Àzédyà 3 - Ɓǎsɔ́ɔ̀ Báɓòɔ̀

Bounɓoɔ̀ mu Jùɖúsɛ̀ɖɛ̀ìn-hwɔ̀ɖɔ̀ɔ̀ gǎ kɔ̃ tòùn

¹ Gmɔ̀ nɔ̄, Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ nìǎ Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ ɖɛ séín ɓě wa dyé ma teeɛ kè waà gbo-kpá-kpá séín ɓěɔ̀ wa xwai zàǔn. Ɔ mu wa ɖii-ɖɛ̀ séín kè ní séín xwai zàùn.

² Ké ɔ mu waà gàa-zà-nyɔ̀ ɓěɔ̀ kè sójà ɓěɔ̀ kè tɔ̀ɔ̀-ɓìɔ̀ ɓěɔ̀ kè kpáá-ɖɛ̀-cɛ̃-nyɔ̀ ɓěɔ̀ kè sɛ̀ɛ̀-po-nyɔ̀ ɓěɔ̀ ɔ kè nyɔ vɛ̀nɛ̀ ɓěɔ̀ wa xwai zàùn.

³ Ké ɔ mu waà sójà kpáɖá-nyɔ sɔ̃́ ɓaɖa-bùè wuɖuí-kɔ̃̀-nyɔ̀ ɓěɔ̀ kè nyɔ tɔ̀ɔ̀ ɓě wuɖuí-kɔ̃̀-nyɔ̀ ɓěɔ̀ kè nyɔ-náún-po-nyɔ̀ ɓěɔ̀ kè sɛ́ɖɛ́-nyɔ̀ ɓěɔ̀ ɔ kè nyɔ ɓě mɔ̀ zɛ̃̀ìn-ɖɛ̀-nyu-nyɔ̀ ɓěɛɛ wa xwai zàùn.

⁴ Ké ɔ mu wa gàa-dyù-gbɔ́ɔ́ ɓě kè dyú-pɛ̀ɖɛ̀ɛ̀ ɓě nyíìn, ɓɛ́ wa ké waà wuɖuí-kɔ̃̀-nyɔ̀ ɓě jǔ.

⁵ Nyɔ ɓěɔ̀ mu dyi pĩ́àìn pĩ̀àìn. Nyɔǔn mu ɔ mǔè ɖò mɔ̀ùn dyi pĩ́àùn. Nyɔ gmɔ̀ ɓěɔ̀ se nyɔ vɛ̀nɛ̀ ɓěɔ̀ kpéín dyéɛ mu, ké nyɔ ɓě se ɖɛ kpaa se nyɔ kpa ɖɛ ɓěɔ̀ kpéín dyéɛ mu ɖekè.

⁶ Ti ɖò mu dyiìn, ɓɛ́ gàa ɖò ké ɔ ɖíí-gàà ɓěɔ̀ ɖò kpɔ̃ ɖé ɔ ɓǎ ɓíɖí-taún, ɓɛ́ ɔ kéɛ ɔ gbo cɛ̃, ɓɛ́ ɔ ké níiń, “M̀ ɓéɖé mú-po-ɖɔ̀ wè. Ɔ jèɛɛ, dyi, ɓɛ́ m̀ ké à wuɖuí kɔ̃̀. Ɓóɖó ɖǎà wáɖáa mɛ nì m̀ xwaún.”

⁷ Kɛɛ ɔ ɖíí-gààɔ̀ mu ɔ gɔ̃̌ jǔùn, ɓɛ́ ɔ ké níiń, “Ḿ se wɔ̃́. Ḿ se ɓě gbo kpáa ɓɛ́ìn. Ḿ se ɖii-ɖɛ̀ mɔɔ mú-po-ɖɔ̀ ɖò ɖé ḿ ɓíɖí-taún ɓéɖé. Ɓě ɓɔ́ ḿ nyɔ ɓěɔ̀ wuɖuí-kɔ̃̀-nyɔ̀ mú nyuɛ.”

⁸ Jùɖúsɛ̀ɖɛ̀ìn-hwɔ̀ɖɔ̀ɔ̀ nì dyi ɓuɖuɛ̌n, ké Júɖà-ɓòɖòɔ̀ nì wáɖáuń, sepóɛɖé waà wĩín-wùɖù kè waà nyuu-kpèɖè vɔ̃ Bounɓoɔ̀ gbo. Wa ɖaɓa Gèɖèpɔ́ɔ̀ mìɔùn nììn dĩ́ín-dĩ̀ìnɔ̀ wuɖuún gàná cá.

⁹ Waà dyúa-kpàɔ̀ kpɔ̃̀ìn wa zaa. Wa nyùìn waà nàmàǔnɔ̀ ɓó píé hwòɖǒǔn kà Sáɖɔ̀ùn-hwɔ̀ɖɔ̀ɔ̀ nyɔ ɓěɔ̀ nyuɛ zɔ̃̌ɔ̀ kà kɛ. Wa ní vǐèɛ̀. Gboò-wùɖù nì wa kɔ̃. Wa dyà mú-gbɔɔ̀-gbɔɔ̀ wa mìɔùn kɔ̃.

¹⁰ Cɛ̃ɛ dyí-sɛ́ɖɛ́ìn-nyɔ̀ ɓěɔ̀ gbo kà mana mu wa kɔ̃ nììn nyɛ. Wa mu waà kũ̀à-sɔ̃̀ɔ̀ pɛ́ɛ̀-ɖɛ̀ kɔ̃ cĩ́ìn.

¹¹ Kɛɛ gboò-wùɖù nì hwòɖǒ-kɔ̃in-nyìnììn-nyɔ̀ ɓěɔ̀ kɔ̃. Wa mu mú gbɔɔ̀ùn, sepóɛɖé wa mu waà kũ̀à-sɔ̃̀ɔ̀ pɛ́ɛ̀-ɖɛ̀ dyéìn.

¹² Dyú-gbɔ́ɔ́ ɓě mɔ̀ ní nyɔ ɓěɔ̀ dyi-pĩ́à-nyɔ̀, ké màa ɓě mɔ̀ nyɔ kɔ̃̀ wa wuɖuí. Óó ní nyɔ ɓě, ɓěɛ̀ nàìn-nyɔ̀ ɓěɔ̀ zàìn ɓě hwìǐ. Wa nyuɛ ké ɓě bĩ hwìè ɓě ɓéɖé ɓě kéɔ́ kpaa xwa.

Bounɓoɔ̀ po ɔ nyɔ ɓěɔ̀ zaa wɔ̃

¹³ Bounɓoɔ̀ ɖǎ ɖé ɔ zɔ̃́ín-wɔ̃-pòìn-naínɔ̀ dyá. Ɔ nyànà dyi, ɓɛ́ ɔ ké ɔ nyɔ ɓěɔ̀ zaa wɔ̃ po.

¹⁴ Bounɓoɔ̀ po ɔ nyɔ ɓěɔ̀ nyɔ vɛ̀nɛ̀ ɓěɔ̀ kè waà wuɖuí-kɔ̃̀-nyɔ̀ ɓěɔ̀ zaa wɔ̃. Ɔ cɛ̃ɛ, ké ɔ ɖá, “Ɓě ɖǎ ní nyɔ ɓěɔ̀ géɖéè-gbǎ ɓěɔ̀ xwa zà. Ɖɛ ɓě ɓɛ́ ɓě zà gǎ-dyé-nyɔ̀ ɓěɔ̀ xwaa nì ɓěɛ̀ gbǒ ɓěɔ̀ mú.

¹⁵ Ɖɛ́ kɔ̃̀ jè ɓě wàìn ní nyɔ ɓěɔ̀ dyi, ɓɛ́ ɓě dyià gǎ-dyé-nyɔ̀ ɓěɔ̀ dyúa-kpà ɓěɔ̀ ɓíɖíi dyi kiɖià kɛ́? Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”

Jùɖúsɛ̀ɖɛ̀ìn-màà ɓěɔ̀ náún-po-po

¹⁶ Ké Bounɓoɔ̀ cɛ̃ɛ ɖe, ké ɔ ɖá, “Dyéɛ kà Jùɖúsɛ̀ɖɛ̀ìn-màà ɓěɔ̀ nyu wa mìɔùn dyí ɓúáìn nyɛ. Wa tò dyúa dyií, ké wa nà. Wa nì dyéɖé-pì dya poɛń, ké wa nì múàǔn-vò-kà nàǔn, ké gèɖèě ɓě ɓɛ́ wa po ɓoɛɛ nì wúɖúɛ kpauń.

¹⁷ Ɔ jèɛɛ, mɔ̄ Bounɓoɔ̀ mu Zádyɔún-màà ɓěɔ̀ xwɛ̃́ dúún poùn. Ní mu waà dú-hwìɛ̀-mì ɓěɔ̀ ɓó dyi zàùn, ɓɛ́ jɔ̌ ké wa dú-hwìɛ̀ cɛ̃̀.”

¹⁸ Wé ɖò nì dyiɛń, ɓɛ́ Bounɓoɔ̀ ké Jùɖúsɛ̀ɖɛ̀ìn-màà ɓěɔ̀ bɛ̃̀ìn-ɖɛ̀ ɓěɔ̀ xwai zà. Ɔ mu wa ɓo-po-ɖɛ̀ ɓěɔ̀ kè dú-jìnììn-kpàǎ ɓěɔ̀ kè ɖɔ-po-ɖɛ̀ ɓěɔ̀

¹⁹ kè ɖùǔn-po-ɖɛ̀ ɓěɔ̀ kè sɔ̃-po-ɖɛ̀ ɓěɔ̀ kè dúi-wáɖá-ɖɔ̀ ɓěɔ̀

²⁰ kè dú-dèìn-ɖɛ̀ ɓěɔ̀ kè sɔ̃-gbɔ̀ǔn-po-ɖɛ̀ ɓěɔ̀ kè bɛ́tì ɓěɔ̀ kè nyɔ́ún-nɔ̀mɔ̀-cànà ɓěɔ̀ kè jɔ̃̀nɔ̀ ɓěɔ̀

²¹ kè jìǐn-po-ɖɛ̀ mɔ̀ ɖɛ-sɔ̃-bɛ̃̀-kɔ̃-pòìn-ɖɛ̀ ɓěɔ̀ kè máná-wĩín-ɓá-ɖɛ̀ ɓěɔ̀

²² kè sútù nɔ̀mɔ̀ kɔ̃in ɓěɔ̀ kè gã́ùn ɓěɔ̀ kè kɔ̃in-gba-ɖɔ̀ ɓěɔ̀ kè wíɖí-mú-po-ɖɛ̀ ɓěɔ̀

²³ kè sɛ́ɓɛ́ɛ̀ ɓěɔ̀ kè ɖénì-ɖɔ̀ nɔ̀mɔ̀ kɔ̃in ɓěɔ̀ kè dú-jìnììn-ɖɛ̀ ɓěɔ̀ ɔ kè ɓaɖa-kɔ̃in ɓěɔ̀ xwai zàùn.

²⁴ Ɓó tia ɓaɖaa, wa se nyɔ́ún-nɔ̀mɔ̀-cànà ɖò fièɛ̌ mu ɖe, kɛɛ wa muá nyɔ́ún nyìnììn. Wa se bɛ́tì nɔ̀mɔ̀ dyíin ɖò gbo poɛ́ mu ɖe, kɛɛ ɔ muá ɖúú kúɖúá jǔùn. Mí nɔ̀mɔ̀ dyíin ɖò se wa dú nìɛ̌ mu ɖe, kɛɛ wa muá jɔ̌-dù ɓéɖéìn. Wa se ɖɔ nɔ̀mɔ̀ kɔ̃in ɖò mú poɛ́ mu ɖe, kɛɛ wa muá ɖɔ-zɔ̃̀ saá-saá mú poùn. Waà dyíin-nɔ̀mɔ̀-nɔ̀mɔ̀ séínɔ̀ muá dɛ̃-ɖɛ̀ mú zɛ̃̀ìn.

²⁵ Jùɖúsɛ̀ɖɛ̀ìn-hwɔ̀ɖɔ̀ɔ̀ gàa-zà-nyɔ̀ ɓěɔ̀ kè ɔ gàa tɔ̀ɔ̀ ɓěɔ̀ mu gàsíà dyúa sèìn ɖé to gbo.

²⁶ Ɔ ɖǎ ná nìǐn, nìí, vĩ̌-wùɖù mu ɖé Zádyɔún-hwɔ̀ɖɔ̀ɔ̀ gmɔ-wɔ̃̀ ɓěɔ̀ gbo nììn. Gǎ muɛ nyuùn ɓɛ́ ɔ nyɔ ɓěɔ̀ ké ɓíɖíi dyi kò.