Àpɔ́sò 24 - Ɓǎsɔ́ɔ̀ Báɓòɔ̀

Ɖɛ Júù-nyɔ̀ ɓěɔ̀ cɛ̃ Pɔ́ɔ̀ kɔ̃ún wɛ̃

¹ Ti wé hm̀m̌ ɖǎ ma ziɛɛ, Ánànádyà mɔ̀à sáa-zà-nyɔ̀ vɛ̀nɛ̀ɔ̀ kɛ kè Júù-nyɔ̀ vɛ̀nɛ̀ ɖíɛ́ ɓě dyi ma ɖé. Wa dyà ma gàa ɖò kɔ̃̀ nyɛ́nɛ́ mɔ̀ ma Tɔ̀táɖà kɛ, ɓɛ́ ɔ ké ma wa bìì wùɖù. Ké ɖɛ kɔ̃̀ jè wa kpɔ̃ ma kà Pɔ́ɔ̀ kɛɛ, wa cɛ̃ɛ ma gɔ̌mànàɔ̀ gbo.

² Ti wa ɖá ma Pɔ́ɔ̀ kɛɛ, Tɔ̀táɖà ɖú ma ɖɛ kɔ̃̀ jè wa kpɔ̃ ma kà Pɔ́ɔ̀ kɛɛ kɔ̃in zaìn kpàǐ, ké ɔ ɖá, “Ɓǎ Fíɖè, ɔ seɔ́ nì jèǐn, à ɓóɖóɛ̀ seɔ́ gìɖìǐ ɖò ɓéɖéɛ mu fɔɔ. Mɔ̀ mɔ̀ nyɔ nyuɛ ké à ɓóɖóɛ̀ ɖɛ séín ɓěɔ̀ nɔ̀mɔ̀à dyíin ɖé dà séín nyɛ̀.

³ Ɓɔ̌ɔ̀, à kpɔ̃ ɖɛ ɓěa dyi, ké à po m̀ zùo mìɔ.

⁴ Kɛɛ à se mɔ́ ɓɛ́ à ké nì ti zĩ̀ìn. Ɔ jèɛɛ, m̀ mɛ ku hwòɖǒ pū, ɓɛ́ m̀ ké à wuɖu ɓěɔ̀ ɖùǔ gbo tò ɖɛ wè, à ɓaà m̀ ní.

⁵ À dyéɛ kà gàa nìà kɛ nyùìn nyɔ fũ̀à-fṹá tee, ké ɔ mɔ̀ zàǔn-zàǔn-dyi-po-nyɔ̀ ɖé Júù-nyɔ̀ séín ɓě nì ɓóɖóɛ̀ kɔ̃ɛɛ hwìɛ̀ kɛ. Ké ɔ mɔ̀ Názɛ̀ɖɛ̀-nyɔ̀ ɓěɔ̀ nyɔ vɛ̀nɛ̀ ɖò.

⁶ Ké ɔ nì ma vɔ̃uń ɓɛ́ ɔ ké Gèɖèpɔ́ɔ̀ gbǒɔ̀ se-mú-hwɛ̀-ɖɛ̀ mú nyu nyɛ̀nɛ̀ɛ̀, ké à kpɔ̃ ma ɔ. [Ké à ɓɛ́ìn má ɔ zaa wɔ̃ poɛ kà à gmaɔ̀ nyuà cɛ̃ɛ kɛ,

⁷ kɛɛ dyéɛ, sójà-ɓǎ mɔ̀à Ɖísìà kɛɛ dyi, ké ɔ zàìn ɔ à gana xwa,

⁸ ké ɔ cɛ̃ɛ à mɔ̀à gàa nìà kɛ zaa-kpɔ̃̀ìn-nyɔ̀ ɓěɛɛ gbo, ɓɛ́ à ké nɔ̄ m̀ gbo dyi.] Ɔ jǔ ké m̀ mìɔùn dyi ɔ dyi diè ní, nìí, nì mu ɖɛ ɓě kɔ̃̀ jè à kpɔ̃à ɔ kɛɛ múin wɔ̃́ùn sɔ̀ìn ɖé ɔ mìɔùn wĩín.”

⁹ Ti Tɔ̀táɖà dè ma wuɖu dyiɛɛ, Júù-nyɔ̀ ɓěɔ̀ kpá ma ɔ gbo, ké wa ɖá kǎà ɖɛ ɓěɔ̀ nì ma jǎà.

Pɔ́ɔ̀ zaìn ɔ mìɔùn jè kɔ̃in ɓó Fíɖè dyúa

¹⁰ Ké gɔ̌mànàɔ̀ ɖáìn ma Pɔ́ɔ̀ sɔ̃, ɓɛ́ ɔ mɔ̀ùn ké ma wùɖù. Ké Pɔ́ɔ̀ ɖá, “Ḿ dyuò kà m̀ ɖǎ ɓóɖó-dù nìà kɛ zaa wɔ̃ poɛń hwèɖèìn ɓó zɔ̃ ɓáún-ɓáún xwíníín nyɛ. Ɔ jèɛɛ, ní hwòɖǒ dè dyi, ɓɛ́ ḿ ké ḿ mìɔùn jè kɔ̃in zaìn.

¹¹ M̀ ɓɛ́ìn nyɔ ɓě nìà kɛ dyi dièɛ̀ kà ti ḿ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ḿ ké ma Gèɖèpɔ́ɔ̀ ɓièɛɛ, ɔ séè wé ɓaɖa-bùè sè sɔ̃́ kɔ̃ zi keɛ.

¹² Wa se ma ḿ kè nyɔ ɖò dòǐn zàà dyé. Ké ḿ se ma nyɔ ɓěɔ̀ dyí poìn ɖé Gèɖèpɔ́ɔ̀ gbǒɔ̀ mú kè ɖé Júù-nyɔ̀ ɓěɔ̀ cɔ́cì-gbò ɓěɔ̀ mú ɔ kè ɖé hwɔɖɔɔ̀ mú.

¹³ Ké wa se ɖɛ ɓě kɔ̃̀ jè wa kpɔ̃à ḿ wɛ̃ɛ m̀ gbo kɔ̃in zaìn ɓɛ́ìn.

¹⁴ Kɛɛ ɖɛ ḿ ɓɛ́ìn m̀ gbo cɛ̃ɛ kɛɛ kɛà kɛ̀. Ḿ mɔ̀ fɛ̀ɛ̀ ɖìèɔ̀ nyɔ ɖò. Ɔ mɔ̀ fɛ̀ɛ̀ ɓɛ́ nyɔ ɓěɛ̀ mɔ̀ùn ɖá ɔ seà dyí sɛ́ɖɛ́ìn nyɛ. Ɖé fɛ̀ɛ̀ ɖìèɔ̀ mú, ɖéɛ̀ ní ɓiè à ɓǎ nììn ɓǎ ɓěɛ̀ Gèɖèpɔ́ɔ̀. Ḿ po ɖɛ séín ɓě céèà ɖé gma-cèè-ɖɛ̀ɔ̀ kè kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ múɛɛ jǎà.

¹⁵ Ké ḿ dè Gèɖèpɔ́ɔ̀ hwòɖǒ kɔ̃ kà ɓɛ́ dyí-sɛ́ɖɛ́ìn-nyɔ̀ ɓěɔ̀ kè nyɔ se dyí sɛ́ɖɛ́ìn ɓěɔ̀ mu gĩɔ wóɖóùn wɛ̃. Ké nyɔ ɓěɛ̀ mɔ̀ùn dè ɖɛ dyúáɖòɔ̀ hwòɖǒ kɔ̃ ɖekè.

¹⁶ Ɓó ɖɛ ɓɛ́ ḿ dèà hwòɖǒ kɔ̃ kɛ jèɛɛ, ḿ ɖɛ̀ɓɛ̀ ɓɛ́ ḿ ké ḿ mìɔùn ti dyéìn, ɓɛ́ ḿ ké hwòɖǒ wáɖáá ɓó Gèɖèpɔ́ɔ̀ kè nyɔǔn-dyù dyúa ɓéɖé tee.

¹⁷ “Ké ti ḿ se ma mú nì ɓó zɔ̃ gbɛ̀ǐ-gbɛ̀ǐ xwíníín nyɛɛ, ḿ dyi ma, ɓɛ́ ḿ ké ma ḿ mìɔùn nììn ɓóɖóɛ̀ nyɔ ɓě nyíí-ɖɛ̀ ɓě gbo dyà, ɔ kè ɓɛ́ ḿ ké Gèɖèpɔ́ɔ̀ nyíí-ɖɛ̀ ɓě nyí ɖekè.

¹⁸ Ḿ nì ma ɖɛa nyuɛń, ké ḿ nyu ma ɖɛ ɓě ɓɛ́ ḿ ké ma kà ɖé Gèɖèpɔ́ɔ̀ gbǒɔ̀ mú nyuín, nìí, ḿ ké kà mú hwɛ̀ɛ. Ké wa dyé ma ɖé ḿ. Ḿ kè nyɔ pàɖǎ ɖò se ma ɖé nì, ké kuɖu-kuɖu ɖò se ma ɖé nì fɔɔ. Kɛɛ Júù-nyɔ̀ ɓě sɔ̀ìn ɖé Ésìà-ɓòɖòɔ̀ kɔ̃ kɛɛ nì ma ɖé.

¹⁹ Wa dyiɔ́ má ɖɛ kɔ̃̀ jè wa kéɔ́ má ḿ kpɔ̃ɛɛ ɖò ɓéɖéín, nìí, wa mɔ̀ nyɔ ɓéɖé ɓɛ́ wa kéɔ́ nɔ̄ m̀ dyúa dyi, ɓɛ́ wa kéɔ́ ɔ jè m̀ gbo cɛ̃.

²⁰ Ɔ se ná nìǐn, nìí, nyɔ ɓěɛ̀ mɔ̀ùn mɛ cɛ̃ ɖɛ gbà ɓɛ́ wa dyé ma ḿ mú, ti ɓɛ́ wa dyà ma ḿ tɔ̀ɔ̀-ɓìɔ̀ ɓěɔ̀ dyúa kɛ.

²¹ Ɖɛ dyúáɖò ɓɛ́ ḿ nyu ma kɛɛ, ɔ mɔ̀ cɛ̃ɛ ḿ cɛ̃ɛ ma kà, ɓɛ́ ḿ dyi níiń, ‘Ɖɛ jɛ́ɛ́ kɔ̃̀ jè ɓě nìà zɛ̃̌ɛ̀ ní zaa wɔ̃ poɛń nyɛɛ, ɔ ɓá nyɔǔn gĩɔ wóɖó jè dyíɛ.’ ”

²² Ɓó tia ɓaɖaa, Fíɖè mɔ̀ùn wɔ̃́ ma fɛ̀ɛ̀ ɖìè nìà kɛ jè múin ɖɛ wè. Ɔ cɛ̃̀ìn ma wa wé, ké ɔ ɖá, “Sójà-ɓǎ mɔ̀à Ɖísìà kɛɛ mu dyiìn, hwɛ̀ ɓɛ́ ḿ ké ɓěɛ̀ zaaɔ̀ wɔ̃ po.”

²³ Ké ɔ cɛ̃ɛ ma nyɔ kɔ̃̀ sójà hɔ̃dɛ̀ɖɛ̀ ɖò wuɖuíɛɛ gbo, ɓɛ́ ɔ ké Pɔ́ɔ̀ dyí gmɔ̀ ɖé kpɔɖɔ ɖeín, ɔ kè ɓɛ́ ɔ ké ɔ píé síìn ɖɛ wè. Ké ɔ cɛ̃ɛ ma ɔ gbo, ɓɛ́ ɔ ní kɔ̃̀ ɖà Pɔ́ɔ̀ mǔè ɓě ɓɛ́ wa mu ɔ gbo kpáuń dyiìn nyɛɛ ɓɔ́í po.

Wa dyà Pɔ́ɔ̀ ɓó Fíɖè kè Dùɖùsíɖà dyúa

²⁴ Ti wé gbɛ̀ǐ-gbɛ̀ǐ ɖǎ ma ziɛɛ, Fíɖè kè ɔ gmàà Dùɖùsíɖà ɓɛ́ ɔ mɔ̀ ma Júù-màà kɛɛ mu, ké wa cuò ma Pɔ́ɔ̀ jè. Ké Pɔ́ɔ̀ cɛ̃ ma Kɛ́ɖɛ́ì Jízɛ̀ hwìɖǐǐ taɓa jè wa gbo, ké wa tò ma ɔ gbo ɖùǔ.

²⁵ Ké Pɔ́ɔ̀ nì ma dyí sɛ́ɖɛ́ìn jè kè hwòɖǒ-dyùà dyí kpɔ̃ jè ɔ kè zaa-wɔ̃-po-po mu ɖé dyúa nììn nyɛɛ jè kɔ̃in zaǐn. Ti Fíɖè wɔ̃́ ma ɖɛ ɓěa kɛɛ, ɔ fɛ̃̀ìn ma mìɔ, ké ɔ ɖá, “M̀ mɛ sɔ̀ dà dyí ke. Ɔ jǔ ké ḿ dyi ti dyéín, ní mu m̀ ɖáùn ɖe.”

²⁶ Ɓó tia ɓaɖaa, ɔ hwòɖǒ mɔ́ ɓɛ́ Pɔ́ɔ̀ ké ma ɔ wíɖí ɖò nyí. Ɔ jèɛɛ, ɔ cuò ma ɔ jè kpɛ́-kpɛ́, ɓɛ́ ɔ kèɔ̀ kè ké ma wùɖù.

²⁷ Ti zɔ̃ sɔ̃́ ɖǎ ma ziɛɛ, Pósìà Fɛ́sàɖà ɖú ma Fíɖè kũ̀àɔ̀ dyí. Fíɖè mɔ́ ɓɛ́ ɔ ké ma Júù-nyɔ̀ ɓěɔ̀ hwòɖǒ dyi dè. Ɔ jèɛɛ, ɔ nyuɛ ké Pɔ́ɔ̀ sè ma ɖé kpɔɖɔɔ̀ ɖeín.