Àzédyà 55 - Ɓǎsɔ́ɔ̀ Báɓòɔ̀

Gèɖèpɔ́ɔ̀ cɛ̃ɛ kà ɔ mu ɔ nyɔ ɓěɔ̀ wìì kɔ̃ ɓéɖéìn nyɛ

¹ Bounɓoɔ̀ cɛ̃ɛ ɖe, ké ɔ ɖá, “Nyɔ mɔ̀ nyɔ ɓɛ́ ní-ná-tò nyuɛɛ, ɔ mɛ dyi nɔ̄ níɔ̀ gbo. Nyɔ mɔ̀ nyɔ ɓɛ́ ɔ se wíɖí ɓéɖéɛɛ mɛ dyi pū. Ɔ mɛ dyi, ɓɛ́ ɔ ké ɖɛ ɖi. Ɔ mɛ dyi, ɓɛ́ ɔ ké wã́ìn kè ɓìɖǐ-nɛɛ̀-nì ná. Wa se wíɖí ɖò kpa. Píɔ́ ɖò se wa kɔ̃ nì.

² Ɖɛ́ kɔ̃̀ jè ɓě gbɔɔ̀ kà ɓěɛ̀ wíɖíɔ̀ mú ɓó ɖɛ se ɖii-ɖɛ̀ kɛɛ kɔ̃ún wɛ̃́? Ɖɛ́ kɔ̃̀ jè ɓě nyuà kũ̀à ɓó ɖɛ se ɓě kpáná ɖò dyí nyuɛ ɓɛ́ìn nyɛɛ jè kɛ́? Ɓě tò ḿ gbo ɖùǔ nɔ̀mɔ̀ dyíin, ɓɛ́ ɓě ké ɖii-ɖɛ̀ɔ̀ nyɔ kpa ɖɛ kɛɛ ɖi, ɓɛ́ ɓěɛ̀ hwòɖǒ ké dyi dè.

³ “Ɓě tò ḿ gbo ɖùǔ, ɓɛ́ ɓě ké ḿ gbo dyi. Ɓě wɔ̃́ ní wuɖuɔ̀, nìí, ɓě mu cĩ́ìn. Ké ḿ kè ɓě mu wuɖu dèìn, ɓɛ́ ɔ ké sè-ná-sèɛ̀ wuɖu jǔ. Ɔ ɓá ní ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ ɓɛ́ ḿ ɓéɖéà ɓó Dèɓé bììɛɛ dyí.

⁴ Dyéɛ, ḿ nyu ma Dèɓé ɓóɖó-dù ɓěɔ̀ wuɖuí-kɔ̃̀-nyɔ̀ kè waà sójà ɓěɔ̀ nàìn-nyɔ̀ mú, ké ḿ tɛ̀mɛ̀ìn ma ní kpéɔ̀ wa dyí dyììn ɖé ɔ mú.

⁵ Gmɔ̀ nɔ̄, ɓě mu ɓóɖó-dù ɓě ɓɛ́ ɓě se ma dyí dyuòɛɛ ɖáùn, ké wa mu ɓě gbo gbǔɛ dyàùn, sepóɛɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ mɔ̀à Éézùɖùɛ̀ɛ̀ Mú-hwɛ̀-nyɔ̀ɛɛ ɖǎ ɓě dya-dè-dè nyí.”

⁶ Ɓě mɔ́ Bounɓoɔ̀ dyi nɔ̀ɔ̀, kà ɓě ɓɛ́ìn ɔ da dyéɛ keɛ. Ɓě ɓaà ɔ nɔ̀ɔ̀, kà ɓɛ́ ɔ xwɛ̃́ìn kà ɓě bũ̌in keɛ.

⁷ Hwòɖǒ-kɔ̃in-nyìnììn-nyɔ̀ mɛ táà hwòɖǒ-kɔ̃in-nyìnììn-ɖɛ̀ nyu-nyu dyi. Ké se-dyí-sɛ́ɖɛ́ìn-ɖɛ̀ nyu-nyɔ̀ mɛ táà ɖɛ gbà hwìɖǐi-poìn-poìn dyi. Wa mɛ gmɔ̀ìn ɖé Bounɓo mɔ̀à à Gèɖèpɔ́ɔ̀ kɛɛ gbo, nìí, Bounɓoɔ̀ mu wa wìǐn dyéìn, ké ɔ mu waà ɖɛ gbà séín ɓěɔ̀ kɔ̃in zĩ̀ìn.

⁸ Bounɓoɔ̀ cɛ̃ɛ ɖe, ké ɔ ɖá, “Mɔ́ún ní poìn ɖɛ hwìɖǐi kà ɓě mɔ̀ùn nyuà ɖɛ hwìɖǐi poɛ̀n nyɛ, mɔɔ ké mɔ́ún ní nyu ɖɛ kà ɓě mɔ̀ùn nyuà nyuɛ kɛ.

⁹ Kà dyɔɔ̀ nìà ɖéé ɖé ɓóɖó-kpàɔ̀ kɔ̃in nyɛɛ, kà dyúáɖòɔ̀ kǎà níǐn xwai-nyu-ɖɛ̀ ɓěɔ̀ kè ní hwìɖǐi-poìn-ɖɛ̀ ɓěɔ̀ nì ɖéé ɖé ɓě nììn xwai-nyu-ɖɛ̀ ɓěɔ̀ kè ɓěɛ̀ hwìɖǐi-poìn-ɖɛ̀ ɓěɔ̀ kɔ̃in.

¹⁰ “Kà ní nyuà ɖé dyɔún sɔ̀ɔ̀, ké ɔ nyuà ɓóɖó-kpàɔ̀ kɔ̃ ɖàɓàìn, ké kà sɔ̃̀ɔ̀ nyuà ɖé dyɔún sɔ̀ɔ̀, ké ɔ nyuà ɓóɖó-kpàɔ̀ kɔ̃ wáɖáa, ké wa ní muà ɖé dyɔún ɖe, kɛɛ wa nyíà ɓóɖó-kpàɔ̀ ní, ké ɔ nyuɛ ké ɓáá-ɖɛ̀ ɓě mɛà, ké wa nìà dyɔ́ún, ké ɖɛ-ɓá-nyɔ̀ɔ̀ dyéà ɓáá-ɖɛ̀-dyùà, ké ɖii-ɖɛ̀ ɖi-nyɔ̀ɔ̀ dyéà ɓó ɖii-ɖɛ̀ kɛɛ,

¹¹ kǎà ní wuɖu ɓɛ́ ɔ sɔ̀ ḿ wĩín nyɛɛ jè nyu nìɛ̀. Ɔ se xwa fɔ̀nɔ̀ɔ̌ mu, ɓɛ́ ɔ ké ḿ gbo ɖe dyi. Kɛɛ ɔ mu ɖɛ ní hwòɖǒ mɔ́ɛɛ nyuùn. Ɔ mu ɖɛ kɔ̃̀ jè ḿ ɖoɓoà ɔ kɛɛ séín nyuùn, ɓɛ́ ɔ ké gbɔ hwɛ̀.

¹² “Ɓě mu to-xwàɖàǔn sɔ̀ùn ɖé múà kè gìɖìǐ mú. Ti ɓě mu muɛń nììn nyɛɛ, toɖo mɛ́nɛ́-mɛ́nɛ́ kèɛ̀ vɛ̀nɛ̀-vɛ̀nɛ̀ ɓě mu múà-kùɖǔ-kuɖu nyuùn, ké cu-gɔ̃̀ séín mu xwa-gbàǎ ɓaɖaùn.

¹³ Pã́ìn-cù mu dɛ̀ ɓɛ́ wí-kpɔ̀ɔ̌ nì ma kɛɛ mɛìn, ké mátɔ̀-cù mu dɛ̀ ɓɛ́ wí-gbǎ nì ma kɛɛ mɛìn. Ɖɛ nìà kɛ mu ɖɛ ɓɛ́ mɔ̄ Bounɓoɔ̀ ɖǎ nyuɛɛ jè nyɔǔn-dyù hwìɖǐi dyàùn kánáá pū. Ɔ mu dyí-tɛ̀mɛ̀ìn-ɖɛ̀ jǔùn ɓɛ́ ɔ ké nyɔǔn hwìɖǐi nì kánáá pū.”