2 Kánáníkɔ̀ 9 - Ɓǎsɔ́ɔ̀ Báɓòɔ̀

Kã́á-màà sɔ̀ ɖé Síɓà-ɓòɖòɔ̀ kɔ̃ɛɛ té Sã́ɖómà gboi

¹ Ti ɓɛ́ kã́á-màà ɖò ɓɛ́ ɔ nì ma ɖé Síɓà-ɓòɖòɔ̀ kɔ̃ɛɛ wɔ̃́ ma Sã́ɖómàà bɔ̃̌ɛɛ, ɔ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ ké ma Sã́ɖómà mú dɔ̃̌ dyììn ɖé ɔ ɖɛ kàmàǔn-kàmàǔn ɓě dyi diè-diè mú. Màaɔ̀ dyà ma nyɔ kúɖúú kè ɖɛ kúɖúú ɓě. Ɔ dyà ma nyɔ́ún-nɔ̀mɔ̀-ɖɛ̀ɛ̀ dú kò-kò ɓě kè góò ɓáún-ɓáún kè sɔ́ɔ́ kpa ɖɛ ɓě ɓɛ́ sǒ-nì-gbu-kɔ̃ún ɓě ɓéɖé ma kɛ. Ti ɓɛ́ ɔ dyɛ̀ìn ma Sã́ɖómà kɛɛ, ɔ diè ma Sã́ɖómà dyi-diè-ɖɛ̀ séín nì ma ɔ hwòɖǒ bũ̌ɛɛ dyi.

² Ké Sã́ɖómà jǔ ma ɔ dyi-diè-ɖɛ̀ séín ɓěɔ̀ gɔ̃̌ nyɛ̀nɛ̀ɛ̀. Dyi-diè-ɖɛ̀ɔ̀ ɖò se ma mú kàmà mìɔ, ɓɛ́ Sã́ɖómà ké seɛ ma gɔ̃̌ jǔɛ ɓɛ́ìn.

³ Ké ti ɓɛ́ kã́á-màà sɔ̀à ɖé Síɓà-ɓòɖòɔ̀ kɔ̃ɛɛ wɔ̃́ ma Sã́ɖómàà fɔ̀nɔ̀-hwòɖǒ-wùɖù ɓěɔ̀, ké ɔ dyé ma kã́á-mú-cĩ́-gbò ɓɛ́ Sã́ɖómà po ma kà kɛ,

⁴ ké ɔ dyé ma ɖii-ɖɛ̀ ɓɛ́ wa dyà ma Sã́ɖómàà téɓèɖèɔ̀ gbɔɛ kè kà ɔ gɔ̌mànà-nyɔ̀ ɓěɔ̀ nyu páún kpáa kɛ kè ɔ gbo-nì-nyɔ̀ ɓěɔ̀ kè waà mú-po-ɖɔ̀ ɓěɔ̀ kè ɔ cówè ɓěɔ̀ kè waà mú-po-ɖɔ̀ ɓěɔ̀ ɔ kè kà ɔ nyu fɔ̃ɔ-sàǎ-zàìn-ɖɛ̀ ɓě nyuɛ ɖé Bounɓoɔ̀ gbǒɔ̀ múɛɛ, púɛɛ, ɔ fɔ̀nɔ̀ ma wɔ̃, ké ɔ se dyuò ɖɛ ɔ ké ma cɛ̃ɛ.

⁵ Ké ɔ cɛ̃ɛ ma Kã́á Sã́ɖómà gbo, ké ɔ ɖá, “Bɔ̃̌ ɓě ɓɛ́ ḿ wɔ̃́ ma kà ɖé ní ɓíɖí-ɓòɖòɔ̀ kɔ̃ ɓá ɖɛ ɓě m̀ ɖǎ nyuɛ kè nì hwòɖǒ-fɔ̀nɔ̀-fɔ̀nɔ̀ɔ̀ jè dyíɛɛ mɔ̀ jǎà.

⁶ Kɛɛ ḿ seɛ ma jǎà po, ɔ sèìn ké ḿ dyi, ké ḿ mìɔùn kpaà dyéɖé, ké ḿ dyéà hwɛ̀ kɛ̀. Kɛɛ mɛ̀nɛ̌-kèǐn, bɔ̃̌ ɓě ɓɛ́ ḿ wɔ̃́ ma kà ɓá nì hwòɖǒ-fɔ̀nɔ̀-fɔ̀nɔ̀ɔ̀ jè dyíɛɛ seɛ fáún-fáún dyɛ mɔ̀ùn. Nì hwòɖǒ-fɔ̀nɔ̀-fɔ̀nɔ̀ɔ̀ ɓúá kpéín mìɔ ké ɔ zi nyɔ kɔ̃̀ jè ḿ ɖúó wɔ̃́uń dyíɛɛ dyí.

⁷ Nì gbo-nì-nyɔ̀ ɓěɔ̀ kè nì gɔ̌mànà-nyɔ̀ ɓěɔ̀ dyé mana. Wa mɔ̀ nyɔ ɓě nìà ɓó m̀ ɖei ti séín, ɓɛ́ wa dyià nì fɔ̀nɔ̀-hwòɖǒ-wùɖù ɓěɔ̀ wɔ̃́ kɛ.

⁸ Ḿ po Bounɓo mɔ̀à nì Gèɖèpɔ́ɔ̀ kɛɛ zùo, sepóɛɖé ɔ hwòɖǒ dèìn m̀ múin, ké ɔ nyu m̀ ɓóɖóɔ̀ kã́á mú. Nì Gèɖèpɔ́ɔ̀ ɖɛ̀ɓɛ̀ Éézùɖùɛ̀-nyɔ̀ ɓěɔ̀ mú mìɔ, ké ɔ mɔ́ ɓɛ́ wa jè ké dúi ku kánáá pū jèɛɛ, ɔ ɖǎ m̀ kã́á mú nyu, ɓɛ́ m̀ ké ɖɛ sɛ́ɖɛ́ìn dyíɛ kè ɖɛ nɔ̀mɔ̀ dyíin nyɛɛ nyu.”

⁹ Ti ɓɛ́ kã́á-mààɔ̀ jaɖa ma wuɖuɛɛ, ɔ nyí ma Kã́á Sã́ɖómà góò ɓɛ́ ɔ xwa-ku-ku ɖu ma pṹá-dyèɖè táázĩ̀ìn mɛ̀nɛ̌ìn-hĩinyɛ kɛ kè nyɔ́ún-nɔ̀mɔ̀-ɖɛ̀ ɓáún-ɓáún ɔ kè sɔ́ɔ́ kpa ɖɛ ɓě. Nyɔ́ún-nɔ̀mɔ̀-ɖɛ̀ ɓɛ́ kã́á-mààɔ̀ nyí ma kà Sã́ɖómà kɛɛ, ɔ séè ma ɔ nì náa ɖò dyé ɖò kĩ́ín, hwɛ̀ ḿ po níiń, ɔ ké nì náa ɖò dyé ɖeɛ.

¹⁰ Ké ɓó kɔ̃in ɖeɛɛ, Kã́á Híwàɖàùn nììn gbo-nì-nyɔ̀ ɓěɔ̀ kè Sã́ɖómà nììn gbo-nì-nyɔ̀ ɓě ɓɛ́ wa zà ma kà góò ɖé Ófì-ɓòɖòɔ̀ kɔ̃ɛɛ dyà ma ámù-cù kè sɔ́ɔ́ kpa ɖɛ ɓě.

¹¹ Ké kã́áɔ̀ nyùìn ma ámù-cù ɓěɔ̀ kũ̀à mú ɓó Bounɓoɔ̀ gbǒɔ̀ kè kã́á-mú-cĩ́-gbòɔ̀ gbóó ɓě jè ɔ kè gbǎɖí-dù kò-kò ɓě jè ɓó ɓaɖaa-ɖɛ̀ ɓaɖa-nyɔ̀ ɓě bìì. Wa séè ma gbǎɖí nɔ̀mɔ̀ kɔ̃in nì náa ɖò ɖé Júɖà-ɓòɖòɔ̀ kɔ̃ dyé ɖò.

¹² Ti ɓɛ́ kã́á-màà sɔ̀à ɖé Síɓà-ɓòɖòɔ̀ kɔ̃ɛɛ ɖǎ ma Kã́á Sã́ɖómà nyíí-ɖɛ̀ ɓě nyíɛɛ, Sã́ɖómà mɔ̀ùn nyí ma ɔ jĩ́á-jè-ɖɛ̀ kúɖúú. Ké ɓó kɔ̃in ɖeɛɛ, Sã́ɖómà nyí ma ɔ ɖɛ kã̀ìn séín ɓɛ́ ɔ hwòɖǒ mɔ́ ké ɔ zɔ̀ìn ma Sã́ɖómà kɛ. Hwɛ̀ ké ɔ kè ɔ gbo-nì-nyɔ̀ ɓěɔ̀ kɔ́ìn ma ɖe, ké wa mu wa ɓíɖí-ɓòɖòɔ̀ kɔ̃ ɖe.

Kã́á Sã́ɖómàà kɔ́mɔ́ɔ̀

¹³ Góò jĩ̀ kà ɓɛ́ Sã́ɖómà dyé ma ɓó zɔ̃ xwíníín nyɛɛ xwa-ku-ku mɔ̀ ma pṹá-dyèɖè táázĩ̀ìn kpáɖá-nyɔ sɔ̃́ ɓaɖa-bùè.

¹⁴ Ɓó kɔ̃in ɖeɛɛ, ɖɛ-peɖe-nyɔ̀ ɓě pɛ́ɛ̀ìn ma ɔ tácì dyéɖéín, ké ɔ dyé ma kpáná ɖé ɖɛ-peɖe-peɖe mú. Ké Àwéɖéɓìà-ɓòɖòɔ̀ kã́á ɓěɔ̀ kè Éézùɖùɛ̀-ɓòɖòɔ̀ gbɛ̌ɛ̀ ɖò-ɖò ɓěɔ̀ nììn gɔ̌mànà-nyɔ̀ ɓěɔ̀ dyà ma Sã́ɖómà góò kè séɓàɖà gbo ɖekè.

¹⁵ Ké Kã́á Sã́ɖómà nyu ma dyí-zĩ̀ìn-ɖɛ̀ vɛ̀nɛ̀-vɛ̀nɛ̀ hɔ̃dɛ̀ɖɛ̀ sɔ̃́ ɓɛ́ wa po ma góò bũ̌in nyɛ. Góò jĩ̀ kà nì ma dyí-zĩ̀ìn-ɖɛ̀ ɓěɔ̀ ɖò-ɖò múɛɛ xwa-ku-ku ɓɛ́ìn ma pṹá-dyèɖè ɓaɖa-bùè sè hm̀m̌ jǔɛ.

¹⁶ Ké ɔ nyu ma dyí-zĩ̀ìn-ɖɛ̀ mɛ́nɛ́ɛ́ hɔ̃dɛ̀ɖɛ̀ tã ɓɛ́ wa po ma góò bũ̌in nyɛ. Góò jĩ̀ kà nì ma dyí-zĩ̀ìn-ɖɛ̀ ɓěɔ̀ ɖò-ɖò múɛɛ xwa-ku-ku ɓɛ́ìn ma pṹá-dyèɖè mɛ̀nɛ̌ìn-sɔ̃́ kè fá-kɛ́ín jǔɛ. Ɔ po ma dyí-zĩ̀ìn-ɖɛ̀ séín ɓěɔ̀ ɖé kã́á-mú-cĩ́-gbòɔ̀ ɓí-dyù ɓɛ́ wa ɖáìn Ɖɛ́ɓèɖɔ́ùn-xwàɖà-kpòòɛɛ mú.

¹⁷ Ké Sã́ɖómà nyu ma zèè vɛ̀nɛ̀ ɖò ɖekè. Zèèɔ̀ wáká ɖò mɔ̀ ma dyuɛ-nyɛ̀nɛ̀, ké wa poɛ ma wáká tɔ̀ɔ̀ góò hwɛ̀ zɛ̀nɛ̌ǐn bũ̌in.

^18-19 Zèèɔ̀ ɓéɖé ɓo-kɔ̃-síìn-ɖɛ̀ ɓɛ́ ɔ mɔ̀ góò ké ɔ gmaìn ma ɔ dyíɛ kè kɔ̃-dyáìn-naín mɛ̀nɛ̌ìn-ɖò ɓóɛ dyúa. Ké wa mɛ ma ɖɛ hwɔìn ganìǎ ɖé zèèɔ̀ kɔ̃-dyáìn-ɖɛ̀ ɓěɔ̀ ɖò-ɖòɛ̀ máná sɔ̃́ ɓěɔ̀ gbo. Ɔ poìn dyí séín mɔ̀ ma ganìǎ ɓaɖa-bùè sè sɔ̃́. Ɖé zèèɔ̀ sɔ̃-kɔ̃in-wáɖá-ɖɛ̀ ɓěɔ̀ ɖò-ɖò mánáín nyɛɛ, wa mɛ ma ɖɛ hwɔìn ganìǎ. Zèè nì náa ɖò séè kã́á-ɓòɖò ɖò mú nì ɖò.

²⁰ Sã́ɖómàà mú-náìn-kpɛ̀ɛ̀ séín ɓěɔ̀ mɔ̀ ma góò saá-saá, ké kũ̀à-mú-nyùìn-ɖɛ̀ séín nì ɖé Ɖɛ́ɓèɖɔ́ùn-xwàɖà-kpòòɔ̀ Ɓí-dyùɔ̀ múɛɛ mɔ̀ ma góò hwɛ̀ zɛ̀nɛ̌ǐn saá-saá. Séɓàɖà se ma ɖɛ kpa ɓó Sã́ɖómà nììn tiɔ̀ ɓaɖa.

²¹ Ɔ ɓéɖé ma méè kúɖúú ɖé dyóóɔ̀ kɔ̃, ké Híwàɖàùn nììn méèǐn-gɔ̀ɖɔ̀ɔ̀ ɓěɔ̀ mɔ̀ ma wa nàìn-nyɔ̀. Zɔ̃ tã dyi zi ní, ɔ méè ɓěɔ̀ dyà góò kè séɓàɖà kè dyuɛ-nyɛ̀nɛ̀ ɓě kè hwɛ̌ ɓě ɔ kè dyèɖè ɓě.

²² Kã́á Sã́ɖómà bã ma, ké ɔ fɔ̀nɔ̀ ma hwòɖǒ ké ɔ zi ma kã́á séín dyí.

²³ Ké kã́á séín mɔ́ ma dyiɛ dyi, ɓɛ́ wa ké fɔ̀nɔ̀-hwòɖǒ-wùɖù ɓě ɓɛ́ Gèɖèpɔ́ɔ̀ nyí ma kà ɔ kɛɛ ɖò wɔ̃́.

²⁴ Nyɔ séín ɓě ɓɛ́ wa dyi ma kà kɛɛ dyà ma ɔ nyíí-ɖɛ̀ ɓě. Nyɔ ɓěɔ̀ dyà ma ɔ séɓàɖà-ɖɛ̀ ɓě kè góò-ɖɛ̀ ɓě kè mú-po-ɖɔ̀ ɓě kè toún-vɔ̃̀ìn-ɖɛ̀ ɓě kè nyɔ́ún-nɔ̀mɔ̀-ɖɛ̀ ɓě kè sǒ ɓě ɔ kè jǎkasì ɓě. Kǎà wa nyuɛ ma ɓó zɔ̃ kè zɔ̃ xwíníín.

²⁵ Ké Sã́ɖómà ɓéɖé ma sǒ-nì-naín táázĩ̀ìn hĩinyɛ ɓó ɔ sǒ ɓěɔ̀ kè ɔ hwíì-sǒ ɓěɔ̀ bìì, ké ɔ ɓéɖé ma sǒ-nàìn-nyɔ̀ táázĩ̀ìn ɓaɖa-bùè sè sɔ̃́. Ɖíɛ́ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ tɔɔ sè ɓóɛɛ, ɔ dèìn ma wa ɖé hwɔɖɔ ɖò-ɖò ɓě múin.

²⁶ Kà ɓɛ́ Sã́ɖómàà kã́á-ɓòɖòɔ̀ nyu ma ɓɛ́ɛ kɛɛ mɔ̀ ɓóɖó-dù séín kpɔ̃̀àìn ɖé Dyùféɖétì-nìɔ̀ wĩín dyi, muà ɖé Féɖésìà-nyɔ̀ ɓěɔ̀ ɓóɖóɔ̀ kɔ̃ ɔ kè muà ɖé Íjè-ɓòɖòɔ̀ bã̀à dyíɛ.

²⁷ Ti ɓɛ́ Sã́ɖómà mɔ̀ ma kà kã́á kɛɛ, séɓàɖà se ma ɖɛ kpa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kà sɔ́ɔ́-kpò ɓě seà ɖɛ kpa ɓóɛ dyí vò jèɛ. Ké síɖà-cù ɓě hwɔ ma dyi púu kà síkímɔ̀-cù ɓě hwɔà dyi ɖé Júɖà Toɖo-ɓòɖòɔ̀ kɔ̃ kɛ.

²⁸ Sã́ɖómàà sǒ ɓěɔ̀, wa zà wa ɖé Íjè-ɓòɖòɔ̀ kè ɓóɖó tɔ̀ɔ̀ séín kɔ̃.

Ɖɛ tɔ̀ɔ̀ ɓě ɓá Sã́ɖómà nììn wuɖuí-kɔ̃̀-kpèɔ̀ jè dyíɛ

²⁹ Ɖɛ tɔ̀ɔ̀ séín ɓě ɓɛ́ Sã́ɖómà nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Nétɔ̃̀ mɔ̀à kpáá-ɖɛ̀-cɛ̃-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ ɓěɔ̀ mú kè ɖé Àhíjà ɓɛ́ ɔ sɔ̀à ɖé Síɖò-hwɔ̀ɖɔ̀ɔ̀ múɛɛ nììn kpáá-ɖɛ̀-cèè-ɖɛ̀ɔ̀ mú ɔ kè ɖé Íɖò mɔ̀à kpáá-ɖɛ̀-dyé-nyɔ̀ ɓɛ́ ɔ dyé ma kà ɖɛ ɓě ɓá Jɛ́ɖòbóàùn mɔ̀à Nɛ́ɓàà dyú-gààɔ̀ kɛ dyíɛɛ nììn dyí-tɛ̀mɛ̀ìn-ɖɛ̀-cèè-ɖɛ̀ɔ̀ mú.

³⁰ Sã́ɖómà mɔ̀ ma kã́á ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɓó Éézùɖùɛ̀-ɓòɖò gànáɔ̀ kɔ̃in, ɓó zɔ̃ kpáɖá-nyɔ sɔ̃́ xwíníín.

³¹ Hwɛ̀ ké ɔ mu ma ɔ ɓǎ ɓě gbo, ké wa zà ma ɔ dyóɖóún ɖé ɔ ɓǎ Dèɓé ɓíɖí-hwɔɖɔún, ké ɔ dyú-gàà kɔ̃̀ nyɛ́nɛ́ mɔ̀ Wíɖíhɔ̀bóàùn kɛɛ mɔ̀ ma kã́á ɓó ɔ bɛ̃̌ǐn.