Àzédyà 53 - Ɓǎsɔ́ɔ̀ Báɓòɔ̀

¹ Nyɛ́ mɔ̀ nyɔ ɖǎ à bɔ̃̌ɔ̀ jè dyi kpɔ̃ dyɛ mɔ̀ùn wɛ̃́? Nyɛ́ mɔ̀ nyɔ ɖǎ Bounɓoɔ̀ kpéɔ̀ dyé ɖé ɖɛ nìà kɛ mú kɛ́?

² Bounɓoɔ̀ gbo-nì-nyɔ̀ɔ̀ ɓúá ma ɓó ɔ dyúa, kà ɓáá-ɖɛ̀ ɖò ɓɛ́ ɔ mɛ ɓó ɓóɖó dyɛ-dyɛ ɖò múɛɛ nìà kɛ. Ɔ se ma dyíin-nɔ̀mɔ̀-nɔ̀mɔ̀ mɔɔ dĩ́ín-dĩ̀ìn ɖò ɖé ɔ mìɔùn mú ɓéɖé, ɓɛ́ à kéɛ dyéɖé gbo dè. Mɔɔ dyíin-nɔ̀mɔ̀-nɔ̀mɔ̀ kà kò ɖò se ɖé ɔ mú nì, ɓɛ́ à kéɛ mú ɖɛ̀ɓɛ̀ɛ̀ mɔ́.

³ Nyɔǔn-dyù zàìn ma ɔ zùǔn, ké waà hwòɖǒ se ma ɔ mɔ́. Ɔ mɔ̀ nyɔ ɓɛ́ wìì dyí múɛ, ké ɔ dyuò gǎ dyé jè dyí. Nyɔǔn-dyù pòìn ma ɔ dyúa xwáɖáún. Wa zàìn ma ɔ zùǔn, ké à se ma ɖé ɔ jè gbo kɔ̃̀.

⁴ Jǎà jɛ́ɛ́, ɔ mɔ̀ nyɔ ɖú ma gǎ ɓě kɔ̃̀ wa kéɔ́ má à kɔ̃ dyiɛɛ dyí, ké ɔ kpa ma à wìì séín ɓěɔ̀. Kɛɛ à hwòɖǒ ɖá ɖɛ ɓě ɓɛ́ ɔ dyéà dyíɛɛ mɔ̀ gǎ, ké Gèɖèpɔ́ɔ̀ tòɛ̀ ma ɔ kɔ̃ ɓó ɖɛ gbà ɓě ɓɛ́ ɔ nyuɛɛ jè.

⁵ Kɛɛ mɛ̀nɛ̌-kèǐn, wa puà ma ɔ ɓó à gma-ɖuà-ɖuà ɓěɔ̀ jè. Wa bunuìn ma ɔ mú ɓó à ɖɛ gbà ɓěɔ̀ jè. Gǎ-ɖɛ̀ ɓě ɓá à gìɖìǐ ɓéɖé jè dyíɛɛ dyi ma ɔ kɔ̃, ké ɔ ɓaɖa-bɛ̃̀ ɓěɔ̀ mɔ̀ ɖɛ kánáìn à dyi.

⁶ À ɖò-ɖò séín nì kà ɓáɖáá ɓě ɓɛ́ wa sè xwáɖáún wɛ̃ɛ nìà kɛ. À nyɔ ɖò-ɖò séín ɖǎ ɔ mìɔùn nììn hwìè xwíníín kpá. Kɛɛ Bounɓoɔ̀ ɖǎa nyu, ké ɔ gbo-nì-nyɔ̀ɔ̀ ɖǎ à ɖɛ gbà séín ɓěɔ̀ kpa dyí ɖú.

⁷ Wa pĩ́à ma ɔ dyi, ké wa dyéìn ma ɔ gǎ, kɛɛ ɔ se ma ɔ wɔ̃ɔ̀ ɓáà, ɓɛ́ ɔ ké ma ɖé wuɖu ɖò zà dyɛ mɔ̀ùn. Ɔ nì ma kà ɓáɖáá ɓɛ́ wa nì ɖáɓá-naín kpauń wɛ̃ɛ nìà kɛ. Kà ɓáɖáá ɓɛ́ wa nì mí bũ̌in cɛ̃iń nyɛɛ ní wùɖùà kɛɛ, kǎà ɔ mɔ̀ùn se ma ɔ wɔ̃ɔ̀ ɓáà ɖekè.

⁸ Wa kpɔ̃ ma ɔ, ké wa wáɖá ma ɔ zaa dúún, ké wa kpa ma ɔ ɖáɓá-naín. Nyɛ́ ɓɛ́ìn ɔ nììn dyú ɓě jè cɛ̃ɛ kɛ́? Sepóɛɖé wa zà ma ɔ nyɔ ɓě nì cĩ́ɛń nyɛɛ hwìɛ̀. Wa ɖáɓá ma ɔ ɓó à nàmàǔn ɓěɔ̀ jè.

⁹ Ɔ se ma ɖɛ gbà ɖò nyu, ké se ɖò se ma ɔ wĩín sɔ̀ dyɛo, kɛɛ dyéɛ, wa zàìn ma ɔ dyóɖóún ɖé hwòɖǒ-kɔ̃in-nyìnììn-nyɔ̀ ɓěɔ̀ kè bã-nyɔ̀ ɓěɔ̀ hwìɛ̀.

¹⁰ Bounɓoɔ̀ cɛ̃ɛ ɖé, ké ɔ ɖá, “Kɛɛ ɔ mɔ̀ ma ní hwòɖǒɛ̀-gbo-wɔ̃́ìn-ɖɛ̀, ɓɛ́ wa ké ní gbo-nì-nyɔ̀ɔ̀ puà, ɓɛ́ ɔ ké mú bunuìn. Ḿ nyu ma ɔ fɛ̀ɛ̀ɔ̀ nàmàǔn-sàǎ-zàìn-ɖɛ̀ mú dyɛo, kɛɛ ɔ mu ɔ xwíníín-dyù ɓě dyéìn. Ɔ mu toɖo-kpàà kɔ̃ hwèɖèìn, ké ɔ mu ɖɛ séín ɓɛ́ ní hwòɖǒ po gboɛɛ nyuùn.

¹¹ Ti ɓɛ́ ní gbo-nì-nyɔ̀ɔ̀ ɖǎ gǎ dyéɛ hwɔɛɛ, nìí, ɔ muɛ dyuòùn kà ɔ se gǎ dyé pídyiɛ, ké ɔ hwòɖǒ mu dyi dèìn. Ní gbo-nì-nyɔ̀ sɛ́ɖɛ́ìn dyíɔ̀ muɛ nyuùn ɓɛ́ zaa ké se nyɔ ɓáún-ɓáún kpɔ̃, sepóɛɖé ɔ mu waà nàmàǔn ɓěɔ̀ kpa dyí ɖúùn.

¹² Ɔ ná nì jèɛɛ, ní mu ɔ nììn nyíí-ɖɛ̀ tòùn ɖé nyɔ kpa ɖɛ ɓěɔ̀ hwìɛ̀, ké ɔ kè gàa-zà-nyɔ̀ ɓěɔ̀ mu to-gbo-zà-ɖɛ̀ ɓě geìn. Sepóɛɖé ɔ zà ɔ fɛ̀ɛ̀ɔ̀ hwòɖǒ gbo, ké wa zɛ̀ɖɛ̀ìn ma ɔ kè gma-ɖuà-nyɔ̀ ɓěɔ̀. Ɔ ɖú ma nyɔ ɓáún-ɓáún nàmàǔn-kpà dyí, ké ɔ ɓaà ma ɓó gma-ɖuà-nyɔ̀ ɓěɔ̀ bìì.”