2 Kɔ̀ɖéíntĩ̀ɔ̀ 2 - Ɓǎsɔ́ɔ̀ Báɓòɔ̀

¹ Ní hwòɖǒɔ̀ poɛ ma gbɔ, ɓɛ́ ḿ ké se ɖé ɓě gbo dyi ɖe, ɓɛ́ ḿ kɔ̃̀ɔ̀ ɖà nyuín, wìì ní kɔ̃̀ ɖà ɓě nyu.

² Ɔ jǔ ké ḿ dyiɔ́ɔ nyu ɓɛ́ wìì ké ɓě nyuín, nìí, nyɛ́ muɛ nyuùn ɓɛ́ mɔ́ún ké múà ɓéɖéɛ́? Ɔ sèìn nyɔ ɓɛ́ ḿ nyuɛ ké wìì nyuà kɛɛ ɖòùn.

³ Ɖɛ nìà kɛ ɔ ɖé ḿ cɛ̃à ní céè-ɖɛ̀ɔ̀ múɛ̀. Ḿ se mɔ́ ɓɛ́ ḿ ké ma ɖé ɓě gbo dyi, ɓɛ́ nyɔ ɓě kéɔ́ɔ kà nyu ɓɛ́ ḿ kéɔ́ kà múà ɓéɖéɛɛ kéɛ nyu, ɓɛ́ wìì ké ḿ nyu. Ḿ dè ɓě hwòɖǒ kɔ̃ kà ɓɛ́ ḿ dyi múà ɓéɖéín, nìí, ɓě séín ɓéɖé múà kɛ.

⁴ Ti ɓɛ́ ḿ céè ma ɓě gboɛɛ, ní hwòɖǒɔ̀ nyùìn ma ḿ fũ̀à-fṹá mìɔ. Ké ɔ gbaà ma dyi, ké ḿ vĩ̌ ma mìɔ. Ḿ seɛ ma náa nyu, ɓɛ́ wìì ké ɓě nyu, kɛɛ ḿ nyuɛ ma náa, ɓɛ́ ɓě kéɛ dyí dyuò kà ɓɛ́ ḿ zi ɓě mú ɖɛ̀ɓɛ̀ǐn mìɔ kɛ.

Ɓě mɛ zĩ̀ìn ɖɛ ɓɛ́ ɖɛ-gbà-nyu-nyɔ̀ɔ̀ nyuɛɛ kɔ̃in

⁵ Nyɔ ɖò dyiɛ ma nyu ké wìì dyi ma nyɔ ɖò nyuín, nìí, ɔ seɛ ma ḿ bũ̌ nyu, kɛɛ ɔ ɖǎ ɔ ɖò wè ɓě séín bũ̌ nyu. Ḿ se ɓéɖé ɓɛ́ ḿ ké ɖɛ ḿ cɛ̃à kɛɛ dyí ɓúáìn.

⁶ Gǎ nì kà ɓɛ́ ɓě pàɖǎ dyéàìn nyɔɔ̀ kɛɛ, ɔ ɖǎ dyí vò ɓó ɔ bìì.

⁷ Kàǔn wɛ̃ɛ, ɓě mɛ zĩ̀ìn ɖɛ ɔ nyuà kɛɛ kɔ̃in, ké ɓě mɛ nyuɛ ɓɛ́ ɔ hwòɖǒ ké dyi dè, ɓɛ́ wìì ní kɔ̃̀ ɖà ɔ nyuɛń zi mìɔ, ɓɛ́ ɔ ní kɔ̃̀ ɖà mɛ̀ɛ̀-mɛ̀ɛ̀ nì.

⁸ Ɔ jèɛɛ, ní ɓaà ɓě ní, ɓě mɛ nyuɛ ɓɛ́ ɔ kéɛ dyí dyuò kà ɓɛ́ ɓě ɖɛ̀ɓɛ̀ ɔ mú jɛ́ɛ́ kɛ.

⁹ Ɖɛ kɔ̃̀ jè ḿ céè ma kà ɓě gboɛɛ, ɔ kɛà kɛ̀. Ɔ mɔ̀, ɓɛ́ ḿ ké ɓě mú dɔ̃̌, ɓɛ́ ḿ kéɛ dyé kɛbì ɓě nyu ní wuɖu séín ɓěɔ̀ ní.

¹⁰ Nyɔ ɓě kɔ̃̀ ɖɛ gbà ɓě ɖǎ kɔ̃in zĩ̀ìn nyɛɛ, mɔ́ún zĩ̀ìn ɔ kɔ̃in ɖekè. Ɔ jǔ ké ḿ dyi nyɔ ɓěɔ̀ ɖɛ gbà kɔ̃in zĩ̀ìn ní, ɖɛ ḿ zĩ̀ìn kà kɔ̃in nyɛɛ, ɔ mɔ̀ ɓó ɓě jè, ɓó Kɛ́ɖɛ́ì dyúa,

¹¹ ɓɛ́ Sétɔ̃̀ ní kɔ̃̀ ɖà à toún ɖu. Sepóɛɖé à dyuò ɖɛ Sétɔ̃̀ mɔ́ ɓɛ́ ɔ ké nyuɛɛ dyí.

Pɔ́ɔ̀ hwòɖǒɔ̀ se ma dyi dè ɖé Tóɖóà-hwɔ̀ɖɔ̀ɔ̀ mú

¹² Ti ḿ mu ma ɖé Tóɖóà-hwɔ̀ɖɔ̀ɔ̀ mú, ɓɛ́ ḿ ké bɔ̃̌ nɔ̀mɔ̀ dyíin ɓá Kɛ́ɖɛ́ì dyíɛ cɛ̃ɛ, ḿ dyéɛ ma kà ɓɛ́ hwìè ɖò ɖǎ ma ɖé ḿ bìì kaà ɓó Bounɓoɔ̀ kũ̀àɔ̀ jèɛ.

¹³ Kɛɛ ní hwòɖǒɔ̀ se ma dyi dèɛ̀ ɓɛ́ìn, sepóɛɖé ḿ se ma ḿ ɖíí-gàà Tátɔ̀ ɖé dyé. Ɔ jèɛɛ, ḿ po ma nyɔ ɓě nì ma ɖéɛɛ, hwuɖu ɖǎ hwɔ, ké ḿ mu ma ɖé Màsèdónìà-ɓòɖòɔ̀ kɔ̃.

À ɓéɖé to-ɖu-ɖu ɖé Kɛ́ɖɛ́ì mú

¹⁴ Kɛɛ à po Gèɖèpɔ́ɔ̀ zùo, sepóɛɖé ɔ mɔ̀ nyɔ nàìn à ti séín ɖé ɖúú ɓɛ́ à mɔ̀à Kɛ́ɖɛ́ì gǐì ɓěɔ̀ kɛɛ nìà mú ɖé Kɛ́ɖɛ́ì ɖeín ɓó ɔ to ɖu jèɛɛ mú. Gèɖèpɔ́ɔ̀ nyùìn à kũ̀à mú ɓɛ́ ɔ kéɛ nyu ɓɛ́ nyɔǔn ké Kɛ́ɖɛ́ì dyí dyuò dà séín kà nyɔ́ún-nɔ̀mɔ̀-ɖɛ̀ɛ̀ nyɔ́ ɓeàìn dyi dà séín nyɛ.

¹⁵ À nì kà nyɔ́ún-nɔ̀mɔ̀-ɖɛ̀ ɓɛ́ Kɛ́ɖɛ́ì fɔ̃̀à ɖé Gèɖèpɔ́ɔ̀ gboɛɛ nìà kɛ. Ɔ nyɔ́ɔ̀ mu nyɔ ɓě nìà póɛń nyɛ kè nyɔ ɓě nìà mú gbɔɔ̀ǔn wɛ̃ɛ gbo.

¹⁶ Ɓó nyɔ ɓě nìà mú gbɔɔ̀ǔn wɛ̃ gboɛɛ, ɔ nyɔ́ɔ̀ nì kà nyɔ ɖò ɖǎà mɛ́, ké ɔ poà nyɔ́ɛɛ nìà kɛ, ké ɔ dyà mɛ́-mɛ́. Kɛɛ ɖé nyɔ ɓě nìà póɛń nyɛ gboɛɛ, ɔ mɔ̀ nyɔ́ nɔ̀mɔ̀ dyíin, ké ɔ dyà fɛ̀ɛ̀. Nyɛ́ ɓɛ́ìn ɖɛ ɓě nìà kɛ dyíɛ́?

¹⁷ Sepóɛɖé à mɔ̀ùn se nì kà nyɔ pàɖǎ ɓɛ́ wa nyùìn kà Gèɖèpɔ́ɔ̀ bɔ̃̌ɔ̀ kũ̀à mú kà ɖɛɔ̀ mɔ̀ɔ̌ kà wíɖí-mú-mɔ́ìn-ɖɛ̀ kɛ. Gèɖèpɔ́ɔ̀ ɖǎ à tò, ké wuɖu ɓɛ́ à cɛ̃à ɖé Gèɖèpɔ́ɔ̀ dyúa kɛɛ sɔ̀ à hwòɖǒɔ̀ bũ̌ kà nyɔ ɓě cĩ́à ɖé Kɛ́ɖɛ́ì múɛɛ wùɖùà kɛ.