Àzédyà 4 - Ɓǎsɔ́ɔ̀ Báɓòɔ̀

¹ Ɓó wéa ɓaɖaa, màa mɛ̀nɛ̌ìn-sɔ̃́ mu gàa dyúáɖò gbo dyiìn, ɓɛ́ wa ké níiń, “À mu à mìɔùn nììn ɖii-ɖɛ̀ dyi mɔ́ùn, ɓɛ́ à ké à mìɔùn ɖɔún po. Kɛɛ ɖɛ kpɔ̃ à hwòɖǒ nyɛ̀nɛ̀ɛ̀ kɛɛ mɔ̀, ɓɛ́ à ké m̀ nyɛ́nɛ́ín mùìn pū, nìí ɓɛ́ kɔ́ìn-nyɛ́nɛ́ɔ̀ ké à dú sɔ̀.”

Bounɓoɔ̀ mu Jùɖúsɛ̀ɖɛ̀ìn-hwɔ̀ɖɔ̀ɔ̀ páún poùn ɖe

² Wé ɖò nì dyiɛń, ɓɛ́ Bounɓoɔ̀ ké Éézùɖùɛ̀-ɓòɖòɔ̀ nyu, ɓɛ́ ɔ ké dyíin nɔ̀mɔ̀ ɖe kà cu-ɖɔ́ ɓɛ́ ɔ mɛ kɔ̃ ɖieɛɛ nìà kɛ, ɓɛ́ ɔ ké dĩ́ín-dĩ̀ìn ɓéɖé. Ké cu-ɓò ɓě nì ɖé Éézùɖùɛ̀-ɓòɖòɔ̀ múɛɛ mu nyɔ ɓě sè ɓíɖíi ɖé ɓóɖóɔ̀ kɔ̃ɛɛ dya-dè-dè dyàùn, ɓɛ́ wa ké ɓɔ́ɖɔ́ ɓó wa jè.

³ Nyɔ ɓě ɓɛ́ wa sè ɖé Zádyɔún mɔ̀à Jùɖúsɛ̀ɖɛ̀ìn-hwɔ̀ɖɔ̀ɔ̀ kɛ múɛɛ, wa mu wa mú-hwɛ̀-nyɔ̀ ɓě ɖáìn. Wa mɔ̀ nyɔ ɓě kɔ̃̀ nyɛ́nɛ́ céè ɖé nyɔ ɓě nì cĩ́ɛń nyɛɛ hwìɛ̀ kɛ.

⁴ Ɖɛɓíɔ́ɔ̀ mu Zádyɔún-hwɔ̀ɖɔ̀ɔ̀ nyɔ ɓěɔ̀ zɛ̀nɛ̌ ɓěɔ̀ bũ̌in wɔɔ̀ùn. Ɔ mu Jùɖúsɛ̀ɖɛ̀ìn-hwɔ̀ɖɔ̀ɔ̀ mú hwɔùn sɔ̀ìn ɖé nyɔmɔɔ ɖǎ ɔ kpɔ̃ɛɛ mú. Ɔ mu ɔ gǎ kɔ̃ tòùn dyììn ɖé ɔ dyoɖo-hwòɖò ku wɔ̃ɔ̀ mú.

⁵ Ɔ ɖǎ ná nìǐn, nìí, Bounɓoɔ̀ mu ní-kpò dyàùn ɓó Zádyɔún-tòɖòɔ̀ kè nyɔ ɓě poìn ɓó dyíɛɛ kɔ̃in ɓó dyóɖóaún, ké ɔ mu ɓó nyànà-sò-kpò kè nyɛ-mìɔ̀ dyàùn ɓó máaún. Gèɖèpɔ́ɔ̀ dĩ́ín-dĩ̀ìnɔ̀ mu hwɔɖɔ gànáɔ̀ kɔ̃in ɓáìn.

⁶ Ɔ dĩ́ín-dĩ̀ìnɔ̀ mu pɛ̀ɛ̀ jǔùn ɓó wéɔ̀ zùzù-pèɖèìn-naín jè, ké ɔ mu pèɖèìn-naín kè vǐè-naín jǔùn sɔ̀ìn ɖé dìì kè ní-ɖaɓa-ɖaɓa mú.