Àpɔ́sò 9 - Ɓǎsɔ́ɔ̀ Báɓòɔ̀

Sɔ́ɔ̀ taɓa Jízɛ̀ hwìɖǐǐ

¹ Ɓó tia ɓaɖaa, Sɔ́ɔ̀ nì ma fã̀à-wùɖù cɛ̃ɛ kpauń. Ɔ nìɛ̀ ma cɛ̃iń kà ɓɛ́ ɔ mu ma Bounɓoɔ̀ ɖeín-nà-nyɔ̀ ɓěɔ̀ ɖáɓáùn wɛ̃. Ɔ mu ma ɖé sáa-zà-nyɔ̀ vɛ̀nɛ̀ɔ̀ gbo,

² ké ɔ cɛ̃ɛ ma ɔ gbo, ɓɛ́ ɔ ké ma ɔ bìì céè-ɖɛ̀ ɓě céè, ɓɛ́ ɔ ké ma wa Júù-nyɔ̀ ɓěɔ̀ cɔ́cì-gbò ɓě ɓɛ́ wa nì ɖé Dìmásìkɔ̀-hwɔ̀ɖɔ̀ɔ̀ múɛɛ mú kpa. Ɔ nyuɛ ma náa, ɔ jǔ ké ɔ dyi nyɔ ɖò fɛ̀ɛ̀ ɖìèɔ̀ dyi kpɔ̃ɔ dyéín, kɛbì ɔ mɛ jǔ màa mɔɔ gàa kɛɛ, ɔ ké wa sã, ɓɛ́ ɔ ké wa Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyà.

³ Ti ɔ nì ma hwìèɔ̀ kɔ̃, ké ɔ nìǎ ma Dìmásìkɔ̀-hwɔ̀ɖɔ̀ɔ̀ bũ̌in xwɛ̃́ǐn nyɛɛ, wàɖà cá kɛɛ, ce ɖò sɔ̀ìn ma ɖé dyií, ké ɔ fã̀ìn ma ɔ ɖei.

⁴ Ké Sɔ́ɔ̀ ɓùɖùìn ma ɓó ɓóɖó-kpàɔ̀ kɔ̃, ké ɔ wɔ̃́ ma wuɖu ɖò. Ké wuɖuɔ̀ ɖá, “Sɔ́ɔ̀, Sɔ́ɔ̀, ɖɛ́ kɔ̃̀ jè m̀ nìà ḿ gǎ dyéɛ̌n nyɛ́?”

⁵ Ké ɔ ɖá, “Ɓɔ̌ɔ̀, m̀ mɔ̀ nyɛ́ɛ̀?” Ké ɔ ɖá, “Mɔ̄ Jízɛ̀, mɔ̄ mɔ̀ nyɔ m̀ nìà gǎ dyéɛ̌n nyɛ̀.

⁶ Kɛɛ sɔ̀ dyí, ɓɛ́ m̀ ké ɖé hwɔɖɔɔ̀ mú mu. Ké ɖɛ m̀ ɓéɖé m̀ ké nyuɛɛ, wa muɛ m̀ gbo cɛ̃ìn.”

⁷ Ɓó tia ɓaɖaa, gàa ɓě ɓɛ́ wa nì ɓó Sɔ́ɔ̀ gboɛɛ nyànà ma dyi dĩin. Wa wɔ̃́ ma wuɖuɔ̀ ní, kɛɛ wa se ma nyɔ ɖò dyé.

⁸ Ti ɓɛ́ Sɔ́ɔ̀ sɔ̀ ma ɓó ɓíɖíiɔ̀ dyíɛɛ, ɔ ɓáà ma dyéɖé, kɛɛ ɔ se ma dyi dyéɛ ɓɛ́ìn. Ɔ jèɛɛ, wa kpɔ̃ ma ɔ sɔ̃in, ké wa kpa ma ɔ ɖé Dìmásìkɔ̀-hwɔ̀ɖɔ̀ɔ̀ mú.

⁹ Ké ɓó wé tã xwíníín nyɛɛ, ɔ se ma dyi dyéɛ ɓɛ́ìn. Ɔ se ma ɖɛ ɖò ɖi, ké ɔ se ma ní ɖò ná dyɛ mɔ̀ùn.

¹⁰ Ké Jízɛ̀ɛ̀ ɖeín-nà-nyɔ̀ ɖò nì ma ɖé Dìmásìkɔ̀-hwɔ̀ɖɔ̀ɔ̀ mú. Ɔ nyɛ́nɛ́ mɔ̀ ma Ánànádyà. Ké Bounɓoɔ̀ cɛ̃ɛ ma ɔ gbo ɖé dyí-tɛ̀mɛ̀ìn-ɖɛ̀ ɖò mú, ké ɔ ɖá, “Ánànádyà.” Ké Ánànádyà ɖá, “Mɔ̄ kɛ̀o, Bounɓo.”

¹¹ Ké Bounɓoɔ̀ cɛ̃ɛ ma ɔ gbo, ké ɔ ɖá, “Sɔ̀ dyí, ɓɛ́ m̀ ké hwìè wa ɖáìn Dyí-sɛ́ɖɛ́ìn-hwìè kɛɛ xwíníín kpá. Mu ɖé Júdà ɓíɖí-taún, ɓɛ́ m̀ ké gàa ɖò sɔ̀ìn Tásɔ̀-hwɔ̀ɖɔ̀ɔ̀ mú, ɓɛ́ wa ɖáìn Sɔ́ɔ̀ kɛɛ jè dyi diè. Nì mu ɔ ɓaà dyi dyɛ̀ìn.

¹² Ɔ ɖǎ dyí-tɛ̀mɛ̀ìn-ɖɛ̀ ɖò dyé, ké ɖéɛ múɛɛ, ɔ dyé gàa ɖò. Gàaɔ̀ nyɛ́nɛ́ mɔ̀ Ánànádyà, ké ɔ dyi ɔ gbo, ké ɔ pɛ̃́ìn ɔ sɔ̃ kɔ̃, ɓɛ́ ɔ ké dyi dyéɛ ɓɛ́ìn ɖe.”

¹³ Kɛɛ Ánànádyà zà ma ɖé wuɖu, ké ɔ ɖá, “Bounɓo, ḿ ɖǎ gàa nìà kɛ jè nyɔ ɓáún-ɓáún wĩín wɔ̃́. Ḿ ɖǎ ɖɛ gbà jĩ̌ kà dyí ɓɛ́ ɔ ɖǎ nì nyɔ ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ bũ̌ nyuɛɛ jè wɔ̃́.

¹⁴ Ké dyéɛ, ɔ nì nɔ̄, ké sáa-zà-nyɔ̀ kpa ɖɛ ɓěɔ̀ ɖǎ ɔ kpé nyí, ɓɛ́ ɔ ké nyɔ kã̀ìn séín ɓě ɖá nì nyɛ́nɛ́ kɛɛ sã.”

¹⁵ Kɛɛ Bounɓoɔ̀ cɛ̃ɛ ma ɔ gbo, ké ɔ ɖá, “M̀ mɛ mu, sepóɛɖé ɔ mɔ̀ nyɔ ɓɛ́ ḿ ɖǎ gã, ɓɛ́ ḿ ké ɔ kũ̀à mú nyùìn, ɓɛ́ ɔ ké ní nyɛ́nɛ́ ɓóɖó-dù kà kò ɖò ɓěɛ̀ nyɔ ɓěɔ̀ kè waà nàìn-nyɔ̀ ɓěɔ̀ ɔ kè Éézùɖùɛ̀-dyù ɓěɔ̀ gbo kpa kɛ.

¹⁶ Mɔ̄ mu ɖɛ séín ɓě ɓɛ́ ɔ mu mú mùìn ɓó ní nyɛ́nɛ́ɔ̀ jè kɛɛ ɔ da zàìn.”

¹⁷ Ɔ jèɛɛ, Ánànádyà mu ma, ké ɔ dyá ma ɖé gbǒɔ̀ mú. Ké ɔ pɛ̃́ìn ma Sɔ́ɔ̀ sɔ̃ kɔ̃, ké ɔ ɖá, “Ḿ ɖíí Sɔ́ɔ̀, nyɔ ɖoɓoà ḿ wɛ̃ɛ, ɔ mɔ̀ Bounɓo mɔ̀ Jízɛ̀ wóɖóìn ma kà m̀ dyí ɖé hwìè ɓɛ́ m̀ dyà ma kà kɛɛ kɔ̃ɛ. Ɔ ɖoɓo nɔ̄ ḿ, ɓɛ́ m̀ ké dyi dyéɛ ɓɛ́ìn ɖe, ɔ kè ɓɛ́ Zùù Hwɛ̀ǐn-hwɛ̀ǐnɔ̀ ké m̀ múin dyíìn.”

¹⁸ Wàɖà cáa, ɖɛ ɖò hwɔ zimii-xwɛ̃̀ ɖò ɓuɖu ma Sɔ́ɔ̀ dyéɖéín. Púɛɛ, ɔ dyé ma dyi cá. Ké ɔ sɔ̀ ma dyí, ké Ánànádyà po ma ɔ níɔ.

¹⁹ Ké ɔ ɖi ma ɖɛ, ké kpé kpá ma ɔ dyí ɖe. Ti ɓɛ́ Sɔ́ɔ̀ ɖǎ ma dyi dyéɛɛ, ɔ hwèɖèìn ma ɖé Jízɛ̀ɛ̀ ɖeín-nà-nyɔ̀ ɓě nì ma ɖé Dìmásìkɔ̀-hwɔ̀ɖɔ̀ɔ̀ múɛɛ gbo goun.

Sɔ́ɔ̀ cɛ̃ bɔ̃̌ nɔ̀mɔ̀ dyíinɔ̀ ɖé Dìmásìkɔ̀-hwɔ̀ɖɔ̀ɔ̀ mú

²⁰ Ké ɔ ɖú ma Jízɛ̀ jè zio po kpàǐ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú kà ɓɛ́ ɔ mɔ̀ Gèɖèpɔ́ɔ̀ Dyú-gààɔ̀ kɛ.

²¹ Ké nyɔ séín ɓě ɓɛ́ wa wɔ̃́ ma ɔ wuɖuɔ̀ kɛɛ giniìn ma dyi, ké wa ɖá, “Má, gàa nìà kɛ mɔ̀ nyɔ nì ma vɔ̃uń ɓɛ́ ɔ ké nyɔ ɓě ɓɛ́ wa ɖá ma kà Jízɛ̀ɛ̀ nyɛ́nɛ́ɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mú gbɔɔ̀ kɛe? Ɖɛ kɔ̃̀ jè ɔ dyi ma nɔ̄ kɛɛ, ɔ se ɓɛ́ ɔ ké wa sã, ɓɛ́ ɔ ké wa sáa-zà-nyɔ̀ kpa ɖɛ ɓěɔ̀ dyúa kpa jèè?”

²² Kɛɛ Sɔ́ɔ̀ nìǎ ma dyi kuɛń ɖé Gèɖèpɔ́ɔ̀-wùɖùɔ̀ cɛ̃-cɛ̃ mú. Ɔ tɛ̀mɛ̀ìn ma Júù-nyɔ̀ ɓě ɓɛ́ wa cĩ́ ma ɖé Dìmásìkɔ̀-hwɔ̀ɖɔ̀ɔ̀ mú kɛɛ dyí wáɖáá kà ɓɛ́ Jízɛ̀ mɔ̀ Kɛ́ɖɛ́ìɔ̀ kɛ. Ké ɔ nyuɛ ké wa kpá ma ɓɔ́í.

²³ Ti ɔ ɖǎ ma ɖé hwèɖèìn mìɔ kɛɛ, Júù-nyɔ̀ ɓěɔ̀ poìn ma wuɖuí, ɓɛ́ wa ké ma ɔ ɖáɓá.

²⁴ Kɛɛ Sɔ́ɔ̀ wɔ̃́ɔ ma ní. Wa nì ma hwɔɖɔɔ̀ gmɔ-wɔ̃̀ ɓěɔ̀ dyí gmɔ̀ǔn ɓó dyóɖóaún kè máaún, ɓɛ́ wa ké ma ɔ ɖáɓá.

²⁵ Kɛɛ nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐ kɛɛ ɖú ma ɔ dyí máaún-kà ɖò. Wa po ma ɔ tìě-ɓò ɖò mú, ké wa pòìn ma ɔ ɓí ɖò ɓɛ́ ɔ nì ma gmɔɔ̀ múɛɛ mú, ké wa síìn ma ɔ ɓíɖíi.

Sɔ́ɔ̀ nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú

²⁶ Ti ɓɛ́ Sɔ́ɔ̀ sɔ̀ ma ɖé Dìmásìkɔ̀-hwɔ̀ɖɔ̀ɔ̀ múɛɛ, ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ vɔ̃ ma ɓɛ́ ɔ kè Jízɛ̀ɛ̀ ɖeín-nà-nyɔ̀ ɓěɔ̀ ké ma dyí poìn. Kɛɛ wa séín fɛ̃̀ìn ma ɔ dyi, sepóɛɖé wa seɛ ma jǎà po kà ɓɛ́ ɔ mɔ̀ǎ ma ɖeín-nà-nyɔ̀ ɓěɔ̀ ɖò jɛ́ɛ́ cá kɛ.

²⁷ Kɛɛ Bànábà ɖú ma ɔ dyí, ké ɔ dyà ma ɔ àpɔ́sò ɓěɔ̀ gbo. Ké ɔ zaìn ma wa gbo kɔ̃in kà ɓɛ́ Sɔ́ɔ̀ dyé ma Bounɓoɔ̀ ɖé hwìè ɓɛ́ ɔ nì ma kà kpauń wɛ̃ɛ kɔ̃ɛ, kè kà ɓɛ́ ɔ wɔ̃́ ma ɔ wuɖuɔ̀ kɛ, ɔ kè kà ɔ se ma fã̀à-kà wùɖù ɖé Jízɛ̀ɛ̀ nyɛ́nɛ́ɔ̀ mú ɖé Dìmásìkɔ̀-hwɔ̀ɖɔ̀ɔ̀ mú kɛ.

²⁸ Ɔ jèɛɛ, Sɔ́ɔ̀ kè àpɔ́sò ɓěɔ̀ naìn ma mú ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ se ma fã̀à-kà wùɖù ɖé Bounɓoɔ̀ nyɛ́nɛ́ɔ̀ mú.

²⁹ Ké ɔ kè Júù-nyɔ̀ ɓě ɓɛ́ wa po ma Gíɖíì-wùɖùɛɛ, wa wuɖuìn ma gbo, ké wa zà ma dòǐn. Ké wa vɔ̃ ɓɛ́ wa ké ma ɔ ɖáɓá.

³⁰ Kɛɛ ti Sɔ́ɔ̀ ɖíí cɔ́cì-nyɔ̀ ɓěɔ̀ wɔ̃́ɔ ma kɛɛ, wa kpa ma ɔ ɖé Sɛ̀sɛ̀wíɖíà-hwɔ̀ɖɔ̀ɔ̀ mú, ké wa tò ma ɔ ɖé Tásɔ̀-hwɔ̀ɖɔ̀ɔ̀ mú.

³¹ Ɓó tia ɓaɖaa, cɔ́cì-nyɔ̀ ɓě ɓɛ́ wa nì ma ɖé Júɖìà-ɓòɖòɔ̀ kè Gáɖàɖíì-ɓòɖòɔ̀ ɔ kè Sɛ̀mɛ́ɖìà-ɓòɖòɔ̀ kɔ̃ dà séín nyɛɛ, wa se ma fũ̀à-fṹá ɖò dyé ɖe. Ké cɔ́cì ɓěɔ̀ ɖú ma dyi ku kpàǐ. Ké nyɔ ɓěɔ̀ nàìn ma cɔ́cì ɓěɔ̀ ɖé Bounɓoɔ̀ dyi-fɛ̃̀ìn-fɛ̃̀ìn mú. Zùù Hwɛ̀ǐn-hwɛ̀ǐnɔ̀ kpá ma cɔ́cì-nyɔ̀ ɓěɔ̀ gbo, ké wa kpá ma kɔ̃.

Píɖɛ̀ nì ɖé Ɖéɖìà-hwɔ̀ɖɔ̀ɔ̀ kè Jɔ́pà-hwɔ̀ɖɔ̀ɔ̀ mú

³² Ti Píɖɛ̀ nì ma sɔ̀ nɔ̄ mu nɔ̄ nyuɛń nyɛɛ, ɔ mu ma ɖé Ɖéɖìà-hwɔ̀ɖɔ̀ɔ̀ mú, ɖé Gèɖèpɔ́ɔ̀-nyɔ̀ ɓě ɓɛ́ wa cĩ́ ma ɖéɛɛ gbo.

³³ Ké ɔ dyé ma ɖé gàa ɖò kɔ̃̀ nyɛ́nɛ́ mɔ̀ ma Ìníà kɛ. Ìníà pɛ̃́ ma dyi tee ɓó zɔ̃ mɛ̀nɛ̌ìn-tã xwíníín, sepóɛɖé ɔ wáká mɛ́ ma ní jè.

³⁴ Ké Píɖɛ̀ cɛ̃ɛ ma ɔ gbo, ké ɔ ɖá, “Ìníà, Jízɛ̀ Kɛ́ɖɛ́ì ɖǎ m̀ dyi kánáìn. Sɔ̀ dyí, ɓɛ́ m̀ ké nì kɔ̃-pɛ̃́-ɖɛ̀ɔ̀ xwa nɔ̀mɔ̀ìn.” Wàɖà cá kɛɛ, Ìníà sɔ̀ ma dyí.

³⁵ Ké nyɔ séín ɓě ɓɛ́ wa cĩ́ ma ɖé Ɖéɖìà-hwɔ̀ɖɔ̀ɔ̀ mú ɔ kè ɖé Sáwɔ̀ɖɔ̀ùn Bɔɔ-kpàɔ̀ kɔ̃ kɛɛ, wa dyéɛ ma ní, ké wa gmɔ̀ìn ma Bounɓoɔ̀ gbo.

³⁶ Ké màa ɖò ɓɛ́ ɔ mɔ̀ ma Jízɛ̀ɛ̀ ɖeín-nà-nyɔ̀ ɓěɔ̀ ɖòɛɛ nì ma ɖé Jɔ́pà-hwɔ̀ɖɔ̀ɔ̀ mú. Ɔ nyɛ́nɛ́ mɔ̀ ma Tàbítà, ké ɖé Gíɖíì-wùɖù múɛɛ, wa ɖáìn ɔ Dɔ́kɔ̀. Kũ̀à nɔ̀mɔ̀ dyíin kè kpeɖe nɔ̀mɔ̀ dyíin nyu-nyu bã ɔ mú mìɔ.

³⁷ Ɓó wé ɓěa ɓaɖaa, ɔ wɛ́, ké ɔ mɛ́ ma. Ti wa ɖǎ ma xwɛ́ɔ̀ dèɖèɛ̀ hwɔɛɛ, wa pɛ̃́ìn ma ɔ ɖé ɓí-dyù ɖò ɓɛ́ ɔ nì ma ɖé gbǒɔ̀ dyiíɛɛ múin.

³⁸ Ɖéɖìà-hwɔ̀ɖɔ̀ɔ̀ xwɛ̃́ìn ma Jɔ́pà-hwɔ̀ɖɔ̀ɔ̀ bũ̌in. Ɔ jèɛɛ, ti ɖeín-nà-nyɔ̀ ɓěɔ̀ wɔ̃́ɔ ma kà Píɖɛ̀ nì ma ɖé Ɖéɖìà-hwɔ̀ɖɔ̀ɔ̀ múɛɛ, wa ɖoɓo ma ɖé gàa sɔ̃́, ɓɛ́ wa ké ma ɔ ɓaà, ɓɛ́ ɔ ké ma wa gbo mu wàɖà.

³⁹ Ɔ jèɛɛ, Píɖɛ̀ sɔ̀ ma dyí, ké ɔ kè wa mu ma. Ké ti ɔ ɖǎ ma nyiniɛɛ, wa kpa ma ɔ ɖé dyií ɖé ɓí-dyùɔ̀ mú. Jɔ̌ɔ̀-màà séín ɓěɔ̀ dyi ma, ké wa nyànà ma Píɖɛ̀ wáún dyi, ké wa nì ma vĩ̌ɛń. Ké wa nì ma wáɖá-ɖɔ̀ ɓě kè ɖɔ tɔ̀ɔ̀ ɓě ɓɛ́ Dɔ́kɔ̀ gma ma ti ɓɛ́ ɔ nì ma wa gbo keɛɛ Píɖɛ̀ dyí tɛ̀mɛ̀ǐn.

⁴⁰ Ké Píɖɛ̀ síìn ma nyɔ séín ɓěɔ̀ píé, ké ɔ taɓa ma kɔ́-dù hwuɖu, ké ɔ ɓaà ma. Ti ɔ ɖǎ ma ɓaà hwɔɛɛ, ɔ gmɔ̀ìn ma ɖé xwɛ́ɔ̀ gbo, ké ɔ ɖá, “Tàbítà, sɔ̀ dyí.” Ké màaɔ̀ ɓáà ma dyéɖé, ké ɔ dyé ma Píɖɛ̀. Púɛɛ, ɔ sɔ̀ dyí, ké ɔ kò ma dyi.

⁴¹ Ké Píɖɛ̀ kpɔ̃ ma ɔ sɔ̃in, ké ɔ sɔ̀ìn ma ɔ dyí. Ké ɔ ɖá ma jɔ̌ɔ̀-màà ɓěɔ̀ kè Gèɖèpɔ́ɔ̀-nyɔ̀ tɔ̀ɔ̀ ɓěɔ̀, ké ɔ tɛ̀mɛ̀ìn ma wa dyí kà ɓɛ́ Dɔ́kɔ̀ nì ma cĩ́ɛń ɖeɛ.

⁴² Ké bɔ̃̌ɔ̀ ɓeìn ma Jɔ́pà-hwɔ̀ɖɔ̀ɔ̀ múin, ké nyɔ ɓáún-ɓáún taɓa ma Bounɓoɔ̀ hwìɖǐǐ.

⁴³ Ké Píɖɛ̀ nyu ma ti goun wè ɖé Jɔ́pà-hwɔ̀ɖɔ̀ɔ̀ mú, ɖé gàa ɖò ɓɛ́ wa ɖáìn Sã́ɓò kɛɛ gbo. Ɔ mɔ̀ ma kúɖúù-ɖáɓá-nyɔ̀ ɖò.