Àpɔ́sò 6 - Ɓǎsɔ́ɔ̀ Báɓòɔ̀

Wa gã nyɔ-kpò mɛ̀nɛ̌ìn-sɔ̃́ ɓɛ́ wa ké àpɔ́sò ɓěɔ̀ gbo kpá

¹ Ɓó wé ɓěa ɓaɖaa, ɖeín-nà-nyɔ̀ ɓěɔ̀ nì ma kɔ̃ kpáuń. Waà nyɔ ɓě ɓɛ́ wa po ma Gíɖíì-wùɖùɛɛ jɛ̀ìn ma waà nyɔ ɓě po ma Júù-wùɖùɛɛ dúi. Wa jɛ̀ìn ma wa dúi, sepóɛɖé ti wa nì ma nyɔ ɓěɔ̀ ɖɛ ɓěɔ̀ múin geɛ̌n wé séín ɓaɖaa, wa se ma wa nììn jɔ̌ɔ̀-màà ɓěɔ̀ gbo gmɔ̀ nɔ̀mɔ̀ dyíin.

² Ɔ jèɛɛ, àpɔ́sò ɓaɖa-bùè sè sɔ̃́ ɓěɔ̀ ɖá ma ɖeín-nà-nyɔ̀ séín ɓěɔ̀, ké wa ɖá, “Ɔ se dyí sɛ́ɖɛ́ìn ɓɛ́ à ké Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ cɛ̃ jè dyi táà, ɓɛ́ à ké ɖii-ɖɛ̀ téɓèɖè gbɔ kpá.

³ Ɔ jèɛɛ, ɖíí ɓě, ɓě gmɔìn ɓě mìɔùn hwìɛ̀ dyi ɓó gàa mɛ̀nɛ̌ìn-sɔ̃́ kɔ̃̀ nyɛ́nɛ́ín-nyɛ̀nɛ̀ nì nyɔ ɓěɔ̀ wĩín nyɛɛ jè. Wa mɛ mɔ̀ nyɔ ɓě ɓɛ́ wa fɔ̀nɔ̀ hwòɖǒ ké Zùùɔ̀ dyíìn wa múin nyɛ, ɓɛ́ à ké wa kũ̀àɔ̀ kɔ̃ún po.

⁴ Kɛɛ à mìɔùn mu dúún kuùn, ɓɛ́ à ké ɓaà, ɓɛ́ à ké bɔ̃̌ nɔ̀mɔ̀ dyíinɔ̀ kũ̀à mú nyùìn ɖekè.”

⁵ Ɖɛ wa cɛ̃ ma kà kɛɛ, ɔ dè ma ɖeín-nà-nyɔ̀ séín ɓěɔ̀ hwìɖǐi. Ké wa gã ma Síɖíɓììn ɓɛ́ ɔ ɓéɖé ma hwìɖǐǐ-taɓa-taɓa ɓáún-ɓáún, ké Zùù Hwɛ̀ǐn-hwɛ̀ǐnɔ̀ dyíìn ma ɔ múin nyɛ. Wa gã ma Féɖò kè Pɔ́ɖɔ́kɔ̀ɖɔ̀ kè Nàkénà kè Táámɔ̀ kè Pámìnà ɔ kè Níkòɖà ɖekè. Níkòɖà mɔ̀ nyɔ ɖú ma Júù-nyɔ̀ ɓěɔ̀ nììn Gèɖèpɔ́ɔ̀ ɓiè-ɓièɔ̀ dyí kĩ́ín nyɛ. Ɔ sɔ̀ ma ɖé Ã́tìà-hwɔ̀ɖɔ̀ɔ̀ mú.

⁶ Gàa ɓě nìà kɛɛ, wa nyànàìn ma wa àpɔ́sò ɓěɔ̀ dyúa dyi. Ké àpɔ́sò ɓěɔ̀ ɓaà ma, ké wa dè ma wa sɔ̃ dúún.

⁷ Ké Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ zaìn ma mú, ké ɖeín-nà-nyɔ̀ ɓěɔ̀ nì ma kɔ̃ kpáuń mìɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké sáa-zà-nyɔ̀ ɓěɔ̀ ɓáún-ɓáún kpɔ̃ ma hwìɖǐǐ-taɓa-ɖɛ̀ɔ̀ jè dyi ɖekè.

Wa kpɔ̃ Síɖíɓììn

⁸ Síɖíɓììn kpeɖe nɔ̀mɔ̀ ma dyíin mìɔ, ké ɔ ɓéɖé ma kpé vɛ̀nɛ̀. Ɔ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn kpa ɖɛ ɓě ɖé nyɔ ɓěɔ̀ hwìɛ̀.

⁹ Ɓó tia ɓaɖaa, Júù-nyɔ̀ ɓěɔ̀ ɓéɖé ma cɔ́cì-gbò ɖò ɓɛ́ wa ɖáìn ma “Nyɔ ɓě ɖǎ ma kà gǐì-kũ̀à xwaún pó” kɛɛ nyɛ́nɛ́ín nyɛ. Nyɔ ɓě nì ma cɔ́cìɔ̀ múɛɛ, wa mɔ̀ ma Sàwíɖíìn-nyɔ̀ ɓě kè Èɖìzánìà-nyɔ̀ ɓě ɔ kè nyɔ ɓě sɔ̀ìn ɖé Sàɖésìà-ɓòɖòɔ̀ kè Ésìà-ɓòɖòɔ̀ kɔ̃ kɛ. Waà cɔ́cì-nyɔ̀ ɖíɛ́ ɓě sɔ̀ ma dyí, ké wa kè Síɖíɓììn zà ma dòǐn.

¹⁰ Kɛɛ wa se ma ɔ ɖuɛ ɓɛ́ìn, sepóɛɖé Zùùɔ̀ nyuɛ ké ɔ wùɖù hwòɖǒ-fɔ̀nɔ̀-kà.

¹¹ Ké wa cɛ̃ɛ ma nyɔ ɖíɛ́ ɓě gbo nyàà, ɓɛ́ wa ké ma kpoɖo-ɖɛ̀ gbo zi. Nyɔ ɓě ɓɛ́ wa ɖá ma kà kɛɛ, wa cɛ̃ɛ ma, ké wa ɖá, “À wɔ̃́ɔ, ké Síɖíɓììn cɛ̃ wuɖu gbà Mózè kè Gèɖèpɔ́ɔ̀ kɔ̃ún.”

¹² Ké wa nì ma nyɔ vɛ̀nɛ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè nyɔ tɔ̀ɔ̀ ɓěɔ̀ vã kɔ̃ poɛń, ké wa hwɛ̀ìn ma ɖe ɓó Síɖíɓììn gbo, ké wa kpɔ̃ ma ɔ, ké wa dyà ma ɔ ɓó tɔ̀ɔ̀-ɓìɔ̀ ɓěɔ̀ dyúa.

¹³ Ké wa nyànàìn ma zàse ɓě ké Síɖíɓììn se wĩin tɔ́mɔ́ìn nyɛɛ dyi, ké zàse ɓěɔ̀ ɖá, “Gàa nìà kɛ cɛ̃ ɖɛ gbà Gèɖèpɔ́ɔ̀ pá nìà kɛ kè Gèɖèpɔ́ɔ̀ gmaɔ̀ kɔ̃ún tee.

¹⁴ À wɔ̃́ɔ, ké ɔ cɛ̃ɛ kà Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ múɛɛ mu pá nìà kɛ mú gbɔɔ̀ùn, ké ɔ mu kpeɖe ɓě ɓɛ́ Mózè zàìn ma à xwáɖáún wɛ̃ɛ gbo zĩàìn nyɛ.”

¹⁵ Ké tɔ̀ɔ̀-ɓìɔ̀ séín ɓěɔ̀ gmɔ̀ ma Síɖíɓììn gãa, ké ɔ dyúa-kpàɔ̀ nì ma pū kà ínjà ɖòɛ̀ dyúa-kpà nìà kɛ.