2 Kɔ̀ɖéíntĩ̀ɔ̀ 5 - Ɓǎsɔ́ɔ̀ Báɓòɔ̀

¹ Sepóɛɖé à dyuòɛ̀ dyí kà vàà-ɖɛ̀ ɓɛ́ à cĩ́à mú dà ɓóɖó-kpàà kɔ̃, ɓɛ́ ɔ mɔ̀à à kpóɖó-dyùà nìà kɛɛ dyi wáɖáín, nìí, à ɓéɖé poo-ɖɛ̀ ɖò ɖé dyɔún wɛ̃. Gèɖèpɔ́ɔ̀ mɔ̀ nyɔ poɛ. Ɔ mɔ̀ gbǒ ɓɛ́ nyɔǔn-dyù se poɛ, ké ɔ mɔ̀ sè-ná-sèɛ̀ ɖɛ.

² À nì vàà-ɖɛ̀ nìà kɛ xwíɖíi, ké à nì kpéɖéɛń, ɓɛ́ à ké à cĩ́-naín nìà ɖé dyɔún wɛ̃ɛ kɔ̃in po, sepóɛɖé ɔ tó nyu à ní.

³ Kɛɛ ɔ jǔ ké à dyiɛ ɓóɛ kɔ̃in po ní, nìí, à se nìɛ̌ mu ɓɛ́ à ké se kpóɖó-dyùà ɖò ɓéɖé.

⁴ Kà ɓɛ́ à nìà vàà-ɖɛ̀ nìà kɛ xwíɖíi cĩ́ɛń keɛɛ, nìí, ɔ nì kà à ɓéɖéà gbɛ̌ ku xwa, ké à nìà ɔ xwíɖíi kpòɛ̌n nyɛ. Ɔ se ɖɛ ɓɛ́ à ké mɔ́ ɓɛ́ à kpóɖó-dyùà sùàɔ̀ ké à mú sɔ̀ɛ, kɛɛ à mɔ́ ɓɛ́ ɔ ɖieɔ̀ ké ɔ kɔ̃in kpá, ɓɛ́ fɛ̀ɛ̀ɔ̀ ké ɖɛ muà mɛ́ìn nyɛɛ dyi zĩ̀ìn.

⁵ Gèɖèpɔ́ɔ̀ mɔ̀ nyɔ dyéìn ma à ti ɓó ɖɛ nìà kɛ jè, ké ɔ nyí ma ɔ Zùùɔ̀ à, ɓɛ́ ɔ ké ɖɛ séín ɓě ɓɛ́ ɔ ɓéɖé à bììɛɛ ɓo-kɔ̃-pòìn-ɖɛ̀ jǔ.

⁶ Ɔ jèɛɛ, à ku hwòɖǒ ti séín. À dyuòɛ̀ dyí kà à dyi à kpóɖó-dyùàɔ̀ mú cĩ́ɛń nì ke ní, nìí, à se Bounɓoɔ̀ ɓíɖí nì kɛ.

⁷ À cĩ́ ɖé hwìɖǐǐ-taɓa-taɓa mú. À se cĩ́ ɓó ɖɛ ɓě ɓɛ́ à dyéɖé dyéɛɛ jè.

⁸ À ku hwòɖǒ. À muɛ mú ɖɛ̀ɓɛ̀ìn ɓɛ́ à ké à kpóɖó-dyùàɔ̀ dyi táà, ɓɛ́ à ké ɖé Bounɓoɔ̀ gbo nì.

⁹ Ɔ jèɛɛ, kɛbì à mɛ nì nɔ̄ à ɓíɖí, mɔɔ kɛbì à mɛ nì ɖé ɔ gboɛɛ, ɖɛ kpɔ̃ à hwòɖǒ cáa mɔ̀ ɓɛ́ à ké ɔ hwòɖǒ dyi dè.

¹⁰ Sepóɛɖé à séín ɓéɖé ɓɛ́ à ké Kɛ́ɖɛ́ì zaa-wɔ̃-po-poɔ̀ dyúa mu, ké nìí, ɖɛ ɖò se gàǐn mu, ɓɛ́ à séín ké ɖɛ à ɓéɖé ɓɛ́ à ké dyé ɓó ɖɛ ɓɛ́ à ɖǎ nyu ɖé à kpóɖó-dyùàɔ̀ múɛ jèɛɛ dyé, kɛbì à mɛ nyu ma ɖɛ nɔ̀mɔ̀ dyíin mɔɔ ɖɛ nyìnììn dyíin nyuɛ.

À kè Gèɖèpɔ́ɔ̀ mɔ̀ǎ ɓǎto dyììn ɖé Kɛ́ɖɛ́ì mú

¹¹ À dyuò ɖɛ mɔ̀ Bounɓoɔ̀ dyi-fɛ̃̀ìn-fɛ̃̀ìn xwíníín nyɛ. Ɔ jèɛɛ, à nì vɔ̃uń ɓɛ́ à ké nyɔǔn pɛ́í po. Gèɖèpɔ́ɔ̀ dyuò nyɔ à jǔɛɛ dyí, ké ḿ dèɛ̀ hwòɖǒ kɔ̃ kà ɓě dyuò nyɔ ɓɛ́ à mɔ̀ùn jǔ jɛ́ɛ́ kɛɛ dyí ɖé ɓě hwòɖǒ-dyùà ɓěɔ̀ mú ɖekèɛ.

¹² À se vɔ̃uń nì ɓɛ́ à ké à mìɔùn ɓě dyí tɛ̀mɛ̀ìn ɖe. À nì ɓě ti nyíɛń, ɓɛ́ ɓě ké à jè múàǔn kpá, ɓɛ́ ɓě ké ɖɛ ɖò ɓéɖé, ɓɛ́ ɓě kéɛ nyɔ ɓě mɔ̀à múàǔn-kpá-nyɔ̀ ɓó kà nyɔ ɖò nyu nìɛ̀ ɓó ɔ ku kɔ̃in, ké ɔ se kà ɔ nyu nìɛ̀ ɖé ɔ hwòɖǒ-dyùà dyéɖéíɛ jèɛɛ gbo cɛ̃.

¹³ À hwòɖǒ-dyùà dyi cáín, nìí, ɔ mɔ̀ ɓó Gèɖèpɔ́ɔ̀ jè. Ké à hwòɖǒ-dyùà se cáín, nìí, ɔ mɔ̀ ɓó ɓě mɔ̀ùn jè.

¹⁴ Sepóɛɖé ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Kɛ́ɖɛ́ì ɓéɖé à bììɛɛ kɔ̃̀ à wuɖuí. Sepóɛɖé à ɖǎa dyí dyuò kà nyɔ dyúáɖò mɛ́ ma ɓó nyɔ séín bììɛ. Ɔ jèɛɛ, ɔ kè nyɔ séín peɖeìn ɔ mɛ́-mɛ́ɔ̀ mú.

¹⁵ Ɔ mɛ́ ma ɓó nyɔ séín bìì, ɓɛ́ nyɔ ɓě nìà cĩ́ɛń nyɛɛ ké se wa mìɔùn bìì cĩ́ ɖe, kɛɛ ɓɛ́ wa kéá cĩ́ ɓó nyɔ ɓɛ́ ɔ mɛ́ ma, ké Gèɖèpɔ́ɔ̀ zà ma kà ɔ gĩɔ ɓó wa jèɛɛ bìì.

¹⁶ À ní poìn nyɔ ɖò jè hwìɖǐi kà ɓóɖó-kpàà nyɔ ɓě nyuà kɛɛ ɖe. À ɖǎ ma Kɛ́ɖɛ́ì jè hwìɖǐi poìn kĩ́ín kà ɓóɖó-kpàà nyɔ ɓě nyuà kɛɛ dyɛo, kɛɛ à ní nyuɛ náa ɖe.

¹⁷ Ɔ jèɛɛ, nyɔ ɖò kè Kɛ́ɖɛ́ì dyi nyɔ dyúáɖò jǔǐn, nìí, Gèɖèpɔ́ɔ̀ ɖǎ ɔ nyu ɖe ɖie. Ɖɛ ɓě nì ma kĩ́ín nyɛɛ ɖǎ dyi zi. Ké dyéɛ, wa ɖǎ ɖɛ ɖìè jǔ.

¹⁸ Gèɖèpɔ́ɔ̀ mɔ̀ nyɔ nyu ɖɛ séín ɓě nìà kɛ. Gèɖèpɔ́ɔ̀ ɖǎ bĩ̀ǎ nì ma ɓó à kè ɔ pṹa kɛɛ zà dyììn ɖé Kɛ́ɖɛ́ì mú. Ké ɔ ɖǎ à kũ̀à mɔ̀à bĩ̀ǎ-zà-zà jè cɛ̃-cɛ̃ kɛɛ nyí.

¹⁹ Ɖɛ à cɛ̃à kɛɛ mɔ̀ Gèɖèpɔ́ɔ̀ nì ma bĩ̀ǎ ɓɛ́ ɔ nìà ɓó ɔ kè ɓóɖó-kpàà pṹa kɛɛ zàǔn dyììn ɖé Kɛ́ɖɛ́ì mú. Ɔ se ma waà ɖɛ gbà ɓěɔ̀ kpa wa dyí zàǐn nì ɖe, ké ɔ ɖǎ à wuɖu ɓá bĩ̀ǎ-zà-zàɔ̀ jè dyíɛɛ gbo sè, ɓɛ́ à kéɛ cɛ̃.

²⁰ Ɔ jèɛɛ, à mɔ̀ Kɛ́ɖɛ́ì bɛ̃̌ǐn-nyɔ̀ ɓě, kà Gèɖèpɔ́ɔ̀ mìɔùn nìɔ̌ kà ɓě gbo wùɖùɛ̌n dyììn ɖé à múɛ. À ɓaà ɓě ɓó Kɛ́ɖɛ́ì jè, ɓě mɛ wɔ̃́ ɓɛ́ Gèɖèpɔ́ɔ̀ ké bĩ̀ǎ nìà ɓó ɓě kèɔ̀ kè pṹa kɛɛ zà.

²¹ Kɛ́ɖɛ́ì se ma nàmàǔn ɖò nyu fɔɔ, kɛɛ Gèɖèpɔ́ɔ̀ nyu ma ɔ nàmàǔn mú ɓó à jè, ɓɛ́ à mɔ̀ nyɔ ɓɛ́ à kè Kɛ́ɖɛ́ì mɔ̀à nyɔ dyúáɖò kɛɛ, à kè Gèɖèpɔ́ɔ̀ ké ɔ dyí-sɛ́ɖɛ́ìn-sɛ́ɖɛ́ìnɔ̀ mú peɖeìn.