Àzédyà 19 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Íjè-ɓòɖòɔ̀ gǎ kɔ̃ tòùn

¹ Wuɖu ɓɛ́ ɔ sɔ̀ìn ɖé Bounɓoɔ̀ gbo ɓá Íjè-ɓòɖòɔ̀ jè dyíɛɛ kɛà kɛ̀. Gmɔ̀ ɖéa, Bounɓoɔ̀ kpá ní-kpò ɖò kɔ̃ún, ké ɔ nì Íjè-ɓòɖòɔ̀ kɔ̃ dyiɛń wàɖà-wàɖà. Ké Íjè-ɓòɖòɔ̀ kũùn-kpò ɓěɔ̀ nì kɔ̃in tɛɖɛiń ɓó ɔ dyúa, ké hwòɖǒ ɖò se Íjè-nyɔ̀ ɖò xwíníín sè.

² Bounɓoɔ̀ cɛ̃ɛ, ké ɔ ɖá, “Ní muɛ nyuùn ɓɛ́ Íjè-nyɔ̀ ɓěɔ̀ ké gbo vɔ̃ìn vɔ̃̀ìn. Ɖíí-gàà ɓě mu gbo vɔ̃ìn vɔ̃̀ìn, ké mǔè kè mǔè mu gbo vɔ̃ìn vɔ̃̀ìn. Hwɔɖɔ kè hwɔɖɔ mu gbo vɔ̃ìn vɔ̃̀ìn, ké Íjè-ɓòɖòɔ̀ gbɛ̌ɛ̀ ɓě mu gbo vɔ̃ìn vɔ̃̀ìn.

³ Ké ní muɛ nyuùn ɓɛ́ hwòɖǒ ɖò ké se Íjè-nyɔ̀ ɓěɔ̀ xwíníín sè. Ní muɛ nyuùn ɓɛ́ waà dyí-sɔ́-ɖɛ̀ ɓěɔ̀ ké se ɖɛín-ɖɛ̀ ɖò gbo wóɖó. Ké wa mu kũùn-kpò ɓě kè gĩɔ-nyɔ̀-gbo-wùɖù-nyɔ̀ ɓě ɔ kè wɔ-pa-nyɔ̀ ɓě dyi dièɛ̌ muùn.

⁴ Ké ní mu Íjè-nyɔ̀ ɓěɔ̀ gǐì-ɓǎ ku wɔ̃ ɖò xwaún dyi poùn. Kã́á ku wɔ̃ ɖò mu wa wuɖuí kɔ̃̀ùn. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”

⁵ Náà-nìɔ̀ mu maùn. Ɔ mu ɓíɖíi muɛń dyi gã̀ùn tee, ké ɔ hwɛ̀ ɓó dyi maa.

⁶ Náà-nìɔ̀ ɖɔ́ séín ɓěɔ̀ mu nyɔ́ún nyìnììn ti ɓɛ́ níɔ̀ nì maùn wɛ̃. Ké tòǒ-gbǎ kè ní-pũ̀ǎ ɓě ɓɛ́ wa nì ɖé níɔ̀ gboɛɛ mu ɓó dyi dyɛìn.

⁷ Ké ɓáá-ɖɛ̀ séín ɓě ɓɛ́ wa ɓá ɓó níɔ̀ wĩin nyɛɛ mu ɓó dyi dyɛɛ hwɛ̀ìn, ké pìɔ̌ mu wa kpaùn, ké ɖò se ɓó sèɛ̌ mu.

⁸ Ké zimii-ɖáɓá-nyɔ̀ séín ɓě mu wìǐn kpáùn, ɓɛ́ wa ké vĩ̌. Nyɔ séín ɓě ɓɛ́ wa mɔ̀ ma níɔ̀ kɔ̃ xwɛ̃ɛ́-po-nyɔ̀ kè kpéɖé-wáɖá-nyɔ̀ɛɛ mu wìǐn kpáùn mìɔ.

⁹ Ké fáɖáà kè dyèě-vúɛ́ ɖò se nìɛ̌ mu ɖe. Ɔ jèɛɛ, ɖɔ-ɖaɓa-nyɔ̀ séín ɓěɔ̀ hwòɖǒ mu ɖé ɖei kpáùn mìɔ.

¹⁰ Ké nyɔ ɓě ɓɛ́ wa mɔ̀ ɓóɖóɔ̀ cu-kpà ɓěɛ kè pɛ́ɛ̀-kũ̀à-nyu-nyɔ̀ ɓěɔ̀ hwòɖǒ mu ɖé ɖei kpáùn mìɔ ɖekè.

¹¹ Zóàùn-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀ mɔ̀ zuɖuu-nyɔ̀. Íjè-kã̀ǎɔ̀ náún-po-nyɔ̀ ɓěɔ̀ cɛ̃ zuɖuu-ɖɛ̀. Ɖɛ́ kɔ̃̀ jè wa cɛ̃à Íjè-kã̀ǎɔ̀ gbo kà wa mɔ̀ hwòɖǒ-fɔ̀nɔ̀-nyɔ̀ ɓě kè kã́á ɓě nìǒ zɔ̃̌ɔ̀ kɛɛ dyú ɓě kɛ́?

¹² Íjè-kã̀ǎ wè, dɛ̌ nì hwòɖǒ-fɔ̀nɔ̀-nyɔ̀ ɓěɔ̀ nì ɓó kàǔn wɛ̃́? Wa mɛ cɛ̃ ɖɛ ɓɛ́ Bounɓo mɔ̀ nyɔ nìà ɖɛ séín kɔ̃in nyɛɛ ɖǎ dyí sɔ́ ɓɛ́ ɔ ké Íjè-ɓòɖòɔ̀ bũ̌ nyuɛɛ jè m̀ gbo.

¹³ Zóàùn-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀ mɔ̀ zuɖuu-nyɔ̀, ké Mɛ́fè-hwɔ̀ɖɔ̀ɔ̀ nyɔ vɛ̀nɛ̀ ɓěɔ̀ hwòɖǒ cá kɔ̃in. Íjè-ɓòɖòɔ̀ cu-kpà ɓěɔ̀ ɖǎ ɓóɖóɔ̀ hwìǐ zàìn.

¹⁴ Bounɓoɔ̀ nyuɛ ké waà ná-wùɖù ɓěɔ̀ ɖǎ kɔ̃in cá. Ɔ jèɛɛ, Íjè-ɓòɖòɔ̀ ní nyu ɖɛ sɛ́ɖɛ́ìn dyí ɖò ɖe. Ɔ nìǎ dyi ɓuɖuɛ̌n kà nɔmɔɔ-ná-nyɔ̀ ɓɛ́ nɔmɔɔ nyuɛ ɓéɖéà dyi ɓuɖuɛ̌n ɖé ɖɛ ɔ zà kɛɛ múɛ.

¹⁵ Bã-nyɔ̀ ɖò mɔɔ gǎ-dyé-nyɔ̀ ɖò, nyɔ kpa ɖɛ ɖò mɔɔ nyɔ se ɖɛ kpa ɖò se ɖé Íjè-ɓòɖòɔ̀ kɔ̃ nì, ɓɛ́ ɔ ké gbo-kpá-kpá ɖò tòɛ̀ ɓɛ́ìn.

Íjè-nyɔ̀ ɓěɔ̀ mu Bounɓoɔ̀ ɓièìn

¹⁶ Wé ɖò nì dyiɛń, ké Íjè-nyɔ̀ ɓěɔ̀ mu fɛ̃̀ìn kà màa nìà kɛ. Wa mu tɛɖɛìn ti ɓɛ́ wa muɛ dyéìn kà Bounɓo mɔ̀ nyɔ nìà ɖɛ séín kɔ̃in nyɛɛ ɖǎ ɔ sɔ̃ɔ̀ pɛ́ɛ̀, ɓɛ́ ɔ ké wa gǎ kɔ̃ tòɛ.

¹⁷ Ti séín nyɔ ɖò mu Júɖà-ɓòɖòɔ̀ nyɛ́nɛ́ ɖáùn ɖé Íjè-nyɔ̀ ɓěɔ̀ gboɛɛ, fã̀à mu Íjè-nyɔ̀ ɓěɔ̀ nyuùn mìɔ. Wa séín muɛ jè wɔ̃́ùn wɛ̃ɛ, díɖí mu wa taɓaùn ɓó ɖɛ gbà ɓɛ́ Bounɓoɔ̀ ɖǎ dyí sɔ́ ɓá wa jè dyíɛɛ jè.

¹⁸ Ɓó wéa ɓaɖaa, hwɔɖɔ hm̀m̌ mu ɖé Íjè-ɓòɖòɔ̀ kɔ̃ nììn, ké wa mu Híìbúɖúù-wùɖù poùn, ɓɛ́ wa ké Bounɓo mɔ̀ nyɔ nìà ɖɛ séín kɔ̃in nyɛɛ ɓiè. Wa mu hwɔɖɔ ɓěa ɖò Dyóɖó-hwɔ̀ɖɔ̀ ɖáìn.

¹⁹ Ɓó wéa ɓaɖaa, sáa-kɔ̃-zàìn-gbàà ɖò mu ɖé Íjè-ɓòɖòɔ̀ hwòɖǒǔn nììn ɓó Bounɓoɔ̀ bìì, ké wa mu ɓiè-sɔ̀ɔ̌-kpò ɖò dyi nyànàìn ɓó Bounɓoɔ̀ bìì, ɖé ɓóɖóɔ̀ bã̀àɔ̀ dyí.

²⁰ Ɖɛ ɓěɛ̀ mu dyí-tɛ̀mɛ̀ìn-ɖɛ̀ kè zàse jǔùn ɓó Bounɓoɔ̀ dyúa, ɖé Íjè-ɓòɖòɔ̀ kɔ̃. Ti ɓɛ́ nyɔ ɖò mu wa dyi pĩ́àùn, ké wa mu Bounɓoɔ̀ kpéi pòìn nyɛɛ, nìí, ɔ mu wa póìn-nyɔ̀ ɖò gbo tòùn, ké ɔ mu wa bìì vɔ̃ùn, ɓɛ́ ɔ ké wa póìn.

²¹ Ɓó wéa ɓaɖaa, Bounɓoɔ̀ mu ɔ mìɔùn Íjè-nyɔ̀ ɓěɔ̀ dyí tɛ̀mɛ̀ìn, ké wa mu ɔ jè mú wɔ̃́ìn, ɓɛ́ wa ké ɔ ɓiè. Wa mu ɔ ɖii-ɖɛ̀-sàǎ-zàìn-ɖɛ̀ ɓě kè sáa-zàìn-ɖɛ̀ tɔ̀ɔ̀ ɓě nyíìn, ké wa mu Bounɓoɔ̀ wuɖu dyéɖéín ɖììn, ɓɛ́ wa ké ɖɛ ɓě kɔ̃̀ wuɖu wa ɖiɛɛ nyu.

²² Bounɓoɔ̀ mu Íjè-nyɔ̀ ɓěɔ̀ sɔ̃ kɔ̃ pɛ̃́ìn, kɛɛ ɔ mu wa dyi kánáìn ɖe. Wa mu ɔ gbo gmɔ̀ìn ɖe, ké ɔ mu waà ɓaà-wùɖù ɓěɔ̀ wɔ̃́ùn, ké ɔ mu wa dyi kánáìn.

²³ Ɓó wéa ɓaɖaa, hwìè vɛ̀nɛ̀ ɖò mu ɓó Íjè-ɓòɖòɔ̀ kè Àsíwíɖíà-ɓòɖòɔ̀ pṹa nììn, ké Íjè-nyɔ̀ ɓěɔ̀ kè Àsíwíɖíà-nyɔ̀ ɓěɔ̀ mu gboi téìn. Ké ɓóɖó-dù sɔ̃́ ɓěɔ̀ mu dyí poìn, ɓɛ́ wa ké Bounɓoɔ̀ ɓiè.

²⁴ Ké Éézùɖùɛ̀-ɓòɖòɔ̀ kè Íjè-ɓòɖòɔ̀ ɔ kè Àsíwíɖíà-ɓòɖòɔ̀ mu sɔ̃ ní gbo poìn, ké wa mu ɓóɖó-kpà gànáà mana kɔ̃ dyàùn.

²⁵ Bounɓo mɔ̀ nyɔ nìà ɖɛ séín kɔ̃in nyɛɛ muɛ cɛ̃ìn, ɓɛ́ ɔ ké níiń, “Mana mɛ nì Íjè-nyɔ̀ ɓě mɔ̀à ní nyɔ ɓěɛ, kè Àsíwíɖíà-nyɔ̀ ɓě mɔ̀à ní sɔ̃ɔ̀ mɛɛ-ɖɛ̀ kɛ, ɔ kè Éézùɖùɛ̀-dyù ɓě mɔ̀à ní kɔ̃̀ɔ̀-ɖɛ̀ kánáá pūɛɛ kɔ̃.”