Àzédyà 52 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Jùɖúsɛ̀ɖɛ̀ìn-hwɔ̀ɖɔ̀ɔ̀ póìn

¹ Jùɖúsɛ̀ɖɛ̀ìn-hwɔ̀ɖɔ̀ wè, sɔ̀ dyí, ɓɛ́ m̀ ké kpé ɓéɖé ɖe. Mɔ̀ mɔ̀à hwɔɖɔ hwɛ̀ǐn-hwɛ̀ǐnɔ̀ kɛɛ, po nì dĩ́ín-dĩ̀ìnɔ̀ mú kà nyɔ poà ɖɔ múɛ. Nyɔ se sàà mɛ́ ɓěɔ̀ kè nyɔ se mú hwɛ̀ ɓěɔ̀ se nì gmɔ-wɔ̃̀ ɓěɔ̀ ɖò mú dyáa mu ɖe.

² Jùɖúsɛ̀ɖɛ̀ìn-hwɔ̀ɖɔ̀ wè, ɓaɖa mú, ɓɛ́ púu-púuɔ̀ ké m̀ mú sɔ̀. Mɔ̀ mɔ̀ nyɔ ɓɛ́ to kpɔ̃à kɛɛ, sɔ̀ dyí. Zádyɔún-hwɔ̀ɖɔ̀ wè, zà m̀ mìɔùn dyɔ̀ɔ̌ ɖɔ.

³ Bounɓo Ɖɛɓíɔ́ cɛ̃ɛ, ké ɔ ɖá, “Wa se ma ɓě wíɖí ɖò mú dɔ̃. Ɔ jèɛɛ, ɓěɛ̀ gbǎà-gbǎàɔ̀ se wíɖí ɖò kpaá mu.

⁴ Ní nyɔ ɓěɔ̀ mu ma ɖé Íjè-ɓòɖòɔ̀ kɔ̃ kĩ́ín, ɓɛ́ wa ké ma ɖé ti wè nyu. Sɔ̀ìn ɓóɛ gboɛɛ, Àsíwíɖíà-nyɔ̀ ɓěɔ̀ pĩ́à ma wa dyi pídyi.

⁵ Ɓó kàǔn wɛ̃ɛ, ɓóɖó-dù ɖò ɖǎ ní nyɔ ɓěɔ̀ kpa pídyi ɖe. Kà ɔ nìà náa, nìí, ɖɛ́ ḿ ɓéɖé dà ɖeɛ́? Ní nyɔ ɓěɔ̀ wuɖuí-kɔ̃̀-nyɔ̀ ɓěɔ̀ nì vĩ̌ɛń, ké ní nyɛ́nɛ́ɔ̀ nì zùǔn sɔ̀ǐn ɓó wé kè wé xwíníín.

⁶ Ti ɖò nì dyiɛń, ɓɛ́ ní nyɔ ɓěɔ̀ ké ní nyɛ́nɛ́ dyuò. Wa muɛ dyí dyuòùn ɓó wéa ɓaɖa kà mɔ̄ mɔ̀ nyɔ wùɖùà kɛ̀. Ǹdye, ɔ mɔ̀ mɔ̄. Mɔ̄ Bounɓoɔ̀ mɔ̀ nyɔ cɛ̃à kɛ̀.”

⁷ Ɔ mɔ̀ ɖɛ kpa ɖɛ cá, ɓɛ́ nyɔ ké kíá ɓɛ́ ɔ nì bɔ̃̌ nɔ̀mɔ̀ dyíin dyàǔn wɛ̃ɛ dyiɛ dyé ɖé toɖo ɓěɔ̀ dya. Ɔ mɔ̀ kíá ɓɛ́ ɔ nì bɔ̃̌ ɓá gìɖìǐ jè dyíɛɛ dyàǔn wɛ̃. Ɔ nì bɔ̃̌ ɓá pó-pó jè dyíɛɛ zio poɛń. Ɔ nìɛ̀ Zádyɔún-nyɔ̀ ɓěɔ̀ gbo cɛ̃iń, ké ɔ ɖá, “Ɓěɛ̀ Gèɖèpɔ́ɔ̀ mɔ̀ nyɔ kɔ̃̀ nyɔǔn wuɖuí.”

⁸ Tò ɖùǔ kà ɓěɛ̀ hwɔɖɔ-dyí-gmɔ̀-nyɔ̀ ɓěɔ̀ jĩìn mú, ké wa ɖú wuɖuí, ké wa nyu múà-kùɖǔ-kuɖu kɛ. Wa kpa dyéɖé, ké wa dyé Bounɓoɔ̀ ɖé Zádyɔún-hwɔ̀ɖɔ̀ɔ̀ mú dyiɛ.

⁹ Jùɖúsɛ̀ɖɛ̀ìn-hwɔ̀ɖɔ̀ɔ̀ dà wáɖá-wáɖá ɓě, ɓě kpá múàǔn, ɓɛ́ ɓě ké kuɖu-kuɖu nyu. Sepóɛɖé Bounɓoɔ̀ ɖǎ ɔ nyɔ ɓěɔ̀ hwòɖǒ dyi dè. Ɔ ɖǎ Jùɖúsɛ̀ɖɛ̀ìn-hwɔ̀ɖɔ̀ɔ̀ póìn.

¹⁰ Bounɓo mɔ̀à à Gèɖèpɔ́ɔ̀ kɛɛ mu ɔ kpé hwɛ̀ǐn-hwɛ̀ǐnɔ̀ kũ̀à mú nyùìn ɓó ɓóɖó-dù séín ɓěɔ̀ dyéɖé waí, ké toɖo-kɔ̃-nyɔ̀ séín mu ɔ nyɔ-póìn-kpèɔ̀ dyéìn.

¹¹ Ní nyɔ ɓě, ɓě sɔ̀ dyí, ɓɛ́ ɓě ké mu. Ɓě sɔ̀ Báɓèɖɔ́ùn-ɓòɖòɔ̀ kɔ̃. Ɓěǐn ɖá ɓɛ́ ɓě ké se-mú-hwɛ̀-ɖɛ̀ ɓěɔ̀ ɖò dyi tìnììn. Ɓě sɔ̀ Báɓèɖɔ́ùn-nyɔ̀ ɓěɔ̀ hwìɛ̀. Ɓě mɔ̀ nyɔ ɓě mɔ̀à Bounɓoɔ̀ gbǒɔ̀ mú-kũ̀à-mú-nyùìn-ɖɛ̀ ɓěɔ̀ ɓéɖé-nyɔ̀ɛɛ, ɓě hwɔ ɓě mìɔùn mú.

¹² Kɛɛ ɓě se ɓéɖé ɓě ké dyí sɔ̀ wàɖà, mɔɔ ké ɓě se ɓéɖé ɓě ké peɖeɛ kpa. Sepóɛɖé Bounɓoɔ̀ mu ɓě dyúa síìn. Éézùɖùɛ̀ Gèɖèpɔ́ɔ̀ mu ɓě dyí-gmɔ̀-nyɔ̀ jǔùn ɖé ɓě ɖeín.

Gbo-nì-nyɔ̀ ɓɛ́ ɔ dyé gǎ kɛ

¹³ Bounɓoɔ̀ cɛ̃ɛ ɖe, ké ɔ ɖá, “Gmɔ̀ nɔ̄, ní gbo-nì-nyɔ̀ɔ̀ nyɛ́nɛ́ mu muùn. Wa mu ɔ dyií ɖúùn, ké ɔ mu dya-dè-dè ɓéɖéìn mìɔ.

¹⁴ Kɛɛ ti ɓɛ́ nyɔ ɓáún-ɓáún dyé ma ɔ kĩ́ín nyɛɛ, wa giniìn ma dyi. Wa nyìnììn ma ɔ dyɔɔ̀-kùɔ̀ dyíin mìɔ cá, ké ɔ se ma nyɔǔn-dyù hwɔìn. M̀ dyi ma ɔ dyéín, ɔ se nyɔǔn-dyù hwɔìn.

¹⁵ Kɛɛ ɓóɖó-dù ɓáún-ɓáún mu dyi giniìn ɖé dyúa ɓá ɔ jè dyí. Kã́á ɓě mu dyi giniìn mìɔ, ké wa se ɖé wuɖu zàà ɓɛ́ǐn mu. Sepóɛɖé wa mu ɖɛ kɔ̃̀ jè wa séè wɔ̃́ ɖòɛɛ dyéìn, ké wa mu ɖɛ wa seó zɔ̃̌ɔ̀ dyuòɛɛ múin wɔ̃́ùn.”