Àzédyà 21 - Ɓǎsɔ́ɔ̀ Báɓòɔ̀

Dyí-tɛ̀mɛ̀ìn-ɖɛ̀ ɓá Báɓèɖɔ́ùn-ɓòɖòɔ̀ wáɖá jè dyíɛ

¹ Dyí-tɛ̀mɛ̀ìn-ɖɛ̀ ɓɛ́ ɔ sɔ̀ìn ɖé Bounɓoɔ̀ gbo ɓá Báɓèɖɔ́ùn-ɓòɖòɔ̀ jè dyíɛɛ kɛà kɛ̀. Mú-gbɔɔ̀-gbɔɔ̀ nì ɖé nyɔ-fã̀à-nyùìn-ɓòɖò ɖò kɔ̃ sɔ̀ǔn kà wɔ́ɔ́-pìɔ̌ sɔ̀à ɖé Nɛ́gà Gbǎùn-fúɖúáɔ̀ kɔ̃ɛɛ nìà kɛ.

² Dyí-tɛ̀mɛ̀ìn-ɖɛ̀ ɓɛ́ ḿ dyéà kɛɛ mɔ̀ nyɔ-fã̀à-nyùìn-ɖɛ̀ ɖò cá. Ḿ dyéɛ, ké nyɔ-hwu-nyɔ̀ nì nyɔ hwuɛń, ké ɖɛ-mú-gbɔɔ̀-nyɔ̀ nì ɖɛ mú gbɔɔ̀ǔn. Ɓě mɔ̀à Éɖàùn-ɓòɖòɔ̀ sójà ɓěɛɛ, ɓě mu, ɓɛ́ ɓě ké to po. Ɓě mɔ̀à Míì-ɓòɖòɔ̀ sójà ɓěɛɛ, ɓě po Báɓèɖɔ́ùn-ɓòɖòɔ̀ to kɔ̃. Gèɖèpɔ́ɔ̀ mu kpò-wùɖù ɓɛ́ Báɓèɖɔ́ùn-ɓòɖòɔ̀ ɖǎà nyɔǔn séín wĩín poɛɛ ɓɔ́í poùn.

³ Ɖɛ ḿ dyéà ɖé dyí-tɛ̀mɛ̀ìn-ɖɛ̀ɔ̀ múɛɛ nyùìn ḿ fã̀à mìɔ, ké ɔ nyuɛ ké ní xwíɖíɔ̀ puà kà màa ɖòɛ̀ póó-xwìɖì kéɔ́ kà ɔ puà kɛ. Ɖɛ ḿ wɔ̃́à kɛɛ nyuɛ ké ḿ kpɔ̃ xwíníín. Ɖɛ ḿ dyéà kɛɛ nyuɛ ké fã̀à dyíìn ḿ múin.

⁴ Fã̀à nyu ḿ mìɔ, ké ɔ nyuɛ ké ní fɔ̀nɔ̀-hwòɖǒɔ̀ vũà dyi, ké ḿ nì tɛɖɛiń. Ḿ nì ma fòèɛ̌n ɓɛ́ hwìo ké ma jǔ, kɛɛ ɖɛ ɓɛ́ hwìoɔ̀ dyà ḿ wɛ̃ɛ mɔ̀ fã̀à saá-saá.

⁵ Ḿ dyéɛ ɖé dyí-tɛ̀mɛ̀ìn-ɖɛ̀ɔ̀ mú, ké Báɓèɖɔ́ùn-nyɔ̀ ɓěɔ̀ nì téɓèɖè dèɛ̌n, ké wa nì kɔ̃-kò-ɖɛ̀ ɓě dyi soɖoɛń, ké wa nì ɖɛ ɖiɛń, ké wa nì náuń. Wàɖà kɛɛ, púɛɛ, wuɖu ɖò dyi, ké wuɖuɔ̀ ɖá, “Sójà-nàìn-nyɔ̀ ɓě, ɓě sɔ̀ dyí. Ɓě po dyí-zĩ̀ìn-ɖɛ̀ ɓěɔ̀ cáná!”

⁶ Ké Bounɓoɔ̀ cɛ̃ɛ ḿ gbo, ké ɔ ɖá, “Mu, ɓɛ́ m̀ ké hwɔɖɔ-dyí-gmɔ̀-nyɔ̀ ɖò dyi nyànàìn. Ɔ mɛ po wuɖui ɓá ɖɛ ɔ dyéɛɛ jè dyí.

⁷ Ɔ jǔ ké ɔ dyi nyɔ ɓě nì sǒ kɔ̃ún wɛ̃ɛ sɔ̃́-sɔ̃́ kè nyɔ ɓě nì jǎkasì ɓě kè sǒ-nì-gbu-kɔ̃ún ɓě kɔ̃ún wɛ̃ɛ dyiɛ dyé ní, nìí, ɔ mɛ nì ɓɛ́ɖɛ́ kɔ̃ kóɖó-kóɖó.”

⁸ Ti ɓɛ́ hwɔɖɔ-dyí-gmɔ̀-nyɔ̀ɔ̀ nì ma hwɔɖɔɔ̀ dyí gmɔ̀ǔn wɛ̃ɛ, ɔ páná ma mú, ké ɔ ɖá, “Ɓɔ̌ɔ̀, ḿ nyànà nɔ̄ ní páɔ̀ mú dyi nɔ̄ hwɔɖɔ-dyí-gmɔ̀ìn-gbòɛ̀ dya, ké ḿ nì ɓɛ́ɖɛ́ kɔ̃ kánáá pū ɓó máaún kè dyóɖóaún.

⁹ Gmɔ̀ ɖéa kà nyɔ ɓě nì sǒ kɔ̃ún wɛ̃ɛ sɔ̃́-sɔ̃́ nì dyiɛń nyɛ. Ké ḿ wɔ̃́ wuɖu ɖò, ké wuɖuɔ̀ ɖá, ‘Báɓèɖɔ́ùn-ɓòɖòɔ̀ ɖǎ wáɖá. Ɔ ɖǎ wáɖá. Ké ɔ kũùn-kpò-gèɖèpɔ́ɔ̀ ɓěɔ̀ hwɔìn-ɖɛ̀ séín ɓěɔ̀ ɖǎ dyi wɛ̀ìn.’ ”

¹⁰ Óó ḿ ɖíí Éézùɖùɛ̀-nyɔ̀ ɓě, ɓě mɔ̀ nyɔ ɓɛ́ wa nyuà kà nyɔ síà mɔɔ́ dyí, ɓɛ́ nyɔ dyià mú nyaa, ɖɛ ɓɛ́ ḿ wɔ̃́ Bounɓo mɔ̀ nyɔ nìà ɖɛ séín kɔ̃in, ɓɛ́ ɔ mɔ̀à Éézùɖùɛ̀ Gèɖèpɔ́ɔ̀ kɛɛ wĩín nyɛɛ, ɖéɛ̀ ḿ nìà ɓě gbo cɛ̃iń nyɛ̀.

Wuɖu ɓá Dúmà-ɓòɖòɔ̀ jè dyíɛ

¹¹ Wuɖu ɓɛ́ ɔ sɔ̀ìn ɖé Bounɓoɔ̀ gbo ɓá Dúmà-ɓòɖòɔ̀ jè dyíɛɛ kɛà kɛ̀. Nyɔ ɖò nì ḿ ɖáuń sɔ̀ìn ɖé Íɖɔ̀ùn-ɓòɖòɔ̀ kɔ̃, ké ɔ ɖá, “Hwɔɖɔ-dyí-gmɔ̀-nyɔ̀ wè, tiɔ̀ nyɛ́ hwuɖuɔ̀ mu ɖé hwɛ̀ìn nyɛ́? Hwɔɖɔ-dyí-gmɔ̀-nyɔ̀ wè, tiɔ̀ nyɛ́ hwuɖuɔ̀ mu ɖé hwɛ̀ìn nyɛ́?”

¹² Ké ḿ jǔ ma ɔ gɔ̃̌, ké ḿ ɖá, “Zɔ̃ nì zɔ̃uń dyiɛń, kɛɛ nìí, hwuɖuɔ̀ mu hwɔùn ɖe. Ɔ jǔ ké m̀ dyi ɖɛi dièɛ̀ mɔ́ ɖe ní, nìí, m̀ mɛ dyi ɖe, ɓɛ́ m̀ ké ɖɛi diè.”

Wuɖu ɓá Àwéɖéɓìà-ɓòɖòɔ̀ jè dyíɛ

¹³ Wuɖu ɓɛ́ ɔ sɔ̀ìn ɖé Bounɓoɔ̀ gbo ɓá Àwéɖéɓìà-ɓòɖòɔ̀ jè dyíɛɛ kɛà kɛ̀. Ɓě mɔ̀ sǒ-nì-gbu-kɔ̃ún kɔ̃ún-kò-nyɔ̀ kúɖúú ɓě sɔ̀à ɖé Dɛ́ɖàùn-hwɔ̀ɖɔ̀ɔ̀ mú, ké ɓě nìà ɖé Àwéɖéɓìà Gbǎùn-fúɖúáɔ̀ kɔ̃ɛɛ,

¹⁴ ɓě nyí nyɔ ɓě ɓɛ́ ní-ná-tò nì nyuɛń nyɛɛ ní. Ɓě mɔ̀ nyɔ ɓě cĩ́à ɖé Témà-ɓòɖòɔ̀ kɔ̃ɛɛ, ɓě dyà to-peɖe-nyɔ̀ ɓěɔ̀ ɖii-ɖɛ̀.

¹⁵ Sepóɛɖé wa gbǔ gàsíà zà kpaɖaúnɔ̀ kè pɔnɔ kíɖí-kíɖíɔ̀ dyúa. Wa gbǔ to nìà wa ɖeín nyɛɛ dyúa.

¹⁶ Ké Bounɓoɔ̀ cɛ̃ɛ ma ḿ gbo ɖe, ké ɔ ɖá, “Ɔ mu kũ̀à-nyùìn-zɔ̃̀ dyúáɖò nyɛ̀nɛ̀ɛ̀ dyí ɖúùn, ɓɛ́ Kéɖà-ɓòɖòɔ̀ dĩ́ín-dĩ̀ìnɔ̀ jè ké dyi zi.

¹⁷ Ké Kéɖà-nyɔ̀ ɓěɔ̀ gàa-zà-nyɔ̀ ɓě ɓɛ́ wa mɔ̀ sé-po-nyɔ̀ ɓě, ɓɛ́ wa mu ɓíɖíi sèìn nyɛɛ se dyí vòɛ̌ mu. Mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ mɔ̀ nyɔ cɛ̃à kɛ̀.”