Àzédyà 17 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Síwíɖíà-ɓòɖòɔ̀ kè Éézùɖùɛ̀-ɓòɖòɔ̀ gǎ kɔ̃ tòùn

¹ Wuɖu ɓɛ́ ɔ sɔ̀ìn ɖé Bounɓoɔ̀ gbo ɓá Dìmásìkɔ̀-hwɔ̀ɖɔ̀ɔ̀ jè dyíɛɛ kɛà kɛ̀. Bounɓoɔ̀ cɛ̃ɛ, ké ɔ ɖá, “Gmɔ̀ nɔ̄, Dìmásìkɔ̀-hwɔ̀ɖɔ̀ɔ̀ se hwɔɖɔ jǔɛ mu ɖe, kɛɛ ɔ muá hwùɖùǎ jǔùn.

² Nyɔ ɓěɔ̀ mu hwɔɖɔ séín ɓě nì Síwíɖíà-ɓòɖòɔ̀ kɔ̃ɛɛ kɔ̃ wãùn, ké wa mu hwùɖùǎ jǔùn. Ɖé muá nyúà-ɖɛ̀ dyi-ɖi-naín jǔùn, ké nyɔ ɖò se nìɛ̌ mu, ɓɛ́ ɔ ké ɖé wa dyi kúmú.

³ Hwɔɖɔ nì gmɔ ɖei ɓě nì ɖé Éézùɖùɛ̀-ɓòɖòɔ̀ kɔ̃ɛɛ mu ɖé dyi paùn, ké Síwíɖíà-ɓòɖò ɓɛ́ Dìmásìkɔ̀-hwɔ̀ɖɔ̀ɔ̀ kɔ̃̀à wuɖuíɛɛ se nìɛ̌ mu ɖe. Síwíɖíà-nyɔ̀ ɓě ɓɛ́ wa muɛ xwaún póùn wɛ̃ɛ mu zùǔn sɔ̀ìn kà Éézùɖùɛ̀-dyù ɓěɔ̀ nìà kɛ. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

⁴ “Ɓó tia ɓaɖaa, Jékɔ̀ɛ̀ xwíníín-dyù ɓěɔ̀ ɓóɖóɔ̀ dĩ́ín-dĩ̀ìn mu mánáín hwɛ̀ìn. Ɓóɖóɔ̀ mu nììn kà wɛ́-nyɔ̀ sɔɔ̀à kɛ.

⁵ Ɔ mu nììn kà geɖe ɓɛ́ wa ɖǎ cɛ̃, ké ɔ ɖǎ geɖeín hwɛ̀, ké wa ɖǎa bɛ̃̌ poɛ hwɔ ɖé Wɛ̀ɖɛ̀fáìn Bɔɔ-kpàɔ̀ kɔ̃ɛɛ nìà kɛ.

⁶ Ɔ mu nììn kà wa dyià ɔ́ɖè-cùɔ̀ kpã́ ní, ɔ ɓo ɖò-ɖò sèà ɖéé ɖé cuɔ̀ dú-hwìɛ̀, mɔɔ ɓo gbɛ̀ǐ-gbɛ̀ǐ sèà ɖɔ́ nì nɔ̄ ɓíɖíiɛ dyíɛɛ nìà kɛ. Mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ mɔ̀ nyɔ cɛ̃à kɛ̀.”

⁷ Ɓó wéa ɓaɖaa, Éézùɖùɛ̀-nyɔ̀ ɓěɔ̀ mu ɖé waà Mú-hwɛ̀-nyɔ̀ mɔ̀ nyɔ mɛà wa kɛɛ gbo gmɔ̀ìn.

⁸ Wa se sáa-kɔ̃-zàìn-gbàà ɓě ɓɛ́ wa mìɔùn nììn sɔ̃ ɖǎ ma kà poɛɛ ɖɛ ɖáa mu, mɔɔ ké wa se ɖɛ tɔ̀ɔ̀ ɓě ɓɛ́ wa mìɔùn nììn sɔ̃ ɖǎà mɛ kɛɛ hwòɖǒ kɔ̃ dèɛ̌ mu ɖe. Ɔ hwɔìn kà cu-kpóɖó ɓě mɔ̀à gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓěɛ kè gbàà ɓě kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛ.

⁹ Ɓó wéa ɓaɖaa, Éézùɖùɛ̀-nyɔ̀ ɓěɔ̀ mu waà to-pèɖèìn-naín ɓěɔ̀ kɔ̃ wãùn, ké wa mu hwùɖùǎ jǔùn kà hwɔɖɔ ɓě ɓɛ́ Hívì-nyɔ̀ ɓěɔ̀ kè Ámɔ̀-nyɔ̀ ɓěɔ̀ wã zɔ̃̌ɔ̀ kà kɔ̃, ɓɛ́ wa dyià Éézùɖùɛ̀-nyɔ̀ ɓěɔ̀ dyúa gbǔɛɛ nìà kɛ.

¹⁰ Éézùɖùɛ̀-nyɔ̀ ɓě, Gèɖèpɔ́ɔ̀ ɓɛ́ ɔ mɔ̀à ɓěɛ̀ póìn-nyɔ̀ kè ɓěɛ̀ dyí-gmɔ̀ìn-sɔ̀ɔ̌-kpòɔ̀ kɛɛ jè ɖǎ ɓě hwìɖǐi sɔ̀. Ɔ jèɛɛ, ɓě ɓá ɓěɛ̀ ɓáá-ɖɛ̀ kpa ɖɛ ɓěɔ̀, ɓɛ́ dyììn ɖéɛ múɛɛ, ɓě ké gèɖèpɔ́ɔ̀ kà kò ɖò ɓiè.

¹¹ Kɛbì ɓěɛ̀ ɓáá-ɖɛ̀ ɓěɔ̀ mɛ mɛɔ́ má, ɓɛ́ wa kéɔ́ má bùè ɓó wé dyúáɖò kɔ̃̀ xwíníín ɓě ɓáà wa kɛɛ, wa se ɓo ɖò tòɖòɛ̌ mu fɔɔ. Kɛɛ ɖɛ ɓě mu ɓó dyéìn nyɛ̀nɛ̀ɛ̀ kɛɛ mɔ̀ fũ̀à-fṹá kè bũ̌in-puà-puà ɓɛ́ ɔ se ɓɔ́í kpáa ɓɛ́ìn nyɛ.

Gèɖèpɔ́ɔ̀ ɖu ɓóɖó-dù ɓě mɔ̀ Éézùɖùɛ̀-nyɔ̀ ɓěɔ̀ mú-nyɛ́-nyɔ̀ ɓěɛɛ toún

¹² Kē! Dyé kà ɓóɖó-dù kúɖúú ɓěɔ̀ nì dyùà-dyùà nyuɛń nyɛ! Waà jĩ̌ nì dyiɛń kà dyóó-kuɖu-wùɖù dyià kɛ, mɔɔ kà ní-kpàà jĩ̌ dyià kɛ.

¹³ Ɓóɖó-dù ɓěɔ̀ nì kuɖu-kuɖu nyuɛń kà ní vɛ̀nɛ̀ ɓě kuɖuà kɛ, kɛɛ Gèɖèpɔ́ɔ̀ mu wa ɓɔ́í poùn, ké wa mu gbǔùn, ɓɛ́ wa ké dà vɛ̃in mu. Wa mu nììn kà mɔɔ́-fèɖè ɓɛ́ pìɔ̌ kpaà ɖé toɖo ɓě dya kɛ, mɔɔ kà púu-púu ɓɛ́ wɔ́ɔ́-pìɔ̌ ɖúà ɓó ɓíɖíi dyíɛɛ nìà kɛ.

¹⁴ Hwìo dyi jǔ ní, Éézùɖùɛ̀-nyɔ̀ ɓěɔ̀ mú-nyɛ́-nyɔ̀ ɓěɔ̀ po wa fã̀àǔn mìɔ, kɛɛ ɔ kéá gànà-kṹún mɛ̀nɛ̀ɛ̀ nyu ní, waà mú-nyɛ́-nyɔ̀ ɓěɔ̀ ɖò se nì ɖe. Kǎà ɔ mu nììn ɓó nyɔ ɓě ɓɛ́ wa hwuà à ɓóɖóɔ̀, ɓɛ́ wa dyià à kɔ̃̀ɔ̀-ɖɛ̀ séín kpa kɛɛ bìì.