Àpɔ́sò 19 - Ɓǎsɔ́ɔ̀ Báɓòɔ̀

Pɔ́ɔ̀ nì ɖé Ɛ́fɛ́sà-hwɔ̀ɖɔ̀ɔ̀ mú ɖe

¹ Ti Àpɔ́ɖè nì ma ɖé Kɔ́ɖèìn-hwɔ̀ɖɔ̀ɔ̀ múɛɛ, Pɔ́ɔ̀ zĩ̀ìn ma ɖé xwía-pìǐɔ̀ mú, ké ɔ mu ma ɖé Ɛ́fɛ́sà-hwɔ̀ɖɔ̀ɔ̀ mú ɖe. Ké ɔ dyɛ̀ìn ma nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐɛɛ ɖé dyi,

² ké ɔ diè ma wa dyi, ké ɔ ɖá, “Ti ɓě taɓa ma Gèɖèpɔ́ɔ̀ hwìɖǐǐɛɛ, Zùù Hwɛ̀ǐn-hwɛ̀ǐnɔ̀ dyi ma ɓě kɔ̃ɔ̀?” Ké wa ɖá, “Gbào, à séè Zùù Hwɛ̀ǐn-hwɛ̀ǐn ɖò jè wɔ̃́ ɖò dyɛ mɔ̀ùn.”

³ Ké ɔ diè ma wa dyi, ké ɔ ɖá, “Níɔ nyɛ́ ɓě kpá maá?” Ké wa ɖá, “Ɔ mɔ̀ ma ɖé Jɔ̃́ɔ́ nììn nyɔ-níɔ-po-poɔ̀ mú.”

⁴ Hwɛ̀ ké Pɔ́ɔ̀ cɛ̃ɛ ma, ké ɔ ɖá, “Nyɔ-níɔ-po-po ɓɛ́ Jɔ̃́ɔ́ nyu ma kɛɛ, ɔ mɔ̀ ma ɓɛ́ nyɔ ɓěɔ̀ ké waà nàmàǔn-kpèɖèɔ̀ dyi táà, ɓɛ́ wa ké níɔ kpá. Ɔ cɛ̃ɛ ma nyɔ ɓěɔ̀ gbo, ɓɛ́ wa ké nyɔ mu ma ɓó ɔ ɖeín dyí kɔùn wɛ̃ɛ hwìɖǐǐ taɓa. Nyɔ mu ma kà ɓó ɔ ɖeín dyí kɔùn wɛ̃ɛ, ɔ mɔ̀ Jízɛ̀.”

⁵ Ti wa wɔ̃́ ma ɖɛa kɛɛ, wa kpá ma níɔ ɖé Bounɓo Jízɛ̀ɛ̀ nyɛ́nɛ́ɔ̀ mú.

⁶ Ké ti Pɔ́ɔ̀ dè ma wa sɔ̃ dúún wɛ̃ɛ, Zùù Hwɛ̀ǐn-hwɛ̀ǐnɔ̀ dyi ma wa kɔ̃. Ké wa wùɖùìn ma wuɖu kà kò ɖò ɓě mú. Ké wuɖu ɓě ɓɛ́ Gèɖèpɔ́ɔ̀ dèìn ma wa wĩín nyɛɛ, wa cɛ̃ɛ ma ní.

⁷ Wa séínɔ̀ ɓɛ́ìn ma nyɔ-kpò ɓaɖa-bùè sè sɔ̃́ jǔɛ.

⁸ Ɓó tia ɓaɖaa, Pɔ́ɔ̀ mu ma Júù-nyɔ̀ ɓěɔ̀ cɔ́cì-gbòɔ̀ mú, ké ɔ se ma ɖé fã̀à-kà wùɖù ɓó dɛ̀nɛ̀ tã xwíníín. Kà ɔ nyu ma Gèɖèpɔ́ɔ̀ kã́á-ɓòɖòɔ̀ jè kɔ̃in zaìn nyɛɛ nyuɛ ké nyɔ ɓěɔ̀ po ma jǎà.

⁹ Kɛɛ nyɔ ɖíɛ́ ɓě kùmùìn ma waà hwòɖǒ-dyùà ɓěɔ̀, ké wa se ma ɖɛ ɓě ɓɛ́ ɔ nì ma kà wa gbo cɛ̃iń nyɛɛ hwìɖǐǐ taɓa. Ké wa nì ma wuɖu gbà cɛ̃iń ɓá hwìè ɖìèɔ̀ jè dyí, ɓó nyɔǔn séín ɓěɔ̀ dyúa. Ɔ jèɛɛ, ɔ sɔ̀ ma ɓó wa hwìɛ̀, ké ɔ po ma nyɔ ɓě ɖǎ ma kà Gèɖèpɔ́ɔ̀ hwìɖǐǐ taɓa kɛɛ wáká. Ké sɔ̀ìn wé gbo mu wé gboɛɛ, ɔ wùɖù ma nyɔ ɓěɔ̀ gbo ɖé Tàwáɖánàà nyɔ-ɖɛ-tɛ̀mɛ̀ìn-gbòɔ̀ mú.

¹⁰ Ɖɛ nìà kɛ nì ma ná ɓó zɔ̃ sɔ̃́ xwíníín. Ɔ nyuɛ ké nyɔ séín ɓě ɓɛ́ wa cĩ́ ma ɖé Ésìà-ɓòɖòɔ̀ kɔ̃ kɛɛ wɔ̃́ ma Bounɓoɔ̀ bɔ̃̌ nɔ̀mɔ̀ dyíinɔ̀. Wa mɔ̀ ma Júù-nyɔ̀ ɓě kè ɓóɖó-dù kà kò ɖò ɓěɛ̀ nyɔ ɓě.

Síívàà dyú ɓěɔ̀ jè

¹¹ Ɓó tia ɓaɖaa, Gèɖèpɔ́ɔ̀ nyùìn ma zɛ̃̀ìn-ɖɛ̀ ɖìè ɓě ɖé Pɔ́ɔ̀ mú.

¹² Ti ɓɛ́ nyɔ ɓěɔ̀ kpa ma bã́ùn-kpàǎ ɓě kè kɛ́ín-jìnììn-ɖɔ̀ ɓě ɓɛ́ wa sɔ̀ ma Pɔ́ɔ̀ kpóɖó-dyùàɔ̀ bũ̌ɛɛ wɛ́-nyɔ̀ ɓěɔ̀ gboɛɛ, waà wɛ́ ɓěɔ̀ sɔ̀ ma wa mú, ké zùù gbà ɓěɔ̀ sɔ̀ ma wa mú.

¹³ Ké Júù-nyɔ̀ ɓěɔ̀ nyɔ ɓě mɔ̀ ma nyɔ zùù gbà mú-zà-nyɔ̀ ɓě, ké wa se ma kò-gbɔ̀ ɖò kɔ̃̀ ɖeɛɛ, wa ɖíɛ́ ɓě vɔ̃ ma ɓɛ́ wa ké ma Bounɓo Jízɛ̀ɛ̀ nyɛ́nɛ́ɔ̀ ɖá ɓó nyɔ ɓě ɓɛ́ wa ɓéɖé ma zùù gbà kɛɛ gbo. Wa ɖá, “À zà m̀ nyɔà mú ɖé Jízɛ̀ɛ̀ nyɛ́nɛ́ɔ̀ mú. Ɔ mɔ̀ nyɔ kɔ̃̀ jè Pɔ́ɔ̀ poà zio kɛ.”

¹⁴ Júù-nyɔ̀ ɓěɔ̀ sáa-zà-nyɔ̀ kpa ɖɛ ɖò kɔ̃̀ nyɛ́nɛ́ mɔ̀ ma Síívà kɛɛ, ɔ dyú-gàà mɛ̀nɛ̌ìn-sɔ̃́ ɓě nì ma ɖɛ nìà kɛ nyuɛń.

¹⁵ Kɛɛ ti wa nìɛ̀ ma náa nyuɛń nyɛɛ, zùù gbàɔ̀ zà ma ɖé wuɖu, ké ɔ ɖá, “Ḿ dyuò Jízɛ̀ dyí, ké ḿ dyuò Pɔ́ɔ̀ dyí. Kɛɛ ɓě mɔ̀ùn mɔ̀ nyɛ́ɛ̀?”

¹⁶ Ké gàa ɓɛ́ ɔ ɓéɖé ma kà zùù gbàɔ̀ kɛɛ wã cá, ké ɔ sí ɖé wa hwìɛ̀. Ké ɔ sɔ̃ zi ma wa wɔ̃, ké ɔ zi ma wa ɓaɖauń mìɔ. Ɔ jèɛɛ, wa fɔ̀nɔ̀ ma múin, ké wa puà ma mìɔ, ké wa gbǔ ma ɖé gbǒɔ̀ mú.

¹⁷ Ké Júù-nyɔ̀ séín ɓě kè ɓóɖó-dù kà kò ɖò ɓěɛ̀ nyɔ séín ɓě ɓɛ́ wa nì ma ɖé Ɛ́fɛ́sà-hwɔ̀ɖɔ̀ɔ̀ múɛɛ dèɛ̀ ma wɔ̃́ɔ gbɔ. Ké wa séín kpá ma fã̀àǔn, ké Bounɓo Jízɛ̀ɛ̀ nyɛ́nɛ́ín-nyɛ̀nɛ̀ nì ma nyɔ ɓěɔ̀ wĩín.

¹⁸ Ké ɓó kɔ̃in ɖeɛɛ, nyɔ ɓě ɓɛ́ wa ɖǎ ma Gèɖèpɔ́ɔ̀ hwìɖǐǐ taɓa kɛɛ ɓáún-ɓáún mu ma, ké wa wɔ̃́ìn ma waà hwe-ɖɛ̀ ɓě ɓɛ́ wa ɖǎ ma nyu kĩ́ín nyɛɛ mú ɓó nyɔǔn séín dyúa.

¹⁹ Ké nyɔ ɓě ɓɛ́ wa mɔ̀ ma zɛ̃̀ìn-ɖɛ̀-nyu-nyɔ̀ ɓě kĩ́ín nyɛɛ, wa pàɖǎ poìn ma waà céè-ɖɛ̀ ɓěɔ̀ dyí, ké wa fɔ̃ ma wa ɓó nyɔǔn séín dyúa. Ké wa gbɛ̌ìn ma céè-ɖɛ̀ ɓěɔ̀ píɔ́ ɓɛ́ wa kpa ma kɛɛ dyí, ké ɔ nyu ma séɓàɖà-pĩ̀à táázĩ̀ìn kpáɖá-nyɔ sɔ̃́ ɓaɖa-bùè.

²⁰ Ɔ jèɛɛ, Bounɓoɔ̀ bɔ̃̌ nɔ̀mɔ̀ dyíinɔ̀ zaìn ma mú, ké ɔ nyu ma kũ̀à ɖé kpé mú.

Zàǔn-zàǔn kpá ɖé Ɛ́fɛ́sà-hwɔ̀ɖɔ̀ɔ̀ mú

²¹ Ti ɖɛ ɓě nìà kɛ ɖǎ ma kpáa, Pɔ́ɔ̀ hwòɖǒɔ̀ poɛ ma gbɔ, ɓɛ́ ɔ ké ma ɖé Màsèdónìà-ɓòɖòɔ̀ kè Àkédyà-ɓòɖòɔ̀ kɔ̃ zĩ̀ìn, ɓɛ́ ɔ ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu. Ɔ ɖá, “Ɔ jǔ ké ḿ dyi Jùɖúsɛ̀ɖɛ̀ìn-hwɔ̀ɖɔ̀ɔ̀ mú nyiniín, nìí, ḿ ɓéɖé ɓɛ́ ḿ ké ɖé Wóɖóùn-hwɔ̀ɖɔ̀ɔ̀ mú dyé ɖekè.”

²² Ké ɔ tò ma ɔ gbo-kpá-nyɔ̀ sɔ̃́ ɓě ɓɛ́ wa mɔ̀ ma Tímétè kè Ìwáɖásɔ̀ kɛɛ ɖé Màsèdónìà-ɓòɖòɔ̀ kɔ̃, ké ɔ mìɔùn sè ma ɖé Ésìà-ɓòɖòɔ̀ kɔ̃ ɖe ɖɛ wè.

²³ Ɓó tia ɓaɖaa, zàǔn-zàǔn vɛ̀nɛ̀ ɓá hwìè ɖìèɔ̀ jè dyíɛɛ kpá ma ɖé Ɛ́fɛ́sà-hwɔ̀ɖɔ̀ɔ̀ mú.

²⁴ Gàa ɖò kɔ̃̀ nyɛ́nɛ́ mɔ̀ ma Dìmítìɔ̀ kɛɛ nì ma ɓó. Ɔ mɔ̀ ma séɓàɖà ɖɛ kò-kò ɓě mú-nyu-nyɔ̀. Ɔ nyu ma séɓàɖà-gbàà ɓě ɓó gèɖèpɔ́ɔ̀-màà ɓɛ́ ɔ mɔ̀ ma Àtímà kɛɛ bìì. Ké ɖɛa nyuɛ ké ɔ sɛ́ɖɛ́-nyɔ̀ ɓěɔ̀ ɓéɖé ma kũ̀à ɓáún-ɓáún.

²⁵ Ké ɔ poìn ma nyɔ ɓě nìà kɛ kè nyɔ mɔ̀ sɛ́ɖɛ́ dyúáɖòɔ̀ nyu-nyɔ̀ ɓěɛɛ dyí, ké ɔ ɖá, “Gàa ɓě, ɓě dyuò kà ɓěà dyé kɔ́mɔ́-ɖɛ̀ ɖé kũ̀à nìà kɛ múɛ.

²⁶ Ɓě ɖǎa wɔ̃́, ké ɓě ɖǎa dyé kà ɓɛ́ Pɔ́ɔ̀ ɖǎ nyɔ pàɖǎ pɛ́í po, ké ɔ ɖǎ wa hwìǐ zàìn nyɛ. Ɔ se nɔ̄ Ɛ́fɛ́sà-hwɔ̀ɖɔ̀ɛ̀ mú ɖòùn, kɛɛ ɔ táà nyɔ séín ɓě nìà ɖé Ésìà-ɓòɖòɔ̀ kɔ̃ kɛɛ hwìǐ zàìn hwɔɔ ɖekè. Ɔ nìɛ̀ cɛ̃iń kà gèɖèpɔ́ɔ̀ ɓɛ́ nyɔǔn nyuɛɛ, wa se gèɖèpɔ́ɔ̀ fɔɔ cá kɛ.

²⁷ Ḿ dyé ɖé fã̀à-ɖɛ̀ ɖò. Ɔ mɔ̀, wa se à kũ̀à nìà kɛ ɖɛ ɖáa mu ɖòùn pū, kɛɛ wa se à gèɖèpɔ́ɔ̀-màà vɛ̀nɛ̀ mɔ̀à Àtímà kɛɛ gbǒɔ̀ kpéín dyéɛ mu ɖekè. Ké ɔ pá se mú tɔ̀mɔ̀ɔ̌ mu ɖe, ɓɛ́ gèɖèpɔ́ɔ̀-màà ɓɛ́ Ésìà-nyɔ̀ séín ɓěɔ̀ kè ɓóɖó-kpàà nyɔ tɔ̀ɔ̀ séín ɓěɔ̀ ɓièà kɛɛ, ɔ nyɔ-vɛ̀nɛ̀-kpèɔ̀ jè ké dyi zi.”

²⁸ Ti wa wɔ̃́ ma ɖɛa kɛɛ, cɛ̃́ dyá ma wa mìɔ, ké wa páná ma mú, ké wa ɖá, “Ɛ́fɛ́sà-nyɔ̀ ɓěɔ̀ gèɖèpɔ́ɔ̀-màà mɔ̀à Àtímà kɛɛ kpé ɓúá dyí mìɔ.”

²⁹ Ké dyùà-dyùà nì ma hwɔɖɔɔ̀ mú cá, ké wa kpɔ̃ ma Gédyà kè Àwèɖèsákà. Wa mɔ̀ nyɔ ɓě kè Pɔ́ɔ̀ naìn ma múɛ. Wa sɔ̀ ma ɖé Màsèdónìà-ɓòɖòɔ̀ kɔ̃. Ké nyɔ ɓěɔ̀ kpàìn ma wa peɖeɛ ɖé dyí-poìn-gbòɔ̀ mú.

³⁰ Ɓó ɖɛa jèɛɛ, Pɔ́ɔ̀ mɔ́ ɓɛ́ ɔ ké ma ɖé nyɔ ɓěɔ̀ hwìɛ̀ mu, kɛɛ ɖeín-nà-nyɔ̀ ɓěɔ̀ se ma wɔ̃́ɔ ɓɛ́ìn ɓɛ́ ɔ ké ma ɖé mu.

³¹ Ɓóɖóɔ̀ nyɔ vɛ̀nɛ̀ ɖíɛ́ ɓě ɓɛ́ wa mɔ̀ ma ɔ ɓǎtoɛɛ tò ma ɖé ɔ gbo wuɖu ɖekè, ké wa ɓaà ma ɔ, ɓɛ́ ɔ ní kɔ̃̀ ɖà dyí-poìn-gbòɔ̀ mú dyá.

³² Nyɔ ɓě poìn ma kà dyíɛɛ, wa nì ma dyùà-dyùà nyuɛń ke. Nyɔ ɓěɔ̀ páná ma mú ɓó ɖɛ kò-kò ɓě jè. Wa pàɖǎ se ma ɖɛ kɔ̃̀ jè wa poìn ma ɖé dyíɛɛ dyí dyuò.

³³ Nyɔ kúɖúú ɓěɔ̀ ɖíɛ́ ɓě zaìn ma ɖɛ ɓěɔ̀ Ɛ̀ɖìzánà gbo kɔ̃in. Ɔ mɔ̀ nyɔ ɓɛ́ Júù-nyɔ̀ ɓěɔ̀ ɖǎ ma ɖé nyɔ ɓěɔ̀ dyúa tòɛ. Ké Ɛ̀ɖìzánà pòìn ma nyɔ ɓěɔ̀ sɔ̃ ɓɔ́í. Ɔ mɔ́ ɓɛ́ ɔ ké ma ɔ nììn kɔ̃in zaìn ɖé wa gbo.

³⁴ Kɛɛ ti wa dyéɛ ma kà ɔ mɔ̀ ma Júù-nyɔ̀ kɛɛ, wa séín poìn ma dyí, ké wa páná ma mú, ké wa ɖá, “Ɛ́fɛ́sà-nyɔ̀ ɓěɔ̀ gèɖèpɔ́ɔ̀-màà mɔ̀à Àtímà kɛɛ kpé ɓúá dyí mìɔ.” Ké ɔ ɓɛ́ìn ma áɓà sɔ̃́ nyuɛ.

³⁵ Sɔ̀ìn ɓóɛ gboɛɛ, hwɔɖɔɔ̀ céè-ɖɛ̀ céè-nyɔ̀ɔ̀ po ma nyɔ kúɖúú ɓěɔ̀ ɓɔ́í, ké ɔ ɖá, “Ɛ́fɛ́sà-nyɔ̀ ɓě, gàaɔ̀ nyɛ́ seɛ dyuò kà ɓɛ́ à mɔ̀ Ɛ́fɛ́sà-hwɔ̀ɖɔ̀ɔ̀ nyɔ ɓě kɛɛ, à mɔ̀ Àtímà vɛ̀nɛ̀ɔ̀ gbǒɔ̀ dyí-gmɔ̀-nyɔ̀ kɛ́? Nyɛ́ seɛ dyuò kà ɓɛ́ à mɔ̀ ɔ hwɔìn-ɖɛ̀ ɓɛ́ ɔ ɓuɖu ma kà ɖé dyiíɛɛ dyí-gmɔ̀-nyɔ̀ kɛ́?

³⁶ Kà ɔ nìà náa, nìí, ɖɛ ɓě nìà kɛ se dyí zàìn ɓɛ́ìn. Ɔ jèɛɛ, ɓě ɓéɖé ɓě ké gìɖìǐ nì, ké ɓěǐn ɖá ɓɛ́ ɓě ké ɖɛ ɖò cɛ-cɛ-kà nyu.

³⁷ Gàa ɓě ɓɛ́ ɓě dyàà dà kɛɛ, wa se ɖɛ ɖò ɖé gèɖèpɔ́ɔ̀-gbò ɖò mú dyíɖí, ké wa se à gèɖèpɔ́ɔ̀-mààɔ̀ ɖɛ gbà ɖò kɔ̃ún cɛ̃.

³⁸ Ɔ jèɛɛ, ɔ jǔ ké Dìmítìɔ̀ kè ɔ mǔè sɛ́ɖɛ́-dyuò-nyɔ̀ ɓěɔ̀ dyi nyɔ ɖò tɔ̀ɔ̀-ɓìɔ̀ ɓěɔ̀ dyúa dyàà mɔ́ ní, nìí, wa mɛ cɛ̃ wa nììn ɖò-ɖò, sepóɛɖé zɔ̃́ín-cɛ̃̀ìn-naín ɓěɔ̀ kaà kpɛ́-kpɛ́, ké tɔ̀ɔ̀-ɓìɔ̀ ɓěɔ̀ nì ɖé.

³⁹ Ké ɖɛ ɖò dyi ɓě hwòɖǒ kpɔ̃ ɖeín, nìí, wa muɛ wɔ̃́ùn ɖé dyí-poìn-poìn vɛ̀nɛ̀ɔ̀ mú.

⁴⁰ Ti ɖòɛ̀ ɓaɖaín, wa mu à gɔ̌mànàɔ̀ gbo vɔ̃ jè kpɔ̃ùn ɓó ɖɛ nìà kpáuń ɓó zɛ̃̌ɛ̀ kɛɛ jè. Ɖɛ ɖò seɛ nyu ɓɛ́ ɖɛ nìà kɛ ké kpá. À se ɖɛ ɓɛ́ à ké cɛ̃, ɓɛ́ kuɖu-kuɖu nìà kɛ ké xwíníín ɖò kɔ̃ɛɛ ɓéɖé.”

⁴¹ Ti ɔ cɛ̃ ma ɖɛ ɓěa kɛɛ, ɔ tò ma nyɔ ɓě poìn ma kà ɓó dyíɛɛ wa ɓíɖí ɖe.