Àzédyà 5 - Ɓǎsɔ́ɔ̀ Báɓòɔ̀

Wɛ́ɖɛ́ ɓá géɖéè-gbǎɔ̀ jè dyíɛ

¹ Ní mu ní mú-ɖɛ̀ɓɛ̀-nyɔ̀ɔ̀ bìì wɛ́ɖɛ́ ɖò ɓeɖeìn. Ɔ mɔ̀ wɛ́ɖɛ́ ɓá ɔ géɖéè-gbǎɔ̀ jè dyíɛ. Ní mú-ɖɛ̀ɓɛ̀-nyɔ̀ɔ̀ ɓéɖé ma géɖéè-gbǎ ɖò, ɖé toɖo bã-bã ɖò dya.

² Ɔ wa ma ɓóɖóɔ̀, ké ɔ zàà ma sɔ́ɔ́-kpò ɓěɔ̀ múin, ké ɔ ɓá ma ɖé géɖéè nɔ̀mɔ̀ kɔ̃in saá-saá. Ké ɔ zà ma ɖé gbàà ɖò, ké ɔ nyu ma ɖé géɖéè-mú-píníìn-naín ɖekè. Ké ɔ dèɛ̀ ma hwòɖǒ kɔ̃, ɓɛ́ géɖéè-gbǎɔ̀ ké ma géɖéè nɔ̀mɔ̀ kɔ̃in tòɖò, kɛɛ ɔ tòɖò ma géɖéè nyìnììn kɔ̃in.

³ Ɔ jèɛɛ, ní mú-ɖɛ̀ɓɛ̀-nyɔ̀ɔ̀ ɖá, “Ɓě mɔ̀ nyɔ ɓě cĩ́à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Júɖà-ɓòɖòɔ̀ kɔ̃ɛɛ, ɓě po zaa nìà ɓó ḿ kè ní géɖéè-gbǎɔ̀ pṹa kɛɛ wɔ̃.

⁴ Ɖɛ ɖò sè ɓó ɖe, ké ḿ séè ní géɖéè-gbǎɔ̀ bìì nyuù? Ɖɛ́ kɔ̃̀ jè ḿ dyià hwòɖǒ kɔ̃ dè, ɓɛ́ ɔ kéà géɖéè nɔ̀mɔ̀ kɔ̃in tòɖò ní, nìí, mɔ́ún dyéà ɓo, kɛɛ ɔ sèìn géɖéè nyìnììn kɔ̃in saá-saá kɛ́?

⁵ “Ɖɛ ní mu ní géɖéè-gbǎɔ̀ bũ̌ nyuùn wɛ̃ɛ, ɔ kɛà kɛ̀. Ní muɛ gba-gbaɔ̀ ɖei zàùn, ɓɛ́ ɔ ké mú gbɔɔ̀. Ní mu gmɔ nìà ɔ ɖeiɛɛ wáɖáùn, ɓɛ́ nimii ɓěɔ̀ kéɛ ɖi, ɓɛ́ wa kéɛ kɔ̃in síìn.

⁶ Ní muɛ dyi táàùn, ɓɛ́ ɔ ké mú gbɔɔ̀. Ḿ seɛ ɖɔ́ sùà dyai cɛ̃ɛ́ mu, mɔɔ ké ḿ seɛ múin kpanaá mu. Ní muɛ dyi táàùn, ɓɛ́ pìǐ kè wí kéɛ dyí ɖú. Ní mu ní-kpò ɓěɔ̀ ɓɔ́í poùn, ɓɛ́ ní ɖò ké seɛ kɔ̃ ɖàɓàìn.”

⁷ Bounɓo mɔ̀ nyɔ nìà ɖɛ séín kɔ̃in nyɛɛ géɖéè-gbǎɔ̀ mɔ̀ Éézùɖùɛ̀ɛ̀ gbǒ-xwíníínɔ̀. Júɖà-nyɔ̀ ɓěɔ̀ mɔ̀ ɓáá-ɖɛ̀-gbǎ ɓɛ́ ɔ ɖɛ̀ɓɛ̀ múɛ. Ɔ gmɔ̀ ma ɖé, ɓɛ́ ɔ kéɛ dyé kɛbì jǎà-ɖɛ̀-wɔ̃-po-po nì ɖé ní, kɛɛ ɖɛ ɔ dyé ɖéɛɛ mɔ̀ nyɔmɔɔ-dyi-wáɖáìn-wáɖáìn saá-saá. Ɔ gmɔ̀ ma ɖé, ɓɛ́ ɔ kéɛ dyé kɛbì dyí-sɛ́ɖɛ́ìn-sɛ́ɖɛ́ìn nì ɖé ní, kɛɛ ɖɛ ɔ wɔ̃́ ɖéɛɛ mɔ̀ nyɔ ɓě ɓɛ́ wa pĩ́à dyiɛɛ kpé-po-wùɖù saá-saá.

Ɖɛ gbà ɓɛ́ nyɔǔn nyuɛ

⁸ Gboò-wùɖù nì nyɔ ɓě ɓɛ́ wa mɔ́ìn waà gbǒ ɓěɔ̀ gbǒ kɔ̃in, ɓɛ́ wa dyià waà geɖe ɓěɔ̀ geɖe kɔ̃in poɛɛ kɔ̃. Ɔ se hwèɖèɛ̌n mu ɖe, ɓɛ́ wa ɖòùn kéá ɓóɖó gànáɔ̀ dyí ɖú, ɓɛ́ cĩ́-naín ké se nì ɖe ɓó nyɔ tɔ̀ɔ̀ ɓě mɔ̀ùn bìì.

⁹ Ní ɖùǔɔ̀ wɔ̃́ɔ, ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ, ké ɔ ɖá, “Jǎà jɛ́ɛ́, gbǒ ɓáún-ɓáún mu fóɖóún kpáùn. Gbǒ vɛ̀nɛ̀ nɔ̀mɔ̀ kɔ̃in ɓě se mú-cĩ́-nyɔ̀ ɖò kɔ̃̀ɔ̌ mu.

¹⁰ Géɖéè-gbǎ ɓɛ́ ɔ ɓɛ́ìn ékɔ̀ ɓaɖa-bùè jǔɛ kɛ múɛɛ, wã́ìn-gbǎ-wĩín-wè sɔ̃́ nyɛ̀nɛ̀ɛ̀ mu ɖé wóɖóùn. Ké ɓáá-ɖɛ̀-dyùà ɓɔ̀ɔ̌-wè tã ɓɛ́ wa ɓá kɛɛ, ɖɛ mu ɓó wóɖóùn wɛ̃ɛ mɔ̀ gbǎ-wĩín-wè sɔ̃́ nyɛ̀nɛ̀ɛ̀.”

¹¹ Gboò-wùɖù nì nyɔ ɓě ɓɛ́ wa dùnùìn dyí sɔ̀ǔn, ɓɛ́ wa dyià náá-ɖɛ̀ ku wɔ̃ ná, ké wa gã̀à nɔmɔɔ-kũ̀ǔnɔ̀ mú dyi tee ké hwuɖu hwɔà kɛɛ kɔ̃.

¹² Wa pa hwɔ dyììn ɖé wã́ìn kè ɓaɖaa-ɖɛ̀ ɓě mɔ̀à gbǎɖí-dù kò-kò ɓě kè bòùnbá ɔ kè hwǒ-kùǐ ɓěɛɛ mú. Ké wa se ɖé Bounɓoɔ̀ nyuu-ɖɛ̀ ɓěɔ̀ jè gbo kɔ̃̀.

¹³ Ní nyɔ ɓěɛ̀ ɖǎ ná nì jèɛɛ, wa mu toɛ̀-kpɔ̃-nyɔ̀ ɓě jǔùn, ɓɛ́ wa ké wa to-xwàɖàǔn kpa ɓó waà se ɖɛ dyuòɔ̀ jè. Mɔ́ mu waà nyɔ vɛ̀nɛ̀ ɓěɔ̀ ɖáɓáùn, ké ní-ná-tò mu waà nyɔ tɔ̀ɔ̀ ɓěɔ̀ ɖáɓáùn.

¹⁴ Xwɛ́-gmààɔ̀ ɓáà wɔ̃, ké ɔ xwíníín-tɔ̀mɔ̀-tɔ̀mɔ̀ɔ̀ se sèìn-naín kɔ̃̀, ké Jùɖúsɛ̀ɖɛ̀ìn-hwɔ̀ɖɔ̀ɔ̀ cu-kpà ɓěɔ̀ kè ɔ nyɔ tɔ̀ɔ̀ séín ɓě nìà kuɖu-kuɖu nyuɛń nyɛɛ mu ɖéɛ mú wáɖáùn.

¹⁵ Wa mu wa séín ɓíɖíi dyàùn. Wa mu ɓíɖíi dyi kpáùn. Nyɔ ɓě ɓɛ́ wa ɓúáìn wa mìɔùn dyíɛɛ dyéɖé mu ɓíɖíi dyiìn.

¹⁶ Kɛɛ Bounɓo mɔ̀ nyɔ nìà ɖɛ séín kɔ̃in nyɛɛ mu dya-dè-dè ɓéɖéìn ɖé jǎà-ɖɛ̀-wɔ̃-po-po mú. Mú-hwɛ̀-Gèɖèpɔ́ɔ̀ mu ɔ mú-hwɛ̀-hwɛ̀ɔ̀ nyɔǔn dyí tɛ̀mɛ̀ìn ɖé dyí-sɛ́ɖɛ́ìn-ɖɛ̀ nyu-nyu mú.

¹⁷ Hwɔɖɔ ɓěɔ̀ ɖǎ hwùɖùǎ jǔ ní, nìí, ɖé muá ɓáɖáá-dyù ɓěɔ̀ pìǐ-ɖi-naín jǔùn, ké ɖé muá wiɖi gmɔ̀ ɓěɔ̀ vàǎ-ɖi-naín jǔùn.

¹⁸ Gboò-wùɖù nì nyɔ ɓě ɓɛ́ wa nyuà se ɖúú mú, ɓɛ́ wa dyià ɖɛ-gbà-nyu-nyu dyí ɓá, ɓɛ́ wa dyià dyi káɖá kɛɛ kɔ̃. Wa káɖá nàmàǔn dyi pū kà nyɔ káɖáà ɖɛ ɖò dyiɛ.

¹⁹ Wa cɛ̃ɛ, ké ɔ wa ɖá, “Gèɖèpɔ́ɔ̀ mɔ̀à Éézùɖùɛ̀ɛ̀ Mú-hwɛ̀-nyɔ̀ɔ̀ kɛɛ mɛ fṹà ɔ kũ̀àɔ̀ gboi, ɓɛ́ à kéɛ dyé. Ɔ mɛ nyu ɖɛ ɔ hwòɖǒ poà gbɔɛ, ɓɛ́ à kéɛ dyí dyuò.”

²⁰ Gboò-wùɖù nì nyɔ ɓě ɓɛ́ wa ɖáìn ɖɛ gbà ɖɛín-ɖɛ̀, ké wa ɖáìn ɖɛín-ɖɛ̀ ɖɛ gbà kɛɛ kɔ̃. Wa mɔ̀ nyɔ ɓě ɓɛ́ wa ɖáìn tíe-kpò ce, ké wa ɖáìn ce tíe-kpò kɛ. Nyɔ ɓěa ɖáìn ɖɛ nɛɛ̀ kɛɛ ɖɛ ɖéé-ɖéé, ké wa ɖáìn ɖɛ ɖéèɛɛ ɖɛ nɛɛ̀-nɛɛ̀.

²¹ Gboò-wùɖù nì nyɔ ɓě ɓɛ́ wa fɔ̀nɔ̀ hwòɖǒ ké wa cɛ̃̀ xwíníín dyi ɖé wa mìɔùn dyéɖéín nyɛɛ kɔ̃.

²² Gboò-wùɖù nì nyɔ ɓě kɔ̃̀ nyɛ́nɛ́ muà ɓó náá-ɖɛ̀ kàmà-kàmà ná jè kèɛ̀ caìn jèɛɛ kɔ̃.

²³ Nyɔ ɓěa zi hwòɖǒ-kɔ̃in-nyìnììn-nyɔ̀ ɓěɔ̀ gbo ɓó nyɔ-gbo-pa-wìɖì jè, ké wa zà dyí-sɛ́ɖɛ́ìn-nyɔ̀ ɓěɔ̀ ɖɛ wa kɔ̃̀ wa kéɔ́ dyéɛɛ xwa.

²⁴ Ɔ jèɛɛ, kà mɔɔ́-fèɖè dyià dyéɖé kpá ní, ɔ nyuà ɓó dyi sĩɛ kɛ, kè kà pìǐ dyià dyéɖé kpá ní, ɔ nyuà ɓó dyi sĩɛ kɛɛ, kà dyúáɖòɔ̀ kǎà wa mu nììn. Waà gmɛ̀nɛ̀ɛ̀ ɓěɔ̀ mu ɓó dyi zɔ̃̌ùn, ké pìɔ̌ mu waà bùè ɓěɔ̀ kpaùn kà púu-púu nìà kɛ. Sepóɛɖé wa ɖǎ Bounɓo mɔ̀ nyɔ nìà ɖɛ séín kɔ̃in, ɓɛ́ ɔ mɔ̀à Éézùɖùɛ̀ɛ̀ Mú-hwɛ̀-nyɔ̀ɔ̀ kɛɛ gmaɔ̀ ɓɔ́. Wa ɖǎ ɔ wuɖuɔ̀ dyií dyi po.

²⁵ Ɔ jèɛɛ, Bounɓoɔ̀ kpáìn ɔ nyɔ ɓěɔ̀ dyoɖoún mìɔ, ké ɔ pɛ́ɛ̀ ɔ sɔ̃ɔ̀, ké ɔ ɖáɓá wa. Toɖo ɓěɔ̀ tɛɖɛ kɔ̃in, ké ɔ nyɔ ɓěɔ̀ xwɛ́ ɓěɔ̀ gbǒìn ɖé hwìè ɓěɔ̀ gba kà sĩ̀ɔ̌ nìà kɛ. Ɖɛ séín ɓěɛ̀ ɖǎ ná nì dyɛo, kɛɛ ɔ dyoɖo-hwòɖòɔ̀ séè wáɖá ke. Ɔ sɔ̃ɔ̀ pɛ́ɛ̀ ní ke, ɓɛ́ ɔ ké wa gǎ kɔ̃ tò.

²⁶ Bounɓoɔ̀ po và ɖé ɓóɖó-dù ɓě nì ɖé dà vɛ̃in nyɛɛ gbo. Ké ɔ ɖáìn wa pĩɔ́-wùɖù mú sɔ̀ìn ɖé ɓóɖó-kpàà sèìn-naín. Gmɔ̀ ɖéa kà wa dyiéɛ. Wa nì dyiɛń wàɖà-wàɖà.

²⁷ Waà nyɔ dyúáɖò dyɛ mɔ̀ùn se sa, mɔɔ ké wa ɖò se ɓuɖu. Waà nyɔ dyúáɖò se mɔ́, hwɛ̀ ḿ po níiń, ɔ ké dyí ɖeè. Waà gbo-jìnììn-ɖɛ̀ ɓěɔ̀ ɖò se buɛ̀, mɔɔ ké waà bǎ ɓěɔ̀ ɖò se ɖúú cɛ̃̀.

²⁸ Waà sé ɓěɔ̀ nì té-té, ké waà pɔnɔ ɓěɔ̀ ɖǎ ti dyé. Waà sǒ ɓěɔ̀ zùǎ ɓěɔ̀ nì kóɖó-kóɖó kà sɔ́ɔ́ nìà kɛ, ké waà hwíì-sǒ ɓěɔ̀ táɖáìn mú kà pìɔ̌ táɖáìn múɛ.

²⁹ Waà kuɖu-wùɖùɔ̀ dyi kà ganìǎ kuɖuà kɛ. Wa kuɖu kà ganìǎ gmɔ̀ kuɖuà kɛ. Wa po dyoɖo ti ɓɛ́ wa kpɔ̃ ɖɛ ké wa nìɛ̀ kpauń wɛ̃. Nyɔ ɖò se nì ɓɛ́ ɔ kéɛ wa wĩín zà.

³⁰ Ɓó wéa ɓaɖaa, wa mu Júɖà-ɓòɖòɔ̀ kɔ̃in kùɖùìn kà dyóó kuɖuà kɛ. Ɔ jǔ ké nyɔ ɖò dyi ɓóɖóɔ̀ kɔ̃in gmɔ̀ ní, nìí, ɖɛ ɔ mu ɖé dyéìn nyɛɛ mu tíe-kpò kè fũ̀à-fṹá-ɖɛ̀ saá-saá jǔùn. Ní-kpò mu dyóɖóɔ̀ dyí zĩ̀ìn.