Àzédyà 65 - Ɓǎsɔ́ɔ̀ Báɓòɔ̀

Gǎ ɓɛ́ Gèɖèpɔ́ɔ̀ tò ɔ kɛ́ɛ́-mú-nyu-nyɔ̀ ɓěɔ̀ kɔ̃ɛ

¹ Bounɓoɔ̀ cɛ̃ɛ ɖe, ké ɔ ɖá, “Ḿ dyé ma ti, ɓɛ́ ní nyɔ ɓěɔ̀ dyi ma ḿ ɓaà ní, nìí, ḿ ké ma wɔ̃́, kɛɛ wa ní ɓaà ḿ. Ḿ dyé ma ti, ɓɛ́ wa dyi ma ḿ dyi mɔ́ ní, nìí, wa ké ma ḿ da dyé, kɛɛ wa seɛ ma náa nyuɛ mɔ́ dyɛ mɔ̀ùn. Ḿ dyé ma ti, ɓɛ́ ḿ ké ma wa gɔ̃̌ jǔ, ɓɛ́ ḿ ké níiń, ‘Mɔ̄ kɛ̀, ní mu ɓě gbo kpáùn,’ kɛɛ wa se ma ḿ ɓaà dyɛ mɔ̀ùn.

² Ḿ gba ma sɔ̃ xwáɖá ɓó ḿ kɛ́ɛ́-mú-nyu-nyɔ̀ ɓěɔ̀ jè. Wa mɔ̀ nyɔ ɓě ɓɛ́ wa nì ɖɛ gbà ɓě kè wa mìɔùn nììn hwòɖǒɛ̀-gbɔ-po-ɖɛ̀ ɓě nyuɛń nyɛ.

³ Wa mɔ̀ nyɔ ɓě ɓɛ́ wa gmɔ̀ ɖé ḿ dyéɖéín, ɓɛ́ wa dyi ní dyoɖoún-po-ɖɛ̀ ɓě nyu teeɛ. Wa nì sáa zàǔn ɖé waà ɓáá-ɖɛ̀-gbǎ ɓěɔ̀ mú, ké wa nì nyɔ́ún-nɔ̀mɔ̀-ɖɛ̀ ɓě fɔ̃uń ɓó sáa-kɔ̃-zàìn-gbàà ɓě ɓɛ́ wa pòìn bèɖěkèɛɛ kɔ̃.

⁴ Wa kò ɖé kú-toɖo ɓěɔ̀ múin ɓó máaún, ké wa nyu máaún-hwùɖù gàná ɖé vǐè-dà ɓě. Wa ɖi ɓeéɛ̀ fɔ́, ké nimii ɓě mɔ̀ se-mú-hwɛ̀-nìmìì ɓěɛɛ suaɖɛ̀ mɔ̀ cɔ́ɔ́, ké ɔ nì ɖé waà ɖɛ-fùù ɓěɔ̀ mú.

⁵ Wa cɛ̃ɛ, ké wa ɖá, ‘Ɓě kpáìn ɖé nya dyi. Ɓěǐn ɖá ɓɛ́ ɓě ké à bũ̌in xwɛ̃́ìn, sepóɛɖé à ɖǎ wáká kpá ɓó Gèɖèpɔ́ɔ̀ bìì sɔ̀ìn ɓó ɓě bũ̌.’ Nyɔ nì ná ɓěa mɔ̀ nyànà-sò ɖé ḿ máná-ɓìǐn. Wa po ḿ dyoɖoún kánáá pū kà nyànà-sò nìà kɛ.

⁶ “Ɔ ná nì jèɛɛ, ɔ ɖǎ céè ɓó ḿ dyéɖé waí kà ḿ se gìɖìǐ nìɛ̌ muɛ. Ní mu wa pɛ́ɛ̀ìn gàná cá

⁷ ɓó waà ɖɛ gbà ɓěɔ̀ kè wa ɓǎ nììn ɓǎ ɓěɛ̀ ɖɛ gbà ɓěɔ̀ jè. Ní muɛ náa nyuùn, sepóɛɖé wa fɔ̃̀ìn nyɔ́ún-nɔ̀mɔ̀-ɖɛ̀ ɖé toɖo vɛ̀nɛ̀ ɓěɔ̀ dya, ké wa po ḿ dyií dyi ɖé toɖo-dyù ɓěɔ̀ dya. Ní mu waà pɛ́ɛ̀-ɖɛ̀ɔ̀ ɖàɓàìn, ɓɛ́ ḿ kéɛ wa kɛ́ín púè ɓó ɖɛ gbà ɓě ɓɛ́ wa nyu ma kĩ́ín nyɛɛ jè. Mɔ̄ Bounɓoɔ̀ mɔ̀ nyɔ cɛ̃à kɛ̀.”

⁸ Bounɓoɔ̀ cɛ̃ɛ ɖe, ké ɔ ɖá, “Kà ɓɛ́ géɖéè-hwàɖàɔ̀ dyià níín nì ke ní, wa cɛ̃à, ɓɛ́ wa dyi níiń, ‘Ɓě ɓɔ́ɔ mú gbɔɔ̀, sepóɛɖé ɖɛín-ɖɛ̀ ɖò nìɛ̀ mú keo’ kɛɛ, kà dyúáɖòɔ̀ kǎà ní muɛ nyuùn ɓá ní gbo-nì-nyɔ̀ ɓěɔ̀ jè dyí. Ḿ se wa séín mú gbɔɔ̌ mu.

⁹ Ní mu nyɔ xwéɖé wè ɖé Jékɔ̀ɛ̀ xwíníín-dyù ɓěɔ̀ kè Júɖàà xwíníín-dyù ɓěɔ̀ hwìɛ̀ zàùn, ɓɛ́ wa ké ní toɖo-ɓòɖòɔ̀ wuɖuí kɔ̃̀ kánáá pū. Ní nyɔ ɓě ɓɛ́ ḿ ɖǎà gã kɛɛ, wa muɛ wuɖuí kɔ̃̀ùn, ké ɖéɛ̀ ní gbo-nì-nyɔ̀ ɓěɔ̀ mu cĩ́ìn.

¹⁰ Sáwɔ̀ɖɔ̀ùn Bɔɔ-kpàɔ̀ kɔ̃ mu nyúà-ɖɛ̀ dyi-ɖi-naín jǔùn, ké Ákɔ̀ Bɔɔ-kpàɔ̀ kɔ̃ mu nyúà-ɖɛ̀ dyi-pɛ̃́-naín jǔùn ɓó ní nyɔ ɓě ɓɛ́ wa ɓiè ḿ wɛ̃ɛ bìì.

¹¹ “Kɛɛ ɓá ɓě mɔ̀ nyɔ ɓě ɓɛ́ mɔ̄ Bounɓoɔ̀ jè sɔ̀à ɓě hwìɖǐi, ɓɛ́ ɓě dyià ní toɖo hwɛ̀ǐn-hwɛ̀ǐnɔ̀ dyi táà, ɓɛ́ ɓě dyià ɖii-ɖɛ̀-sàǎ-zàìn-ɖɛ̀ ɓěɛ̀ gèɖèpɔ́ɔ̀ kɔ̃̀ nyɛ́nɛ́ mɔ̀à Mana kɛɛ bìì nyu, ɓɛ́ ɓě dyià náá-ɖɛ̀-sàǎ-zàìn-ɖɛ̀ ɓěɛ̀ gèɖèpɔ́ɔ̀ kɔ̃̀ nyɛ́nɛ́ mɔ̀à Sèìn-Naín nyɛɛ bìì nyuɛɛ,

¹² ní mu ɓě gàsíàɔ̀ xwáɖáún zàìn, ɓɛ́ ɓě kéɛ dyúa sè. Sepóɛɖé ti ɓɛ́ ḿ ɖá ma kɛɛ, ɓě se ma ḿ gɔ̃̌ jǔ. Ti ɓɛ́ ḿ wùɖù ma kɛɛ, ɓě se ma ḿ ɖùǔ gbo tò. Kɛɛ ɓě nyu ma ḿ nàmàǔn bũ̌. Ɓě gã ma ɖɛ ɓɛ́ ní hwòɖǒ se múin dèìn nyɛ.

¹³ Ɔ ná nì jèɛɛ, ɖɛ mɔ̄ Bounɓo Ɖɛɓíɔ́ cɛ̃ɛ kɛà kɛ̀. Gmɔ̀ nɔ̄, ní gbo-nì-nyɔ̀ ɓěɔ̀ mu ɖɛ ɖiìn, kɛɛ mɔ́ mu ɓě mɔ̀ùn nyuùn. Wa mu ní náùn, kɛɛ ní-ná-tò mu ɓě mɔ̀ùn nyuùn. Wa mu múàǔn kpáùn, kɛɛ dɛ̃ mu ɓě mɔ̀ùn dyéɖéín sèìn.

¹⁴ Wa mu múàǔn kpáùn, ɓɛ́ wa ké ɓeɖe, kɛɛ ɓě mɔ̀ùn mu mú pánáùn ɓó ɖɛ mu ɓěɛ̀ hwòɖǒ-dyùàɔ̀ puàùn wɛ̃ɛ jè. Ɓě mu vĩ̌ìn ɓó ɖɛ mu ɓěɛ̀ hwòɖǒ-dyùàɔ̀ dyi wàìn nyɛɛ jè.

¹⁵ Ɓěɛ̀ nyɛ́nɛ́ɔ̀ mu gboò-wùɖù jǔùn ɖé ní nyɔ ɓě ɓɛ́ ḿ ɖǎà gãa wĩín, ké mɔ̄ Bounɓo Ɖɛɓíɔ́ mu ɓě ɖáɓáùn. Kɛɛ ní mu ní gbo-nì-nyɔ̀ ɓěɔ̀ nyɛ́nɛ́ ɖìè ɖò jǔìn.

¹⁶ Ɔ ɖǎ ná nìǐn, nìí, nyɔ mɔ̀ nyɔ ɓɛ́ ɔ mu nyɔ ɖò mana kɔ̃ poùn ɖé ɓóɖóɔ̀ kɔ̃ɛɛ muɛ náa nyuùn ɖé mɔ̄ jǎà Gèɖèpɔ́ɔ̀ mú, ké nyɔ mɔ̀ nyɔ ɓɛ́ ɔ mu wuɖu-ɖi-ɖi ɖò nyuùn ɖé ɓóɖóɔ̀ kɔ̃ɛɛ, ɔ mu mɔ̄ jǎà Gèɖèpɔ́ɔ̀ dyí gboòùn. Sepóɛɖé fũ̀à-fṹá sùà séínɔ̀ jè mu wa hwìɖǐi sɔ̀ùn, ké ɔ se wa kɔ̃ dyiɛ́ mu ɖe fɔɔ.”

Mɛɛ-ɖɛ̀ ɖìèɔ̀ jè

¹⁷ Bounɓoɔ̀ cɛ̃ɛ ɖe, ké ɔ ɖá, “Gmɔ̀ nɔ̄, ní mu dyɔɔ̀ ɖìè ɖò kè ɓóɖó-kpà ɖìè ɖò mɛìn. Ké ɖɛ sùà ɓěɔ̀ ɖò se nyɔ ɖò hwìɖǐi nìɛ̌ mu, mɔɔ ké ɖò se nyɔ ɖò hwìɖǐi dyiɛ́ mu ɖe fɔɔ.

¹⁸ Ɓě mɛ kpá múàǔn, ɓɛ́ ɓěɛ̀ hwòɖǒ ké ɖɛ ɓě ɓɛ́ ní mu mɛìn nyɛɛ múin dèìn. Gmɔ̀ nɔ̄, ní mu Jùɖúsɛ̀ɖɛ̀ìn-hwɔ̀ɖɔ̀ɔ̀ poùn ɖe, ɓɛ́ ɔ nyɔ ɓěɔ̀ kéɛ múà múin kpáìn.

¹⁹ Ní mu múàǔn kpáùn ɓó Jùɖúsɛ̀ɖɛ̀ìn-hwɔ̀ɖɔ̀ ɖìèɔ̀ jè, ké ní hwòɖǒ mu dyi dèìn ɓóɛ nyɔ ɓěɔ̀ jè. Nyɔ ɖò se vĩ̌-wùɖù ɖò mɔɔ kpé-po-wùɖù ɖò ɖéɛ mú wɔ̃́ɔ mu ɖe.

²⁰ Dyú-pɛ̀ɖɛ̀ ɖò se ɖé ɔ ɖe xwa sɔ̀ɔ̌ mu, mɔɔ nyɔ sùà ɖò kɔ̃̀ zɔ̃ se ɖé hwɛ̀ɛ se ɖé mɛ́ɛ mu. Nyɔ mɔ̀ nyɔ ɓɛ́ ɔ nyu zɔ̃ hɔ̃dɛ̀ɖɛ̀ ɓɛ́ ɔ dyi mɛ́ɛ, wa muɛ cɛ̃ìn kà ɔ sè gmɔ̀ kɔ̃ ké ɔ mɛ́ɛ. Ké nyɔ mɔ̀ nyɔ ɓɛ́ ɔ se zɔ̃ hɔ̃dɛ̀ɖɛ̀ nyu ɓɛ́ ɔ dyi mɛ́ɛ, wa muɛ cɛ̃ìn kà gboò-wùɖù nì ɔ kɔ̃ɛ.

²¹ Wa mu ɖé gbǒ ɓě poùn, ké wa muɛ mú cĩ́ìn. Wa mu ɖé géɖéè ɓě ɓáùn, ké wa muɛ ɓo ɖiìn.

²² Wa se waà gbǒ ɓěɔ̀ poɛ́ mu, ɓɛ́ nyɔ kà kò ɖò ké wa mú cĩ́. Wa se waà ɓáá-ɖɛ̀ ɓáa mu, ɓɛ́ nyɔ kà kò ɖò kéɛ ɓo ɖi. Kà cu-gɔ̃̀ nyuà hwèɖèɛ̀n nyɛɛ, kǎà ní nyɔ ɓěɔ̀ mu nììn, sepóɛɖé ní nyɔ ɓě ɓɛ́ ḿ ɖǎà gã kɛɛ, wa mu waà sɔ̃ɔ̀ kũ̀à ɓěɔ̀ múà múin kpáìn kánáá pū.

²³ Wa se pídyi-kũ̀à nyuɛ́ mu, mɔɔ ké wa se dyú ɓě ɓɛ́ ɖɛ gbà kɔ dyí kánáá pūɛɛ wóɖóɛ̌n mu, sepóɛɖé mɔ̄ Bounɓoɔ̀ mu wa kè waà dyú ɓěɔ̀ mana kɔ̃ poùn.

²⁴ Hwɛ̀ ɓɛ́ wa ké ḿ ɖáa, ní mu wa gɔ̃̌ jǔùn. Wuɖuɔ̀ mu wa wĩín dyi gã̀ùn, ké ḿ wɔ̃́ɔ.

²⁵ Ji kè ɓáɖáá-dyù mu dà dyúáɖò ɖɛ ɖiìn, ké ganìǎ mu pìǐ ɖiìn kà ɓìɖǐ ɖià pìǐɛ, ké ɓóɖó mu sɛ nììn ɖii-ɖɛ̀ jǔùn. Nyɔ-puà-ɖɛ̀ ɖò mɔɔ ɖɛ-mú-gbɔɔ̀-ɖɛ̀ ɖò se ɖé ní toɖo hwɛ̀ǐn-hwɛ̀ǐnɔ̀ dya nìɛ̌ mu. Mɔ̄ Bounɓoɔ̀ mɔ̀ nyɔ cɛ̃à kɛ̀.”