Àzédyà 64 - Ɓǎsɔ́ɔ̀ Báɓòɔ̀

¹ Nyɛ́ ɖá m̀ fáɔ́ má dyɔɔ̀ wɔ̃, ké m̀ síɔ́ má ɓíɖíi, ɓɛ́ toɖo vɛ̀nɛ̀ ɓěɔ̀ kéɔ́ má tɛɖɛ ɓó m̀ dyúa kɛ́?

² Ɔ muɔ́ má nììn kà nyɛ dyɛ-dyɛ kpɔ̃à dyí, nìí ɓɛ́ nyɛɔ̀ dyià nyu ɓɛ́ ní dyià púɖúɛ. Ɔ muɔ́ máa nyuùn ɓɛ́ nì gbo-vɔ̃-nyɔ̀ ɓěɔ̀ kéɔ́ má nì nyɛ́nɛ́ɔ̀ dyuò, ɓɛ́ ɓóɖó-dù ɓěɔ̀ kéɔ́ má kɔ̃in tɛɖɛ ɓó m̀ dyúa.

³ Ti ɖòɛ̀ ɓaɖaa, m̀ dyi ma ɓíɖíi, ké m̀ nyu ma dĩ́ín-dĩ̀ìn-ɖɛ̀ ɓě kɔ̃̀ jè à se ma hwìɖǐi dèɛ. Toɖo vɛ̀nɛ̀ ɓěɔ̀ tɛɖɛ ma ɓó m̀ dyúa.

⁴ Nyɔ ɖò séè Gèɖèpɔ́ɔ̀ ɖò dyé ɖò, mɔɔ ké ɔ séèɛ̀ ɔ jè wɔ̃́ ɖò, ɓɛ́ ɔ ké nì kà m̀ nìà kɛ, ɓɛ́ ɔ ké ɖɛ dĩ́ín-dĩ̀ìn ɓě nyu ɓó nyɔ ɓě ɓɛ́ wa dè ɔ hwòɖǒ kɔ̃ɛɛ bìì.

⁵ M̀ kpá nyɔ ɓě ɓɛ́ wa ɖɛ̀ɓɛ̀ dyí-sɛ́ɖɛ́ìn-ɖɛ̀ nyu-nyu múɛɛ gbo. Wa mɔ̀ nyɔ ɓě ɓɛ́ wa sí nì kpeɖe kíɖííɛ. Kɛɛ ti ɓɛ́ à nì ma nàmàǔn nyuɛń kánáá pūɛɛ, m̀ kpáìn ma à dyoɖoún. Kà ɔ nìà náa, nìí, à ɓɛ́ìn póɛe?

⁶ À séín ɖǎ nàmàǔn nyu, ké à mɔ̀ se-mú-hwɛ̀-nyɔ̀, ké à dyí-sɛ́ɖɛ́ìn-kpèɖè séínɔ̀ nì kà ɖɔ-zɔ̃̀ kpɔ̃ zɛ̀nɛ̌ nìà kɛ. À séín hwɔìn cu-mì ɓě ɓɛ́ wa keè ké wa wáɖá kɛ, ké à ɖɛ gbà ɓěɔ̀ ɖǎ à kpa kà pìɔ̌ kpaà ɖɛ ɖò kɛ.

⁷ Nyɔ ké ḿ ɓiè kɛɛ ɖò se nì. Nyɔ ɖò se nì, ɓɛ́ ɔ ké ɓó m̀ jè gbo dyi kpɔ̃, sepóɛɖé m̀ ɖǎ à dyúa xwáɖáún pòìn, ké m̀ ɖǎ à ɖé à ɖɛ gbà ɓěɔ̀ xwaún dyi táà.

⁸ Kɛɛ wɛ̃́ɛ́ kɛɛ, Bounɓo, mɔ̀ mɔ̀ à ɓǎ. À mɔ̀ mɛɔ̀, ké mɔ̀ mɔ̀ mɛ-dyàà-mɛ-nyɔ̀ɔ̀. À séín mɔ̀ nì sɔ̃ɔ̀ mɛɛ-ɖɛ̀.

⁹ Mɔ̀ǔn ɖá ɓɛ́ m̀ ké dyoɖoún kpá mìɔo, Bounɓo. Mɔ̀ǔn ɖá ɓɛ́ à ɖɛ gbà ɓěɔ̀ jè ké m̀ hwìɖǐi nì kánáá pū. À ɓaà m̀ ní, gmɔ̀ à kɔ̃. À séín mɔ̀ nì nyɔ ɓě.

¹⁰ Nì hwɔɖɔ hwɛ̀ǐn-hwɛ̀ǐn ɓěɔ̀ mɔ̀ǎ gbǎùn-fúɖúá. Zádyɔún-hwɔ̀ɖɔ̀ mɔ̀à Jùɖúsɛ̀ɖɛ̀ìn-hwɔ̀ɖɔ̀ɔ̀ kɛɛ ɖǎ fóɖóún kpá. Ɔ mɔ̀ǎ gbǎùn-fúɖúá.

¹¹ À gbǒ hwɛ̀ǐn-hwɛ̀ǐn nɔ̀mɔ̀ dyíin kɔ̃̀ mú ɓɛ́ à ɓǎ nììn ɓǎ ɓě ɓàìn zɔ̃̌ɔ̀ m̀ wɛ̃ɛ ɖǎ sĩɛ hwɛ̀, ké à pá nɔ̀mɔ̀ kɔ̃in séín ɓěɔ̀ ɖǎ fóɖóún kpá.

¹² Bounɓo, nì mu m̀ mìɔùn dyí kpɔ̃ùn kánáá pū ɓá ɖɛ ɓěa jè dyíì? Nì mu à gǎ kɔ̃ tòùn kánáá pūù?