Àpɔ́sò 2 - Ɓǎsɔ́ɔ̀ Báɓòɔ̀

Zùù Hwɛ̀ǐn-hwɛ̀ǐnɔ̀ dyi jè

¹ Ti Pɛ́nɛ́kɔ̀-wèɔ̀ ɖǎ ma dyiɛɛ, Jízɛ̀ɛ̀ ɖeín-nà-nyɔ̀ séín ɓěɔ̀ poìn ma dà dyúáɖò dyí.

² Wàɖà cá kɛɛ, kuɖu-kuɖu ɖò sɔ̀ìn ma ɖé dyɔún. Ɔ nì ma kà dìì dyià kɛ, ké ɔ dyíìn ma gbǒ kɔ̃̀ mú wa kò ma kà dyiɛ.

³ Ké ɖɛ ɓě ɓɛ́ wa hwɔìn nyɛ-mìɔ̀ kɛɛ wóɖóìn ma wa dyí, ké wa zaìn ma gboi, ké wa kòìn ma wa kɔ̃in ɖò-ɖò.

⁴ Zùù Hwɛ̀ǐn-hwɛ̀ǐnɔ̀ dyíìn ma wa séín múin, ké ɔ nyí ma wa kpé ɓɛ́ wa ké wùɖù, ké wa ɖú ma wuɖu kà kò ɖò ɓě mú wùɖùìn kpàǐ.

⁵ Ɓó tia ɓaɖaa, Júù-nyɔ̀ ɓě ɓɛ́ wa mɔ̀ Gèɖèpɔ́ɔ̀ ɓiè-nyɔ̀ɛɛ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Wa sɔ̀ìn ɓóɖó-dù kò-kò ɓě nì ɓóɖó-kpàà gboiɛɛ kɔ̃ dyi.

⁶ Nyɔ kúɖúú ɓěɛ̀ poìn ma dyí ti wa ɖǎ ma kuɖu-kuɖuɔ̀ wɔ̃́ɛ. Ké wa giniìn ma dyi mìɔ, sepóɛɖé wa séín wɔ̃́ ma wa mìɔùn nììn ɓíɖí-wùɖù ɖeín-nà-nyɔ̀ ɓěɔ̀ wĩín.

⁷ Ké wa giniìn ma dyi, ké hwòɖǒ kpèìn ma wa kɔ̃in, ké wa ɖá, “Má, nyɔ séín ɓě nìà wùɖùɛ̌n nyɛɛ mɔ̀ Gáɖàɖíì-nyɔ̀ ɓěe?

⁸ Wuɖu ɓɛ́ à wóɖóìn ma múɛɛ, ɖɛ́ kɔ̃̀ jè à nìɛ̀ wa wĩín wɔ̃́uń wɛ̃́?

⁹ À ɖíɛ́ ɓě mɔ̀ Pátĩ̀à-nyɔ̀ kè Míì-nyɔ̀ kè Éɖàùn-nyɔ̀, ké à ɖíɛ́ ɓě sɔ̀ ɖé Mɛ̀sɔ̀pɔ̀témìà-ɓòɖòɔ̀ kè Júɖìà-ɓòɖòɔ̀ kè Kàpàdósìà-ɓòɖòɔ̀ kè Pɔ̃́tɔ̀-ɓòɖòɔ̀ kè Ésìà-ɓòɖòɔ̀

¹⁰ kè Fíɖíjìà-ɓòɖòɔ̀ kè Pã̀fíɖídyà-ɓòɖòɔ̀ ɔ kè Íjè-ɓòɖòɔ̀ kɔ̃. Ké à ɖíɛ́ ɓě sɔ̀ ɖé Ɖéɓìà-ɓòɖòɔ̀ wáká ɓɛ́ ɔ xwɛ̃́ìn Sàwíɖíìn-hwɔ̀ɖɔ̀ɔ̀ múin nyɛɛ kɔ̃, ké à ɖíɛ́ ɓě mɔ̀ ɖéè sɔ̀ìn Wóɖóùn-hwɔ̀ɖɔ̀ɔ̀ mú kɛ. À mɔ̀ Júù-nyɔ̀ ɓě kè nyɔ ɓě ɓɛ́ à ɖú Júù-nyɔ̀ ɓěɔ̀ Gèɖèpɔ́ɔ̀ ɓiè-ɓiè dyíɛ.

¹¹ Ké à ɖíɛ́ ɓě mɔ̀ Kíɖíì-nyɔ̀ ɔ kè Àwéɖéɓìà-nyɔ̀. Ké ɖɛ kpa ɖɛ ɓě ɓɛ́ Gèɖèpɔ́ɔ̀ ɖǎ nyu kɛɛ, wa nìɛ̀ cɛ̃iń ɖé à ɓíɖí-wùɖù mú, ké à nìɛ̀ múin wɔ̃́uń.”

¹² Ɔ kpèìn ma wa hwìɖǐi, ké wa séín giniìn ma dyi. Ké wa cɛ̃ìn cɛ̃̀ìn ma gbo, ké wa ɖá, “Ɖɛ́ mɔ̀ ɖɛa xwíníín nyɛ́?”

¹³ Kɛɛ nyɔ ɖíɛ́ ɓě nì ma wa dyɔ́ ɓaɖauń, ké wa ɖá, “Wa sɔ̀ wã́ìn ɖìè náuń.”

Píɖɛ̀ wùɖù nyɔ ɓěɔ̀ gbo

¹⁴ Ké Píɖɛ̀ kè àpɔ́sò ɓaɖa-bùè sè dyúáɖò ɓěɔ̀ nyànà ma dyi. Ké Píɖɛ̀ kpa ma wuɖu dyií, ké ɔ wùɖù ma nyɔ ɓěɔ̀ gbo, ké ɔ ɖá, “Ḿ mǔè Júù-nyɔ̀ ɓě kè nyɔ séín ɓě cĩ́ dà Jùɖúsɛ̀ɖɛ̀ìn-hwɔ̀ɖɔ̀ɛ̀ múɛɛ, ɖɛ ɖǎà kpáa, ɓě mɛ dyuòɛ̀, ɓɛ́ ɓě ké ní wuɖuɔ̀ ɖùǔ gbo tò.

¹⁵ À se ná kà ɓěɛ̀ hwòɖǒ ɖá à náà kɛ, sepóɛɖé jǎ-dyòɖò-pì séè ɖé hwɛ̀ ke.

¹⁶ Kɛɛ ɖɛ kpáà kɛɛ mɔ̀ ɖɛ ɓɛ́ Jóɛ̀ mɔ̀ kpáá-ɖɛ̀-cɛ̃-nyɔ̀ɔ̀ cɛ̃ zɔ̃̌ɔ̀ kɛ. Ɔ ɖá,

¹⁷ ‘Gèɖèpɔ́ɔ̀ ɖá, “Ɖé wé hwɛ̀ìn-gbɔɔ̀ múɛɛ, ní mu ní Zùùɔ̀ nyɔ séín kɔ̃ púèìn. Ké ɓěɛ̀ dyú-gàà kè ɓěɛ̀ dyú-màà ɓěɔ̀ mu wuɖu ɓě ḿ dèìn wa wĩín nyɛɛ cɛ̃ìn. Ké ɓěɛ̀ gàa-dyù gmɔ̀ ɓěɔ̀ mu dyí-tɛ̀mɛ̀ìn-ɖɛ̀ ɓě dyéìn, ké ɓěɛ̀ gàa sùà ɓěɔ̀ mu dya-dya ɓě ɓéɖéìn.

¹⁸ Ní mu ní Zùùɔ̀ gǐì-gàà kè gǐì-màà ɓě kɔ̃ púèìn ɖekè ɓó wé ɓěa ɓaɖa, ké wa mu kpáá-ɖɛ̀ ɓě cɛ̃ìn.

¹⁹ Ní mu dĩ́ín-dĩ̀ìn-ɖɛ̀ ɓě ɖé dyɔɔ̀ dyí kè ɓóɖó-kpàɔ̀ kɔ̃ nyuùn. Dĩ́ín-dĩ̀ìn-ɖɛ̀ ɓěɔ̀ mu nyɔmɔɔ kè nyɛ ɔ kè nyànà-sò-kpò jǔùn.

²⁰ Dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ mu nyɔmɔɔ mú zɛ̃̀ìn, hwɛ̀ ɓɛ́ Bounɓoɔ̀ wé vɛ̀nɛ̀ ku wɔ̃ɔ̀ ké ɓó nyini.

²¹ Ké nyɔ séín mu mɔ̄ Bounɓoɔ̀ nyɛ́nɛ́ɔ̀ ɖáùn wɛ̃ɛ, wa mu póùn.” ’

²² “Ḿ mǔè Éézùɖùɛ̀-nyɔ̀ ɓě, ɓě tò ḿ gbo ɖùǔ. Ḿ nì Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ mú kɛɛ jè ɓě gbo cɛ̃iń. Ɔ mɔ̀ gàa kɔ̃̀ zàse Gèɖèpɔ́ɔ̀ nyu ma ɖé ɓě gboɛ. Zɛ̃̀ìn-ɖɛ̀ ɓěɔ̀ kè ɖɛ dĩ́ín-dĩ̀ìn ɓěɔ̀ ɔ kè ɖàɓàìn-ɖɛ̀ ɓě ɓɛ́ Gèɖèpɔ́ɔ̀ nyùìn ma ɔ mú ɖé ɓě hwìɛ̀ kɛɛ, wa mɔ̀ zàseɔ̀. Ɓě dyuò ɖɛ ɓěɔ̀ dyí jɛ́ɛ́.

²³ Kà Gèɖèpɔ́ɔ̀ nyuɛ ma dyí sɔ́ɔ see, ké ɔ dyuòɛ̀ dyí kĩ́ín nyɛɛ, wa ɖǎ Jízɛ̀ xwáɖáún zà ɖé ɔ mú-nyɛ́-nyɔ̀ ɓěɔ̀ gbo. Jízɛ̀ nìà kɛɛ, ɓě ɖáɓá ma ɔ dyììn ɖé ɔ kɔ́ɖɔ́sìɔ̀ kɔ̃in kɔ̀ìn-kɔ̀ìn mú, ɓó nyɔ ɓě seà Gèɖèpɔ́ɔ̀ gmaɔ̀ dyí dyuò wɛɛ xwaún.

²⁴ Kɛɛ Gèɖèpɔ́ɔ̀ buɛ̀ ma ɖúú ɓɛ́ gĩɔ sã̀ìn ma ɔ dyiɛɛ ní, ké ɔ zà ma ɔ gĩɔ, sepóɛɖé ɔ se ná nìɛ̀ ɓɛ́ìn, ɓɛ́ gĩɔ ké Jízɛ̀ dyi kpɔ̃.

²⁵ Sepóɛɖé ɖɛ Dèɓé cɛ̃ zɔ̃̌ɔ̀ ɓá Jízɛ̀ dyíɛɛ, ɔ kɛ̀. Ɔ ɖá, ‘Ɔ nì ḿ hwìɖǐi kánáá pū kà Bounɓoɔ̀ nì ɓó ḿ gboɛ. Ɔ xwɛ̃́ìn ḿ bũ̌in jèɛɛ, ɖɛ ɖò se ḿ daí zàìn ɓɛ́ìn.

²⁶ Ɔ jèɛɛ, ní hwòɖǒ dè dyi, ké ḿ kpá múàǔn. Ḿ dèɛ̀ hwòɖǒ kɔ̃ tee kà ní mu gĩɔ wóɖóùn wɛ̃.

²⁷ Bounɓo, m̀ gmɔ̀ ḿ dyí sɔ̀ìn ɖé gĩɔ kpéɔ̀ xwaún. Nyɔ ɓɛ́ ɔ taɓaà m̀ hwìɖǐǐ kóɖó-kóɖó kɛɛ, m̀ se ɔ dyi táǎ mu ɓɛ́ ɔ ké zɔ̃̌.

²⁸ M̀ ɖǎ ḿ hwìè mu ɖé fɛ̀ɛ̀ múɛɛ da zàìn. Nì muɛ nyuùn ɓɛ́ múà ké ḿ múin dyíìn ɓó m̀ dyúa.’

²⁹ “Ɖíí ɓě, ɔ nɔ̀mɔ̀ dyíin ɓɛ́ ḿ ké ɓě gbo wùɖù jɛ́ɛ́ ɓá à ɓóɖóɛ̀ nyɔ vɛ̀nɛ̀ Dèɓé jè dyí. Ɔ mɛ́ zɔ̃̌ɔ̀, ké wa zà ɔ dyóɖóún, ké ɔ xwɛ́-gmààɔ̀ nì dà ɓó à gbo ke.

³⁰ Dèɓé mɔ̀ ma kpáá-ɖɛ̀-cɛ̃-nyɔ̀, ké ɔ dyuòɛ̀ kà Gèɖèpɔ́ɔ̀ ɖǎ ma ɔ wuɖuɔ̀ dyí gboò kà ɓɛ́ ɔ xwíníín-dyù ɓěɔ̀ ɖò mu ma ɔ dúí sèìn, ɓɛ́ ɔ ké ɔ zèèɔ̀ kɔ̃ kò kɛ.

³¹ Ɔ jèɛɛ, ɔ dyéɛ ma ɖé dyúa, ké ɔ cɛ̃ɛ kà ɓɛ́ Gèɖèpɔ́ɔ̀ se ma wɔ̃́ ɓɛ́ ɔ ké gĩɔ mú sè, mɔɔ ɓɛ́ ɔ kpóɖó-dyùàɔ̀ ké zɔ̃̌ kɛ. Ti ɔ nì ma ɖɛ ɓěa cɛ̃iń nyɛɛ, ɔ cɛ̃ɛ kà Kɛ́ɖɛ́ì mu ma gĩɔ wóɖóùn wɛ̃.

³² Jízɛ̀ kɔ̃̀ jè ɓɛ́ à nìà cɛ̃iń nyɛɛ, Gèɖèpɔ́ɔ̀ zà ma ɔ gĩɔ, ké à séín nyuɛ zàse.

³³ Ké Gèɖèpɔ́ɔ̀ ɖú ma Jízɛ̀ dyií, ɓɛ́ ɔ ké ma ɔ ɖiaún nì. Ké Zùù Hwɛ̀ǐn-hwɛ̀ǐn ɓɛ́ Gèɖèpɔ́ɔ̀ ɖǎ ma kà Jízɛ̀ nyɛ́nɛ́ín ɖáìn nyɛɛ, ɔ ɖǎ ɔ dyé sɔ̀ìn ɖé Ɓǎɔ̀ xwaún. Ɔ jèɛɛ, ɖɛ ɓě nìà dyéɛń, ké ɓě nìà wɔ̃́uń wɛ̃ɛ, ɔ sɔ̀ìn ɖé Jízɛ̀ mú.

³⁴ Ɓě dyéɛ kà Dèɓé se ma ɖé dyɔún muɛ, kɛɛ ɔ mìɔùn cɛ̃ɛ, ké ɔ ɖá, ‘Bounɓoɔ̀ cɛ̃ɛ ma ní Wuɖuí-kɔ̃̀-nyɔ̀ɔ̀ gbo, ké ɔ ɖá, “Dèɖě dà ḿ ɖiaún dya,

³⁵ ɓɛ́ ḿ ké nì mú-nyɛ́-nyɔ̀ ɓěɔ̀ nì ɓo-kɔ̃-síìn-ɖɛ̀ mú nyu hwɛ̀.” ’

³⁶ “Ɔ jèɛɛ, Éézùɖùɛ̀-nyɔ̀ séín ɓěɔ̀ mɛ dyuòɛ̀ dyí jǎà jɛ́ɛ́ kà Jízɛ̀ nìà kɛ ɓɛ́ ɓě ɖǎ ma kɔ́ɖɔ́sìɔ̀ kɔ̃in kɔ̀ìn nyɛɛ, Gèɖèpɔ́ɔ̀ ɖǎ ɔ Nyɔ-wuɖuí-kɔ̃̀-nyɔ̀ kè Kɛ́ɖɛ́ìɔ̀ mú nyuɛ.”

³⁷ Ti wa wɔ̃́ ma ɖɛa kɛɛ, púɛɛ, wa hwòɖǒɔ̀ giniìn ma dyi cá, ké wa diè Píɖɛ̀ kè àpɔ́sò tɔ̀ɔ̀ ɓěɔ̀ dyi, ké wa ɖá, “Ɖíí ɓě, ɖɛ́ à mɛ nyuɛ́?”

³⁸ Ké Píɖɛ̀ cɛ̃ɛ ma wa gbo, ké ɔ ɖá, “Ɓě táà ɓěɛ̀ nàmàǔn-kpèɖèɔ̀ dyi, ɓɛ́ ɓě séín ké níɔ kpá ɖé Jízɛ̀ Kɛ́ɖɛ́ìɛ̀ nyɛ́nɛ́ɔ̀ mú, ɓɛ́ Gèɖèpɔ́ɔ̀ ké ɓěɛ̀ nàmàǔn ɓěɔ̀ kɔ̃in zĩ̀ìn. Ké Gèɖèpɔ́ɔ̀ mu ɓě nyíí-ɖɛ̀ mɔ̀à Zùù Hwɛ̀ǐn-hwɛ̀ǐnɔ̀ kɛɛ nyíìn.

³⁹ Sepóɛɖé nyɛ́nɛ́ín-ɖáìn-ɖɛ̀ɔ̀, ɔ mɔ̀ nyɔ séín ɓɛ́ Bounɓo mɔ̀à à Gèɖèpɔ́ɔ̀ kɛɛ mu ɖáùn ɖé ɔ mìɔùn gboɛɛ bìì. Ɔ mɔ̀ ɓě kè ɓěɛ̀ dyú ɓěɔ̀ kè ɓěɛ̀ nyúà-dyú ɓěɔ̀ ɔ kè nyɔ séín ɓě nì dà vɛ̃in nyɛɛ bìì.”

⁴⁰ Ké ɔ cɛ̃ ma zàse-wùɖù ɓáún-ɓáún, ké ɔ ɓaà wa, ké ɔ ɖá, “Ɓě póìn ɓě mìɔùn, ɓɛ́ ɓě ké nyɔ se dyí sɛ́ɖɛ́ìn ɓě nìà kàǔn wɛ̃ɛ kɔ̃ín pòìn.”

⁴¹ Ɓó wéa ɓaɖaa, nyɔ ɓě ɓɛ́ wa kpɔ̃ ma Píɖɛ̀ɛ̀ wuɖuɔ̀ dyiɛɛ kpá ma níɔ, ké Gèɖèpɔ́ɔ̀ po ma wa nyɔ ɓě ɓɛ́ wa taɓa ma ɔ hwìɖǐǐɛɛ kɔ̃. Wa ɓɛ́ìn ma nyɔ-kpò táázĩ̀ìn tã jǔɛ.

⁴² Ké wa ku dúún, ké wa wɔ̃́ ma ɖɛ àpɔ́sò ɓěɔ̀ nì ma wa tɛ̀mɛ̀ǐn nyɛ, ké wa kpɔ̃ìn ma gbo, ké wa ɖi ma Gèɖèpɔ́ɔ̀-bɛ̀ɖɛ̀ɛ̀, ké wa ɓaà ma.

Kà nyɔ ɓě taɓa Gèɖèpɔ́ɔ̀ hwìɖǐǐɛɛ nyu cĩ́ɛ kɛ

⁴³ Ɓó tia ɓaɖaa, àpɔ́sò ɓěɔ̀ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn ɓáún-ɓáún ɓě, ké nyɔ séín ɓěɔ̀ kpá ma fã̀àǔn.

⁴⁴ Ké nyɔ séín ɓě ɓɛ́ wa taɓa ma Gèɖèpɔ́ɔ̀ hwìɖǐǐɛɛ nì ma dà dyúáɖò, ké wa kpɔ̃ìn ma gbo.

⁴⁵ Ké wa peɖe ma waà pá ɓě kè waà kɔ̃̀ɔ̀-ɖɛ̀ tɔ̀ɔ̀ ɓě, ké wa geìn ma wíɖí ɓěɔ̀ nyɔ ɓě kɔ̃̀ wa kéɛ ma dyéɛɛ múin.

⁴⁶ Sɔ̀ìn wé gbo mu wé gboɛɛ, wa ku dúún, ké wa mu Gèɖèpɔ́ɔ̀ gbǒɔ̀ mú, ké wa ɖi ma Gèɖèpɔ́ɔ̀-bɛ̀ɖɛ̀ɛ̀ɔ̀ ɖé wa ɓíɖí-taún. Wa kpá múàǔn, ké wa pɛ́ɛ̀ xwa dyí ɓó wa mǔè ɖò gbo, ké wa ɖiìn ɖììn ɖɛ gbo tee.

⁴⁷ Ké wa nyí ma Gèɖèpɔ́ɔ̀ ɓàìn-ɓàìn, ké nyɔ séín ɓěɔ̀ hwòɖǒ dèìn ma wa múin. Ké sɔ̀ìn wé gbo mu wé gboɛɛ, Bounɓoɔ̀ po ma nyɔ ɓě ɓɛ́ wa nì ma póɛń nyɛɛ wa kɔ̃.