Àzédyà 18 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Kúsì-ɓòɖòɔ̀ gǎ kɔ̃ tòùn

¹ Gboò-wùɖù nì Kúsì-ɓòɖò ɓɛ́ wãa-ɖɛ̀ kúɖúú dyíà kɔ̃ɛɛ kɔ̃. Ɔ mɔ̀ ɓóɖó ɓɛ́ ní ɓě geà múɛ.

² Kúsì-ɓòɖòɔ̀ kíá ɓě sɔ̀ ɖé, ké wa dèɖěìn Náà-nìɔ̀ dyi ɖé tòǒ-hwɔ̀ ɓě mú. Ɓo-xwai-fṹà-kìǎ ɓě, ɓě mu ɓě ɓíɖí ɖe. Ɓě mu ɖé ɓěɛ̀ nyɔ ɓě tɔ̀mɔ̀à dya, ké waà dyɔɔ̀-kù nìà ɓɔ̀ɖɔ̀ɔ̀-ɓɔ̀ɖɔ̀ɔ̀ kɛɛ gbo. Wa mɔ̀ nyɔ ɓě ɓɛ́ ɓóɖó-dù ɓě xwɛ̃́ìn dyiɛ kè ɓóɖó-dù ɓě tɔ̀mɔ̀ gboɛɛ fɛ̃̀ìn dyi mìɔ kɛ. Wa mɔ̀ ɓóɖó-dù ɓéɖé gana, ké wa mɔ̀ to-ɖu-nyɔ̀ ɓě. Wa mɔ̀ nyɔ ɓě kɔ̃̀ ɓóɖó ɓɛ́ ní ɓěɔ̀ geà mú kɛ.

³ Ɓě mɔ̀à toɖo-kɔ̃-nyɔ̀ séín ɓěɛɛ, ɔ jǔ ké wa dyi và po ɖé toɖo ɓěɔ̀ dya ní, ɓě gmɔ̀ ɖé. Wa dyi ɖɔ-kpa ɓaɖa ní, ɓě tòɛ̀ ɖùǔ gbo.

⁴ Sepóɛɖé ɖɛ Bounɓoɔ̀ cɛ̃ ḿ gboɛɛ kɛà kɛ̀. Ɔ ɖá, “Ní mu ɖé ní cĩ́-naínɔ̀ nììn, ɓɛ́ ḿ ké ɓíɖíi gmɔ̀, ɓɛ́ ḿ ké gìɖìǐ nì, kà dyóɖóɔ̀ zùzù dyià ɓíɖíiɛ, mɔɔ kà dunu nyuà ɓuɖuɛ ɓó dyóɖó-bà-ɓàɖàà máaún wɛ̃.

⁵ Kúsì-nyɔ̀ ɓěɔ̀ mu nììn kà géɖéè-ɖúú-gbǒ ɓě nìà kɛ. Ti ɓɛ́ géɖéè ɓěɔ̀ ɖǎ bùè, ké wa ɖǎ tòɖò, ké wa nìǎ boɛń nyɛɛ, nìí, ní mu géɖéè-ɖúú-gbǒ ɓěɔ̀ cɛ̃ìn, ké ní mu wa ɖɔ́ séín dyai cɛ̃ìn ɖekè.

⁶ Ké wa mu ɓó sèìn ɓó naà ɓě nìà toɖo ɓěɔ̀ gboɛ kè nimii ɓěɔ̀ bìì. Wa mu naà ɓěɔ̀ ɖii-ɖɛ̀ jǔùn ɓó dyóɖó-bà-tìɔ̀ mú, ké wa mu nimii ɓěɔ̀ ɖii-ɖɛ̀ jǔùn ɓó sɔ̃̀ɔ̀-tìɔ̀ mú.”

⁷ Ɓó tia ɓaɖaa, Kúsì-nyɔ̀ ɓěɔ̀ mu Bounɓo mɔ̀ nyɔ nìà ɖɛ séín kɔ̃in nyɛɛ nyíí-ɖɛ̀ ɓě dyàùn. Wa mɔ̀ nyɔ ɓě tɔ̀mɔ̀à dya, ké waà dyɔɔ̀-kù nìà ɓɔ̀ɖɔ̀ɔ̀-ɓɔ̀ɖɔ̀ɔ̀ kɛ. Wa mɔ̀ nyɔ ɓě ɓɛ́ ɓóɖó-dù ɓě xwɛ̃́ìn dyiɛ kè ɓóɖó-dù ɓě tɔ̀mɔ̀ gboɛɛ fɛ̃̀ìn dyi mìɔ kɛ. Wa mɔ̀ ɓóɖó-dù ɓéɖé gana, ké wa mɔ̀ to-ɖu-nyɔ̀ ɓě. Wa mɔ̀ nyɔ ɓě kɔ̃̀ ɓóɖó ɓɛ́ ní ɓěɔ̀ geà mú kɛ. Wa mu nyíí-ɖɛ̀ ɓěɔ̀ ɖé Zádyɔún-tòɖòɔ̀ dya dyàùn ɖé pá kɔ̃̀ mú ɓɛ́ wa ɓièìn kà Bounɓo mɔ̀ nyɔ nìà ɖɛ séín kɔ̃in nyɛ.