Àpɔ́sò 7 - Ɓǎsɔ́ɔ̀ Báɓòɔ̀

Ɖɛ ɓɛ́ Síɖíɓììn zaìn ma kɔ̃in nyɛ

¹ Ké sáa-zà-nyɔ̀ vɛ̀nɛ̀ɔ̀ diè ma ɔ dyi, ké ɔ ɖá, “Kà ɖɛ ɓěa nìì?”

² Ké Síɖíɓììn ɖá, “Ɖíí ɓě, ɓě mɔ̀à ɓóɖóɛ̀ ɓǎ ɓěɛɛ, ɓě tò ḿ gbo ɖùǔ. Ti à ɓǎ Ééɓòɖòhɛ̃́ɛ̀ nì zɔ̃̌ɔ̀ ɖé Mɛ̀sɔ̀pɔ̀témìà-ɓòɖòɔ̀ kɔ̃, hwɛ̀ ɓɛ́ ɔ ké ma kà ɖé Háwàɖàùn-hwɔ̀ɖɔ̀ɔ̀ mú cĩ́ɛɛ, à dĩ́ín-dĩ̀ìn Gèɖèpɔ́ɔ̀ wóɖóìn ma ɔ dyí.

³ Ké ɔ cɛ̃ɛ ɔ gbo, ké ɔ ɖá, ‘Sɔ̀ nì ɓíɖí-ɓòɖòɔ̀ kɔ̃, ɔ kè nì nyɔ ɓěɔ̀ hwìɛ̀, ɓɛ́ m̀ ké ɓóɖó ní mu m̀ da zàìn nyɛɛ kɔ̃ mu.’

⁴ Ɔ jèɛɛ, Ééɓòɖòhɛ̃́ɛ̀ sɔ̀ ma ɖé Kàdíà-nyɔ̀ ɓěɔ̀ ɓóɖóɔ̀ kɔ̃, ké ɔ cĩ́ ma ɖé Háwàɖàùn-hwɔ̀ɖɔ̀ɔ̀ mú. Ti ɔ ɓǎ mɛ́ ma kɛɛ, Gèɖèpɔ́ɔ̀ zà ma ɔ ɖé, ké ɔ dyà ma ɔ nɔ̄ ɓóɖó kɔ̃̀ mú ɓě nìà cĩ́ɛń ɓó kàǔn wɛ̃.

⁵ Kɛɛ Gèɖèpɔ́ɔ̀ se ma ɔ pá ɖò nyí nɔ̄ ɓóɖóɛ̀ kɔ̃, ɓɛ́ ɔ ké ma ɔ kɔ̃̀ɔ̀-ɖɛ̀ jǔ. Ɔ se ma ɔ ɓáɖáa dyúáɖò nyí fóɖóún. Kɛɛ Gèɖèpɔ́ɔ̀ ɖáìn ma ɔ nyɛ́nɛ́ín kà ɔ muɛ ma ɔ nyíìn, ɓɛ́ ɔ ké ɔ kɔ̃̀ɔ̀-ɖɛ̀ jǔ, ɓɛ́ ɔ xwíníín-dyù ɓě mɔ̀ùn kéɛ ma kɔ̃̀ ɖekèɛ. Kɛɛ tia xwíníín nyɛɛ, ɔ séè ma dyú ɖò ɓéɖé ke.

⁶ Ɖɛ Gèɖèpɔ́ɔ̀ cɛ̃ ma kɛɛ, ɔ kɛ̀. Ɔ ɖá, ‘Ééɓòɖòhɛ̃́ɛ̀ xwíníín-dyù ɓěɔ̀ mu ɖéè jǔùn ɖé nyɔ kà kò ɖò ɓě nììn ɓíɖí-ɓòɖò kɔ̃. Ké wa mu wa gǐì mú nyuùn, ɓɛ́ wa ké wa dyi pĩ́à ɓó zɔ̃ hɔ̃dɛ̀ɖɛ̀ hĩinyɛ xwíníín.

⁷ Kɛɛ ní mu ɓóɖó kɔ̃̀ gǐì ɓɛ́ wa muà jǔùn wɛ̃ɛ gǎ dyéìn. Ɔ ɖǎ ná nìǐn, Ééɓòɖòhɛ̃́ɛ̀ xwíníín-dyù ɓěɔ̀ mu dyiìn, ɓɛ́ wa ké ḿ ɓiè nɔ̄ pá nìà kɛ mú.’

⁸ Ké Gèɖèpɔ́ɔ̀ kè Ééɓòɖòhɛ̃́ɛ̀ dè ma wuɖu. Ké dèè-wùɖùɔ̀ ɖàɓàìn-ɖɛ̀ mɔ̀ sàà-mɛ́-mɛ́. Ɔ jèɛɛ, ti Ééɓòɖòhɛ̃́ɛ̀ ɖǎ ma Áázè wóɖóìn nyɛɛ, ɔ ɖáɓá ma ɔ sàà, ti ɔ nyuá ma wé mɛ̀nɛ̌ìn-tã kɛ. Ké Áázè wóɖóìn ma Jékɔ̀, ké Jékɔ̀ wóɖóìn ma à ɓóɖóɛ̀ nyɔ vɛ̀nɛ̀ ɓaɖa-bùè sè sɔ̃́ ɓěɔ̀.

⁹ “Ké à ɓóɖóɛ̀ nyɔ vɛ̀nɛ̀ ɓěɔ̀ kpá ma hwɛ̀nɛ̌ǐn ɓó Jòsé jè, ké wa peɖe ma ɔ, ké ɔ mɔ̀ ma gǐì ɖé Íjè-ɓòɖòɔ̀ kɔ̃. Kɛɛ Gèɖèpɔ́ɔ̀ nì ma ɔ gbo,

¹⁰ ké ɔ gbǎà ma ɔ ɖé ɔ gǎ-dyé-dyé séín ɓěɔ̀ mú. Ké Gèɖèpɔ́ɔ̀ nyí ma ɔ fɔ̀nɔ̀-hwòɖǒ. Ɔ nyuɛ ma ɓɛ́ Féwòɖò mɔ̀ ma kà Íjè-ɓòɖòɔ̀ nàìn-nyɔ̀ɔ̀ kɛɛ hwòɖǒ ké ma ɔ múin dèìn. Ké Féwòɖò nyu ma Jòsé Íjè-ɓòɖòɔ̀ kè ɔ ɓíɖí-gbǒ-xwíníín-nyɔ̀ séín ɓěɔ̀ wuɖuí-kɔ̃̀-nyɔ̀ mú.

¹¹ Ké mɔ́ kpá ma ɖé Íjè-ɓòɖòɔ̀ kè Kénà-ɓòɖòɔ̀ kɔ̃ dà séín. Ké mɔ́ɔ̀ dyà ma gǎ-dyé-dyé pàɖǎ, ké à ɓǎ nììn ɓǎ ɓěɔ̀ se ma ɖii-ɖɛ̀ ɖò dyéɛ ɓɛ́ìn fɔɔ.

¹² Kɛɛ ti Jékɔ̀ wɔ̃́ɔ ma kà ɖii-ɖɛ̀ nì ma ɖé Íjè-ɓòɖòɔ̀ kɔ̃ɛɛ, ɔ tò ma ɖé à ɓǎ nììn ɓǎ ɓěɔ̀. Ɔ mɔ̀ ma wa ɖé mu-mu kĩ́ín-kĩ́ínɔ̀.

¹³ Kɛɛ ti ɓɔ́ìn ɖe ɓɛ́ wa mu ma ɖéɛɛ, Jòsé nyuɛ ma ké ɔ ɖíí-gàà ɓěɔ̀ dyuò ma ɔ dyí. Púɛɛ, Féwòɖò dyuò ma Jòséɛ̀ nyɔ ɓěɔ̀ dyí.

¹⁴ Ké Jòsé tò ma nyɔ, ɓɛ́ wa ké ma ɔ ɓǎ kè ɔ nyɔ séín ɓěɔ̀ ɖá. Ɔ nyɔ ɓěɔ̀ mɔ̀ ma nyɔ-kpò kpáɖá-nyɔ tã ɓaɖa-bùè sè hm̀m̌.

¹⁵ Ké Jékɔ̀ mu ma ɖé Íjè-ɓòɖòɔ̀ kɔ̃. Ɔ kè à ɓǎ nììn ɓǎ ɓěɔ̀ fɛ̀ɛ̀ɔ̀ hwɛ̀ìn ma ɖé mánáín.

¹⁶ Ké nyɔ ɓěɔ̀ zà ma waà xwɛ́ ɓěɔ̀ ɖé Íjè-ɓòɖòɔ̀ kɔ̃, ké wa kpa ma wa ɖé Sɛ́kɛ̃̀ìn-hwɔ̀ɖɔ̀ɔ̀ mú. Ké wa zà ma wa dyóɖóún ɖé pá ɓɛ́ Ééɓòɖòhɛ̃́ɛ̀ dɔ̃ zɔ̃̌ɔ̀, ɓɛ́ ɔ ké ma ɖé xwɛ́ dyóɖóún zàìn nyɛɛ mú. Ééɓòɖòhɛ̃́ɛ̀ dɔ̃̀ìn ma páɔ̀ séɓàɖà-wìɖì mú ɖé Hámɔ̀ɛ̀ dyú ɓěɔ̀ gbo, ɖé Sɛ́kɛ̃̀ìn-hwɔ̀ɖɔ̀ɔ̀ mú.

¹⁷ “Kɛɛ ti ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ kà Ééɓòɖòhɛ̃́ɛ̀ nyɛ́nɛ́ín nyɛɛ ɖǎ ma dyi xwɛ̃́ìn nyɛɛ, à nyɔ ɓě ɓɛ́ wa nì ma ɖé Íjè-ɓòɖòɔ̀ kɔ̃ɛɛ zaìn ma dúún, ké wa kpá ma kɔ̃.

¹⁸ Ti ɔ ɖǎ ma hwèɖèìn hwèɖèìn nyɛɛ, kã́á ɖìè ɖò ɓɛ́ ɔ se ma Jòsé jè dyuòɛɛ kɔ̃̀ ma Íjè-ɓòɖòɔ̀ wuɖuí.

¹⁹ Ɔ vɔ̃ ma à nyɔ ɓěɔ̀ gbo sɛ́ɖɛ́-kà, ké ɔ nɛ́ ma à ɓǎ nììn ɓǎ ɓěɔ̀ kɔ̃, ɓɛ́ wa ké waà dyú-pɛ̀ɖɛ̀ ɓěɔ̀ xwáɖá xwíɖíi dyi pɛ̃́ìn, ɓɛ́ wa ní kɔ̃̀ ɖà ɖé wóɖó.

²⁰ Kɛɛ tia xwíníín nyɛɛ, Mózè wóɖó ma. Ɔ mɔ̀ ma dyú nɔ̀mɔ̀ dyíin, ké Gèɖèpɔ́ɔ̀ ɖɛ̀ɓɛ̀ ma ɔ mú mìɔ. Wa gmɛ̀ìn ma ɔ ɖé ɔ ɓǎ ɓíɖí-gbǒǔn ɓó dɛ̀nɛ̀ tã xwíníín.

²¹ Ké ti wa pɛ̃́ìn ma ɔ xwáɖá xwíɖíi dyiɛɛ, Féwòɖòɛ̀ dyú-mààɔ̀ ɖú ma ɔ dyí, ké ɔ gmɛ̀ìn ma ɔ kà ɔ kéɔ́ kà ɔ mìɔùn xwíníín-zà-dyù gmɛ̀ìn nyuɛ.

²² Ké Íjè-nyɔ̀ ɓěɔ̀ tɛ̀mɛ̀ìn ma Mózè wa nììn hwòɖǒ-fɔ̀nɔ̀-fɔ̀nɔ̀ séín ɓěɔ̀, ké ɔ dyuò ma wùɖùɛ̀ mìɔ, ké ɔ ɓéɖé ma kpé ɖé ɔ nyuu-ɖɛ̀ ɓěɔ̀ mú.

²³ “Ti ɔ ɖǎ ma zɔ̃ kpáɖá-nyɔ sɔ̃́ nyuɛɛ, ɔ hwòɖǒ poɛ ma gbɔ, ɓɛ́ ɔ ké ma ɔ ɖíí Éézùɖùɛ̀-nyɔ̀ ɓěɔ̀ gboi té.

²⁴ Kɛɛ ti ɔ dyéɛ ma kà Íjè-gàà ɖò kpɔ̃ ma ɔ ɖíí ɓěɔ̀ ɖò gbà-kà kɛɛ, ɔ vɔ̃ ma ɔ ɖíí ɓɛ́ gàaɔ̀ sɔ̃ zi ma kà wɔ̃ kɛɛ bìì. Ké ɔ zà ma ɔ ɖííɔ̀ kpa, ké ɔ ɓɔɔ̀ ma Íjè-gààɔ̀.

²⁵ Mózè poɛ̀n ma hwìɖǐi kà ɔ ɖíí ɓěɔ̀ muɛ ma dyí dyuòùn kà Gèɖèpɔ́ɔ̀ mɔ́ ɓɛ́ ɔ ké ma wa póìn dyììn ɖé ɔ múɛɛ, kɛɛ wa mɔ̀ùn seɛ ma náa dyí dyuò.

²⁶ Wéɔ̀ nyɔ kɔ ma ɓó dyíɛɛ, ɔ wóɖóìn ma ɔ ɖíí sɔ̃́ ɓě nì ma vɔ̃uń wɛ̃ɛ kɔ̃. Ɔ vɔ̃ ɓɛ́ ɔ ké ma wa dyí kpɔ̃, ké ɔ ɖá, ‘Gàa-dyù ɓě, má, ɓě mɔ̀ wóɖó-wóɖóe? Ɖɛ́ kɔ̃̀ jè ɓě nìà gbo vɔ̃ǐn nyɛ́?’

²⁷ Kɛɛ nyɔ ɓɛ́ ɔ mɔ́ ma kà ɔ mǔèɔ̀ jeín nyɛɛ cṹ ma Mózè, ké ɔ ɖá, ‘Nyɛ́ nyu m̀ nyɔ-wuɖuí-kɔ̃̀-nyɔ̀ kè tɔ̀ɔ̀ mú ɓó à kɔ̃in nyɛ́?

²⁸ Nì mɔ́ mɔ́ún ɖáɓáa dyi ɖekè kà m̀ ɖáɓá ma kà Íjè-gààɔ̀ mabã̀a kɛɛ̀?’

²⁹ Ɓó ɖɛ gàaɔ̀ cɛ̃à kɛ jèɛɛ, Mózè kpá ma xwáɖáún, ké ɔ mu ma ɖé Míɖìàùn-ɓòɖòɔ̀ kɔ̃. Ké ɔ cĩ́ ma ɖé, ké ɔ wóɖóìn ma ɖé gàa-dyù sɔ̃́.

³⁰ “Ti zɔ̃ kpáɖá-nyɔ sɔ̃́ ɖǎ ma ziɛɛ, ínjà ɖò wóɖóìn ma Mózè dyí ɖé nyɛ-mìɔ̀ ɖò ɓɛ́ ɔ nì ɖé cu-gbɔ̌ ɖò mú sɔ̀ǔn wɛ̃ɛ mú, ɖé gbǎùn-fúɖúáɔ̀ kɔ̃, dɛ̀ ɓɛ́ Sányà-tòɖòɔ̀ nì ma kà kɛ.

³¹ Ti Mózè dyéɛ ma kà cu-gbɔ̌ɔ̀ nyu ma nìɛ̀ kɛɛ, púɛɛ, ɔ kpèìn ma ɔ hwìɖǐi. Ké ti ɔ xwɛ̃́ìn ma ɓó dyi, ɓɛ́ ɔ kéɛ ma dyé nɔ̀mɔ̀ dyíin nyɛɛ, ɔ wɔ̃́ ma Bounɓoɔ̀ wuɖu.

³² Ké wuɖuɔ̀ ɖá, ‘Mɔ̄ mɔ̀ nì ɓǎ ɓěɛ̀ Gèɖèpɔ́ɔ̀. Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ Ké Mózè tɛɖɛ ma, ké ɔ se ma ɖé gmɔ̀ɔ̀ ɓɛ́ìn ɖe.

³³ Ké Bounɓoɔ̀ cɛ̃ɛ ma ɔ gbo, ké ɔ ɖá, ‘Zà nì bǎɔ̀ ɓoún, sepóɛɖé pá m̀ nyànàà ɓó kɔ̃ dyiɛɛ mɔ̀ pá hwɛ̀ǐn-hwɛ̀ǐn.

³⁴ Ḿ ɖǎa dyéɖéi hwɔ̀ìn kà wa nyu ní nyɔ ɓěɔ̀ dyi pĩ́àà ɖé Íjè-ɓòɖòɔ̀ kɔ̃ɛ. Ké ḿ ɖǎ waà vĩ̌-wùɖù ɓěɔ̀ wɔ̃́. Ḿ ɖǎ nɔ̄ ɓíɖíi dyi, ɓɛ́ ḿ ké wa póìn. Ɔ jèɛɛ, ḿ nì m̀ ɖé Íjè-ɓòɖòɔ̀ kɔ̃ ɖoɓoɛń.’

³⁵ “Mózè mɔ̀ nyɔ ɓɛ́ wa ɓɔ́ ma kà, ɓɛ́ wa dyi ma kà níiń, ‘Nyɛ́ nyu m̀ à wuɖuí-kɔ̃̀-nyɔ̀ kè à tɔ̀ɔ̀-ɓìɔ̀ múɛ́?’ kɛ. Mózè dyúáɖòɔ̀ mɔ̀ nyɔ Gèɖèpɔ́ɔ̀ ɖoɓo ma, ɓɛ́ ɔ ké nyɔ-wuɖuí-kɔ̃̀-nyɔ̀ kè nyɔ-póìn-nyɔ̀ jǔ. Gèɖèpɔ́ɔ̀ nyí ma ɔ kũ̀àɔ̀ ti ɓɛ́ ɔ wùɖùìn ma ɖé ínjà ɓɛ́ ɔ wóɖóìn ma kà ɔ dyí ɖé cu-gbɔ̌ɔ̀ múɛɛ mú kɛ.

³⁶ Mózè mɔ̀ nyɔ nàìn ma wa, ké ɔ zà ma wa ɖé Íjè-ɓòɖòɔ̀ kɔ̃. Ɔ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn ɓě ɖé Íjè-ɓòɖòɔ̀ kɔ̃ kè ɖé Dyóó Zĩ-zãɔ̀ wĩín ɔ kè ɖé gbǎùn-fúɖúáɔ̀ kɔ̃, ɓó zɔ̃ kpáɖá-nyɔ sɔ̃́ xwíníín.

³⁷ Mózè mɔ̀ nyɔ cɛ̃ɛ zɔ̃̌ɔ̀ Éézùɖùɛ̀-nyɔ̀ ɓěɔ̀ gbo, ké ɔ ɖá, ‘Gèɖèpɔ́ɔ̀ muɛ nyuùn ɓɛ́ ɓě ɖíí ɓěɔ̀ ɖò ké kpáá-ɖɛ̀-cɛ̃-nyɔ̀ jǔ ɖé ɓě hwìɛ̀ kà ḿ nìà kɛ.’

³⁸ Ti Éézùɖùɛ̀-nyɔ̀ ɓěɔ̀ poìn ma ɖé gbǎùn-fúɖúáɔ̀ kɔ̃ dyíɛɛ, Mózè mɔ̀ ma nyɔ kè ínjàɔ̀ nì ma kà wùɖùɛ̌n ɖé Sányà-tòɖòɔ̀ dya kɛ̀. À ɓǎ nììn ɓǎ ɓěɔ̀ nì ma ɓó ɖekè. Gèɖèpɔ́ɔ̀ nyí ma Mózè cĩ́-cĩ́-wùɖù ɓě, ɓɛ́ ɔ kéɛ à nyí.

³⁹ “Kɛɛ à ɓǎ nììn ɓǎ ɓěɔ̀ nɔ́ɔ̀ ma ɔ wuɖuɔ̀ gbo, ké wa poɛ ma wáká. Ké Íjè-ɓòɖòɔ̀ kɔ̃ ɖe-mu-tò nyu ma wa mìɔ.

⁴⁰ Wa cɛ̃ɛ ma Eɖóún gbo, ké wa ɖá, ‘Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké Mózè mɔ̀ nyɔ zà ma kà à ɖé Íjè-ɓòɖòɔ̀ kɔ̃ɛɛ gbo kpáa dyí dyuò.’

⁴¹ Ɓó wé ɓěa ɓaɖaa, wa mɛ ma ɓìɖǐ-dyù ɖò, ké wa zà ma sáa ɓó kũùn-kpò ɓɛ́ wa ɖǎ ma kà mɛɛ bìì. Ké wa pa ma hwɔ ɓó ɖɛ wa mìɔùn nììn sɔ̃ ɖǎ ma kà mɛɛ bìì.

⁴² Ɔ jèɛɛ, Gèɖèpɔ́ɔ̀ pòìn ma wa kɔ̃ín, ké ɔ zàìn ma wa ɖɛ séín ɓě ɓɛ́ wa fãà ɖé dyɔɔ̀ dyíɛɛ ɓiè-ɓiè xwáɖáún. Kà ɓɛ́ ɔ nyu céèɛ̀ ɖé kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ múɛɛ, ɔ kɛ̀. Gèɖèpɔ́ɔ̀ ɖá, ‘Óó Éézùɖùɛ̀-dyù ɓě, zɔ̃ kpáɖá-nyɔ sɔ̃́ ɓɛ́ ɓě nyuà ɖé gbǎùn-fúɖúáɔ̀ kɔ̃ɛɛ, ɓě dyà ma ḿ ɖòǔn sáa-zàìn-ɖɛ̀ mɔɔ nyíí-ɖɛ̀ɛ̀?

⁴³ Gbào, ɓě ɖú gèɖèpɔ́ɔ̀ mɔ̀à Móɖɛ̀ kɛɛ mú-ɓièìn-gbò kè dɛ̀nɛ̀-dyù-gèɖèpɔ́ɔ̀ mɔ̀à Wɛ́ɖɛ́fàùn kɛɛ kũùn-kpòɔ̀ dyí, ké ɓě kpa ma wa. Ɓě ɓiè waà hwɔìn-ɖɛ̀ ɓě ɓɛ́ ɓě ɖǎà mɛ kɛɛ ní. Ɔ jèɛɛ, ní mu ɓě toɛ̀-kpɔ̃-nyɔ̀ mú nyuùn, ɓɛ́ ḿ ké ɓě ɖé Báɓèɖɔ́ùn-ɓòɖòɔ̀ ɖeín kpa.’

⁴⁴ “À ɓǎ nììn ɓǎ ɓěɔ̀ ɓéɖé ma Bounɓoɔ̀ jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nì ma kà kɛɛ ɖé gbǎùn-fúɖúáɔ̀ kɔ̃. Ɔ mɔ̀ ɖɛ kɔ̃̀ jè Gèɖèpɔ́ɔ̀ cɛ̃ ma wa gbo kĩ́ín, ti ɔ cɛ̃ɛ ma Mózè gbo, ɓɛ́ ɔ ké ma jàɖàìn-gbòɔ̀ po kà ɔ mìɔùn nyuɛ ma kà Mózè gbo cɛ̃ɛ kɛ.

⁴⁵ Ti Gèɖèpɔ́ɔ̀ kúmú ma xwéɖé-dù ɓěɔ̀ ɓó à ɓǎ nììn ɓǎ ɓěɔ̀ dyúa, ké à ɓǎ ɓěɔ̀ ɖú ma waà ɓóɖóɛ̀ dyíɛɛ, à ɓǎ ɓěɔ̀ kè Jasúé dyà ma jàɖàìn-gbòɔ̀ nɔ̄ ɓóɖóɛ̀ kɔ̃. Ké ɔ sè ma nɔ̄ ɓóɖóɛ̀ kɔ̃, ké Dèɓé dyɛ̀ìn ma nɔ̄ dyi.

⁴⁶ Ké Gèɖèpɔ́ɔ̀ hwòɖǒ dèìn ma Dèɓé múin, ké Dèɓé zɔ̀ìn ma Gèɖèpɔ́ɔ̀, ɓɛ́ ɔ ké ma ɔ kpé nyí, ɓɛ́ ɔ ké ma ɔ bìì cĩ́-naín ɖò po. Cĩ́-naín ɔ ké ma kà poɛɛ, ɔ mɔ̀ ma Jékɔ̀ɛ̀ Gèɖèpɔ́ɔ̀ bìì.

⁴⁷ Kɛɛ Sã́ɖómà mɔ̀ nyɔ po ma ɔ bìì gbǒ ɖò.

⁴⁸ Kɛɛ Gèɖèpɔ́ɔ̀ nìà ɖéé ɖé dyiíɛɛ ní cĩ́ gbǒ ɓɛ́ nyɔǔn-dyù poɛɛ mú. Ɔ mɔ̀ ɖɛ ɓɛ́ kpáá-ɖɛ̀-cɛ̃-nyɔ̀ɔ̀ cɛ̃ zɔ̃̌ɔ̀, ké ɔ ɖá,

⁴⁹ ‘Bounɓoɔ̀ cɛ̃ɛ, ké ɔ ɖá, “Dyɔún mɔ̀ ní zèèɔ̀ dè-naín, ké ɓóɖó-kpàɔ̀ mɔ̀ ní ɓo-síìn-naín. Gbǒɔ̀ nyɛ́ ɓě kéà ḿ bìì poɛ́? Cĩ́-naínɔ̀ nyɛ́ ɓě ké ḿ bìì nyuɛ́?

⁵⁰ Ní sɔ̃ mɔ̀ nyɔ mɛ ɖɛ séín ɓěɛ̀.” ’

⁵¹ “Ɓě kã̀ ɖùǔ cá. Ɓě dyi ɖɛ hwìɖǐi poìn, ɔ kè ɓě dyi ɖɛ́ ɖò wɔ̃́ín, ɔ nì kà nyɔ ɓě seà Gèɖèpɔ́ɔ̀ dyí dyuò wɛɛ nìà kɛ. Ké ɓě nì Zùù Hwɛ̀ǐn-hwɛ̀ǐnɔ̀ gbo vɔ̃uń kánáá pū. Kà ɓě ɓǎ nììn ɓǎ ɓěɔ̀ nyuɛ zɔ̃̌ɔ̀ kà kĩ́ín nyɛɛ, kǎà ɓě mɔ̀ùn nìà nyuɛń nyɛ̀.

⁵² Kpáá-ɖɛ̀-cɛ̃-nyɔ̀ ɓěɔ̀ nyɛ́ ɓě ɓǎ nììn ɓǎ ɓěɔ̀ se ma gǎ dyéìn nyɛ́? Nyɔ ɓě ɓɛ́ wa cɛ̃ɛ zɔ̃̌ɔ̀ kĩ́ín kà ɓɛ́ Dyí-sɛ́ɖɛ́ìn-nyɔ̀ɔ̀ mu ma kà dyiìn nyɛɛ, wa ɖáɓá ma wa ní. Ké Dyí-sɛ́ɖɛ́ìn-nyɔ̀ɔ̀ kɛɛ, ɓě mɔ̀ùn ɖǎ ɔ peɖe-nyɔ̀ kè ɔ ɖáɓá-nyɔ̀ jǔ ɓó kàǔn.

⁵³ Ɓě dyé zɔ̃̌ɔ̀ Gèɖèpɔ́ɔ̀ gma ɓě ɓɛ́ ɔ dèìn zɔ̃̌ɔ̀ kà ínjà ɓěɔ̀ xwa kɛ, kɛɛ wɛ̃́ɛ́ kɛɛ, ɓě seɛ ma dyi kpɔ̃.”

Wa taɓaìn Síɖíɓììn sɔ́ɔ́-kpò dyi

⁵⁴ Ti tɔ̀ɔ̀-ɓìɔ̀ ɓěɔ̀ wɔ̃́ ma ɖɛ ɓěa kɛɛ, cɛ̃́ dyá ma wa mìɔ, ké wa tà ma nyɛ́nɛ́.

⁵⁵ Kɛɛ púɛɛ, Zùù Hwɛ̀ǐn-hwɛ̀ǐnɔ̀ dyíìn ma Síɖíɓììn múin, ké ɔ gmɔ̀ ma dyií gãa, ké ɔ dyé ma Gèɖèpɔ́ɔ̀ dĩ́ín-dĩ̀ìnɔ̀, ké ɔ dyé ma Jízɛ̀ ɓó Gèɖèpɔ́ɔ̀ ɖiaún dyi nyànàà.

⁵⁶ Ké ɔ ɖá, “Ɓě gmɔ̀ ɖéa, ḿ dyé ké dyɔɔ̀ kaà wɔ̃, ké ḿ dyé Nyɔǔn-dyùɛ̀ Dyú-gààɔ̀, ké ɔ nyànà ɖé Gèɖèpɔ́ɔ̀ ɖiaún dyi.”

⁵⁷ Ké tɔ̀ɔ̀-ɓìɔ̀ ɓěɔ̀ páná ma mú zoo, ké wa kã ma waà ɖùǔ ɓěɔ̀, ké wa séín wáɖá ma Síɖíɓììn kɔ̃.

⁵⁸ Ké wa kúmú ma ɔ hwɔɖɔɔ̀ mú dyi, ké wa taɓaìn ma ɔ sɔ́ɔ́-kpò dyi. Zàse ɓěɔ̀ pɛ̃́ìn ma waà ɖɔ ɓě ɓɛ́ wa zà ma múɛɛ ɓó gàa-dyù hwà ɖò ɓɛ́ wa ɖáìn Sɔ́ɔ̀ kɛɛ ɓo zɔ̃̌ dyi.

⁵⁹ Ké ti wa nì ma Síɖíɓììn sɔ́ɔ́-kpò dyi taɓaǐn nyɛɛ, ɔ wùɖù ma Bounɓoɔ̀ gbo, ké ɔ ɖá, “Bounɓo Jízɛ̀, kpɔ̃ ní zùùɔ̀ dyi.”

⁶⁰ Ké ɔ taɓa ma kɔ́-dù hwuɖu, ké ɔ páná ma mú, ké ɔ ɖá, “Bounɓo, nàmàǔn wa nìà nyuɛń nyɛɛ, mɔ̀ǔn ɖá ɓɛ́ wa kéɛ kpa dyí ɖú.” Ti ɔ ɖǎ ma ɖɛa cɛ̃ɛ, púɛɛ, ɔ mɛ́ ma ní.