2 Kánáníkɔ̀ 7 - Ɓǎsɔ́ɔ̀ Báɓòɔ̀

Gbǒɔ̀ Gèɖèpɔ́ɔ̀ xwáɖáún-zàìn-zàìn

¹ Ti ɓɛ́ Sã́ɖómà jaɖa ma ɔ ɓaà-wùɖùɔ̀ dúí nyɛ̀nɛ̀ɛ̀ kɛɛ, púɛɛ, nyɛ sɔ̀ ma ɖé dyɔún, ké ɔ fɔ̃ ma fɔ̃ɔ-sàǎ-zàìn-ɖɛ̀ ɓěɔ̀ kè sáa-zàìn-ɖɛ̀ tɔ̀ɔ̀ ɓěɔ̀ ɓó dyi. Ké Bounɓoɔ̀ dĩ́ín-dĩ̀ìnɔ̀ dyíìn ɖé ɔ gbǒɔ̀ múin.

² Ké sáa-zà-nyɔ̀ ɓěɔ̀ se ma ɖé Bounɓoɔ̀ gbǒɔ̀ mú dyáa ɓɛ́ìn, sepóɛɖé Bounɓoɔ̀ dĩ́ín-dĩ̀ìnɔ̀ dyíìn ma ɖé ɔ gbǒɔ̀ múin.

³ Ti ɓɛ́ Éézùɖùɛ̀-nyɔ̀ séín ɓěɔ̀ dyé ma nyɛɔ̀ dyɔún sɔ̀ɔ̀, ké wa dyé ma Bounɓoɔ̀ dĩ́ín-dĩ̀ìnɔ̀ ɖé ɔ gbǒɔ̀ múɛɛ, púɛɛ, wa taɓa ma dú hwuɖu, ké waà dyúa-kpà dè ma ɓó ɓíɖíi dyi. Ké wa ɖú ma Bounɓoɔ̀ ɓiè kpàǐ, ké wa nì ma zùo poɛń, ké wa ɖá, “Bounɓoɔ̀ kpeɖe nɔ̀mɔ̀ dyíin, ké ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ se sèìn-naín ɖò kɔ̃̀.”

⁴ Hwɛ̀ ké Kã́á Sã́ɖómà kè nyɔ séín ɓěɔ̀ zà ma sáa ɖé Bounɓoɔ̀ gbo.

⁵ Ɖɛ ɓě ɓɛ́ kã́áɔ̀ kè nyɔ ɓěɔ̀ zàìn ma kà sáa kɛɛ mɔ̀ ma ɓìɖǐ táázĩ̀ìn kpáɖá-nyɔ sè sɔ̃́ kè ɓáɖáá táázĩ̀ìn hɔ̃dɛ̀ɖɛ̀ ɖò kè táázĩ̀ìn kpáɖá-nyɔ. Kǎà kã́áɔ̀ kè nyɔ séín ɓěɔ̀ nyu ma gbǒɔ̀ Gèɖèpɔ́ɔ̀ xwáɖáún zàìn.

⁶ Ɓó tia ɓaɖaa, Éézùɖùɛ̀-nyɔ̀ séín ɓěɔ̀ nyànà ma dyi. Sáa-zà-nyɔ̀ ɓěɔ̀ nyànà ma ɓó wa nììn pá ɓěɔ̀ mú dyi, ké Ɖíìváà-nyɔ̀ ɓěɔ̀ hwɔ ma ɖé wa dyúa dyí. Sáa-zà-nyɔ̀ ɓěɔ̀ nì ma gã̀à ɓaɖauń, ké Ɖíìváà-nyɔ̀ ɓěɔ̀ nì ma ɓaɖaa-ɖɛ̀ ɓě ɓɛ́ Kã́á Dèɓé nyu zɔ̃̌ɔ̀ kà ɓɛ́ wa ké Bounɓoɔ̀ ɓàìn ɓó ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jèɛɛ ɓaɖauń.

⁷ Ɓó wéɔ̀ ɓaɖaa, Sã́ɖómà po ma kɔ̃̀pã́ùn nìà ɓó Bounɓoɔ̀ gbǒɔ̀ dyúa kɛɛ hwòɖǒǔn wáká, ké ɓóɛ̀ ɔ nyùìn ma sáa-zàìn-ɖɛ̀ ɓěɔ̀. Ɔ nyu ma fɔ̃ɔ-sàǎ-zàìn-ɖɛ̀ ɓě kè ɖii-ɖɛ̀-sàǎ-zàìn-ɖɛ̀ ɓě, ké ɔ fɔ̃ ma nyúà-ɖɛ̀ mɔ̀à gbo-kpɔ̃ìn-sàǎ-zàìn-ɖɛ̀ ɓěɔ̀ kɛɛ nììn cánáɔ̀. Ɔ nyuɛ ma náa, sepóɛɖé bàɖàsǐ-gbàà ɓɛ́ ɔ nyu ma kà kɛɛ se ma pá ɓéɖé ɓó sáa-zàìn-ɖɛ̀ séín ɓěɔ̀ jè.

^8-9 Ké Sã́ɖómà kè Éézùɖùɛ̀-nyɔ̀ séín ɓě poìn ma kà dyíɛɛ zà ma sáa-kɔ̃-zàìn-gbààɔ̀ xwáɖáún ɓó wé mɛ̀nɛ̌ìn-sɔ̃́ xwíníín. Sɔ̀ìn ɓóɛ gboɛɛ, wa pàìn ma Ɓeè-Dyù-hwɔ̀ɔ̀ ɓó wé mɛ̀nɛ̌ìn-sɔ̃́ ɖò xwíníín ɖe. Nyɔ kúɖúú dyi ma hwɔɔ̀ kɔ̃ sɔ̀ìn ɖé ɓóɖóɔ̀ gboi. Ɔ hwɔìn kà sɔ̀ìn ɖé Ɖíɓò-Hámà-hwɔ̀ɖɔ̀ɔ̀ mú, nyinià ɖé ní nìà ɖé Íjè-ɓòɖòɔ̀ bã̀àɔ̀ dyíɛɛ wĩín nyɛ. Ké ɓó wéɔ̀ mɛ̀nɛ̌ìn-tã nììnɔ̀ ɓaɖaa, wa poìn ma dyí ɓó Bounɓoɔ̀ ɓiè jè.

¹⁰ Ké ɓó dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ wé kpáɖá-nyɔ sè tã nììnɔ̀ ɓaɖaa, Sã́ɖómà ɖoɓo ma nyɔ ɓěɔ̀ wa ɓíɖí-taún ɖe. Wa kpa ma múà nyuɛ ɓó mana jĩ̀ kà ɓɛ́ Bounɓoɔ̀ ɖǎ ma kà Dèɓé kè Sã́ɖómà ɔ kè Éézùɖùɛ̀-nyɔ̀ ɓěɔ̀ kɔ̃ poɛɛ jè.

Gèɖèpɔ́ɔ̀ wóɖóìn Sã́ɖómà dyí ɖe

¹¹ Ti ɓɛ́ Sã́ɖómà ɖǎ ma Bounɓoɔ̀ gbǒɔ̀ kè kã́á-mú-cĩ́-gbòɔ̀ poɛ hwɔ kà ɔ nyuɛ ma kà dyí sɔ́ɔ kɛɛ,

¹² púɛɛ, Bounɓoɔ̀ wóɖóìn ma ɔ dyí ɓó máaún-hwùɖù ɖò mú, ké ɔ cɛ̃ɛ ma ɔ gbo, ké ɔ ɖá, “Ḿ ɖǎ nì ɓaà-wùɖùɔ̀ wɔ̃́, ké ḿ ɖǎ pá nìà kɛ gã, ɓɛ́ ɖé ké ḿ gbo sáa-zàìn-naín jǔ.

¹³ Ɔ jǔ ké ḿ dyi dyɔɔ̀ dyí kã, ké ní ɖò ní ɖaɓa ɖe ní, mɔɔ ké ḿ dyiɛ nyu ɓɛ́ kpã̌ùn-tò ké ɓáá-ɖɛ̀ séín nì ɓóɖóɔ̀ kɔ̃ɛɛ ɖi ní, mɔɔ ké ḿ dyi wɛ́ nyìnììn dyíin ɖò ɖé ní nyɔ ɓěɔ̀ hwìɛ̀ tò ní,

¹⁴ ké ní nyɔ ɓě ɓɛ́ wa mùìn kà ḿ nyɛ́nɛ́ín nyɛɛ dyi wa mìɔùn ɓíɖíi dyà, ké wa dyi ḿ ɓaà, ké wa dyi ḿ gbo ɖe dyi, ké wa dyi waà kpeɖe gbà ɓěɔ̀ kɔ̃ín pòìn ní, nìí, mɔ̄ nìà ɖé dyɔún wɛ̃ɛ, ní mu waà ɓaà-wùɖùɔ̀ wɔ̃́ùn, ɓɛ́ ḿ ké waà nàmàǔnɔ̀ kɔ̃in zĩ̀ìn, ɓɛ́ ḿ ké waà ɓóɖóɔ̀ dyi kánáìn.

¹⁵ Ní mu ɖùǔ tòùn, ɓɛ́ ḿ ké ɓaà-wùɖù séín ɓɛ́ wa mu pá nìà kɛ mú nyuùn wɛ̃ɛ wɔ̃́.

¹⁶ Sepóɛɖé ḿ ɖǎ gbǒ nìà kɛ gã, ké ḿ ɖǎa wáká po, ɓɛ́ ɖé ké ḿ ɓièìn-naín jǔ kánáá pū. Ní muɛ dyí gmɔ̀ùn kánáá pū.

¹⁷ Ɔ jǔ ké m̀ dyi ḿ kíɖíí sí kà m̀ ɓǎ Dèɓé nì ma kà kɛ, ké m̀ dyi ní gma ɓěɔ̀ dyi kpɔ̃, ké m̀ dyi ɖɛ séín ɓě ɓɛ́ ḿ cɛ̃à m̀ gboɛɛ nyu ní,

¹⁸ nìí, ní mu ɖɛ ḿ ɖáìn ma kà m̀ ɓǎ Dèɓé nyɛ́nɛ́ín nyɛɛ nyuùn. Ḿ cɛ̃ɛ ma ɔ gbo kà ɓɛ́ ɔ xwíníín-dyù ɓě mɔ̀ nyɔ mu Éézùɖùɛ̀-ɓòɖòɔ̀ wuɖuí kɔ̃̀ùn kánáá pūɛ.

¹⁹ Kɛɛ ɓě dyi ḿ kíɖíí síɛ ɓɔ́, ké ɓě dyi ní gma ɓě ɓɛ́ ḿ ɖǎà ɓě nyíɛɛ mú jaɖa, ké ɓě dyi gèɖèpɔ́ɔ̀ kà kò ɖò ɓě ɓiè ní,

²⁰ nìí, ní mu ɓě nɔ̄ ɓóɖó ɓɛ́ ḿ ɖǎà ɓě nyíɛɛ kɔ̃ zàùn kà nyɔ zàà ɓáá-ɖɛ̀ hwuɖuɛ. Ké ní mu gbǒ ɓɛ́ ḿ ɖǎà wáká po ɓɛ́ ɖé kéà ḿ ɓièìn-naín jǔɛɛ dyi táàùn, ké ɔ mu nɔ́ɔ́-dyi-pòìn-ɖɛ̀ kè dyɔ́-cù jǔùn ɖé nyɔ ɓě nìà ɓó ɓě ɖeiɛɛ gbo.

²¹ Ké ɓá gbǒ nìà kɛ ɓɛ́ ɔ ɓéɖéà dya-dè-dèɛɛ jè dyíɛɛ, nyɔ séín ɓě muɛ dyíin ziìn nyɛɛ mu dyi giniìn, ɓɛ́ wa ké ɖɛi diè, ɓɛ́ wa ké níiń, ‘Ɖɛ́ kɔ̃̀ jè Bounɓoɔ̀ nyuà ɖɛ nì kàà ɓóɖó nìà kɛ kè gbǒ nìà kɛ bũ̌ kɛ́?’

²² Ké nyɔǔn ɓě mu wa gɔ̃̌ jǔùn, ɓɛ́ wa ké níiń, ‘Ɖɛ kɔ̃̀ jè ɔ nìà náa mɔ̀ sepóɛɖé wa táà Bounɓo mɔ̀à wa ɓǎ ɓěɛ̀ Gèɖèpɔ́ɔ̀ ɓɛ́ ɔ zà zɔ̃̌ɔ̀ kà wa ɓǎ nììn ɓǎ ɓěɔ̀ ɖé Íjè-ɓòɖòɔ̀ kɔ̃ɛɛ dyi jè. Wa ɖǎ gèɖèpɔ́ɔ̀ kà kò ɖò ɓě dyí ɖú, ké wa ɖǎ wa ɓiè. Ɖɛ kɔ̃̀ jè Bounɓoɔ̀ dyàà mú-gbɔɔ̀-gbɔɔ̀ nìà kɛ wa kɔ̃ɛɛ nìàǒ wɛ̀.’ ”