Àzédyà 51 - Ɓǎsɔ́ɔ̀ Báɓòɔ̀

Jùɖúsɛ̀ɖɛ̀ìn-nyɔ̀ ɓěɔ̀ hwòɖǒ-dyi-dè-wùɖù

¹ Bounɓoɔ̀ cɛ̃ɛ ɖe, ké ɔ ɖá, “Ɓě mɔ̀ nyɔ ɓě mɔ́à póɛ dyiɛɛ, ɓě tò ḿ gbo ɖùǔ. Ɓě mɔ̀ nyɔ ɓě nìà mɔ̄ Bounɓoɔ̀ dyi mɔ́uń wɛ̃ɛ, ɓě gmɔ̀ Ééɓòɖòhɛ̃́ɛ̀ mɔ̀à sɔ́ɔ́-kpò vɛ̀nɛ̀ kɔ̃̀ mú ɓɛ́ wa zà ma kà ɓěɛɛ dya. Ɓě gmɔ̀ Seɖɔ́ mɔ̀à sɔ́ɔ́-tòɖò kɔ̃̀ mú ɓɛ́ wa ɓúɖú ma kà, ɓɛ́ wa dyià ɖé ɓě zà kɛɛ dya.

² Ɓě gmɔ̀ Ééɓòɖòhɛ̃́ɛ̀ mɔ̀à ɓě ɓǎ kè Seɖɔ́ mɔ̀à ɓě ɖe ɓɛ́ ɔ wóɖóìn ma kà ɓěɛɛ dya. Ti ɓɛ́ Ééɓòɖòhɛ̃́ɛ̀ ɖòùn nì ma keɛɛ, ḿ ɖá ma ɔ, ké ḿ po ma ɔ mana kɔ̃, ké ɔ zaìn ma dúún.

³ “Ní mu nyɔ séín cĩ́à ɖé Zádyɔún-hwɔ̀ɖɔ̀ wáɖá-wáɖáɔ̀ múɛɛ hwòɖǒ dyi dèìn, Ní mu hwɔɖɔ ɓɛ́ ɔ mɔ̀ǎ kà gbǎùn-fúɖúá kɛɛ nyuùn, ɓɛ́ ɔ ké nì kà Ídɛ̃̀ìn mɔ̀à ní ɓáá-ɖɛ̀-gbǎɔ̀ kɛɛ nìà kɛ. Múà kè hwòɖǒ-dyi-dè-dè mu ɖé nììn, ké wa mu ní ɓàìn-wɛ̀ɖɛ̀ ɓě ɓeɖeɛń nììn.

⁴ “Ní nyɔ ɓě, ɓě mɔ̀à ní ɓóɖó-dùɔ̀ kɛɛ, ɓě tò ḿ gbo ɖùǔ. Ḿ nì ɓóɖó-dù ɓěɔ̀ ɖɛ tɛ̀mɛ̀ǐn, ké ní dyí-sɛ́ɖɛ́ìn-sɛ́ɖɛ́ìnɔ̀ mu ce jǔùn ɓó wa bìì.

⁵ Ní nyɔ-póìn-kpèɔ̀ nì dyiɛń wàɖà. Ɔ ɖǎ dyi xwɛ̃́ìn mìɔ cá. Ḿ mìɔùn mu ɓóɖó-dù ɓěɔ̀ wuɖuí kɔ̃̀ùn. Ɓóɖó ɓě nìà ɖé dyóóɔ̀ wĩín nyɛɛ mu ḿ dya gmɔ̀ùn, ké ní wuɖuí-kɔ̃̀-kpèɔ̀ mɔ̀ ɖɛ wa mu hwòɖǒ kɔ̃ dèìn.

⁶ Ɓě ɖú dyéɖé dyií, ɓɛ́ ɓě ké ɖé dyɔɔ̀ dyí gmɔ̀. Ɓě gmɔ̀ ɓóɖó-kpà nìà ɓó ɓě xwíɖíiɛɛ kɔ̃. Sepóɛɖé dyɔɔ̀ mu ɓó dyi paùn kà nyànà-sò paà dyiɛ, ké ɓóɖó-kpàɔ̀ mu súá kpáùn kà mú-po-ɖɔ̀ nìà kɛ, ké nyɔ ɓě ɓɛ́ wa cĩ́ ɖéɛ kɔ̃ɛɛ mu mɛ́ìn kà dɛ̃̌ mɛ́à kɛ. Kɛɛ ní nyɔ-póìn-kpèɔ̀ kè ní to-ɖu-ɖuɔ̀ mu nììn kánáá pū. Wa se sèìn-naín ɖò kɔ̃̀ɔ̌ mu.

⁷ “Ɓě mɔ̀ nyɔ ɓě dyuò kà ɖɛ mɔ̀ dyí-sɛ́ɖɛ́ìn-ɖɛ̀ kɛ dyíɛɛ, ɓě tò ḿ gbo ɖùǔ. Ɓě mɔ̀ nyɔ ɓě ɓɛ́ ní gmaɔ̀ nìà ɖé ɓě hwòɖǒ bũ̌ kóɖó-kóɖóɛɛ, ɓě dè ɖùǔ dyi. Ɓěǐn ɖá ɓɛ́ ɓě ké fɛ̃̀ìn ɓó nyɔǔn-dyùɛ̀ nyɔ-zùǔn-zàìn-zàìnɔ̀ jè, ké ɓěǐn ɖá ɓɛ́ ɓě ké fã̀àǔn kpá ɓó waà nyɔ-wuɖuún-ɖaɓa-ɖaɓaɔ̀ jè.

⁸ Sepóɛɖé wa jè mu dyi ziìn kà nyaa-ɓéɖé ɓɛà ɖɔ ɓó da dyiɛ, kɛɛ ní to-ɖu-ɖuɔ̀ kè ní nyɔ-póìn-kpèɔ̀ mu nììn kánáá pū ɓó xwéɖé-dù deìn dúún ɓě bìì.”

⁹ Bounɓo, sɔ̀ dyí, ɓɛ́ m̀ ké à gbo kpá. Nì kpéɔ̀ mɛ póìn à kà m̀ nyuɛ zɔ̃̌ɔ̀ kà nyuɛ ɓó ti sùà múɛ. Mɔ̀ mɔ̀ nyɔ gbɔɔ̀ zɔ̃̌ɔ̀ kà dyóún-ɖɛ̀ vɛ̀nɛ̀ mɔ̀à Wéɖéháà kɛɛ múɛ̀.

¹⁰ Mɔ̀ mɔ̀ nyɔ nyuɛ ké dyóóɔ̀ ma ma kà ɓó dyiɛ̀. Mɔ̀ mɔ̀ nyɔ zàìn ma kà ɓó níɔ̀ hwìǐ, ké m̀ nyu ma kà hwìè, ɓɛ́ nyɔ ɓě ɓɛ́ m̀ ɖǎ póìn nyɛɛ kéà ɓó péɖéìn nyɛ̀.

¹¹ Nyɔ ɓě ɓɛ́ Bounɓoɔ̀ ɖǎ póìn nyɛɛ mu ɖe dyiìn. Wa mu ɓeɖeɛ dyàùn, ɓɛ́ wa ké Zádyɔún-hwɔ̀ɖɔ̀ɔ̀ dyá. Sè-ná-sèɛ̀ múà mu waà dú-dèìn-ɖɛ̀ jǔùn. Múà kè hwòɖǒ-dyi-dè-dè mu ɖé wa múin dyíìn, ké wìì kè xwíníín-vĩ̌ìn-vĩ̌ìn mu dyi ziìn.

¹² Bounɓoɔ̀ cɛ̃ɛ ɖe, ké ɔ ɖá, “Mɔ̄ mɔ̀ ɓěɛ̀ hwòɖǒ-dyi-dè-nyɔ̀. Ɖɛ́ kɔ̃̀ jè ɓě fɛ̃̀ìn kà nyɔǔn-dyù ɓɛ́ wa ɓɛ́ìn mɛ́ɛ kɛɛ dyiɛ́? Nyɔǔn-dyù nì kà pìǐ ɓɛ́ ɔ ɓɛ́ìn ɓó dyi mɛ́ɛ wàɖà kɛɛ nìà kɛ.

¹³ Ɖɛ́ kɔ̃̀ jè mɔ̄ Bounɓo mɔ̀ nyɔ mɛà ɓěɛɛ jè sɔ̀à ɓě hwìɖǐi kɛ́? Mɔ̄ mɔ̀ nyɔ pɛ́ɛ̀ dyɔɔ̀ kɔ̃in, ké mɔ̄ mɔ̀ nyɔ dè ɓóɖó-kpàɔ̀ hìɖì-kpà. Ɖɛ́ kɔ̃̀ jè ɓě fɛ̃̀ìn kà ɓěɛ̀ dyi-pĩ́à-nyɔ̀ ɓě ɓɛ́ wa mɔ́à ɓě mú gbɔɔ̀ dyiɛɛ dyoɖoɔ̀ dyi kánáá pū ɓó wé séín nyɛ́? Dɛ̌ ɓěɛ̀ dyi-pĩ́à-nyɔ̀ ɓěɔ̀ dyoɖo-hwòɖò ku wɔ̃ɔ̀ nì kɛ́?

¹⁴ Ɔ se hwèɖèɛ̌n mu ɓɛ́ nyɔ ɓě ɓɛ́ wa nì kpɔɖɔ ɖeín nyɛɛ ké buɛ̀. Nyɔ ɓě nì náa se mɛ́ɛ mu. Wa se ɖii-ɖɛ̀ gǎ dyéɛ mu.

¹⁵ “Mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. Mɔ̄ mɔ̀ nyɔ túò kà dyóóɔ̀ dyi, ké ɔ dyóó-kpɛ̀ ɓěɔ̀ kuɖuà kɛ̀. Ní nyɛ́nɛ́ mɔ̀ Bounɓo mɔ̀ nyɔ nìà ɖɛ séín kɔ̃in nyɛ.

¹⁶ Ḿ ɖǎ ní wuɖuɔ̀ ɓě wĩín po, ké ní sɔ̃ɔ̀ ɖǎ ɓě kɔ̃in ɓáìn. Ḿ pɛ́ɛ̀ dyɔɔ̀ kɔ̃in, ké ḿ dè ɓóɖó-kpàɔ̀ hìɖì-kpà. Ḿ cɛ̃ɛ ɓě mɔ̀ Zádyɔún-hwɔ̀ɖɔ̀ɔ̀ nyɔ ɓěɛ̀ gbo, kà ɓě mɔ̀ ní nyɔ ɓěɛ.”

Jùɖúsɛ̀ɖɛ̀ìn-nyɔ̀ ɓěɔ̀ gǎɔ̀ sèìn-naín

¹⁷ Jùɖúsɛ̀ɖɛ̀ìn-hwɔ̀ɖɔ̀ wè, sɔ̀ dyí! Sɔ̀ dyí, ɓɛ́ m̀ ké dyi nyànà! M̀ ɖǎ Bounɓoɔ̀ dyoɖo nìà ɖé ɔ kópòɔ̀ múɛɛ ná. M̀ náa gmùù-gmúú séín ɓěɔ̀, ké ɔ nyu m̀, ké m̀ ɓéɖé dyi ɓuɖuɛ̌n.

¹⁸ Ɖé gàa-dyù séín ɓě ɓɛ́ m̀ ɖǎà wóɖóìn nyɛɛ hwìɛ̀ kɛɛ, nyɔ dyúáɖò dyɛ mɔ̀ùn se ɖé nì, ɓɛ́ ɔ ké m̀ nàìn. Ɖé gàa-dyù séín ɓě ɓɛ́ m̀ ɖǎà gmɛ̀ìn nyɛɛ hwìɛ̀ kɛɛ, nyɔ dyúáɖò dyɛ mɔ̀ùn se ɖé nì, ɓɛ́ ɔ ké m̀ sɔ̃ún ɓá.

¹⁹ Mɔ́ kè gàsíà-tò ɖǎ m̀ kɔ̃ dyi. Nyɛ́ mu m̀ gɔ̃̌ nyíìn nyɛ́? Gǎ-dù sɔ̃́ ɓěɛ̀ ɖǎ m̀ kɔ̃ dyi. Nyɛ́ mu nì hwòɖǒ dyi dèìn nyɛ́?

²⁰ Kpé ɖò se nì dyú ɓěɔ̀ dyí nì ɖe, ké wa ɖǎ kṹún kpá. Wa pɛ̃́ìn ɖé nì hwìè-gmǎà séín ɓěɔ̀ dyíin. Wa nì kà xwáɖá-xwíɖíi-nìmìì ɓɛ́ xwáɖá kpɔ̃ɛɛ nìà kɛ. Bounɓo mɔ̀à nì Gèɖèpɔ́ɔ̀ kɛɛ dyoɖo ku wɔ̃ɔ̀ nì wa kɔ̃.

²¹ Ɔ ná nì jèɛɛ, ɓě mɔ̀ nyɔ ɓě ɓɛ́ wa nìà gǎ dyéɛ̌n nyɛɛ, ɓě tò ɖùǔ. Ɓě mɔ̀ nyɔ nìà kà náá-ɖɛ̀ nyuà nyɔɛɛ, ɓě dè ɖùǔ dyi.

²² Ɖɛ ɓɛ́ Bounɓo Ɖɛɓíɔ́ mɔ̀à ɓěɛ̀ Gèɖèpɔ́ɔ̀ ɓɛ́ ɔ mɔ̀à ɓě bìì vɔ̃-nyɔ̀ɛɛ cɛ̃ kɛɛ kɛà kɛ̀. Ɔ ɖá, “Gmɔ̀ nɔ̄, ḿ ɖǎ kópò ɓɛ́ ɔ nyuɛ ɓɛ́ ɓě dyià dyi ɓuɖuìn nyɛɛ ɓě bũ̌ zà. Ɓě se ní dyoɖo nìà ɖé ní gbòɖòòɔ̀ múɛɛ náa mu ɖe.

²³ Ní muɛ ɓěɛ̀ gǎ-dyéìn-nyɔ̀ ɓěɔ̀ xwa nyíìn. Wa mɔ̀ nyɔ ɓě cɛ̃à ɓě gbo, ɓɛ́ wa dyi níiń, ‘Ɓě pɛ̃́ ɓó ɓíɖíi dyi, ɓɛ́ à ké ɓě kɔ̃in nà’ kɛ. Ké ɓě nyu ma ɓě mìɔùn kà ɓóɖó-kpàɔ̀ kè hwɔɖɔ-gboi-hwìè nìà kɛ, ké wa nà ma ɓě kɔ̃in.”