Àpɔ́sò 8 - Ɓǎsɔ́ɔ̀ Báɓòɔ̀

¹ Ɓó tia ɓaɖaa, Sɔ́ɔ̀ hwòɖǒ wɔ̃́ ma, ɓɛ́ wa ké ma Síɖíɓììn ɖáɓá. Sɔ̀ìn ɓó wéa gboɛɛ, wa ɖú ma cɔ́cì-nyɔ̀ ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gǎ dyéìn kpàǐ cá. Ké wa séín ɓeìn ma ɖé Júɖìà-ɓòɖòɔ̀ kè Sɛ̀mɛ́ɖìà-ɓòɖòɔ̀ kɔ̃in dà séín, ɔ sèìn ma àpɔ́sò ɓěɔ̀ ɖòùn.

Sɔ́ɔ̀ dyéìn cɔ́cì-nyɔ̀ ɓěɔ̀ gǎ

² Nyɔ ɓě ku ma dúún ɓó Gèɖèpɔ́ɔ̀ ɓiè jèɛɛ zà ma Síɖíɓììn dyóɖóún, ké wa nì ma ɔ jè kpá hwòɖǒ taɓauń mìɔ.

³ Ɓó tia ɓaɖaa, Sɔ́ɔ̀ nì ma cɔ́cì-nyɔ̀ ɓěɔ̀ wɔ̃ hwɔuń. Ɔ mu ma waà gbǒ ɓěɔ̀ mú ɖò-ɖò, ké ɔ jiɖi ma gàa ɓěɔ̀ kè màa ɓěɔ̀ ɖé, ké ɔ po ma wa kpɔɖɔ ɖeín.

Féɖò cɛ̃ bɔ̃̌ nɔ̀mɔ̀ dyíinɔ̀ ɖé Sɛ̀mɛ́ɖìà-ɓòɖòɔ̀ mú

⁴ Kɛɛ nyɔ ɓě ɓɛ́ wa ɓeìn ma kà dyiɛɛ, wa kpa ma bɔ̃̌ nɔ̀mɔ̀ dyíinɔ̀ cɛ̃ɛ.

⁵ Féɖò mu ma ɖé Sɛ̀mɛ́ɖìà-ɓòɖòɔ̀ hwɔɖɔ ɖò mú, ké ɔ po ma Kɛ́ɖɛ́ìɔ̀ jè zio ɖé wa gbo.

⁶ Ti nyɔ kúɖúú ɓěɔ̀ wɔ̃́ ma ɖɛ ɓě ɓɛ́ ɔ nì ma cɛ̃iń nyɛ, ké ti wa dyé ma zɛ̃̀ìn-ɖɛ̀ ɓě ɓɛ́ ɔ nyu ma kɛɛ, wa ɓéɖé ma hwòɖǒ dyúáɖò, ké wa tò ma ɔ wuɖuɔ̀ ɖùǔ gbo nɔ̀mɔ̀ dyíin.

⁷ Ké zùù gbà ɓěɔ̀ páná ma mú, ké wa sɔ̀ ma nyɔ ɓě mú. Ké nyɔ ɓáún-ɓáún ɓě kɔ̃̀ wáká mɛ́ ma kɛ kè nyɔ kúɖúú ɓě kɔ́ɖɔ́ ma kɛɛ káná ma dyi.

⁸ Ɔ jèɛɛ, múà ɓáún-ɓáún nì ma hwɔɖɔɔ̀ mú.

⁹ Kɛɛ gàa ɖò nì ma ɓó, ké ɔ nyɛ́nɛ́ mɔ̀ ma Sã́ɓò. Ké ɔ ɖǎ ma ɖé hwɔɖɔɔ̀ mú zɛ̃̀ìn-ɖɛ̀ ɓě nyuɛń hwèɖèìn. Ké ɔ zɛ̃̀ìn-ɖɛ̀ ɓěɔ̀ nyuɛ ké Sɛ̀mɛ́ɖìà-nyɔ̀ ɓěɔ̀ giniìn ma dyi mìɔ. Ɔ nìɛ̀ ma cɛ̃iń kà ɓɛ́ ɔ mɔ̀ ma nyɔ vɛ̀nɛ̀ kɛ.

¹⁰ Sɔ̀ìn ɖé waà nyɔ dyùwè ɓěɔ̀ gbo ké waà nyɔ vɛ̀nɛ̀ ɓěɔ̀ dyɛ̀ìn nyɛɛ, wa séín tò ma ɔ wuɖuɔ̀ ɖùǔ gbo nɔ̀mɔ̀ dyíin, ké wa ɖá, “Gàa nìà kɛ mɔ̀ kpé sɔ̀ìn ɖé Gèɖèpɔ́ɔ̀ gbo, ɓɛ́ wa ɖáìn ‘Kpé Vɛ̀nɛ̀’ kɛ.”

¹¹ Wa tò ma ɔ ɖùǔ gbo, sepóɛɖé ɔ ɖǎ ma wa dyi giniɛ̌n hwèɖèìn ɖé zɛ̃̀ìn-ɖɛ̀ ɓě ɓɛ́ ɔ nyu ma kɛɛ mú.

¹² Kɛɛ Féɖò nì ma bɔ̃̌ nɔ̀mɔ̀ dyíinɔ̀ cɛ̃iń ɓá Gèɖèpɔ́ɔ̀ kã́á-ɓòɖòɔ̀ jè dyí, ɔ kè ɓá Jízɛ̀ Kɛ́ɖɛ́ìɛ̀ nyɛ́nɛ́ɔ̀ jè dyí ɖekè. Ké gàa kè màa ɓěɔ̀ kpá ma níɔ, ti ɓɛ́ wa taɓa ma ɖɛ Féɖò nì ma kà wa gbo cɛ̃iń nyɛɛ hwìɖǐǐɛ.

¹³ Ké Sã́ɓò mìɔùn taɓa ma ɖɛ ɓɛ́ Féɖò nì ma kà cɛ̃iń nyɛɛ hwìɖǐǐ ɖekè. Ɔ kpá ma níɔ, ké ɔ kè Féɖò naìn ma mú tee. Ti ɓɛ́ ɔ dyé ma Féɖò ɖàɓàìn-ɖɛ̀ kè zɛ̃̀ìn-ɖɛ̀ kpa ɖɛ ɓě nyuɛ kɛɛ, ɔ giniìn ma dyi.

¹⁴ Ti àpɔ́sò ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ wɔ̃́ɔ ma kà Sɛ̀mɛ́ɖìà-nyɔ̀ ɓěɔ̀ ɖǎ ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ dyi kpɔ̃ kɛɛ, wa ɖoɓo ma Píɖɛ̀ kè Jɔ̃́ɔ́ ɖé wa gbo.

¹⁵ Wa mu ma ɖé, ké wa ɓaà ma ɓó nyɔ ɓěɔ̀ jè, ɓɛ́ Zùù Hwɛ̀ǐn-hwɛ̀ǐnɔ̀ ké ma wa kɔ̃ dyi.

¹⁶ Sepóɛɖé Zùùɔ̀ séè ma wa ɖò kɔ̃ dyi ke. Wa ɖǎ ma níɔ kpá ɖé Bounɓo Jízɛ̀ɛ̀ nyɛ́nɛ́ɔ̀ mú ɖòùn pū.

¹⁷ Ké Píɖɛ̀ kè Jɔ̃́ɔ́ dè ma wa sɔ̃ dúún, ké Zùù Hwɛ̀ǐn-hwɛ̀ǐnɔ̀ dyi ma wa kɔ̃.

¹⁸ Kɛɛ ti Sã́ɓò dyéɛ ma kà àpɔ́sò ɓěɔ̀ dè ma nyɔ ɓěɔ̀ sɔ̃ dúún, ké Zùùɔ̀ dyi ma wa kɔ̃ɛɛ, púɛɛ, ɔ nyí ma wa wíɖí,

¹⁹ ké ɔ ɖá, “Ɓě nyí mɔ́ún kpé dyúáɖòɔ̀ ɖò, ɓɛ́ nyɔ kã̀ìn séín ní mu sɔ̃ dúún dèìn nyɛɛ, Zùù Hwɛ̀ǐn-hwɛ̀ǐnɔ̀ ké wa kɔ̃ dyi ɖekè.”

²⁰ Kɛɛ Píɖɛ̀ cɛ̃ɛ ma ɔ gbo, ké ɔ ɖá, “M̀ kè nì wíɖíɔ̀ mu mú gbɔɔ̀ùn, sepóɛɖé m̀ poɛ̀n hwìɖǐi kà ɓɛ́ m̀ ɓɛ́ìn Gèɖèpɔ́ɔ̀ nyíí-ɖɛ̀ɔ̀ wíɖí mú dyéɛ̀n nyɛ.

²¹ M̀ se kpé kè pá ɖò ɓéɖé ɖé ɖɛ nìà kɛ mú, sepóɛɖé nì hwòɖǒ-dyùàɔ̀ se dyí sɛ́ɖɛ́ìn ɓó Gèɖèpɔ́ɔ̀ gbo.

²² M̀ mɛ táà nì kpeɖe gbàɔ̀ dyi, ɓɛ́ m̀ ké Bounɓoɔ̀ ɓaà, kɛbì Gèɖèpɔ́ɔ̀ mu ɖɛ nì hwòɖǒ-dyùàɔ̀ poà gbɔɛɛ kɔ̃in zĩ̀ìn ní.

²³ Ḿ dyéɛ kà hwɛ̀nɛ̌ nyuɛ ké nì hwòɖǒ-dyùàɔ̀ nɛɛ̀ mìɔ kɛ, ɔ kè kà nì ɖɛ gbàɔ̀ ɖǎ m̀ sã mìɔ kɛ.”

²⁴ Ké Sã́ɓò zà ma ɖé wuɖu, ké ɔ ɖá, “Ɓě ɓaà ḿ bìì Bounɓoɔ̀, ɓɛ́ ɖɛ ɓě cɛ̃à kɛɛ ɖò ní kɔ̃̀ ɖà ḿ gbo kpá.”

²⁵ Ti Píɖɛ̀ kè Jɔ̃́ɔ́ ɖǎ ma zàse nyu, ké wa ɖǎ ma Bounɓoɔ̀ bɔ̃̌ nɔ̀mɔ̀ dyíinɔ̀ nyɔ ɓěɔ̀ gbo cɛ̃ɛ, wa kɔ́ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Wa kpa ma bɔ̃̌ nɔ̀mɔ̀ dyíinɔ̀ cɛ̃ɛ ɖé Sɛ̀mɛ́ɖìà-hwɔ̀ɖɔ̀ ɓáún-ɓáún ɓě kɔ̃̀ mú wa zĩ̀ìn ma dyiɛɛ múin.

Féɖò kè gɔ̌mànà-nyɔ̀ vɛ̀nɛ̀ sɔ̀ìn ɖé Ítìópìà-ɓòɖòɔ̀ kɔ̃ɛɛ jè

²⁶ Wé ɖòɛ̀ ɓaɖaa, Bounɓoɔ̀ ínjà ɖò cɛ̃ɛ ma Féɖò gbo, ké ɔ ɖá, “Sɔ̀ dyí, ɓɛ́ m̀ ké ɖé zɔ̃̌in mùìn, ɓɛ́ m̀ ké hwìè ɓɛ́ ɔ sɔ̀ìn kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ muà ɖé Gázà-hwɔ̀ɖɔ̀ɔ̀ múɛɛ dyí sí.” Ɔ mɔ̀ hwìè ɓɛ́ ɔ mu ɖé gbǎùn-fúɖúáɔ̀ kɔ̃ɛ.

²⁷ Ké Féɖò sɔ̀ ma dyí, ké ɔ mu ma. Ti ɔ nì ma muɛń nyɛɛ, ɔ wáɖá ma Ítìópìà-gàà ɖò dyéɖé dya. Gàa nìà kɛ mɔ̀ ma Kã̀dásì ɓɛ́ ɔ mɔ̀ ma màa, ɓɛ́ ɔ kɔ̃̀ ma Ítìópìà-nyɔ̀ ɓěɔ̀ wuɖuí kɛɛ gbo-nì-nyɔ̀ vɛ̀nɛ̀. Ɖɛ kpa ɖɛ séín ɓě ɓɛ́ kã́á-mààɔ̀ ɓéɖé ma kɛɛ, ɔ mɔ̀ nyɔ kɔ̃̀ wa wuɖuí. Ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ ké Gèɖèpɔ́ɔ̀ ɓiè.

²⁸ Ké ɔ nìǎ ma ɔ ɓíɖí muɛń ɖe. Ɔ kò ma ɔ hwíì-sǒɔ̀ mú, ké ɔ nì ma Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ wuɖuún zàà kpauń.

²⁹ Ké Zùùɔ̀ cɛ̃ɛ ma Féɖò gbo, ké ɔ ɖá, “Mu ɖé gàa nìà hwíì-sǒɔ̀ mú kɛɛ gbo.”

³⁰ Ɔ jèɛɛ, Féɖò kpa ma ɖé ɔ gbo peɖeɛ, ké ɔ wɔ̃́ ma gàaɔ̀ Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ wuɖuún zàà. Ké ɔ diè ma ɔ dyi, ké ɔ ɖá, “Ɖɛ m̀ nìà wuɖuún zàǔn wɛ̃ɛ, m̀ wɔ̃́ɔ múinǹ?”

³¹ Ké gàaɔ̀ ɖá, “Ɔ jǔ ké nyɔ ɖò se nì, ɓɛ́ ɔ kéɛ ḿ tɛ̀mɛ̀ìn ní, nìí, xwɛ̌ ḿ ɓɛ́ìn ɔ múin wɔ̃́ɔ nyuɛ kɛ́?” Ké ɔ ɖá ma Féɖò, ɓɛ́ ɔ ké ma ɖé ɔ gbo dyá, ɓɛ́ ɔ ké ɖé ɔ gbo dyi kò.

³² Gèɖèpɔ́ɔ̀-cèè-ɖɛ̀ɔ̀ wáká kɔ̃̀ mú ɓɛ́ ɔ nì ma kà wuɖuún zàǔn wɛ̃ɛ, ɖɛ ɔ cɛ̃ɛ kɛà kɛ̀. Ɔ ɖá, “Ɔ nì ma kà ɓáɖáá ɓɛ́ wa nì ɖáɓá-naín kpauń wɛ̃ɛ nìà kɛ. Kà ɓáɖáá ɓɛ́ wa nì mí bũ̌in cɛ̃iń nyɛɛ ní wuɖuà kɛɛ, kǎà ɔ mɔ̀ùn se ma ɔ wɔ̃ɔ̀ ɓáà ɖekè.

³³ Wa dyà ma ɔ ɓíɖíi, ké ɖɛ wa kéɔ́ má dyí-sɛ́ɖɛ́ìn-kà cɛ̃, ɓɛ́ ɔ kéɔ́ dyéɛɛ, ɔ seɛ ma dyé. Nyɛ́ ɓɛ́ìn ɔ nììn dyú ɓě jè cɛ̃ɛ kɛ́? Sepóɛɖé ɔ fɛ̀ɛ̀ɔ̀ ɖǎ ɔ xwa sɔ̀, ké ɔ ɖǎ ɓóɖó-kpàà kɔ̃ sɔ̀.”

³⁴ Ké gɔ̌mànà-nyɔ̀ vɛ̀nɛ̀ɔ̀ diè ma Féɖò dyi, ké ɔ ɖá, “Nyɛ́ kɔ̃̀ jè kpáá-ɖɛ̀-cɛ̃-nyɔ̀ɔ̀ cɛ̃à kɛ́? Ɔ cɛ̃ ɔ mìɔùn jèè, mɔɔ ɔ cɛ̃ nyɔ kà kò ɖò jèè? Cɛ̃ɛ wɛ́ɛ ḿ gboe.”

³⁵ Ké Féɖò dè ma wùɖùɛ̀ gbɔ. Ɔ dèɛ̀n ma ɖé céè-ɖɛ̀ kɔ̃̀ mú gàaɔ̀ nì ma kà wuɖuún zàǔn wɛ̃ɛ gbo gbɔ, ké ɔ cɛ̃ ma bɔ̃̌ nɔ̀mɔ̀ dyíin ɓá Jízɛ̀ dyíɛɛ ɔ gbo.

³⁶ Ké ti wa nì ma hwìèɔ̀ xwíníín muɛń nyɛɛ, wa dyɛ̀ìn ma ní ɖò. Ké gɔ̌mànà-nyɔ̀ vɛ̀nɛ̀ɔ̀ ɖá, “Gmɔ̀ nɔ̄, gbɛ̀ kà ní ɖò nìɛ. Ɖɛ́ mu nyuùn ɓɛ́ ḿ ké se níɔ kpáá?” [

³⁷ Ké Féɖò ɖá, “M̀ dyiɛ náa jǎà po ɖé nì hwòɖǒ-dyùà séín múín, m̀ ɓɛ́ìn níɔ kpáa.” Hwɛ̀ ké gɔ̌mànà-nyɔ̀ vɛ̀nɛ̀ɔ̀ cɛ̃ɛ ma Féɖò gbo, ké ɔ ɖá, “Ḿ poɛ jǎà jɛ́ɛ́ kà Jízɛ̀ Kɛ́ɖɛ́ì mɔ̀ Gèɖèpɔ́ɔ̀ Dyú-gààɔ̀ kɛ.”]

³⁸ Ké ɔ cɛ̃ɛ ma nyɔ ɓɛ́ ɔ nì ma ɔ hwíì-sǒɔ̀ nàǐn nyɛɛ gbo, ɓɛ́ wa ké ma dyi nyànà. Ké Féɖò kè gɔ̌mànà-nyɔ̀ vɛ̀nɛ̀ɔ̀ sí ma níɔ̀ kɔ̃, ké Féɖò po ma ɔ níɔ.

³⁹ Ké ti wa sɔ̀ ma níɔ̀ gboɛɛ, Bounɓoɔ̀ Zùùɔ̀ bǎ ma ɓó Féɖò ɓíɖíi, ké gɔ̌mànà-nyɔ̀ vɛ̀nɛ̀ɔ̀ se ma ɔ dyé ɖe fɔɔ. Ké gɔ̌mànà-nyɔ̀ɔ̀ kpá ma hwìè xwíníín ɖe, ké ɔ kpa ma múà nyuɛ mìɔ.

⁴⁰ Kɛɛ Féɖò wóɖóìn ma ɖé Àzótà-hwɔ̀ɖɔ̀ɔ̀ mú. Ké ɔ mùìn ma ɖé ɓóɖóɔ̀ kɔ̃, ké ɔ kpa ma bɔ̃̌ nɔ̀mɔ̀ dyíinɔ̀ cɛ̃ɛ ɖé hwɔɖɔ séín ɓěɔ̀ mú, ké ɔ nyini ma ɖé Sɛ̀sɛ̀wíɖíà-hwɔ̀ɖɔ̀ɔ̀ mú.