2 Kánáníkɔ̀ 5 - Ɓǎsɔ́ɔ̀ Báɓòɔ̀

¹ Ti ɓɛ́ Sã́ɖómà ɖǎ ma Bounɓoɔ̀ gbǒɔ̀ kũ̀à séín ɓěɔ̀ gbo hwɛ̀ kɛɛ, ɔ po ma ɖɛ séín ɓě ɓɛ́ ɔ ɓǎ Dèɓé ɖǎ ma wáká po ɓó Bounɓoɔ̀ bììɛɛ ɖé ɖɛ-dyi-dèìn-naín ɓě nìà ɖé Gèɖèpɔ́ɔ̀ gbǒɔ̀ múɛɛ mú. Ɖɛ ɓěɔ̀ mɔ̀ séɓàɖà kè góò ɔ kè ɖɛ tɔ̀ɔ̀ ɖíɛ́ ɓě.

Wa dyà gma-gbɔ̀ɖɔ̀ɔ̀ ɖé Gèɖèpɔ́ɔ̀ gbǒɔ̀ mú

² Ti ɓɛ́ gbǒɔ̀ ɖǎ ma hwɛ̀ kɛɛ, Kã́á Sã́ɖómà poìn ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓě sɔ̀ìn ɖé xwéɖé-dù ɖò-ɖò séín kè gbǒ-xwíníín ɖò-ɖò séín múɛɛ dyí ɖé ɔ gbo, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ma Bounɓoɔ̀ gma-gbɔ̀ɖɔ̀ɔ̀ ɖé Zádyɔún-hwɔ̀ɖɔ̀ mɔ̀à Dèɓé ɓíɖí-hwɔ̀ɖɔ̀ɔ̀ kɛɛ mú zà, ɓɛ́ wa kéɛ ɖéɛ Gèɖèpɔ́ɔ̀ gbǒɔ̀ mú kpa.

³ Wa séín poìn ma dyí ɓó Ɓeè-Dyù-hwɔ̀ɔ̀ tiín, ɖé waà zɔ̃ɔ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ xwíníín.

⁴ Ti ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ hwɛ̀ ma ɖeɛɛ, púɛɛ, Ɖíìváà-nyɔ̀ ɓěɔ̀ ɖú ma gma-gbɔ̀ɖɔ̀ɔ̀ dyí,

⁵ ké wa dyàà ma ɖé Gèɖèpɔ́ɔ̀ gbǒɔ̀ gbo. Ké sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ jàɖàìn ma Bounɓoɔ̀ jàɖàìn-gbòɔ̀ kè kũ̀à-mú-nyùìn-ɖɛ̀ séín ɓáa dyíɛɛ ɖé Gèɖèpɔ́ɔ̀-gbòɔ̀ mú.

⁶ Ké Kã́á Sã́ɖómà kè Éézùɖùɛ̀-nyɔ̀ séín ɓěɔ̀ poìn ma ɓó gma-gbɔ̀ɖɔ̀ɔ̀ gbo dyí, ké wa zàìn ma ɓáɖáá kè ɓìɖǐ kúɖúú ɓɛ́ wa se zɛɖɛɛ ɓɛ́ìn nyɛɛ sáa.

⁷ Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ ɖú ma gma-gbɔ̀ɖɔ̀ɔ̀ dyí, ké wa kpaa ɖéɛ Gèɖèpɔ́ɔ̀ gbǒɔ̀ Pá Hwɛ̀ Mú Mìɔɔ̀ mú, ké wa dèɛ̀ ɖéɛ dyi, hwɔ ɓó cɛ́ɖɔ̀ ɓěɔ̀ pìɔ̌-kpà ɓěɔ̀ xwíɖíi dyí.

⁸ Cɛ́ɖɔ̀ ɓěɔ̀ pìɔ̌-kpà pɛ́ɛ̀ kɔ̃in ɓěɔ̀ tò ma ɓó gbɔ̀ɖɔ̀ɔ̀ kè ɔ ɓéɖéìn-cù ɓěɔ̀ kɔ̃in.

⁹ Gbɔ̀ɖɔ̀ɔ̀ ɓéɖéìn-cù ɓěɔ̀ tɔ̀mɔ̀ ma mìɔ jèɛɛ, waà máná tò ma píé sɔ̀ìn ɖé pá hwɛ̀ǐn-hwɛ̀ǐnɔ̀ mú, kɛɛ nyɔ nì ɖé píéɛɛ se ma wa dyéɛ ɓɛ́ìn. Gbɔ̀ɖɔ̀ɔ̀ ɓéɖéìn-cù ɓěɔ̀ nì ɓó ke ɓó zɛ̃̌ɛ̀.

¹⁰ Ɖɛ kà kò ɖò se ma ɖé gma-gbɔ̀ɖɔ̀ɔ̀ mú nì, ɔ sèìn sɔ́ɔ́-pĩ̀à sɔ̃́ ɓɛ́ Mózè po zɔ̃̌ɔ̀ kà ɖé ti ɓɛ́ Éézùɖùɛ̀-nyɔ̀ ɓěɔ̀ nì ma kà ɖé Sányà-tòɖòɔ̀ gboɛ. Ɔ mɔ̀ ti ɓɛ́ Bounɓoɔ̀ kè wa dè zɔ̃̌ɔ̀ wuɖu ti ɓɛ́ wa nì ma kà ɖé Íjè-ɓòɖòɔ̀ kɔ̃ sɔ̀ǔn wɛ̃.

Bounɓoɔ̀ dĩ́ín-dĩ̀ìnɔ̀ dyi ɖé ɔ gbǒɔ̀ mú

^11-13 Ɔ nì ná kɛɛ, sáa-zà-nyɔ̀ séín ɓě nì ma ɓóɛɛ ɖǎ ma wa mìɔùn mú hwɔ, kɛbì wa mɛ ɓéɖé ma kpoo ɖò-ɖò mú sɔ̀ǔn wɛ̃. Ké Ɖíìváà-nyɔ̀ ɓěɔ̀ ɓeɖe-nyɔ̀ ɓě ɓɛ́ wa mɔ̀ Ásàfì kè Hémàùn kè Jɛ̀ɖúfùùn kè waà dyú-gàà ɓě ɔ kè waà ɖíí-gàà ɓě kɛɛ po ma ɖénì-ɖɔ̀ nɔ̀mɔ̀ kɔ̃in mú, ké wa nì ma bàɖàsǐ-pĩ̀à ɓě kè gbǎɖí-dù kò-kò ɓě ɓaɖauń, ké wa nyànà ma ɖé sáa-kɔ̃-zàìn-gbààɔ̀ dyóɖó-xwáɖáún-wóɖóìn-naínɔ̀ dyi. Ké sáa-zà-nyɔ̀ hɔ̃dɛ̀ɖɛ̀ ɖò kè kpáɖá-nyɔ nì ma ɓó ɖekè, ké wa mɔ̀ùn nì ma gã̀à ɓě ɓaɖauń. Ɓaɖaa-ɖɛ̀ ɓaɖa-nyɔ̀ ɓěɔ̀ kè ɓeɖe-nyɔ̀ ɓěɔ̀ kũ̀à mɔ̀ ɓɛ́ wa ké Bounɓoɔ̀ ɓàìn, ɓɛ́ wa ké ɔ zùo po. Waà Bounɓoɔ̀ ɓàìn-ɓàìn ɖé wɛ́ɖɛ́-wùɖù kè ɓaɖaa-ɖɛ̀-wùɖù múɔ̀ dyi ma jùù. Waà wɛ́ɖɛ́-wùɖùɔ̀ ɖá, “Bounɓoɔ̀ kpeɖe nɔ̀mɔ̀ dyíin, ké ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ se sèìn-naín ɖò kɔ̃̀.” Ti ɓɛ́ sáa-zà-nyɔ̀ ɓěɔ̀ nì ma ɖé pá hwɛ̀ǐn-hwɛ̀ǐnɔ̀ mú sɔ̀ǔn nyɛ̀nɛ̀ɛ̀ kɛɛ, ní-kpò ɖò dyíìn ɖé Bounɓoɔ̀ gbǒɔ̀ mú dyí.

¹⁴ Bounɓoɔ̀ dĩ́ín-dĩ̀ìn nì ma ní-kpòɔ̀ múɛɛ nyuɛ ké sáa-zà-nyɔ̀ ɓěɔ̀ se ma ɖé Gèɖèpɔ́ɔ̀ gbǒɔ̀ mú dyáa ɓɛ́ìn ɖe, ɓɛ́ wa ké ma waà kũ̀à ɓěɔ̀ nyu.