Àzédyà 63 - Ɓǎsɔ́ɔ̀ Báɓòɔ̀

Bounɓoɔ̀ ɖu ɓóɖó-dù ɓěɔ̀ toún

¹ Nyɛ́ mɔ̀ nyɔ sɔ̀à ɖé Bɔ́zàɖà-hwɔ̀ɖɔ̀ nìà ɖé Íɖɔ̀ùn-ɓòɖòɔ̀ kɔ̃ɛɛ mú kɛ́? Nyɛ́ mɔ̀ nyɔ poà ɖɔ zĩ-zã nɔ̀mɔ̀ dyíin mú, ɓɛ́ ɔ dyià nàǔn nì kà sójà nàà ɖé kpé vɛ̀nɛ̀ múɛɛ kɛ́? Ɔ mɔ̀ Bounɓoɔ̀. Ɔ nì dyiɛń ɖé ɔ nyɔ-póìn-kpèɔ̀ mú. Ɔ nì dyiɛń, ɓɛ́ ɔ ké wuɖui po ɓá ɔ to-ɖu-ɖuɔ̀ jè dyí.

² Bounɓo, ɖɛ́ kɔ̃̀ jè nì mú-po-ɖɔ̀ɔ̀ nìà zĩ-zã kà nyɔ ɓɛ́ ɔ sɔ̀ géɖéè mú píníɛń nyɛɛ mú-po-ɖɔ̀ nìà kɛɛ́?

³ Bounɓoɔ̀ zà ɖé wuɖu, ké ɔ ɖá, “Ḿ ɖòǔn mɔ̀ nyɔ síìn ma géɖéè mɔ̀à ɓóɖó-dù ɓěɔ̀ kɛɛ kɔ̃in, ké nyɔ ɓěɔ̀ ɖò se ma ḿ gbo kpá. Ḿ síìn wa kɔ̃in ɖé ní dyoɖoɔ̀ mú. Waà nyɔmɔɔ̀ mɔ̀ ɖɛ mɛ́nɛ́ìn kà ní mú-po-ɖɔ̀ɔ̀ dyai, ké ɔ ɖǎà ní ɖɔ séínɔ̀ kpɔ̃ɛ̀.

⁴ Sepóɛɖé kpa-zà-tìɔ̀ jè nì ma ɖé ḿ hwòɖǒ bũ̌, ké ní nyɔ ɓěɔ̀ póìn-zɔ̃̀ɔ̀ ɖǎ ɓó nyini.

⁵ Ḿ gmɔìn ma dyi, kɛɛ nyɔ ké ma gbo-kpá-kpá tòɛɛ ɖò se ma nì. Ḿ giniìn ma dyi mìɔ kà ɓɛ́ nyɔ ɖò se ma nìɛ. Ɔ jèɛɛ, ḿ mìɔùn nììn kpéɔ̀ dyà ma ḿ to-ɖu-ɖu, ké ní dyoɖo-hwòɖòɔ̀ kpɔ̃ ma ḿ dyií dyi.

⁶ Ḿ síìn ma ɓóɖó-dù ɓěɔ̀ kɔ̃in ɖé ní dyoɖoɔ̀ mú, ké ḿ nyuɛ ké wa nì kà nɔmɔɔ-nyu-nyɔ̀ nìà kɛ. Ké ḿ púè waà nyɔmɔɔ̀ ɓó ɓíɖíi dyi.”

Kpeɖeɛ̀-dyíin-nɔ̀mɔ̀-nɔ̀mɔ̀ ɓɛ́ Bounɓoɔ̀ ɓéɖé ɓó Éézùɖùɛ̀-nyɔ̀ ɓěɔ̀ bììɛ

⁷ Ní mu Bounɓoɔ̀ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè hwòɖǒ gboi nàìn. Ní mu ɔ ɓàìn ɓó ɖɛ nɔ̀mɔ̀ kɔ̃in séín ɓě ɓɛ́ ɔ ɖǎ à mɔ̀ Éézùɖùɛ̀ɛ̀ gbǒ-xwíníín-nyɔ̀ ɓěɔ̀ nyíɛɛ jè, ɔ kè ɓó kpeɖeɛ̀-dyíin-nɔ̀mɔ̀-ɖɛ̀ ɓě ɓɛ́ ɔ ɖǎ à bìì nyuɛɛ jè. Ɔ nyuɛ náa dyììn ɖé ɔ wììɔ̀ kè ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ mú.

⁸ Sepóɛɖé Bounɓoɔ̀ cɛ̃ɛ, ké ɔ ɖá, “Wa mɔ̀ ní nyɔ ɓě jǎà jɛ́ɛ́. Wa mɔ̀ ní dyú ɓě ɓɛ́ wa se ḿ gbá-gbá mú nyuɛɛ ɓɛ́ìn nyɛ.” Ɔ jèɛɛ, ɔ mɔ̀ ma waà póìn-nyɔ̀.

⁹ Fũ̀à-fṹá-ɖɛ̀ séín ɓě ɓɛ́ wa dyé ma dyíɛɛ, ɔ kè wa peɖeɛ̀n ma mú ɖekè. Ké ɔ ínjàɔ̀ póìn ma wa. Bounɓoɔ̀ póìn ma wa dyììn ɖé ɔ ɖɛ̀ɓɛ̀ǐn-ɖɛ̀ɓɛ̀ǐn kè ɔ wììɔ̀ mú. Ɔ ɖú ma wa dyí, ké ɔ ɓéɖéìn wa xwaún dyi.

¹⁰ Kɛɛ wa nyu ma ɔ kɛ́ɛ́ mú, ké wa po ma ɔ Zùù Hwɛ̀ǐn-hwɛ̀ǐnɔ̀ hwòɖǒ ɖé ɖei. Ɔ jèɛɛ, ɔ zɛ̃̀ìn ma waà mú-nyɛ́-nyɔ̀ mú, ké ɔ mìɔùn vɔ̃ ma wa gbo.

¹¹ Kɛɛ púɛɛ, Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ nììn ti sùà ɓěɔ̀ jè dyi wa hwìɖǐi, ké wa ɖú ma ɖɛi diè kpàǐ, ké wa ɖá, “Dɛ̌ Bounɓo mɔ̀ nyɔ péɖéìn zɔ̃̌ɔ̀ kà ɔ nyɔ ɓěɔ̀ nàìn-nyɔ̀ ɓěɔ̀ dyóóɔ̀ kɛɛ nìɛ́? Dɛ̌ Bounɓo mɔ̀ nyɔ tò ma kà ɔ Zùù Hwɛ̀ǐn-hwɛ̀ǐnɔ̀ ɖé wa hwìɛ̀ kɛɛ nìɛ́?

¹² Dɛ̌ Bounɓo mɔ̀ nyɔ nyí zɔ̃̌ɔ̀ kà Mózè kpé vɛ̀nɛ̀ ɓɛ́ ɔ dyià ɖɛ ku kɔ̃in ɓě nyuɛɛ nì kɛ́? Ɔ ge zɔ̃̌ɔ̀ dyóóɔ̀ mú, ké ɔ nyɔ ɓěɔ̀ zĩ̀ìn zɔ̃̌ɔ̀ ɓó ní tɔ̀mɔ̀ǔn-tɔ̀mɔ̀ǔnɔ̀ hwòɖǒǔn ɓó ɓóɖó dyɛ-dyɛ kɔ̃. Ɔ nyuɛ ma náa, nìí ɓɛ́ ɔ nyɛ́nɛ́ ké mu kánáá pū.

¹³ Ɔ zĩ̀ìn zɔ̃̌ɔ̀ wa ɖé níɔ̀ hwòɖǒǔn kà sǒ zĩ̀ìn kà gbǎùn-fúɖúá kɔ̃ɛ, ké waà ɓìɛ̀ se taɓa.

¹⁴ Bounɓoɔ̀ Zùùɔ̀ nyí ma wa fɔ̀-fɔ̀ kà nyúà-ɖɛ̀ ɓě fɔ̀ìn kà ɖé waà dyi-ɖi-naín ɖé bɔɔ-kpà ɖò kɔ̃ɛ. Kǎà Bounɓoɔ̀ nyu ma ɔ nyɔ ɓěɔ̀ nàìn, nìí ɓɛ́ ɔ nyɛ́nɛ́ ké mu jè.”

Ɓaà-wùɖù ɓá nyɔ-wìǐn-dyé-dyé kè gbo-kpá-kpá jè dyíɛ

¹⁵ Bounɓo, mɔ̀ nìà ɖé dyɔún wɛ̃ɛ, gmɔ̀ ɓíɖíi sɔ̀ìn ɖé nì pá dĩ́ín-dĩ̀ìn mɔ̀à nì cĩ́-naín hwɛ̀ǐn-hwɛ̀ǐnɔ̀ kɛɛ mú. Dɛ̌ nì à jè kàmà-kàmàɔ̀ kè nì kpé vɛ̀nɛ̀ɔ̀ nì kɛ́? Dyéɛ, m̀ ɖǎ nì à jè kàmà-kàmàɔ̀ kè nì wììɔ̀ à bũ̌ zà.

¹⁶ Mɔ̀ mɔ̀ à ɓǎ, kɛbì Ééɓòɖòhɛ̃́ɛ̀ mɛ se à dyí dyuò, mɔɔ ɓɛ́ Jékɔ̀ ké se à jè mú wɔ̃́ìn nyɛ. Bounɓo, mɔ̀ mɔ̀ à ɓǎ. Mɔ̀ mɔ̀ à póìn-nyɔ̀ sɔ̀ìn ɖé ti sùà mú.

¹⁷ Óó Bounɓo, ɖɛ́ kɔ̃̀ jè m̀ nyuɛ ɓɛ́ à dyi nì hwìèɔ̀ dyí sɔ̀ìn nyɛ́? Ɖɛ́ kɔ̃̀ jè m̀ kùmùìn kà à hwòɖǒ-dyùà, ké à seà m̀ dyi fɛ̃̀ìn nyɛ́? Gmɔ̀ìn à gbo ɖe, sepóɛɖé à mɔ̀ nì gbo-nì-nyɔ̀, ké à mɔ̀ xwéɖé-dù ɓě mɔ̀ nì kɔ̃̀ɔ̀-ɖɛ̀ kánáá pūɛ.

¹⁸ À mɔ̀ nì nyɔ hwɛ̀ǐn-hwɛ̀ǐn ɓěɔ̀ kɛɛ kɔ̃̀ nì gbǒ hwɛ̀ǐn-hwɛ̀ǐnɔ̀ wuɖuí ɓó ti tííwè xwíníín, kɛɛ ɓó kàǔn wɛ̃ɛ, à gbo-vɔ̃-nyɔ̀ ɓěɔ̀ ɖǎa kɔ̃in síìn.

¹⁹ À hwɔìn nyɔ ɓě ɓɛ́ m̀ séè wuɖuí kɔ̃̀ ɖò fɔɔ cá kɛ. À hwɔìn nyɔ ɓě ɓɛ́ wa séè m̀ nyɛ́nɛ́ín mùìn ɖò fɔɔ cá kɛ.