Àpɔ́sò 10 - Ɓǎsɔ́ɔ̀ Báɓòɔ̀

Píɖɛ̀ kè Kɔ̀níɖìà jè

¹ Ké gàa ɖò ɓɛ́ wa ɖáìn Kɔ̀níɖìà kɛɛ nì ma ɖé Sɛ̀sɛ̀wíɖíà-hwɔ̀ɖɔ̀ɔ̀ mú. Ɔ kɔ̃̀ sójà hɔ̃dɛ̀ɖɛ̀ ɖò wuɖuí. Ɔ mɔ̀ ma sójàɔ̀ dú nyɔ wa ɖáìn Ítáɖè-dù kɛɛ nyɔ ɖò.

² Ɔ mɔ̀ ma Gèɖèpɔ́ɔ̀ ɓiè-nyɔ̀ ɖò. Ɔ kè ɔ ɓíɖí-gbǒ-xwíníín-nyɔ̀ séín ɓěɔ̀ fɛ̃̀ìn ma Gèɖèpɔ́ɔ̀ dyi. Ɔ nyí ma Júù-nyɔ̀ ɓěɔ̀ nyíí-ɖɛ̀ kpɛ́-kpɛ́, ɓɛ́ ɔ ké wa gbo kpá, ké ɔ ɓaà ma Gèɖèpɔ́ɔ̀ tee.

³ Wé ɖòɛ̀ ɓaɖaa, ɓó zii-dyòɖò-gbo-dyòɖòàǔn wɛ̃ɛ, ɔ dyé ma dyí-tɛ̀mɛ̀ìn-ɖɛ̀ ɖò. Ké ɖé dyí-tɛ̀mɛ̀ìn-ɖɛ̀ɔ̀ múɛɛ, ɔ dyé ma Gèɖèpɔ́ɔ̀ ínjà ɖò wáɖáá cá. Ké ínjàɔ̀ dyá ma ɖé ɔ gbǒɔ̀ mú, ké ɔ cɛ̃ɛ ma ɔ gbo, ké ɔ ɖá, “Kɔ̀níɖìà.”

⁴ Ké Kɔ̀níɖìà fɛ̃̀ìn ma, ké ɔ gmɔ̀ ma ɔ gãa, ké ɔ ɖá, “Ɓɔ̌ɔ̀, ɔ mɔ̀ ɖɛ́ kɛ́?” Ké ínjàɔ̀ cɛ̃ɛ ma ɔ gbo, ké ɔ ɖá, “Nì ɓaà-wùɖù kè nyíí-ɖɛ̀ ɓě ɓɛ́ m̀ nyíà nyɔ ɓěɔ̀ kɛɛ, wa ɖǎ ɖé dyɔún mu, ké wa ɖǎ nì jè Gèɖèpɔ́ɔ̀ hwìɖǐi dyà.

⁵ Ké kàǔn wɛ̃ɛ, ɖoɓo nyɔ ɖé Jɔ́pà-hwɔ̀ɖɔ̀ɔ̀ mú, ɓɛ́ wa ké gàa ɖò mɔ̀ Sã́ɓò kɔ̃̀ nyɛ́nɛ́ tɔ̀ɔ̀ mɔ̀à Píɖɛ̀ kɛɛ dyà.

⁶ Ɔ mɔ̀ ɖéè ɖé Sã́ɓò mɔ̀à kúɖúù-ɖáɓá-nyɔ̀ɔ̀ kɛɛ ɓíɖí-taún. Sã́ɓòɛ̀ gbǒɔ̀ nì ɖé dyóóɔ̀ wĩín.”

⁷ Ti ínjà ɓɛ́ ɔ wùɖù ma kà ɔ gboɛɛ mu ma kɛɛ, Kɔ̀níɖìà ɖá ma ɔ gbo-nì-nyɔ̀ sɔ̃́ kè sójà ɓě ɓɛ́ wa nì ma ɔ gboɛɛ dyúáɖò. Ɔ mɔ̀ sójà ɓěɔ̀ nyɔ ɓiè ma Gèɖèpɔ́ɔ̀ kɛ.

⁸ Ké Kɔ̀níɖìà zaìn ma ɖɛ séín ɓěɔ̀ wa gbo kɔ̃in, ké ɔ ɖoɓo ma wa ɖé Jɔ́pà-hwɔ̀ɖɔ̀ɔ̀ mú.

⁹ Wéɔ̀ nyɔ kɔ ma ɓó dyíɛɛ, ti wa nì ma hwìèɔ̀ kɔ̃, ké wa nìǎ ma hwɔɖɔɔ̀ bũ̌in xwɛ̃́ǐn nyɛɛ, Píɖɛ̀ mu ma ɖé gbǒ kɔ̃̀ mú ɔ nì ma kà kɛɛ dúún, ɓɛ́ ɔ ké ma ɓaà. Ɔ mu ma ɖé ɓó dyóɖó-kò-dú-hwìɛ̀.

¹⁰ Ké mɔ́ dè ma Píɖɛ̀ nyuɛ gbɔ, ké ɔ mɔ́ ma ɖɛ ɖò ɖiɛ dyi. Kɛɛ ti wa nì ma ɖii-ɖɛ̀ɔ̀ nyuɛń nyɛɛ, ɔ dyé ma dyí-tɛ̀mɛ̀ìn-ɖɛ̀ ɖò.

¹¹ Ɔ dyéɛ, ké dyɔɔ̀ kaà ma wɔ̃, ké ɖɛ ɖò nì ma kà ɖɔ púú vɛ̀nɛ̀ ɖò nìà kɛɛ nì ma ɓíɖíi dyiɛń. Ɖɛ ɖò kpɔ̃ ma ɔ gã hĩinyɛ ɓěɔ̀ dyi, ké ɔ síìn ma ɔ ɓóɖó-kpàà kɔ̃.

¹² Nimii ɓě kè ɓíɖíi-dyi-nà-ɖɛ̀ ɓě ɔ kè naà ɓě nì ma ɖé ɔ mú.

¹³ Ké wuɖu ɖò dyi ma Píɖɛ̀ gbo, ké ɔ ɖá, “Píɖɛ̀, sɔ̀ dyí. Ɖáɓá ɖɛ ɓě nìà kɛ, ɓɛ́ m̀ kéɛ ɖi.”

¹⁴ Kɛɛ Píɖɛ̀ ɖá, “Gbào, Bounɓo, gbào, sepóɛɖé ḿ séè ɖɛ nyìnììn dyíin kè ɖɛ se mú hwɛ̀ɛ ɖi ɖò.”

¹⁵ Ké wuɖuɔ̀ dyi ma ɔ gbo ɖe, ké ɔ ɖá, “Ɖɛ ɓɛ́ Gèɖèpɔ́ɔ̀ ɖǎ nyu nɔ̀mɔ̀ dyíin ɓɛ́ m̀ kéɛ ɖiɛɛ, ɓɔ́ɔ cɛ̃ɛ kà ɔ nyìnììn dyíin nyɛ.”

¹⁶ Ɖɛ nìà kɛ kpáìn ma ná kpa tã, ké ɖɛɔ̀ mu ma dyɔɔ̀ dyí ɖe wàɖà cá.

¹⁷ Ti Píɖɛ̀ nì ma hwìɖǐi poɛ̌n ke ɓá ɖɛ ké ma ɖɛ ɓɛ́ ɔ dyé ma kà kɛɛ xwíníín jǔɛɛ jè dyíɛɛ, Kɔ̀níɖìàà kíá ɓěɔ̀ nyini ma ɓó Sã́ɓòɛ̀ gbǒɔ̀ zɔ̃̌. Wa diè ma nyɔ ɓěɔ̀ dyi, ké wa zàìn ma wa hwìèɔ̀ da, ké wa nyanaìn ma ɓó gbǒɔ̀ wĩín dyi.

¹⁸ Ké wa po ma ɖé gbǒɔ̀ mú wuɖu, ɓɛ́ wa kéɛ dyé kɛbì ɖéɛ̀ ɖéè-gàà mɔ̀à Sã́ɓò Píɖɛ̀ kɛɛ cĩ́à kɛɛ ní.

¹⁹ Ké ti Píɖɛ̀ nì ma ɖɛ ɓɛ́ ɔ dyé ma kà kɛɛ jè hwìɖǐi poɛ̌n nyɛɛ, Zùùɔ̀ cɛ̃ɛ ma ɔ gbo, ké ɔ ɖá, “Gmɔ̀ nɔ̄, gàa tã nì m̀ dyi mɔ́uń.

²⁰ Sɔ̀ dyí, ɓɛ́ m̀ ké ɖé ɓíɖíi mu. Ɓɔ́ hwìɖǐi poɛ̀n. M̀ kè wa mɛ mu, sepóɛɖé ḿ ɖǎ wa ɖoɓo.”

²¹ Ké Píɖɛ̀ mu ma ɓíɖíi ɖé gàa ɓěɔ̀ gbo, ké ɔ ɖá, “Mɔ̄ ɓě mɔ́à dyiɛ̀. Ɖɛ́ kɔ̃̀ jè ɓě dyià kɛ́?”

²² Ké wa ɖá, “À sɔ̀ ɖé Kɔ̀níɖìà mɔ̀ nyɔ kɔ̃̀à sójà hɔ̃dɛ̀ɖɛ̀ ɖò wuɖuíɛɛ gbo. Ɔ mɔ̀ dyí-sɛ́ɖɛ́ìn-nyɔ̀, ké ɔ fɛ̃̀ìn Gèɖèpɔ́ɔ̀ dyi. Ɔ kɔ̃̀ nyɛ́nɛ́ín-nyɛ̀nɛ̀ nìà ɖé Júù-nyɔ̀ séín ɓěɔ̀ wĩín nyɛ. Gèɖèpɔ́ɔ̀ ínjà ɖò cɛ̃ɛ ma ɔ gbo, ɓɛ́ ɔ ké m̀ jè cuò, ɓɛ́ m̀ ké ɖé ɔ ɓíɖí-gbǒ zɔ̃̌ mu, ɓɛ́ ɔ ké ɖɛ m̀ ɓéɖé ɓɛ́ m̀ kéà ɔ gbo cɛ̃ɛ ɖùǔ gbo tò.”

²³ Ké Píɖɛ̀ cɛ̃ɛ ma wa gbo, ɓɛ́ wa ké ɔ ɖéè ɓě jǔ. Wéɔ̀ nyɔ kɔ ma ɓó dyíɛɛ, ɔ sɔ̀ ma dyí, ké ɔ kè wa mu ma. Ké ɔ kè ɔ ɖíí cɔ́cì-nyɔ̀ ɖíɛ́ ɓě ɓɛ́ wa nì ma ɖé hwɔɖɔɔ̀ múɛɛ mu ma ɖekè.

²⁴ Ké wéɔ̀ nyɔ kɔ ma ɓó dyíɛɛ, wa nyini ma Sɛ̀sɛ̀wíɖíà-hwɔ̀ɖɔ̀ɔ̀ mú. Kɔ̀níɖìà ɖǎ ma ɔ nyɔ ɓěɔ̀ kè ɔ mǔè péé-nyu-nyɔ̀ ɓěɔ̀ dyí poìn, ké ɔ nì ma wa fòèɛ̌n.

²⁵ Ti Píɖɛ̀ nyini ma gbǒɔ̀ zɔ̃̌ɛɛ, Kɔ̀níɖìà dyi ma ɔ hwìǐ kpɔ̃ùn, ké ɔ jìɖǐ ma Píɖɛ̀ ɓo zɔ̃̌ dyi, ké ɔ ɓiè ma ɔ.

²⁶ Kɛɛ Píɖɛ̀ sɔ̀ìn ma ɔ dyí, ké ɔ ɖá, “Sɔ̀ dyí. Mɔ́ún mɔ̀ nyɔǔn-dyù kà mɔ̀ùn nìà kɛ.”

²⁷ Ké ti ɔ kè ɔ nì ma wùɖùɛ̌n nyɛɛ, wa dyá ma ɖé gbǒɔ̀ mú. Nyɔ vò-vò ɓě poìn ma ɖé dyí, ké Píɖɛ̀ dyé ma wa.

²⁸ Ké ɔ cɛ̃ɛ ma wa gbo, ké ɔ ɖá, “Ɓě mìɔùn dyuòɛ̀ kà ɓɛ́ ɔ se dyíin nɔ̀mɔ̀ ɓɛ́ Júù-nyɔ̀ ɓěɔ̀ ɖò kè ɓóɖó-dù kà kò ɖò nììn nyɔ ɓěɔ̀ ɖò ké xwa cáìn nyɛ, mɔɔ ɓɛ́ wa ké gboi téìn tèìn nyɛ. Kɛɛ Gèɖèpɔ́ɔ̀ ɖǎa ḿ dyí tɛ̀mɛ̀ìn kà ɓɛ́ ɔ se dyíin nɔ̀mɔ̀ ɓɛ́ ḿ kéɛ nyɔ ɖò gbo cɛ̃ kà ɔ se ɖɛ kpa mɔɔ ɔ se mú hwɛ̀ɛ.

²⁹ Ɔ jèɛɛ, ti ɓɛ́ ɓě cuòà ḿ jèɛɛ, ḿ se nɔ́ɔ̀, ké ḿ dyià kɛ̀. Tòɛ̀ ḿ ké ɓě dyi diè. Ɖɛ́ kɔ̃̀ jè ɓě ɖáà ḿ wɛ̃́?”

³⁰ Ké Kɔ̀níɖìà ɖá, “Wé tã ɖǎ ma ziɛɛ, ɓó ti nì kà kɛɛ, ḿ nì ma ɓaàǔn ɖé ḿ ɓíɖí-gbǒǔn ɓó zii-dyòɖò-gbo-dyòɖòàǔn. Wàɖà cá kɛɛ, gàa ɖò nyànà ma ɓó ḿ dyúa dyi. Ɔ po ma ɖɔ wee ɖò mú.

³¹ Ké ɔ ɖá, ‘Kɔ̀níɖìà, wùɖù m̀ wùɖùà Gèɖèpɔ́ɔ̀ gboɛɛ, ɔ ɖǎa wɔ̃́, ké nyíí-ɖɛ̀ ɓě ɓɛ́ m̀ nyíà nyɔ ɓěɔ̀ kɛɛ jè ɖǎ ɔ hwìɖǐi dyi.

³² Ɔ jèɛɛ, ɖoɓo nyɔ ɖé Jɔ́pà-hwɔ̀ɖɔ̀ɔ̀ mú, ɓɛ́ m̀ ké Sã́ɓò kɔ̃̀ nyɛ́nɛ́ tɔ̀ɔ̀ mɔ̀à Píɖɛ̀ kɛɛ ɖá. Ɔ mɔ̀ Sã́ɓò mɔ̀à kúɖúù-ɖáɓá-nyɔ̀ɔ̀ kɛɛ nììn ɖéè. Sã́ɓòɛ̀ gbǒɔ̀ nì ɖé dyóóɔ̀ wĩín.’

³³ Ɔ kɔ̃̀ jè ḿ cuò ma kà m̀ jè wàɖà kɛ̀. Ké m̀ ɖǎà ḿ bìì dyiɛ̀. Ké kàǔn wɛ̃ɛ, à séín ɖǎ dà dyí poìn ɓó Gèɖèpɔ́ɔ̀ dyúa, ɓɛ́ à ké ɖɛ séín ɓɛ́ Bounɓoɔ̀ cɛ̃ ma m̀ gbo, ɓɛ́ m̀ ké ma kà cɛ̃ɛ wɔ̃́.”

Píɖɛ̀ kpa wuɖu

³⁴ Ké Píɖɛ̀ ɖú ma wùɖù kpàǐ, ké ɔ ɖá, “Ḿ ɖǎa dyí dyuò wáɖáá kà ɓɛ́ Gèɖèpɔ́ɔ̀ se nyɔ ɖò mú ɖɛ̀ɓɛ̀ mìɔ, ɓɛ́ ɔ ké nyɔ tɔ̀ɔ̀ ɖò mɔ̀ùn dyí ziɛ.

³⁵ Kɛɛ ɖé ɓóɖó-dù séín kɔ̃ɛɛ, nyɔ ɓě ɓɛ́ wa mu ɔ dyi fɛ̃̀ìn, ké wa mu ɖɛ mɔ̀ dyí-sɛ́ɖɛ́ìn-ɖɛ̀ kɛɛ nyuùn wɛ̃ɛ, wa mɔ̀ nyɔ ɖé Gèɖèpɔ́ɔ̀ mu dyi kpɔ̃ùn.

³⁶ Gèɖèpɔ́ɔ̀ tò ma bɔ̃̌ nɔ̀mɔ̀ dyíinɔ̀ ɖé Éézùɖùɛ̀-nyɔ̀ ɓěɔ̀ gbo. Ɔ nì ma bɔ̃̌ nɔ̀mɔ̀ dyíin ɓá gìɖìǐ ɓɛ́ ɔ dyììn kà Jízɛ̀ múɛɛ jè dyíɛɛ cɛ̃iń. Jízɛ̀ kɔ̃̀ nyɔ séín wuɖuí.

³⁷ Ɓě dyuò ɖɛ kpá ma ɖé Júù-nyɔ̀ ɓěɔ̀ ɓóɖóɔ̀ dà séín nyɛ. Ɔ dèìn ma ɖé Gáɖàɖíì-ɓòɖòɔ̀ mú gbɔ, ti Jɔ̃́ɔ́ ɖǎ ma níɔ kpá jè zio mú pòɛ̀n hwɔɛ.

³⁸ Ɓě dyuò Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ mú kɛɛ jè dyí. Gèɖèpɔ́ɔ̀ nyu ma Jízɛ̀ ɔ Kɛ́ɖɛ́ìɔ̀ mú, ti ɓɛ́ ɔ nyí ma kà ɔ Zùù Hwɛ̀ǐn-hwɛ̀ǐnɔ̀ kè kpéɔ̀ kɛ. Jízɛ̀ kpa ma nɔ̀mɔ̀ dyíin nyuɛ, ké ɔ kánáìn ma nyɔ ɓě ɓɛ́ Sétɔ̃̀ kpɔ̃ ma kànàǎ-kà kɛɛ dyi, sepóɛɖé Gèɖèpɔ́ɔ̀ nì ma ɔ gbo jè.

³⁹ Ɖɛ séín ɓě ɓɛ́ ɔ nyu ma ɖé Júù-nyɔ̀ ɓěɔ̀ ɓóɖóɔ̀ kɔ̃ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, à nyu wa zàse. Wa ɖáɓá ma ɔ ti ɓɛ́ wa ɓá ma ɔ cuɔ̀ dya dyiɛ,

⁴⁰ kɛɛ Gèɖèpɔ́ɔ̀ zà ma ɔ gĩɔ ɓó wéɔ̀ tã nììnɔ̀ ɓaɖa. Ké ɔ wɔ̃́ ɓɛ́ ɔ ké ma nyɔ dyí wóɖóìn.

⁴¹ Jízɛ̀ se ma nyɔ séín dyí wóɖóìn pū, kɛɛ ɔ wóɖóìn ma à mɔ̀ nyɔ ɓě ɓɛ́ Gèɖèpɔ́ɔ̀ gã ma kĩ́ín, ɓɛ́ à ké ma ɔ zàse-nyɔ̀ jǔ kɛɛ dyí. À mɔ̀ nyɔ ɓě ɓɛ́ à kèɔ̀ kè ɖi ma ɖɛ, ké à ná ma ní ti ɓɛ́ ɔ ɖǎ ma gĩɔ wóɖóɛ.

⁴² Ɔ cɛ̃ɛ ma à gbo, ɓɛ́ à ké ɔ jè zio po ɖé nyɔ ɓěɔ̀ gbo, ɓɛ́ à ké zàse nyu kà ɓɛ́ ɔ mɔ̀ nyɔ ɓɛ́ Gèɖèpɔ́ɔ̀ ɖǎ zɔ̃̌ɔ̀ gã, ɓɛ́ ɔ ké nyɔ ɓě nì cĩ́ɛń nyɛ kè nyɔ ɓě ɖǎ ma mɛ́ kɛɛ zaa-wɔ̃-po-nyɔ̀ jǔɛ.

⁴³ Jízɛ̀ mɔ̀ nyɔ kɔ̃̀ jè kpáá-ɖɛ̀-cɛ̃-nyɔ̀ séín ɓěɔ̀ nyu ma kà zàseɛ̀. Wa nìɛ̀ ma cɛ̃iń kà nyɔ séín ɓě ɓɛ́ wa mu ɔ hwìɖǐǐ taɓaùn wɛ̃ɛ, Gèɖèpɔ́ɔ̀ mu waà nàmàǔn ɓěɔ̀ kɔ̃in zĩ̀ìn ɖé ɔ nyɛ́nɛ́ɔ̀ mú kɛ.”

Zùù Hwɛ̀ǐn-hwɛ̀ǐnɔ̀ dyi ɓóɖó-dù kà kò ɖò ɓěɛ̀ nyɔ ɓěɔ̀ kɔ̃

⁴⁴ Ti Píɖɛ̀ nì ma ɖɛ ɓěa cɛ̃iń keɛɛ, Zùù Hwɛ̀ǐn-hwɛ̀ǐnɔ̀ dyi ma nyɔ séín ɓě ɓɛ́ wa wɔ̃́ ma bɔ̃̌ nɔ̀mɔ̀ dyíinɔ̀ kɛɛ kɔ̃.

⁴⁵ Nyɔ ɓě ɓɛ́ wa kè Píɖɛ̀ mu ma kà kɛɛ mɔ̀ ma Júù-nyɔ̀ ɓě, ké wa taɓa ma Gèɖèpɔ́ɔ̀ hwìɖǐǐ. Wa giniìn ma dyi mìɔ, sepóɛɖé ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn ɖǎ ma Gèɖèpɔ́ɔ̀ nyíí-ɖɛ̀ mɔ̀à Zùù Hwɛ̀ǐn-hwɛ̀ǐnɔ̀ kɛɛ ɓéɖé ɖekè.

⁴⁶ Wa dyuòɛ̀ kà Zùùɔ̀ dyi ma wa kɔ̃ɛ, sepóɛɖé wa wɔ̃́ ma wa wuɖu kà kò ɖò ɓě mú wùɖùɛ̀n, ké wa nì ma Gèɖèpɔ́ɔ̀ ɓàǐn. Púɛɛ, Píɖɛ̀ ɖá,

⁴⁷ “Nyɔ ɖò ɓɛ́ìn ní dyí pũɛ, ɓɛ́ à ké se nyɔ ɓě nìà kɛ níɔ poò? Sepóɛɖé wa ɖǎ Zùù Hwɛ̀ǐn-hwɛ̀ǐnɔ̀ ɓéɖé kà ɓɛ́ ɓěà mɔ̀ùn ɖǎà ɔ ɓéɖé kɛ.”

⁴⁸ Ké Píɖɛ̀ cɛ̃ɛ ma wa gbo, ɓɛ́ wa ké níɔ kpá ɖé Jízɛ̀ Kɛ́ɖɛ́ì nyɛ́nɛ́ɔ̀ mú. Ké wa cɛ̃ɛ ma Píɖɛ̀ gbo, ɓɛ́ ɔ ké ɖé wa gbo nì ke.