Àzédyà 7 - Ɓǎsɔ́ɔ̀ Báɓòɔ̀

Cuò-wùɖù dyi Kã́á Áhàzì gboɛ

¹ Ti ɓɛ́ Áhàzì mɔ̀à Dyùzíàà nyúà-dyú, kɔ̃̀ ɓǎ mɔ̀à Jótàùn wɛ̃ɛ mɔ̀ ma Júɖà-ɓòɖòɔ̀ kã́á kɛɛ, Wɛ́ɖɛ́zììn ɓɛ́ ɔ mɔ̀ ma Síwíɖíà-ɓòɖòɔ̀ kã́á kɛ kè Pɛ́kà ɓɛ́ ɔ mɔ̀ ma Wɛ̀ɖɛ̀máɖídyàà dyú-gàà, ɓɛ́ ɔ mɔ̀ ma Éézùɖùɛ̀-ɓòɖòɔ̀ kã́á kɛɛ kpa ma Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃, kɛɛ wa seɛ ma toún ɖuɛ ɓɛ́ìn.

² Ɓó tia ɓaɖaa, nyɔ ɖò cɛ̃ɛ ma Áhàzì mɔ̀à Dèɓéɛ̀ gbǒ-xwíníín-nyɔ̀ ɓěɔ̀ ɖòɛɛ gbo, ké ɔ ɖá, “Síwíɖíà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ ɖǎ wuɖu táí po.” Púɛɛ, Áhàzì kè ɔ nyɔ ɓěɔ̀ hwòɖǒ túò ma dyi kà pìɔ̌ túòà cu dyiɛ.

³ Hwɛ̀ ké Bounɓoɔ̀ cɛ̃ɛ ma mɔ̄ Àzédyà gbo, ké ɔ ɖá, “M̀ kè nì dyú-gàà Sɛ́ɔ̀-Jásù mɛ mu, ɓɛ́ ɓě kè Áhàzì ké ɓó ní-hwìè ɓɛ́ ɔ sɔ̀ ɖé ní-ɓì nì ɖé hwɔɖɔɔ̀ toɖoɔ̀ dya, ɓɛ́ ɔ mu ɖé hwɔɖɔɔ̀ múɛɛ wĩín gmɔ̌ìn. Ɔ mɔ̀ ɓó hwìè ɓɛ́ ɔ mu ɖé dɛ̀ ɓɛ́ ɖɔ-wɔɔ̀-nyɔ̀ ɓě nyu kũ̀à kɛɛ kɔ̃.

⁴ M̀ mɛ cɛ̃ɛ ɔ gbo, ɓɛ́ m̀ ké níiń, ‘M̀ mɛ ma mú. M̀ mɛ nì gìɖìǐ. Mɔ̀ǔn ɖá ɓɛ́ m̀ ké fɛ̃̀ìn, mɔɔ ɓɛ́ nì hwòɖǒ ké kpéí hwɛ̀ ɓó Wɛ́ɖɛ́zììn mɔ̀à Síwíɖíà-kã̀ǎɔ̀ kɛ kè Wɛ̀ɖɛ̀máɖídyàà dyú-gààɔ̀ dyoɖo vɛ̀nɛ̀ɔ̀ jè, sepóɛɖé wa nyɔ sɔ̃́ɔ̀ hwɔìn nyɛ nì ɓúɛń ɖòùn pū.

⁵ Síwíɖíà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ ɔ kè Wɛ̀ɖɛ̀máɖídyàà dyú-gààɔ̀ ɖǎ ɖɛ gbà dyí sɔ́ ɓá m̀ dyí. Wa cɛ̃ɛ, ké wa ɖá,

⁶ “Ɓěà kpa Júɖà-ɓòɖòɔ̀ to kɔ̃, ɓɛ́ ɓěà kéɛ fã̀àǔn po, ɓɛ́ ɓěà kéɛ toún ɖu, nìí ɓɛ́ ɓěà ké Táɓèòɛ̀ dyú-gààɔ̀ kã́á mú nyu ɓóɛ kɔ̃in.”

⁷ “ ‘Kɛɛ Bounɓo Ɖɛɓíɔ́ ɖá, “Ɔ se ná nìɛ̌ mu. Ɖɛ wa cɛ̃à kɛɛ se ná kpáa mu.

⁸ Sepóɛɖé Síwíɖíà-ɓòɖòɔ̀ se kpé ɓéɖé ɓɛ́ ɔ ké Dìmásìkɔ̀ mɔ̀à ɔ dìɓà-hwɔ̀ɖɔ̀ɔ̀ kɛɛ dyí zi, ké Dìmásìkɔ̀ mɔ̀ùn se kpé ɓéɖé ɓɛ́ ɔ ké Wɛ́ɖɛ́zììn mɔ̀à ɔ kã́áɔ̀ kɛɛ dyí zi. Zɔ̃ kpáɖá-nyɔ tã sè hm̀m̌ kéá zi ní, nìí, Éézùɖùɛ̀-dyù ɓěɔ̀ mu mú gbɔɔ̀ùn, ɓɛ́ wa ké se ɓóɖó-dù ɖò jǔ ɖe.

⁹ Éézùɖùɛ̀-ɓòɖòɔ̀ se kpé ɓéɖé ɓɛ́ ɔ ké Sɛ̀mɛ́ɖìà mɔ̀à ɔ dìɓà-hwɔ̀ɖɔ̀ɔ̀ kɛɛ dyí zi, ké Sɛ̀mɛ́ɖìà mɔ̀ùn se kpé ɓéɖé ɓɛ́ ɔ ké Wɛ̀ɖɛ̀máɖídyàà dyú-gàà mɔ̀à ɔ kã́áɔ̀ kɛɛ dyí zi. Ɔ jǔ ké ɓě se dyi ku ɖé ɓěɛ̀ hwìɖǐǐ-taɓa-taɓaɔ̀ múín, nìí, ɓě se dyi nyànàà ɓɛ́ǐn mu fɔɔ cá.” ’ ”

Ɖàɓàìn-ɖɛ̀ ɓá Ìmádyùɛ̀ jè dyíɛ

¹⁰ Ké Bounɓoɔ̀ tò ma Áhàzì wuɖu ɖò gbo ɖe, ké ɔ ɖá,

¹¹ “Diè mɔ̄ Bounɓo mɔ̀à nì Gèɖèpɔ́ɔ̀ kɛɛ dyi, ɓɛ́ ḿ ké m̀ ɖàɓàìn-ɖɛ̀ ɖò dyí tɛ̀mɛ̀ìn. Kɛbì ɔ mɛ sɔ̀ ɖé ɓóɖó-hwùɖù vɛ̃in dɛ̀ ɓɛ́ gĩɔ-nyɔ̀ ɓěɔ̀ nìà kɛ, mɔɔ kɛbì ɔ mɛ sɔ̀ ɖé dyɔún wɛ̃ɛ, ní muɛ m̀ dyí tɛ̀mɛ̀ìn.”

¹² Kɛɛ Áhàzì ɖá, “Ḿ seɛ nyuɛ́ mu. Ḿ se Bounɓoɔ̀ mú dɔ̃̌ɔ mu.”

¹³ Hwɛ̀ ké mɔ̄ Àzédyà zà ma ɖé wuɖu, ké ḿ ɖá, “Óó Dèɓéɛ̀ gbǒ-xwíníín-nyɔ̀ ɓě, kà ɓɛ́ ɓě ɖǎà nyɔǔn-dyùɛ̀ hwòɖǒ-ku-ku mú dɔ̃̌ɛɛ, ɓě se ɓó sèìn, kɛɛ ɓě mɔ́ ní Gèɖèpɔ́ɔ̀ nììn hwòɖǒ-ku-kuɔ̀ mú dɔ̃̌ɔ dyi ɖekèè?

¹⁴ Ɔ jèɛɛ, Ɖɛɓíɔ́ɔ̀ mìɔùn mu ɓě ɖàɓàìn-ɖɛ̀ ɖò dyí tɛ̀mɛ̀ìn. Ɖàɓàìn-ɖɛ̀ɔ̀ mɔ̀, màa-dyù gmɔ̀ ɖò ɓɛ́ ɔ se toɖo kɔ̃ jè dyuòɛɛ mu zùù kɔ̃ nììn, ké ɔ mu gàa-dyù ɖò wóɖóìn, ké ɔ mu ɔ Ìmádyùɛ̀-nyɛ̀nɛ̀ jǔìn.

¹⁵ Hwɛ̀ ɓɛ́ ɔ ké ɖɛ gbà gbo nɔ́ɔ̀ dyuò, ɓɛ́ ɔ ké ɖɛín-ɖɛ̀ gãa dyuòɛɛ, ɓìɖǐ-nɛɛ̀-nì kè ɖo-nì mu ɔ ɖii-ɖɛ̀ jǔùn.

¹⁶ Kɛɛ hwɛ̀ ɓɛ́ gàa-dyù-gbɔ́ɔ̀ ké ɖɛ gbà gbo nɔ́ɔ̀ dyuò, ɓɛ́ ɔ ké ɖɛín-ɖɛ̀ gãa dyuòɛɛ, ɓóɖó ɓě kɔ̃̀ fã̀à ɓɛ́ mɔ̀ kã́áɔ̀ peɖeà kɛɛ, waà kã́á sɔ̃́ ɓěɔ̀ mu wa kɔ̃ wãùn.

¹⁷ “Kɛɛ Bounɓoɔ̀ mu wé nyìnììn dyíin ɖò m̀ kè m̀ ɓǎà gbǒ-xwíníín-nyɔ̀ ɓěɔ̀ ɔ kè nì nyɔ ɓěɔ̀ kɔ̃ dyàùn. Ɔ mu wɔ̃ kuùn mìɔ ɓɛ́ ɔ ké ti ɓɛ́ Éézùɖùɛ̀-nyɔ̀ ɓěɔ̀ kpá ma wáká sɔ̀ìn ɓó Júɖà-nyɔ̀ ɓěɔ̀ bũ̌ɛɛ dyí zi. Ɔ mu Àsíwíɖíà-kã̀ǎɔ̀ dyàùn.

¹⁸ “Ɓó wéa ɓaɖaa, Bounɓoɔ̀ mu pĩɔ́ ɓaɖaùn, ɓɛ́ Íjè-nyɔ̀ kúɖúú ké Náà-nìɔ̀ wĩin sɔ̀, ɓɛ́ wa ké dyi kà dɛ̃̌-tò dyià kɛ, ɔ kè ɓɛ́ Àsíwíɖíà-nyɔ̀ ɓěɔ̀ ké dyi kà ɖo kúɖúú dyià kɛ.

¹⁹ Ké wa kúɖúú ɓěɔ̀ mu dyiìn, ɓɛ́ wa ké bɔɔ ɓěɔ̀ kɔ̃ wáɖá, ɓɛ́ wa ké sɔ́ɔ́-ɓì ɓěɔ̀ mú dyi dyíìn, ɓɛ́ wa ké wí-cù séín dya dyi dyíìn, ɓɛ́ wa ké nyúà-ɖɛ̀ dyi-ɖi-naín séín dyi dyíìn.

²⁰ “Ɓó wéa ɓaɖaa, Ɖɛɓíɔ́ɔ̀ mu jɛ̃̌ ɖò ɖé Dyùféɖétì-nìɔ̀ ɖeín zàùn. Jɛ̃̌ɔ̀ mɔ̀ Àsíwíɖíà-kã̀ǎɔ̀. Ɔ mu ɓěɛ̀ dúún-mìɔ̀ kè ɓěɛ̀ vɛ̃̌ ɓěɔ̀ ɔ kè ɓěɛ̀ mí tɔ̀ɔ̀ ɓěɔ̀ kpanaùn.

²¹ “Ɓó wéa ɓaɖaa, ɔ jǔ ké gàa ɖò dyiɔ́ má ɓìɖǐ gmɔ̀ ɖò kè ɓáɖáá sɔ̃́ nyɛ̀nɛ̀ɛ̀ po ní,

²² nìí, ɔ mu ɓìɖǐ-nɛɛ̀-nì wè ɓéɖéìn, ɓɛ́ ɔ kéɛ ná. Sepóɛɖé ɓìɖǐ-nɛɛ̀-nì kè ɖo-nì ɖòùn mu nyɔ séín sè ɖé ɓóɖóɔ̀ kɔ̃ɛɛ ɖii-ɖɛ̀ jǔùn.

²³ “Ɓó wéa ɓaɖaa, dɛ̀ ɓɛ́ géɖéè-ɖúú-gbǒ táázĩ̀ìn ɖò ɓɛ́ wa ɓɛ́ìn séɓàɖà-cɛ̀kò táázĩ̀ìn ɖò kpaa kɛɛ nì ma kɛɛ, ɓó muá pìǐ-kpò kè wí-gbǎ jǔùn.

²⁴ Nyɔǔn muá ɖé sé kè pɔnɔ xwáɖáún pàìn, sepóɛɖé ɓóɖó gànáɔ̀ muá pìǐ-kpò kè wí-gbǎ jǔùn.

²⁵ Toɖo ɓě kɔ̃̀ dya ɓɛ́ wa wàìn ma káɖá, ɓɛ́ wa dyi ma ɖé ɓáá-ɖɛ̀ ɓá kɛɛ, nyɔ ɖò se ɖé muɛ́ mu ɖe, sepóɛɖé ɖé muá pìǐ-kpò kè wí-gbǎ saá-saá jǔùn. Ɖé muá ɓìɖǐ kè ɓáɖáá ɓěɛ̀ dyi-ɖi-naín jǔùn pū.”