Àpɔ́sò 11 - Ɓǎsɔ́ɔ̀ Báɓòɔ̀

Píɖɛ̀ zaìn ɖɛ ɓěɔ̀ cɔ́cì-nyɔ̀ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo kɔ̃in

¹ Ɓó tia ɓaɖaa, àpɔ́sò ɓěɔ̀ kè cɔ́cì-nyɔ̀ ɓě ɓɛ́ wa nì ma ɖé Júɖìà-ɓòɖòɔ̀ kɔ̃ɛɛ wɔ̃́ɔ ma kà ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ ɖǎ ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ dyi kpɔ̃ ɖekèɛ.

² Ɔ jèɛɛ, ti Píɖɛ̀ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kɛɛ, ɔ mǔè Júù-nyɔ̀ ɓěɔ̀ mɔ́ìn ma ɔ bɛ̃̌ dyi,

³ ké wa ɖá, “M̀ ɖǎ nyɔ ɓě se sàà mɛ́ kɛɛ gboi té, ké m̀ kè wa kè ɖǎ dà dyúáɖò ɖɛ ɖi.”

⁴ Ké Píɖɛ̀ dè ma ɖɛ ɓě kpá ma ɔ gboɛɛ kɔ̃in zaìn gbɔ ɖò-ɖò. Ɔ ɖá,

⁵ “Ḿ nì ma ɖé Jɔ́pà-hwɔ̀ɖɔ̀ɔ̀ mú, ké ḿ nì ma ɓaàǔn, ké ḿ dyé ma dyí-tɛ̀mɛ̀ìn-ɖɛ̀ ɖò. Ḿ dyé ma ɖɛ ɖò ɓíɖíi dyiɛ. Ɔ nì ma kà ɖɔ púú vɛ̀nɛ̀ ɖò nìà kɛ. Ɖɛ ɖò kpɔ̃ ma ɔ gã hĩinyɛ ɓěɔ̀ dyi, ké ɔ síìn ma ɔ ɓíɖíi. Ɔ sɔ̀ìn ma ɖé dyií, ké ɔ dyi ma dɛ̀ ɓɛ́ ḿ nì ma kà kɛ.

⁶ Ḿ gmɔ̀ɔ̀ ma gãa, ké ḿ dyé ma ɖé nyúà-ɖɛ̀ ɓě kè xwáɖá-xwíɖíi-nìmìì ɓě kè ɓíɖíi-dyi-nà-ɖɛ̀ ɓě ɔ kè naà ɓě.

⁷ Ké ḿ wɔ̃́ ma wuɖu ɖò, ké wuɖuɔ̀ cɛ̃ɛ ḿ gbo, ké ɔ ɖá, ‘Píɖɛ̀, sɔ̀ dyí. Ɖáɓá ɖɛ ɓě nìà kɛ, ɓɛ́ m̀ kéɛ ɖi.’

⁸ Hwɛ̀ ké ḿ ɖá, ‘Gbào, Bounɓo, gbào, sepóɛɖé, ḿ séè ɖɛ nyìnììn dyíin kè ɖɛ se mú hwɛ̀ɛ ní wɔ̃ɔ̀ mú po ɖò fɔɔ.’

⁹ Ké wuɖuɔ̀ sɔ̀ìn ma ɖé dyɔún ɖe, ké ɔ cɛ̃ɛ ma ḿ gbo, ké ɔ ɖá, ‘Ɖɛ ɓɛ́ Gèɖèpɔ́ɔ̀ ɖǎ nyu nɔ̀mɔ̀ dyíin ɓɛ́ m̀ kéɛ ɖiɛɛ, ɓɔ́ɔ cɛ̃ɛ kà ɔ se mú hwɛ̀ kɛ.’

¹⁰ Ɖɛ nìà kɛ kpáìn ma ná kpa tã, ké ɖɛ ɖò jiɖi ma ɖɛ séín ɓěɔ̀ ɖé dyií ɖe.

¹¹ Ti déínɔ̀ xwíníín nyɛɛ, gàa tã ɓɛ́ wa tò ma ḿ gbo sɔ̀ìn ɖé Sɛ̀sɛ̀wíɖíà-hwɔ̀ɖɔ̀ɔ̀ múɛɛ wóɖó ma xwáɖáún ɓó gbǒ kɔ̃̀ dya à nì ma kà kɛɛ dyúa.

¹² Ké Zùùɔ̀ cɛ̃ɛ ḿ gbo, ɓɛ́ ḿ ké se hwìɖǐi poìn, ɓɛ́ ḿ kè wa ké mu. Ɔ jèɛɛ, ḿ kè ní ɖíí mɛ̀nɛ̌ìn-ɖò ɓě nìà kɛ mu ma, ké à dyá ma ɖé Kɔ̀níɖìàà gbǒɔ̀ mú.

¹³ Ké ɔ cɛ̃ɛ ma à gbo kà ɓɛ́ ɔ nyu ma ínjà ɖò dyéɛ ɖé ɔ gbǒɔ̀ mú kɛ. Ké ínjàɔ̀ cɛ̃ɛ ma ɔ gbo, ké ɔ ɖá, ‘Ɖoɓo nyɔ ɖé Jɔ́pà-hwɔ̀ɖɔ̀ɔ̀ mú, ɓɛ́ wa ké Sã́ɓò kɔ̃̀ nyɛ́nɛ́ tɔ̀ɔ̀ mɔ̀à Píɖɛ̀ kɛɛ dyà.

¹⁴ Wuɖu ɓě ɓɛ́ ɔ mu m̀ gbo cɛ̃ìn nyɛɛ, wa muɛ nyuùn ɓɛ́ m̀ kè nì ɓíɖí-gbǒ-xwíníín-nyɔ̀ séín ɓěɔ̀ ké pó.’

¹⁵ Ti ɓɛ́ ḿ dè ma wùɖùɛ̀ gbɔɛɛ, Zùù Hwɛ̀ǐn-hwɛ̀ǐnɔ̀ dyi ma wa kɔ̃ kà ɔ dyi ma kà ɓěà kɔ̃ kĩ́ín-kĩ́ín nyɛ.

¹⁶ Púɛɛ, wuɖu ɓě ɓɛ́ Bounɓoɔ̀ cɛ̃ zɔ̃̌ɔ̀ à gboɛɛ dyi ma ḿ hwìɖǐi. Ɔ cɛ̃ɛ zɔ̃̌ɔ̀ à gbo, ké ɔ ɖá, ‘Jɔ̃́ɔ́ po ɓě níɔ, kɛɛ Gèɖèpɔ́ɔ̀ mu ɓě Zùù Hwɛ̀ǐn-hwɛ̀ǐnɔ̀ mú poùn.’

¹⁷ Ti à taɓa ma Bounɓo Jízɛ̀ Kɛ́ɖɛ́ì hwìɖǐǐɛɛ, nyíí-ɖɛ̀ ɓɛ́ Gèɖèpɔ́ɔ̀ nyí ma kà à kɛɛ, ɔ ɖǎ nyíí-ɖɛ̀ dyúáɖòɔ̀ wa mɔ̀ùn nyí ɖekè. Kà ɔ nìà náa, nyɛ́ ḿ jǔ ɓɛ́ ḿ ké kpé ɓéɖé, ɓɛ́ ḿ kéà Gèɖèpɔ́ɔ̀ dyí kpɔ̃ɛ́?”

¹⁸ Ti wa wɔ̃́ ɖɛa kɛɛ, wa se ma ɖɛ ɖò cɛ̃ ɖe fɔɔ. Ké wa ɓàìn ma Gèɖèpɔ́ɔ̀, ké wa ɖá, “Ɖɛ nìà kɛ xwíníín mɔ̀, Gèɖèpɔ́ɔ̀ ɖǎ ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn ti nyí, ɓɛ́ wa ké waà nàmàǔn-kpèɖèɔ̀ dyi táà, ɓɛ́ wa ké fɛ̀ɛ̀ ɓéɖé.”

Cɔ́cì nì ɖé Ã́tìà-hwɔ̀ɖɔ̀ɔ̀ múɛ

¹⁹ Ti ɓɛ́ Síɖíɓììn jè nyuɛ ké cɔ́cìɔ̀ dyé ma gǎ kɛɛ, wa ɓeìn ma dyi, ké wa mu ma ɖé Fònísìà-ɓòɖòɔ̀ kè Kítììn-ɓòɖòɔ̀ kɔ̃ ɔ kè ɖé Ã́tìà-hwɔ̀ɖɔ̀ɔ̀ mú. Wa kpa ma bɔ̃̌ nɔ̀mɔ̀ dyíinɔ̀ Júù-nyɔ̀ ɓěɔ̀ ɖòùn gbo cɛ̃ɛ.

²⁰ Ké cɔ́cì-nyɔ̀ ɖíɛ́ ɓě ɓɛ́ wa sɔ̀ìn ɖé Kítììn-ɓòɖòɔ̀ kɔ̃ kè ɖé Sàwíɖíìn-hwɔ̀ɖɔ̀ɔ̀ múɛɛ nì ma wa hwìɛ̀. Ti wa nyini ma Ã́tìà-hwɔ̀ɖɔ̀ɔ̀ múɛɛ, wa wùɖù ma Gíɖíì-nyɔ̀ ɓěɔ̀ gbo ɖekè, ké wa nì ma bɔ̃̌ nɔ̀mɔ̀ dyíin ɓá Bounɓo Jízɛ̀ jè dyíɛɛ wa gbo cɛ̃iń.

²¹ Ké Gèɖèpɔ́ɔ̀ kpéɔ̀ nì ma wa gbo, ké nyɔ ɓáún-ɓáún ɓɛ́ wa taɓa ma Gèɖèpɔ́ɔ̀ hwìɖǐǐɛɛ gmɔ̀ìn ma ɖé Bounɓoɔ̀ gbo.

²² Ti ɖɛ nì ma kà kpáuń wɛ̃ɛ bɔ̃̌ nyini ma cɔ́cì-nyɔ̀ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ gboɛɛ, wa ɖoɓo ma Bànábà ɖé Ã́tìà-hwɔ̀ɖɔ̀ɔ̀ mú.

²³ Ti ɔ nyini ma ɖé, ké ɔ dyé ma ɖɛ nɔ̀mɔ̀ dyíin ɓě ɓɛ́ Gèɖèpɔ́ɔ̀ nì ma wa bìì nyuɛń nyɛɛ, ɔ kpá ma múàǔn. Ké ɔ po ma wa náún, ɓɛ́ wa ké ma hwòɖǒ ku, ɓɛ́ wa ké Bounɓoɔ̀ gboi kpɔ̃ kóɖó-kóɖó.

²⁴ Bànábà cɛ̃ɛ ma náa, sepóɛɖé ɔ kpeɖe nɔ̀mɔ̀ dyíin jè. Zùù Hwɛ̀ǐn-hwɛ̀ǐnɔ̀ dyíìn ma ɔ múin, ké ɔ ɓéɖé ma hwìɖǐǐ-taɓa-taɓa ɓáún-ɓáún. Ké nyɔ goun ɓě kpá ma Bounɓoɔ̀ nììn wákáɔ̀ kɔ̃.

²⁵ Sɔ̀ìn ɓóɛ gboɛɛ, Bànábà mu ma ɖé Tásɔ̀-hwɔ̀ɖɔ̀ɔ̀ mú, ɓɛ́ ɔ ké ma Sɔ́ɔ̀ dyi mɔ́.

²⁶ Ti Bànábà dyé ma Sɔ́ɔ̀ kɛɛ, ɔ dyà ma ɔ ɖé Ã́tìà-hwɔ̀ɖɔ̀ɔ̀ mú. Ɓó zɔ̃ gàná xwíníín nyɛɛ, wa kè cɔ́cì-nyɔ̀ ɓěɔ̀ poìn ma dyí, ké wa tɛ̀mɛ̀ìn ma nyɔ kúɖúú ɓě ɖɛ. Dɛ̀ kĩ́ín-kĩ́ín ɓɛ́ wa ɖáìn ma Jízɛ̀ɛ̀ ɖeín-nà-nyɔ̀ ɓěɔ̀ Kɛ́ɖɛ́ì ɖeín-sí-nyɔ̀ ɓěɛɛ mɔ̀ ma ɖé Ã́tìà-hwɔ̀ɖɔ̀ɔ̀ mú.

²⁷ Ɓó wé ɓěa ɓaɖaa, kpáá-ɖɛ̀-cɛ̃-nyɔ̀ ɓěɔ̀ ɖíɛ́ ɓě sɔ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa mu ma ɖé Ã́tìà-hwɔ̀ɖɔ̀ɔ̀ mú.

²⁸ Ké wa dyúáɖò kɔ̃̀ nyɛ́nɛ́ mɔ̀ ma Ákábà kɛɛ nyànà ma dyi, ké ɔ cɛ̃̀ìn ma ɖéɛ Zùùɔ̀ nyɛ́nɛ́ín, ké ɔ ɖá, “Mɔ́ vɛ̀nɛ̀ ɖò mu kpáùn ɖé dyúa nɔ̄ ɓóɖóɛ̀ dà séín.” Ké ɖɛ nìà kɛ kpá ma ti ɓɛ́ Kɔ́ɖɔ́ɖìàsì nì ma Wóɖóùn-ɓòɖòɔ̀ wuɖuí kɔ̃̀ǔn wɛ̃.

²⁹ Ké ɖeín-nà-nyɔ̀ ɓěɔ̀ hwòɖǒ poɛ ma gbɔ, ɓɛ́ wíɖí jĩ̀ kà ɓɛ́ nyɔ ɖò mɔ̀ùn mu ɓéɖéìn nyɛɛ, ɔ ké ɖò wa ɖíí cɔ́cì-nyɔ̀ ɓě ɓɛ́ wa cĩ́ ma ɖé Júɖìà-ɓòɖòɔ̀ kɔ̃ kɛɛ gbo kpáìn.

³⁰ Ké nyɔ ɓěɔ̀ nyuɛ ma náa, ké wa dèɛ̀n ma Bànábà kè Sɔ́ɔ̀ xwa, ké wa kpaa ɖéɛ cɔ́cì-nyɔ̀ vɛ̀nɛ̀ ɓěɔ̀ gbo.