Àpɔ́sò 20 - Ɓǎsɔ́ɔ̀ Báɓòɔ̀

Pɔ́ɔ̀ mu ɖé Màsèdónìà-ɓòɖòɔ̀ kè Gíɖíì-ɓòɖòɔ̀ kɔ̃

¹ Ti zàǔn-zàǔnɔ̀ ɖǎ ma dyi ziɛɛ, Pɔ́ɔ̀ ɖá ma ɖeín-nà-nyɔ̀ ɓěɔ̀, ké ɔ po ma wa kpéí. Ké ɔ po ma wa hwuɖu ɖǎ hwɔ, ké ɔ sɔ̀ ma dyí, ɓɛ́ ɔ ké ma ɖé Màsèdónìà-ɓòɖòɔ̀ kɔ̃ mu.

² Ké ɔ zĩ̀ìn ma Màsèdónìà-ɓòɖòɔ̀ wáká ɓěɔ̀ kɔ̃, ké ɔ po ma cɔ́cì-nyɔ̀ ɓěɔ̀ kpéí mìɔ. Hwɛ̀ ké ɔ mu ma ɖé Gíɖíì-ɓòɖòɔ̀ kɔ̃.

³ Ɔ nyu ma ɖé dɛ̀nɛ̀ tã. Ɓó tia ɓaɖaa, ɔ mɔ́ ɓɛ́ ɔ ké ma dyóóɔ̀ kɔ̃ mùìn, ɓɛ́ ɔ ké ma ɖé Síwíɖíà-ɓòɖòɔ̀ kɔ̃ mu, kɛɛ Júù-nyɔ̀ ɓěɔ̀ sɔ́ ma ɔ ní. Ɔ jèɛɛ, ɔ poɛ ma gbɔ, ɓɛ́ ɔ ké ma Màsèdónìà-ɓòɖòɔ̀ kɔ̃ mùìn.

⁴ Nyɔ ɓě ɓɛ́ ɔ kè wa mu ma kɛɛ, wa nyɛ́nɛ́ ɓěɔ̀ kɛà kɛ̀: Sópàtà ɓɛ́ ɔ mɔ̀ ma Píwàɖàà dyú-gàà, ɓɛ́ ɔ sɔ̀ ɖé Bèwíɖíà-hwɔ̀ɖɔ̀ɔ̀ múɛ kè Àwèɖèsákà kè Sìkánà ɓɛ́ wa mɔ̀ ma Tɛ̀sàɖònákà-nyɔ̀ ɓěɛ kè Gédyà ɓɛ́ ɔ mɔ̀ ma Dɔ́ɓè-nyɔ̀ kɛ kè Tímétè ɔ kè Tíkíkà kè Tɔ́ɖɔ́fímà ɓɛ́ wa mɔ̀ ma Ésìà-nyɔ̀ ɓěɛ.

⁵ Nyɔ ɓě nìà kɛ mu ma dyúa, ké wa nì ma à fòèɛ̌n ɖé Tóɖóà-hwɔ̀ɖɔ̀ɔ̀ mú.

⁶ Ti Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ ɖǎ ma dyi ziɛɛ, à sɔ̀ ma ɖé Féɖópà-hwɔ̀ɖɔ̀ɔ̀ múín, ké à mùìn ma ɖé dyóóɔ̀ kɔ̃. À nyu ma wé hm̀m̌ níɔ̀ kɔ̃, ké à nyini ma ɖé wa gbo ɖé Tóɖóà-hwɔ̀ɖɔ̀ɔ̀ mú. Ké à nyu ma ɖé wé mɛ̀nɛ̌ìn-sɔ̃́.

Pɔ́ɔ̀ɛ̀ Tóɖóà-hwɔ̀ɖɔ̀ɔ̀ múin-té-té hwɛ̀ìn-gbɔ

⁷ Ɓó wíkìɔ̀ wé kĩ́ín-kĩ́ínɔ̀ xwíníín nyɛɛ, ti à poìn ma dyí, ɓɛ́ à ké Gèɖèpɔ́ɔ̀-bɛ̀ɖɛ̀ɛ̀ɔ̀ ɖiɛɛ, Pɔ́ɔ̀ wùɖù ma cɔ́cì-nyɔ̀ ɓěɔ̀ gbo. Ɔ mɔ́ ɓɛ́ ɔ ké ma hwɔɖɔɔ̀ mú dyí sɔ̀ ɓó wéɔ̀ nyɔ kɔ ma ɓó dyíɛɛ xwíníín. Ɔ jèɛɛ, ɔ gã̀ ma wùɖùɛ̌n dyi tee, ké ɔ nyu ma máaún hwuɖu hwìɛ̀ǐn.

⁸ À poìn ma dyí ɖé ɓí-dyù ɖò nì ma ɖé gbǒɔ̀ dyaa mú, ké ce ɓáún-ɓáún nì ma ɖé.

⁹ Ké gàa-dyù hwà ɖò kɔ̃̀ nyɛ́nɛ́ mɔ̀ ma Dyútíkà kɛɛ kò ma ɓó gbǒɔ̀ wúɖɛ̀-wɔ̃̀ ɓěɔ̀ ɖò gbo dyi. Ti Pɔ́ɔ̀ nì ma wùɖùɛ̌n keɛɛ, nyíɔ dyíɖí ma gàa-dyùɔ̀, ké ɔ ɖú ma dyí ɖeè kpàǐ, ké ɔ keè ma ɖé gbǒɔ̀ deìn kɔ̃in tã nììnɔ̀ wúɖɛ̀-wɔ̃̀ɔ̀ gbo, ké ɔ kpá dyi. Ké wa ɖú ma ɔ xwɛ́ɔ̀ dyí.

¹⁰ Ké Pɔ́ɔ̀ sí ma ɓíɖíi, ké ɔ ɓùɖùìn ma xwɛ́ɔ̀ kɔ̃, ké ɔ gbèɖèɛ̀n ma, ké ɔ ɖá, “Ɓě ɓɔ́ kuɖu-kuɖu nyuɛ, sepóɛɖé ɔ fɛ̀ɛ̀ɔ̀ nì ɔ mú ke.”

¹¹ Ké Pɔ́ɔ̀ mu ma ɖé gbǒɔ̀ dya ɖe, ké ɔ kè wa ɖi ma Gèɖèpɔ́ɔ̀-bɛ̀ɖɛ̀ɛ̀ɔ̀. Ké ɔ kè wa wùɖù ma goun, hwɛ̀ ké zɔ̃ zɔ̃ ma. Ké ɔ sɔ̀ ma dyí, ké ɔ mu.

¹² Wa hwòɖǒ dè ma dyi mìɔ, sepóɛɖé dyúɔ̀ nì ma cĩ́ɛń jè, ké wa kpa ma ɔ.

Wa sɔ̀ Tóɖóà-hwɔ̀ɖɔ̀ɔ̀ mú ké wa mu ɖé Màɖítà-hwɔ̀ɖɔ̀ɔ̀ mú

¹³ Ti ɓɛ́ Pɔ́ɔ̀ ɖǎ ma Tóɖóà-hwɔ̀ɖɔ̀ɔ̀ mú sɔ̀ɛɛ, à mɔ̀ùn mu ma dyúa, ké à kpá ma méè ɖò mú, ɓɛ́ à ké ɖé Ásà-hwɔ̀ɖɔ̀ɔ̀ mú mu, dɛ̀ ɓɛ́ à ɓéɖé ɓɛ́ à kéà Pɔ́ɔ̀ mɔ̀ùn dyí ɖúɛ. Ɔ cɛ̃ɛ ma náa à gbo kĩ́ín, sepóɛɖé ɔ mɔ́ ɓɛ́ ɔ ké ma ɖé ɓo kpa.

¹⁴ Ké ti ɓɛ́ à kèɔ̀ kè dyéìn ma ɖé Ásà-hwɔ̀ɖɔ̀ɔ̀ múɛɛ, à ɖú ma ɖé ɔ dyí, ké à kèɔ̀ kè mu ma ɖé Mìtìɖínì-hwɔ̀ɖɔ̀ɔ̀ mú.

¹⁵ Wéɔ̀ nyɔ kɔ ma ɓó dyíɛɛ, à sɔ̀ ma ɓó dyí, ké à wóɖóìn ma Kádyà-tòò-kpòɔ̀ dyí. Ké à nyini ma Sémà-tòò-kpòɔ̀ kɔ̃ ɓó wéɔ̀ nyɔ kɔ ma ɓó dyíɛɛ xwíníín. Ké zɔ̃ɔ̀ nyɔ zɔ̃ ma ɓó ɖeɛɛ, à nyini ma ɖé Màɖítà-hwɔ̀ɖɔ̀ɔ̀ mú.

¹⁶ Pɔ́ɔ̀ poɛ ma gbɔ, ɓɛ́ ɔ ké ma Ɛ́fɛ́sà-hwɔ̀ɖɔ̀ɔ̀ ɓàɖàìn, sepóɛɖé ɔ se mɔ́ ɓɛ́ ɔ ké ma ɖé Ésìà-ɓòɖòɔ̀ kɔ̃ hwèɖèìn jè. Ɔ nì ma fṹàǔn, ɔ jǔ ké ɔ dyiɛ ma nyuɛ ɓɛ́ìn ní, ɔ ké ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nì ɓó Pɛ́nɛ́kɔ̀-wèɔ̀ xwíníín.

Pɔ́ɔ̀ po cɔ́cì-nyɔ̀ vɛ̀nɛ̀ ɓě sɔ̀ ɖé Ɛ́fɛ́sà-hwɔ̀ɖɔ̀ɔ̀ mú kɛɛ hwuɖu ɖǎ hwɔ

¹⁷ Ti Pɔ́ɔ̀ nì ma ɖé Màɖítà-hwɔ̀ɖɔ̀ɔ̀ múɛɛ, ɔ cuò ma nyɔ, ɓɛ́ wa ké ɔ bìì cɔ́cì-nyɔ̀ vɛ̀nɛ̀ ɓě ɓɛ́ wa nì ma ɖé Ɛ́fɛ́sà-hwɔ̀ɖɔ̀ɔ̀ múɛɛ ɖá.

¹⁸ Ké ti wa dyi ma ɔ gboɛɛ, ɔ cɛ̃ɛ ma wa gbo, ké ɔ ɖá, “Ɓě dyuò kà ní kpeɖe nyu ma nìɛ̀, ti ɓɛ́ ḿ nyini ma ɖé Ésìà-ɓòɖòɔ̀ kɔ̃ nyɛ̀nɛ̀ɛ̀ cáa, ɔ kè ti jĩ̀ kà ɓɛ́ ḿ nyu ma ɖé ɓě gboɛ.

¹⁹ Ḿ nì ma Bounɓoɔ̀ bìì kũ̀à nyuɛń, ké ḿ dyà ma ḿ mìɔùn ɓíɖíi ɖé wìì-ɖɛ̀ ɓě kè mú-dɔ̃̌-dɔ̃̌ ɓě ɓɛ́ ḿ dyé ma dyíɛɛ mú. Ɖɛ ɓěa kpá ma ḿ gbo, sepóɛɖé kà Júù-nyɔ̀ ɓěɔ̀ nyuɛ ma dyí sɔ́ɔ.

²⁰ Ɓě dyuò kà ḿ se ma wuɖu ɓě ké ɓě gbo kpáa ɓě dyí gàìn nyɛ. Ḿ cɛ̃ ma ɓě bɔ̃̌ nɔ̀mɔ̀ dyíinɔ̀ gbo, ké ḿ tɛ̀mɛ̀ìn ma ɓě ɖɛ ɖé nyɔǔn séín dyúa, ɔ kè ɖé ɓě ɓíɖí-taà ɓěɔ̀ mú ɖekè.

²¹ Ḿ nìɛ̀ ma Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓěɔ̀ gbo cɛ̃iń kà ɓɛ́ wa ɓéɖé ɓɛ́ wa ké waà kpeɖe gbà ɓěɔ̀ dyi táà ɓó Gèɖèpɔ́ɔ̀ gbo, ké wa ɓéɖé wa ké à Bounɓo Jízɛ̀ɔ̀ hwìɖǐǐ taɓaa.

²² Ké kàǔn wɛ̃ɛ, ɓě dyéɛ kà Zùùɔ̀ nɛ́ ḿ kɔ̃, ké ḿ nìǎ hwìè kɔ̃, ɓɛ́ ḿ ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛ. Ké ḿ se ɖɛ mu ɖé ḿ gbo kpáùn wɛ̃ɛ dyí dyuò,

²³ ɔ sèìn ɖɛ ɓɛ́ Zùù Hwɛ̀ǐn-hwɛ̀ǐnɔ̀ cɛ̃à ḿ gbo ɖé hwɔɖɔ ɖò-ɖò séín múɛ. Ɔ ɖá, wa nì ḿ fòèɛ̌n, ɓɛ́ wa ké ḿ kpɔɖɔ ɖeín po, ɔ kè ɓɛ́ wa ké ḿ gǎ dyéìn.

²⁴ Kɛɛ ḿ se ní fɛ̀ɛ̀ɔ̀ jè kàmà, ké ḿ seɛ ɖɛ ɖá. Hwìè ɓɛ́ Gèɖèpɔ́ɔ̀ mɔ́ ɓɛ́ ḿ kéà kpaa, ḿ mɔ́ ɓɛ́ ḿ kéɛ dúí jaɖa wɛ̃́ɛ́ pū. Ḿ mɔ́ ɓɛ́ ḿ ké kũ̀à ɓɛ́ Bounɓo Jízɛ̀ nyíà ḿ wɛ̃ɛ nyuɛ hwɔ. Kũ̀à ɓɛ́ ɔ nyíà ḿ wɛ̃ɛ mɔ̀ ɓɛ́ ḿ ké bɔ̃̌ nɔ̀mɔ̀ dyíinɔ̀ cɛ̃. Bɔ̃̌ nɔ̀mɔ̀ dyíinɔ̀ ɓá kpeɖe nɔ̀mɔ̀ dyíin ɓɛ́ Gèɖèpɔ́ɔ̀ nyu ma nyɔ bììɛɛ jè dyí.

²⁵ “Ḿ ɖǎ ma ɖé ɓě hwìɛ̀ mu, ké ḿ ɖǎ ma ɖé Gèɖèpɔ́ɔ̀ kã́á-ɓòɖòɔ̀ jè zio mú pòìn. Kɛɛ kàǔn wɛ̃ɛ, ḿ dyuò kà ɓɛ́ ɓě ɖò se ḿ dyéɖé kɔ̃ poɛ́ mu ɖe fɔɔ kɛ.

²⁶ Ɔ jèɛɛ, ḿ nìɛ̀ ɓě gbo cɛ̃iń kà ɓɛ́ ɖɛ mu nyɔ ɖò gbo kpáùn wɛ̃ɛ se ní kpé jǔɛ muɛ.

²⁷ Sepóɛɖé ḿ se ma ɓě wuɖu ɖò dyí gàìn. Ḿ cɛ̃ ma ɖɛ séín ɓě ɓɛ́ Gèɖèpɔ́ɔ̀ ɖǎ ma dyí sɔ́ɛɛ ɓě gbo.

²⁸ Ɓě mɛ màìn ɓě mìɔùn mú, ké ɓě mɛ màìn ɓáɖáá kúɖúú ɓě mɔ̀à Gèɖèpɔ́ɔ̀ nyɔ ɓě ɓɛ́ Zùù Hwɛ̀ǐn-hwɛ̀ǐnɔ̀ ɖǎà nyu ké ɓě mɔ̀à waà kɔ̃in-gmɔìn-nyɔ̀ kɛɛ mú. Ɔ nyuɛ ma náa, ɓɛ́ ɓě ké Bounɓoɔ̀ nììn nyɔ ɓě ɓɛ́ ɔ dyéìn ma ɖé ɔ mìɔùn nììn nyɔmɔɔ̀ múɛɛ dyí gmɔ̀.

²⁹ Ḿ dyuò kà ɔ jǔ ké ḿ dyi ɓě hwìɛ̀ sɔ̀ ní, nìí, ji kɔ̃̀ dyoɖo ɓě mu ɓě hwìɛ̀ dyiìn, ké wa se ɓáɖáá ɓěɔ̀ wìǐn dyéɛ mu kɛ.

³⁰ Ké nyɔ ɖíɛ́ ɓě mu ɖé ɓě mìɔùn hwìɛ̀ sɔ̀ùn ɖekè, ké wa mu jǎàɔ̀ dyí zàìn, ɓɛ́ wa kéɛ nyu ɓɛ́ ɖeín-nà-nyɔ̀ ɓěɔ̀ ké wa kíɖíí sí.

³¹ Ɔ jèɛɛ, ɓě mɛ nì ɓɛ́ɖɛ́ kɔ̃. Ké ɔ mɛ nì ɓě hwìɖǐi kà ḿ vĩ̌ ma, ké ḿ po ma ɓě séín náún tee ɓó zɔ̃ tã xwíníín, ɓó gànà-kṹún kè ɔ ɖíí hwìo kɛ.

³² “Ɓó kàǔn wɛ̃ɛ, ḿ zàìn ɓě Gèɖèpɔ́ɔ̀ kè bɔ̃̌ nɔ̀mɔ̀ dyíin ɓɛ́ ɔ ɓá ɔ kpeɖe nɔ̀mɔ̀ dyíin ɓě ɓɛ́ ɔ nyu nyɔ bììɛ dyíɛɛ xwáɖáún. Bɔ̃̌ nɔ̀mɔ̀ dyíinɔ̀ ɓéɖé kpé ɓɛ́ ɔ ké ɓě dyi kùìn, ɔ kè ɓɛ́ ɔ ké ɓě kɔ̃̀ɔ̀-ɖɛ̀ ɖò nyí ɓó nyɔ séín ɓě ɓɛ́ wa ɖǎ wa mìɔùn Gèɖèpɔ́ɔ̀ xwáɖáún zàìn nyɛɛ hwìɛ̀.

³³ Nyɔ ɖòɛ̀ wíɖí kè ɔ ɖɔ jè ní po ma ḿ hwɛ̀nɛ̌ǐn.

³⁴ Ɓě mìɔùn dyuòɛ̀ kà ní sɔ̃ ɓě nìà kɛ wa nyuɛ, ké ḿ dyé ma ɖɛ ɓě ɓɛ́ ḿ kè nyɔ ɓě nì ma ɓó ḿ gboɛɛ mɔ́ ma kɛ.

³⁵ Ḿ ɖǎa ɓě dyí tɛ̀mɛ̀ìn ɖé ɖɛ séín mú kà ɓɛ́ ɓěà ɓéɖé ɓɛ́ ɓěà ké kpéɛ̀-dyí-hwɛ̀-nyɔ̀ ɓěɔ̀ gbo kpá ɖé kũ̀à-nyu-nyu nì kà kɛɛ múɛ. Ɖɛ Bounɓo Jízɛ̀ cɛ̃ ma kɛɛ mɛ nì ɓě hwìɖǐi. Ɔ cɛ̃ɛ ma, ké ɔ ɖá, ‘Nyɔ-ɖɛ-nyí-nyí dyà múà, ké ɔ zi ɖɛ-dyé-dyé dyí.’ ”

³⁶ Ti Pɔ́ɔ̀ ɖǎ ma ɖɛ ɓěa cɛ̃ɛ hwɔɛɛ, ɔ kè nyɔ séín ɓěɔ̀ taɓa ma kɔ́-dù hwuɖu, ké ɔ ɓaà ma.

³⁷ Ké wa séín vĩ̌ ma mìɔ, ké wa gbèɖèìn ma ɔ, ké wa nyá ma ɔ wɔ̃.

³⁸ Ɖɛ nyùìn ma wa wìì mìɔ kɛɛ, ɔ mɔ̀ wuɖu ɔ cɛ̃ ma kà, ɓɛ́ ɔ dyi níiń, wa se ma kà ɔ dyéɖé kɔ̃ poɛ́ mu ɖe fɔɔ kɛ. Ké wa kpa ma ɔ hwìǐ, ɓɛ́ ɔ ké méè mú kpá.