Àzédyà 20 - Ɓǎsɔ́ɔ̀ Báɓòɔ̀

Kpáá-ɖɛ̀-cɛ̃-nyɔ̀ɔ̀ fɔ̀nɔ̀ múin ɓɛ́ ɔ ké ɖàɓàìn-ɖɛ̀ jǔ

¹ Zɔ̃ kɔ̃̀ xwíníín ɓɛ́ Sáágɔ̃̀ ɓɛ́ ɔ mɔ̀ ma Àsíwíɖíà-kã̀ǎ kɛɛ ɖoɓo ma ɔ sójà ɓěɔ̀ wuɖuí-kɔ̃̀-nyɔ̀, ɓɛ́ ɔ ké ma Áɖò mɔ̀à Féɖésìà-nyɔ̀ ɓěɔ̀ ɓíɖí-hwɔ̀ɖɔ̀ ɓěɔ̀ ɖòɛɛ to kɔ̃ kpa, ɓɛ́ ɔ kéɛ ma dyí ɖúɛɛ,

² Bounɓoɔ̀ cɛ̃ɛ ma mɔ̄ Àzédyà mɔ̀à Ámɔ̀zìɛ̀ dyú-gààɔ̀ kɛɛ gbo, ké ɔ ɖá, “Mu, ɓɛ́ m̀ ké ɖɔ-zɔ̃̀ m̀ poà múɛɛ mú zà, ɓɛ́ m̀ ké nì bǎɔ̀ ɓoún zà ɖekè.” Ké ḿ nyuɛ ma náa, ké ḿ fɔ̀nɔ̀ ma múin, ké ḿ fɔ̀nɔ̀ ma ɓoún dyi.

³ Ti ɖɛ ɓěɛ̀ ɖǎ ma dyi ziɛɛ, Bounɓoɔ̀ cɛ̃ɛ ma, ké ɔ ɖá, “Kà ɓɛ́ ní gbo-nì-nyɔ̀ Àzédyà fɔ̀nɔ̀à múin, ké ɔ fɔ̀nɔ̀à ɓoún dyi, ɓɛ́ ɔ dyià dyi nà ɓó zɔ̃ tã xwíníín, ɓɛ́ ɔ kéà ɖàɓàìn-ɖɛ̀ kè dyí-tɛ̀mɛ̀ìn-ɖɛ̀ jǔ ɓá ɖɛ gbà mu Íjè-ɓòɖòɔ̀ kè Kúsì-ɓòɖòɔ̀ gbo kpáùn wɛ̃ɛ jè dyíɛɛ,

⁴ kà dyúáɖòɔ̀ kǎà Àsíwíɖíà-kã̀ǎɔ̀ mu Íjè-nyɔ̀ ɓěɔ̀ kè Kúsì-nyɔ̀ ɓěɔ̀ toɛ̀-kpɔ̃-nyɔ̀ mú nyuùn. Wa nyɔ gmɔ̀ kè nyɔ sùà mu gbɔ fɔ̀nɔ̀ùn, ɓɛ́ wa ké ɓoún dyi fɔ̀nɔ̀, ɓɛ́ dɛ̃ ké Íjè-ɓòɖòɔ̀ nyu.

^5-6 Ɔ ɖǎ ná nìǐn, fã̀à mu nyɔ ɓě ɓɛ́ wa cĩ́à Mɛ́ɖɛ̀tɔ̀wéɖénìà-dyòǒɔ̀ wĩin nyɛɛ nyuùn mìɔ, ɓɛ́ waà hwòɖǒ ké ɖé ɖei kpá ɓó Kúsì-ɓòɖò ɓɛ́ wa dè ma kà hwòɖǒ kɔ̃ɛ kè Íjè-ɓòɖò kɔ̃̀ jè wa nì ma kà ɓɔ́ɖɔ́uń wɛ̃ɛ jè. Wa muɛ cɛ̃ìn ɓó wéa ɓaɖa, ɓɛ́ wa ké níiń, ‘Dyé ɖɛ kpá nyɔ ɓě ɓɛ́ à dè ma hwòɖǒ kɔ̃ɛɛ gboɛ. Wa mɔ̀ nyɔ ɓě kɔ̃̀ gbo à gbǔìn ma kà, ɓɛ́ wa ké ma kà à Àsíwíɖíà-kã̀ǎɔ̀ xwaún póìn nyɛ. Kē! Xwɛ̌ à muá ɔ xwaún póɛ nyuùn wɛ̃́?’ ”