ Ɔ jèɛɛ, ní mu Àsíwíɖíà-kã̀ǎɔ̀ kè ɔ sójà séín ɓěɔ̀ dyàùn, ɓɛ́ wa ké Júɖà-ɓòɖòɔ̀ to kɔ̃ po. Wa mu ɓóɖóɔ̀ kɔ̃in ɓáìn kà Dyùféɖétì-nìɔ̀ dyià dyí ní, ɔ zià ɔ kpóóɔ̀ kɔ̃in nyɛ.

⁸ Wa mu ní-tò jǔùn, ɓɛ́ wa ké Júɖà-ɓòɖòɔ̀ mú dyi dyíìn, ɓɛ́ wa ké wa bùnù zɔ̃̌ sèìn. Wa mu Ìmádyùɛ̀ɛ̀ ɓóɖóɔ̀ kɔ̃in ɓáìn kà naà-pìɔ̌-kpà ɓáìn kà ɖɛ ɖò kɔ̃in nyɛ.”

⁹ Óó ɓóɖó-dù ɓě, ɓě poìn dyí ɓó to jè, ɓɛ́ wa ké ɓě dyi wàìn. Ɓě mɔ̀ nyɔ ɓě nì ɖé ɓóɖó vɛ̃in ɓě kɔ̃ɛɛ, ɓě jìnììn ɓě mìɔùn ɓó to jè, ɓɛ́ wa ké ɓě dyi wàìn.

¹⁰ Ɓě sɔ́ ɖɛ dyí, kɛɛ ɔ se ná kpáa mu. Ɓě cɛ̃ wuɖu ɓě, kɛɛ wa se dúi kuɛ́ mu, sepóɛɖé Gèɖèpɔ́ɔ̀ nì ɓó à gbo.

Bounɓoɔ̀ po kpáá-ɖɛ̀-cɛ̃-nyɔ̀ɔ̀ náún

¹¹ Sɔ̀ìn ɓóɛ gboɛɛ, Bounɓoɔ̀ kpéɔ̀ dyi ma ḿ kɔ̃, ké ɔ po ma ḿ náún. Ɔ cɛ̃ɛ ma ḿ gbo kà ḿ mɛ ɓɔ́ ní nyɔ ɓěɔ̀ kpeɖe kíɖíí síɛ kɛ. Ɔ ɖá,

¹² “Mɔ̀ǔn ɖá ɓɛ́ m̀ ké ɖɛ séín ɓɛ́ nyɔ ɓěɛ̀ ɖáìn sɔ́-sɔ́ɛɛ sɔ́-sɔ́ ɖáìn. Ké mɔ̀ǔn ɖá ɓɛ́ m̀ ké ɖɛ ɓě ɓɛ́ wa fɛ̃̀àìn dyi mìɔ kɛɛ ɖò dyi fɛ̃̀ìn.

¹³ Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɛ mɔ̀ mú-hwɛ̀-nyɔ̀ ɓó m̀ bìì. Mɔ̄ mɔ̀ nyɔ m̀ mɛ fɛ̃̀ìn dyi mìɔ cá.

¹⁴ Ní mu gbǒ hwɛ̀ǐn-hwɛ̀ǐn jǔùn ɓó m̀ bìì, kɛɛ ní mu sɔ́ɔ́-kpò mɔ̀ dyí-gbǒ-ɖɛ̀ ɓɛ́ ɔ nyuɛ ɓɛ́ nyɔǔn dyi ɓuɖuɛɛ jǔùn ɓó Éézùɖùɛ̀-ɓòɖòɔ̀ kè Júɖà-ɓòɖòɔ̀ bìì. Ní mu xwáɖá-gbǎ-mú jǔùn ɓó Jùɖúsɛ̀ɖɛ̀ìn-nyɔ̀ ɓěɔ̀ bìì.

¹⁵ Wa nyɔ ɓáún-ɓáún mu ḿ dyí gbǒùn, ɓɛ́ wa ké ɓuɖu, ɓɛ́ wa ké dyi jɛɖɛìn. Ní mu xwáɖá gbǎùn ɓó wa bìì, ɓɛ́ ɔ ké wa kpɔ̃.”

Náún-po-wùɖù ɓá gĩɔ-nyɔ̀ gbo wùɖù jè dyíɛ

¹⁶ Ɓě mɔ̀à ní ɖeín-nà-nyɔ̀ ɓěɛɛ, ɓě sã̀ìn ní tɛ̀mɛ̀ìn-ɖɛ̀ ɓěɔ̀ ɖé ɓěɛ̀ hwòɖǒ bũ̌ dyi kóɖó-kóɖó, ɓɛ́ wa ní kɔ̃̀ ɖà xwáɖáún sè.

¹⁷ Ní mu Bounɓo ɓɛ́ ɔ pòàìn Jékɔ̀ɛ̀ gbǒ-xwíníínɔ̀ dyúa xwáɖáún wɛ̃ɛ hwòɖǒ kɔ̃ dèìn. Ní mu ɔ hwìɖǐǐ taɓaùn kóɖó-kóɖó.

¹⁸ Gmɔ̀ nɔ̄, ḿ kè dyú ɓě ɓɛ́ Bounɓoɔ̀ ɖǎà ḿ nyíɛɛ mɔ̀ ɖàɓàìn-ɖɛ̀ kè dyí-tɛ̀mɛ̀ìn-ɖɛ̀ ɓó Éézùɖùɛ̀-nyɔ̀ ɓěɔ̀ bìì, sɔ̀ìn ɖé Bounɓo mɔ̀ nyɔ nìà ɖɛ séín kɔ̃in, ɓɛ́ ɔ cĩ́à ɖé Zádyɔún-tòɖòɔ̀ dyaa gbo.

¹⁹ Ɔ jǔ ké nyɔǔn dyiɛ ɓě gbo cɛ̃, ké wa dyi níiń, “Ɓě mu wɔ-pa-nyɔ̀ ɓě kè gĩɔ-nyɔ̀-gbo-wùɖù-nyɔ̀ ɓě ɓɛ́ wa poà wuɖu-dyù, ké wa paà sánáa dyi dièo” ní, nìí, ɓě mɛ diè ɓěɛ̀ Gèɖèpɔ́ɔ̀ dyi. Ɓě mɛ ɓɔ́ gĩɔ-nyɔ̀ dyi dièɛ̀ ɓó nyɔ ɓě nì cĩ́ɛń nyɛɛ bìì.

²⁰ Ɓě mɛ kpɔ̃ Bounɓoɔ̀ gmaɔ̀ kè ɔ tɛ̀mɛ̀ìn-ɖɛ̀ɔ̀ dyi, sepóɛɖé wuɖu ɓɛ́ wɔ-pa-nyɔ̀ ɓěɔ̀ kè gĩɔ-nyɔ̀-gbo-wùɖù-nyɔ̀ ɓěɔ̀ cɛ̃ kɛɛ ní nyí nyɔ ce.

Fũ̀à-fṹá-tì

²¹ Wé ɖò nì dyiɛń, ɓɛ́ Júɖà-nyɔ̀ ɓěɔ̀ ké ɓóɖóɔ̀ múin té. Waà hwòɖǒ mu ɖé ɖei kpáùn, ké mɔ́ mu wa nyuùn. Ɖé waà mɔ́-hwòɖòɔ̀ kè dyoɖo-hwòɖòɔ̀ múɛɛ, wa mu dyií gmɔ̀ùn, ɓɛ́ wa ké waà kã́áɔ̀ kè waà Gèɖèpɔ́ɔ̀ vàɖǎ.

²² Ké dɛ̀ kã̀ìn séín wa mu gmɔ̀ùn wɛ̃ɛ, wa se ɖɛín-ɖɛ̀ ɖò dyéɛ mu, ɔ sèìn fũ̀à-fṹá kè tíe-kpò kpɛ̃̀. Bounɓoɔ̀ mu wa tíe-kpò kpɛ̃̀ ɖò mú poùn.