Àzédyà 2 - Ɓǎsɔ́ɔ̀ Báɓòɔ̀

Sè-kpáà gìɖìǐ

¹ Bounɓoɔ̀ wuɖu ɓɛ́ ɔ dyi ma mɔ̄ Àzédyà mɔ̀à Ámɔ̀zìɛ̀ dyú-gààɔ̀ kɛɛ gbo ɓá Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ jè dyíɛɛ kɛà kɛ̀. Wuɖuɔ̀ ɖá,

² “Ɓó wé hwɛ̀ìn-gbɔɔ̀ ɓaɖaa, toɖo kɔ̃̀ dya ɓɛ́ Bounɓoɔ̀ gbǒɔ̀ nìà kɛɛ mu toɖo ɓɛ́ ɔ tɔ̀mɔ̀ dya mìɔ ɖé toɖo ɓě hwìɛ̀ kɛɛ jǔùn. Ɔ mu ɖé toɖo tɔ̀ɔ̀ ɓě dú-hwìɛ̀ dyi pɛ̃́ìn, ké ɓóɖó-dù séín ɓěɔ̀ muɛ gbo muùn.

³ Nyɔ ɓáún-ɓáún mu dyiìn, ɓɛ́ wa ké níiń, ‘Ɓě dyi, ɓɛ́ ɓěà ké ɖé Bounɓoɔ̀ toɖoɔ̀ dya mu. Ɓěà mu ɖé Jékɔ̀ɛ̀ Gèɖèpɔ́ɔ̀ gbǒɔ̀ gbo, ɓɛ́ ɔ ké ɔ kpeɖe ɓěɔ̀ à tɛ̀mɛ̀ìn, nìí ɓɛ́ à ké ɔ hwìèɔ̀ xwíníín nà.’ Sepóɛɖé ɖé Zádyɔún-hwɔ̀ɖɔ̀ɔ̀ mú, ɖéɛ̀ Bounɓoɔ̀ gmaɔ̀ mu sɔ̀ìn. Ɔ wuɖuɔ̀ mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú sɔ̀ìn.

⁴ “Bounɓoɔ̀ mu zɔ̃́ín nì ɓóɖó-dù ɓěɔ̀ pṹa kɛɛ wɔ̃ poùn. Ɔ mu nyɔ ɓáún-ɓáún ɖɛ wɔ̃ poùn. Ké wa muá waà gàsíà ɓěɔ̀ ɓóɖó-wàìn-ɖɛ̀ ɓě mú ɓaɖaùn, ké wa mu waà ɖí ɓěɔ̀ ɖɛ-kpã́ìn-gbǎ ɓě mú ɓaɖaùn. Ɓóɖó-dù ɖò se ɔ mǔè-ɓòɖò-dù ɖò to kɔ̃ kpaá mu ɖe, mɔɔ ké wa se to-vɔ̃-nyɔ̀ ɖò ti dyéɛ̌n mu ɓó to jè ɖe.”

⁵ Óó Jékɔ̀ɛ̀ gbǒ-xwíníín-nyɔ̀ ɓě, ɓě dyi, ɓɛ́ ɓěà ké ɖé Bounɓoɔ̀ ceɔ̀ mú cĩ́.

Bounɓoɔ̀ mu nyɔ ɓě ɓɛ́ wa ɓúáìn wa mìɔùn dyíɛɛ mú gbɔɔ̀ùn

⁶ Óó Bounɓo, m̀ ɖǎ nì nyɔ ɓě mɔ̀à Jékɔ̀ɛ̀ gbǒ-xwíníínɔ̀ kɛɛ dyi táà, sepóɛɖé wa sí ɓóɖó-dù ɓě nìà ɖé dyóɖó-xwáɖáún-wóɖóìn-naínɔ̀ kɛɛ kpeɖe ɓěɔ̀ kíɖíí, ké wa mɔ̀ǎ sɛ̀ɛ̀-po-nyɔ̀ ɓě kà Féɖésìà-nyɔ̀ ɓěɔ̀ nìà kɛ. Wa kè ɖíà ɓě po wuɖu ɓíín.

⁷ Ké séɓàɖà kè góò dyíìn waà ɓóɖóɔ̀ múin. Waà dyi-dè-ɖɛ̀ ɓěɔ̀ se zɛɖɛɛ ɓɛ́ìn. Sǒ ɓě dyíìn ɖé waà ɓóɖóɔ̀ múin, ké waà hwíì-sǒ ɓěɔ̀ se zɛɖɛɛ ɓɛ́ìn.

⁸ Ké kũùn-kpò ɓě dyíìn ɖé waà ɓóɖóɔ̀ múin ɖekè. Wa taɓa wa mìɔùn nììn sɔ̃ɔ̀ mɛɛ-ɖɛ̀ ɓěɔ̀ dyúa dú hwuɖu.

⁹ Ɔ jèɛɛ, wa mu wa séín ɓíɖíi dyàùn. Wa mu ɓíɖíi dyi kpáùn. Kɛɛ Bounɓo, mɔ̀ǔn zĩ̀ìn wa kɔ̃in.

¹⁰ Júɖà-nyɔ̀ ɓě, ɓě pa ɖé sɔ́ɔ́-ɓì ɓě kè ɓí ɓě nì ɓóɖóún wɛ̃ɛ mú, ɓɛ́ ɓě ké Bounɓoɔ̀ díɖíɔ̀ kè ɔ dĩ́ín-dĩ̀ìn vɛ̀nɛ̀ɔ̀ dyí vǐè.

¹¹ Wé ɖò mu dyiìn, ké nyɔ ɓě ɓɛ́ wa ɓúáìn wa mìɔùn dyíɛɛ dyéɖé mu ɓíɖíi dyiìn, ké ɓɔ́ɖɔ́-nyɔ̀ ɓěɔ̀ mu ɓíɖíi dyi kpáùn, kɛɛ Bounɓoɔ̀ ɖòùn mu dya-dè-dè ɓéɖéìn.

¹² Sepóɛɖé Bounɓo mɔ̀ nyɔ nìà ɖɛ séín kɔ̃in nyɛɛ ɖǎ wé ɖò táí po, ɓɛ́ ɔ ké nyɔ séín ɓɛ́ wa ɓúáìn wa mìɔùn dyíɛ kè ɓɔ́ɖɔ́-nyɔ̀ séín ɓěɔ̀ ɔ kè nyɔ séín ɓɛ́ wa ɖú wa mìɔùn dyiíɛɛ ɓíɖíi dyà.

¹³ Kǎà ɔ mu síɖà-cù tɔ̀mɔ̀ dya séín nì ɖé Ɖɛ́ɓèɖɔ́ùn-ɓòɖòɔ̀ kɔ̃ɛ kè cu vɛ̀nɛ̀ séín ɓě nì ɖé Básàùn-ɓòɖòɔ̀ kɔ̃ɛɛ nyuùn ɖekè.

¹⁴ Kǎà ɔ mu nììn ɓá toɖo vɛ̀nɛ̀ séín ɓěɔ̀ kè toɖo-dyù séín ɓěɔ̀ jè dyí.

¹⁵ Kǎà ɔ mu nììn ɓá hwɔɖɔ-dyí-gmɔ̀ìn-gbò tɔ̀mɔ̀ dya séín ɓěɔ̀ kè hwɔɖɔ séín nì gmɔ ɖeiɛɛ jè dyí.

¹⁶ Kǎà ɔ mu nììn ɓá méè séín ɓě ɓɛ́ wa sɔ̀ ɖé Tásìà-hwɔ̀ɖɔ̀ɔ̀ múɛ kè méè nɔ̀mɔ̀ kɔ̃in séín ɓěɔ̀ jè dyí.

¹⁷ Nyɔ ɓě ɓɛ́ wa ɓúáìn wa mìɔùn dyíɛɛ mu ɓíɖíi dyi kpáùn, ké ɓɔ́ɖɔ́-nyɔ̀ ɓěɔ̀ mu ɓíɖíi dyi kpáùn ɖekè, kɛɛ Bounɓoɔ̀ ɖòùn mu dya-dè-dè ɓéɖéìn ɓó wéa ɓaɖa.

¹⁸ Ké ɔ mu kũùn-kpò séín ɓěɔ̀ jè dyi zĩ̀ìn.

¹⁹ Ɓó wéa ɓaɖaa, Bounɓoɔ̀ mu dyí sɔ̀ùn, ɓɛ́ ɔ ké ɓóɖó-kpàà dyi túò gana-kà, ké nyɔǔn ɓě mu muùn, ɓɛ́ wa ké sɔ́ɔ́-ɓì ɓě kè ɓí ɓě nì ɓóɖóún wɛ̃ɛ mú pa, ɓɛ́ wa ké Bounɓoɔ̀ díɖíɔ̀ kè ɔ dĩ́ín-dĩ̀ìn vɛ̀nɛ̀ɔ̀ dyí vǐè.

²⁰ Ɓó wéa ɓaɖaa, wa mu waà séɓàɖà-kũ̀ùn-kpò ɓěɔ̀ kè waà góò-kũ̀ùn-kpò ɓě ɓɛ́ wa mɛ ma ɓó wa mìɔùn bììɛɛ xwáɖáún poùn, ɓɛ́ wa ké bũ̀ɛ̌ ɓě kè zĩ́á-gã ɓě nììn kɔ̃̀ɔ̀-ɖɛ̀ jǔ.

²¹ Wa mu ɖɛ ɓěà xwáɖáún poùn, ɓɛ́ wa ké sɔ́ɔ́-ɓì ɓě kè toɖo-ɓì ɓě mú pa, ɓɛ́ wa ké Bounɓoɔ̀ díɖíɔ̀ kè ɔ dĩ́ín-dĩ̀ìn vɛ̀nɛ̀ɔ̀ dyí vǐè, ti ɔ muà dyí sɔ̀ùn, ɓɛ́ ɔ kéà ɓóɖó-kpàà dyi túò gana-kà kɛ.

²² Ɔ jèɛɛ, ɓě ɓɔ́ nyɔǔn hwìɖǐǐ taɓaa, sepóɛɖé fɛ̀ɛ̀ ɔ ɓéɖéɛɛ nìà ɓó ɔ máná-ɓìɔ̀ mú nyɛ̀nɛ̀ɛ̀ kɛ̀. Ɖɛ́ nyɔǔn kpa kɛ́?