Àpɔ́sò 4 - Ɓǎsɔ́ɔ̀ Báɓòɔ̀

Píɖɛ̀ kè Jɔ̃́ɔ́ nyànà ɓó tɔ̀ɔ̀-ɓìɔ̀ ɓěɔ̀ dyúa dyi

¹ Ti Píɖɛ̀ kè Jɔ̃́ɔ́ nì ma nyɔ ɓěɔ̀ gbo wùɖùɛ̌n nyɛɛ, sáa-zà-nyɔ̀ ɓěɔ̀ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ wuɖuí-kɔ̃̀-nyɔ̀ɔ̀ ɔ kè Sádyùsíì-nyɔ̀ ɓěɔ̀ hwɛ̀ìn ma wa ɖe.

² Ké ɖɛ àpɔ́sò ɓěɔ̀ nì ma nyuɛń nyɛɛ, ɔ pĩ́à ma wa hwòɖǒ dyi, sepóɛɖé wa nì ma nyɔ ɓěɔ̀ ɖɛ tɛ̀mɛ̀ǐn, ké wa nìɛ̀ ma cɛ̃iń kà nyɔ ɖò dyi mɛ́ín, ɔ mu gĩɔ wóɖóùn ɖeɛ, sepóɛɖé Jízɛ̀ wóɖó ma gĩɔ jèɛ.

³ Ké wa kpɔ̃ ma Píɖɛ̀ kè Jɔ̃́ɔ́, ké wa po ma wa kpɔɖɔ ɖeín, ɓɛ́ zɔ̃ ké ma wa ɖé zɔ̃̀ìn, sepóɛɖé tíe nìǎ ma kpɔ̃uń jè.

⁴ Kɛɛ nyɔ ɓě ɓɛ́ wa wɔ̃́ ma bɔ̃̌ nɔ̀mɔ̀ dyíinɔ̀ kɛɛ, wa ɓáún-ɓáún taɓa ma Jízɛ̀ hwìɖǐǐ, ké wa kpá ma nyɔ ɓě ɓɛ́ wa ɖǎ ma Gèɖèpɔ́ɔ̀ hwìɖǐǐ taɓa kĩ́ín nyɛɛ kɔ̃. Ké gàa ɓěɔ̀ ɓɛ́ìn ma nyɔ-kpò táázĩ̀ìn hm̀m̌ jǔɛ.

⁵ Wé kɔ ma ɓó dyíɛɛ, Júù-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ kè waà nyɔ vɛ̀nɛ̀ ɓěɔ̀ ɔ kè waà Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ poìn ma dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

⁶ Ánàsì mɔ̀à sáa-zà-nyɔ̀ vɛ̀nɛ̀ɔ̀ kɛ kè Kádyáfà kè Jɔ̃́ɔ́ kè Ɛ̀ɖìzánà ɔ kè nyɔ séín ɓě ɓɛ́ wa mɔ̀ ma sáa-zà-nyɔ̀ vɛ̀nɛ̀ɔ̀ nyɔ ɓě kɛɛ nì ma ɓó ɖekè.

⁷ Ti wa ɖǎ ma Píɖɛ̀ kè Jɔ̃́ɔ́ ɓó wa hwìɛ̀ dyi nyànàìn nyɛɛ, wa diè ma wa dyi, ké wa ɖá, “Kpéɔ̀ nyɛ́ kè nyɛ́nɛ́ɔ̀ nyɛ́ kɔ̃̀ mú ɓě nyùìn kà ɖɛa kɛ́?”

⁸ Ké Zùù Hwɛ̀ǐn-hwɛ̀ǐnɔ̀ dyíìn ma Píɖɛ̀ múin, ké ɔ cɛ̃ɛ ma wa gbo, ké ɔ ɖá, “Ɓě mɔ̀ nyɔ-wuɖuí-kɔ̃̀-nyɔ̀ ɓěɔ̀ kè nyɔ vɛ̀nɛ̀ ɓěɔ̀.

⁹ Ɔ jǔ ké ɓě dyi zɛ̃̌ɛ̀ à dyi dièɛ̌n nì ɓó ɖɛ nɔ̀mɔ̀ dyíin ɓɛ́ à ɖǎ wɛ́-nyɔ̀ɛ̀ bìì nyu ɓá kà gàa nìà kɛ nyuà dyi kánáa kɛɛ jè dyí ní,

¹⁰ nìí, ɖɛ ɓě mɛ dyuò kɛɛ, ɔ kɛ̀. Ɓě séín kè Éézùɖùɛ̀-nyɔ̀ séín ɓěɔ̀ mɛ dyuòɛ̀ kà Jízɛ̀ Kɛ́ɖɛ́ì sɔ̀à Názɛ̀ɖɛ̀-hwɔ̀ɖɔ̀ɔ̀ mú, ɓɛ́ ɓě kɔ̀ìn ma kà kɔ́ɖɔ́sìɔ̀ kɔ̃in, ɓɛ́ Gèɖèpɔ́ɔ̀ zà ma kà gĩɔ kɛɛ, ɔ nyɛ́nɛ́ɔ̀ ɖǎa nyu ké gàa nìà kɛ ɖǎà dyi káná, ké ɔ nyànàà dà ɓě dyúa dyiɛ̀.

¹¹ Jízɛ̀ nìà kɛɛ, ɔ mɔ̀ sɔ́ɔ́-kpò ɓɛ́ ɓě mɔ̀ gbǒ-po-nyɔ̀ ɓěɔ̀ ɖǎ ma zùǔn zàìn nyɛ, kɛɛ ɔ ɖǎ gbǒɔ̀ gãún-sɔ̀ɔ̌-kpò jǔ.

¹² Pó-pó ɖò se nyɔ kà kò ɖò mú nì fɔɔ, sepóɛɖé nyɛ́nɛ́ kà kò ɖò kɔ̃̀ mú à ɓɛ́ìn póɛ̀n nyɛɛ ɖò se nɔ̄ dyɔɔ̀ɛ̀ xwíɖíi nì nɔ̄ ɖé ɓěà mɔ̀ toɖo-kɔ̃-nyɔ̀ ɓěɛ̀ hwìɛ̀.”

¹³ Ti wa ɖǎa dyé kà Píɖɛ̀ kè Jɔ̃́ɔ́ se ma fɛ̃̀ìn-kà wùɖùɛ̌n nìɛ, ké waà hwòɖǒ dyéɛ ma kà wa mɔ̀ ma nyɔ séè ɖɛ cɛ̃́ ɖòɛɛ, hwòɖǒ kpèìn ma wa kɔ̃in. Ké wa dyuòɛ̀ ma dyí kà wa kè Jízɛ̀ ɖǎ ma mú naìn kĩ́ín nyɛ.

¹⁴ Ké ti wa dyéɛ ma kà gàa ɖǎ ma kà dyi káná kɛɛ nyànà ma ɓó wa hwìɛ̀ dyiɛɛ, wa se ma Píɖɛ̀ kè Jɔ̃́ɔ́ wuɖuɔ̀ se poɛ ɓɛ́ìn.

¹⁵ Kɛɛ ti wa ɖǎ ma wa píé ɖoɓo ɖɛ wèɛɛ, púɛɛ, wa dyéìn ma dú,

¹⁶ ké wa ɖá, “Ɖɛ́ ɓěà mɛ nyu gàa ɓěà bũ̌ɛ́? Sepóɛɖé nyɔ séín ɓě cĩ́à dà Jùɖúsɛ̀ɖɛ̀ìn-hwɔ̀ɖɔ̀ɛ̀ múɛɛ dyuòɛ̀ dyí jɛ́ɛ́ kà gàa ɓě nìà kɛ ɖǎ ma zɛ̃̀ìn-ɖɛ̀ kpa ɖɛ ɖò nyuɛ, ké à seɛ mú doɛ̀n ɓɛ́ìn.

¹⁷ Ɓěà mɛ po wa fã̀àǔn, ɓɛ́ wa ní kɔ̃̀ ɖà nyɔ ɖò gbo wùɖù ɖé Jízɛ̀ɛ̀ nyɛ́nɛ́ɔ̀ mú ɖe, ɓɛ́ bɔ̃̌ɔ̀ ní kɔ̃̀ ɖà nyɔ ɓěɔ̀ hwìɛ̀ dyi ɓeìn ɖe.”

¹⁸ Ké wa ɖá ma Píɖɛ̀ kè Jɔ̃́ɔ́ ɖé gbǒɔ̀ mú ɖe, ké wa cɛ̃ɛ ma wa gbo, ɓɛ́ wa ké nyɔ ɓěɔ̀ gbo wùɖùɛ̀ ɓɔ́, ɔ kè ɓɛ́ wa ké nyɔ ɓěɔ̀ ɖɛ tɛ̀mɛ̀ìn ɓɔ́ ɖé Jízɛ̀ɛ̀ nyɛ́nɛ́ɔ̀ mú.

¹⁹ Kɛɛ Píɖɛ̀ kè Jɔ̃́ɔ́ zà ma ɖé wuɖu, ké wa ɖá, “Ɓěɛ̀ hwòɖǒ ɖá ɔ sɛ́ɖɛ́ìn dyí ɖé Gèɖèpɔ́ɔ̀ dyéɖéín, ɓɛ́ à ké ɓěɛ̀ wuɖu nyu, ké ɔ zi ɓɛ́ à ké Gèɖèpɔ́ɔ̀ wuɖu nyuɛɛ dyíì? Ɓě mìɔùn mɛ poɛ wɔ̃,

²⁰ sepóɛɖé ɖɛ ɓě ɓɛ́ à ɖǎ dyéɛ kè ɖɛ ɓě à ɖǎ wɔ̃́ɛɛ, à seɛ cɛ̃ɛ ɓɔ́ɔ ɓɛ́ìn.”

²¹ Ti wa ɖǎ ma Píɖɛ̀ kè Jɔ̃́ɔ́ fã̀àǔn po ɖeɛɛ, wa buɛ̀ ma wa, ɓɛ́ wa ké ma mu. Wa se ma hwìè ɖò dyé, ɓɛ́ wa ké ma wa gǎ dyéìn, sepóɛɖé nyɔ séín ɓěɔ̀ nì ma Gèɖèpɔ́ɔ̀ ɓàìn-ɓàìn nyíɛń ɓó ɖɛ ɖǎ ma kà kpáa jè.

²² Gàa kɔ̃̀ bũ̌ ɓɛ́ wa ɖǎ ma kà nyɔ-dyi-kánáìn-zɛ̃̀ìn-ɖɛ̀ɔ̀ nyuɛɛ, ɔ zi ma zɔ̃ kpáɖá-nyɔ sɔ̃́ kɔ̃.

Nyɔ ɓě ɓɛ́ wa taɓa Gèɖèpɔ́ɔ̀ hwìɖǐǐɛɛ ɓaà ɓɛ́ wa ké se fã̀à peɖe

²³ Ti Píɖɛ̀ kè Jɔ̃́ɔ́ ɖǎ ma wa xwaún sɔ̀ kɛɛ, wa mu ma wa mǔè ɓěɔ̀ gbo, ké ɖɛ ɓɛ́ sáa-zà-nyɔ̀ kpa ɖɛ ɓěɔ̀ kè nyɔ vɛ̀nɛ̀ ɓěɔ̀ cɛ̃ ma kà wa gboɛɛ, wa zaìn ma séín wa mǔè ɓěɔ̀ gbo kɔ̃in.

²⁴ Ké ti Píɖɛ̀ mǔè ɓěɔ̀ wɔ̃́ɔ ma kɛɛ, wa kpa ma wuɖu dyií ɖé Gèɖèpɔ́ɔ̀ gbo hwòɖǒ-dyúáɖò-kà, ké wa ɖá, “Bounɓo, mɔ̀ mɔ̀ nyɔ mɛà dyɔɔ̀ kè ɓóɖó-kpàà kè dyóóɔ̀ ɔ kè ɖɛ séín nìà ɖé dyɔɔ̀ dyíɛ kè ɖé ɓóɖó-kpàà kɔ̃ɛ ɔ kè ɖé níɔ̀ gboɛɛ,

²⁵ m̀ wùɖùìn ma ɖé Zùù Hwɛ̀ǐn-hwɛ̀ǐnɔ̀ mú, ké m̀ cɛ̃ɛ ma dyììn ɖé à ɓǎ Dèɓé mɔ̀à nì gbo-nì-nyɔ̀ɔ̀ kɛɛ mú, ké m̀ ɖá, ‘Ɖɛ́ kɔ̃̀ jè ɓóɖó-dù ɓěɔ̀ sɔ́à Bounɓoɔ̀ gbo vɔ̃ jè dyí pídyiɛ́? Ɖɛ́ kɔ̃̀ jè waà nyɔ ɓěɔ̀ sɔ́à ɖɛ ɓě se kpáa ɓɛ́ìn nyɛɛ dyí pídyiɛ́?

²⁶ Ɓóɖó-dù ɓěɔ̀ kã́á ɓěɔ̀ kè waà wuɖuí-kɔ̃̀-nyɔ̀ tɔ̀ɔ̀ ɓěɔ̀ po kɛ́ɛ́, ké wa sɔ́ Bounɓoɔ̀ kè kã́á ɓɛ́ ɔ ɖǎà gã kɛ.’

²⁷ Wa poìn ma dà dyúáɖò dyí jǎà nɔ̄ hwɔɖɔ nìà kɛ mú jɛ́ɛ́, ɓɛ́ wa ké ma nì gbo-nì-nyɔ̀ hwɛ̀ǐn-hwɛ̀ǐn Jízɛ̀ mɔ̀ nyɔ ɓɛ́ m̀ ɖǎ ma kà gã, ɓɛ́ ɔ ké ma kà Kɛ́ɖɛ́ìɔ̀ jǔ kɛɛ gbo vɔ̃. Hɛ́wɔ̀ɖɔ̀ kè Pɔ̃́cà Páɖè kè ɓóɖó-dù kà kò ɖò ɓěɛ̀ nyɔ ɓěɔ̀ ɔ kè Éézùɖùɛ̀-nyɔ̀ ɓěɔ̀ poìn ma dyí,

²⁸ ɓɛ́ ɖɛ ɓɛ́ m̀ ɖǎ ma kà gbɔ po kĩ́ín ɖé nì kpé kè nì fɔ̀nɔ̀-hwòɖǒ múɛɛ, wa kéɛ nyu.

²⁹ Ké kàǔn wɛ̃ɛ, Bounɓo, m̀ mɛ dè wuɖu ɓɛ́ wa cɛ̃à à kéà fã̀àǔn kpáa dyéɖé gbo, ɓɛ́ m̀ ké à mɔ̀ nì gǐì ɓěɔ̀ kpé nyí, ɓɛ́ à ké nì bɔ̃̌ nɔ̀mɔ̀ dyíinɔ̀ cɛ̃, ɓɛ́ à ké seɛ fã̀à mú pèɖèìn.

³⁰ Pɛ́ɛ̀ nì sɔ̃ɔ̀ dyí, ɓɛ́ m̀ ké nyɔǔn dyi kánáìn, ké m̀ mɛ nyuɛ ɓɛ́ nì gbo-nì-nyɔ̀ hwɛ̀ǐn-hwɛ̀ǐn Jízɛ̀ɛ̀ nyɛ́nɛ́ɔ̀ ké ɖàɓàìn-ɖɛ̀ kè zɛ̃̀ìn-ɖɛ̀ nyu.”

³¹ Ké ti wa ɖǎ ma ɓaà hwɔɛɛ, dɛ̀ ɓɛ́ wa poìn ma kà dyíɛɛ túò ma dyi, ké Zùù Hwɛ̀ǐn-hwɛ̀ǐnɔ̀ dyíìn ma wa séín múin, ké wa cɛ̃ ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ hwòɖǒ-ku-kà.

Kɛ́ɖɛ́ì ɖeín-sí-nyɔ̀ ɓěɔ̀ geìn waà kɔ̃̀ɔ̀-ɖɛ̀ ɓěɔ̀ ní

³² Ɓó tia ɓaɖaa, nyɔ ɓě ɓɛ́ wa taɓa ma kà Gèɖèpɔ́ɔ̀ hwìɖǐǐɛɛ, wa hwòɖǒ kè wa hwìɖǐi-poìn-ɖɛ̀ nì ma dyúáɖò. Ké wa dyúáɖò seɛ ma cɛ̃, ɓɛ́ ɔ ké níiń, “Ɖɛ ɓě nìà kɛɛ, wa mɔ̀ ḿ níǐn.” Wa poìn ma waà ɖɛ séín ɓěɔ̀ gbo.

³³ Ké àpɔ́sò ɓěɔ̀ nyu ma zàse ɖé kpé vɛ̀nɛ̀ mú kà ɓɛ́ Bounɓo mɔ̀à Jízɛ̀ kɛɛ ɖǎ ma gĩɔ wóɖóɛ. Ké nyɔ ɓěɔ̀ hwòɖǒ dèìn ma nyɔ séín ɓě taɓa ma kà Gèɖèpɔ́ɔ̀ hwìɖǐǐɛɛ múin.

³⁴ Nyɔ ɖò se ma gǎ dyé ɖé wa hwìɛ̀, sepóɛɖé nyɔ séín ɓě ɓɛ́ wa ɓéɖé ma pá kè gbǒ ɓěɛɛ, wa peɖe ma wa ní. Ké wíɖí ɓě ɓɛ́ wa dyé ma waà ɖɛ ɓěɔ̀ kɔ̃ún wɛ̃ɛ, wa dyàà ma,

³⁵ ké wa nyíɛ ma àpɔ́sò ɓěɔ̀ xwa. Ké nyɔ ɓě kɔ̃̀ wa kéɛ ma dyéɛɛ, wa séín dyé ma ɖò.

³⁶ Gàa ɖò nì ma ɓó. Ɔ kɔ̃̀ ma pá ɖò. Ɔ mɔ̀ nyɔ ɓɛ́ àpɔ́sò ɓěɔ̀ jǔìn ma Bànábà-nyɛ̀nɛ̀ kɛ. Bànábà-nyɛ̀nɛ̀ɔ̀ xwíníín mɔ̀ “Nyɔ-kpéí-po-nyɔ̀.” Ɔ mɔ̀ ma Ɖíìváà-nyɔ̀. Ɔ wóɖóìn ma ɖé Kítììn-ɓòɖòɔ̀ kɔ̃.

³⁷ Pá ɓɛ́ ɔ kɔ̃̀ ma kà kɛɛ, ɔ peɖeɛ ma ní, ké ɔ dyà ma wíɖíɔ̀, ké ɔ nyíɛ ma àpɔ́sò ɓěɔ̀ xwa.