2 Kánáníkɔ̀ 4 - Ɓǎsɔ́ɔ̀ Báɓòɔ̀

Gèɖèpɔ́ɔ̀ gbǒɔ̀ ɖɛ ɓěɔ̀ jè

¹ Ké Sã́ɖómà nyu ma sáa-kɔ̃-zàìn-gbàà ɖò ɓɛ́ ɔ mɔ̀ bàɖàsǐ kɛ. Ɔ tɔ̀mɔ̀-tɔ̀mɔ̀ mɔ̀ ma ɓáɖáa hm̀m̌, ké ɔ xwíɖí-kù mɔ̀ ma ɓáɖáa hm̀m̌, ké ɔ dya-tɔ̀mɔ̀-tɔ̀mɔ̀ mɔ̀ ma ɓáɖáa sɔ̃́ kè fá-kɛ́ín.

² Sɔ̀ìn ɓóɛ gboɛɛ, ɔ ɖú ma bàɖàsǐ dyí, ké ɔ nyuɛ ma mú-dèɖèìn-ɖɛ̀ vɛ̀nɛ̀ hìɖìì ɖò mú. Ɔ xwíɖí-kù mɔ̀ ma ɓáɖáa sɔ̃́ kè fá-kɛ́ín, ké ɔ xwíníín-tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́, ké ɔ wɔ̃-gbǎìn-gbǎìn mɔ̀ ma ɓáɖáa mɛ̀nɛ̌ìn-sɔ̃́ kè fá-kɛ́ín.

³ Ké ɔ mɛ ma ɖɛ hwɔìn gɔ̌-ɓò ɓěɛɛ gbɛ̌ɛ̀ sɔ̃́ mú, ké wa ɓáìn ma ɓɔ ɓɛ́ ɔ dè ma mú-dèɖèìn-ɖɛ̀ vɛ̀nɛ̀ɔ̀ wĩin nyɛɛ bũ̌in. Gɔ̌-ɓò hm̀m̌ nì ma ɓó jìì-ɓàɖàǎ dyúáɖò pá mú. Gɔ̌-ɓò ɓěɔ̀ kè mú-dèɖèìn-ɖɛ̀ vɛ̀nɛ̀ɔ̀ mɔ̀ ma ɖɛ dyúáɖò.

⁴ Mú-dèɖèìn-ɖɛ̀ vɛ̀nɛ̀ɔ̀ dè ma ɖɛ hwɔìn ɓìɖǐ ɓíɔ́ ɓɛ́ wa mɔ̀ bàɖàsǐ mɛ-mɛ kɛɛ ɓaɖa-bùè sè sɔ̃́ kɔ̃ún. Wa nyanaìn ma dyi gbɛ̌ɛ̀ hìɖìì mú, ké wa toìn ma gbɔ dyí, ké wa tã-tã gmɔ̀ìn ma ɖé wáká ɖò-ɖò kɔ̃.

⁵ Ké mú-dèɖèìn-ɖɛ̀ vɛ̀nɛ̀ɔ̀ mú-ku-ku kè xwa-pìɖì ɓɛ́ìn ní. Ɓɔ nìɛ̀ ma wĩin nyɛɛ kè ɓɔ nì ní-kpɛ̀ɛ̀ wĩin nyɛɛ hwɔìn ní, ké ɓɔɔ̀ jɛ̀ɖɛ̀ìn ɖé píé kà dòùn-dáá-bùè nìà kɛ. Ní ɓɛ́ìn ma ɖéɛ xwíníín kpáa kɛɛ mɔ̀ ma ní-dɔ̀nɔ̀ùn hɔ̃dɛ̀ɖɛ̀ tã.

⁶ Ké ɔ nyu ma mú-dèɖèìn-ɖɛ̀ ɓaɖa-bùè. Ɔ dè ma hm̀m̌ ɖé Gèɖèpɔ́ɔ̀ gbǒɔ̀ wáká hwɔà ɖé hwɔɖɔɔ̀ zɔ̃̌in dyíɛɛ kɔ̃, ké ɔ dè hm̀m̌ tɔ̀ɔ̀ ɖé gbǒɔ̀ wáká hwɔà ɖé xwía dyíɛɛ kɔ̃. Ɖéɛ̀ wa ké ma fɔ̃ɔ-sàǎ-zàìn-ɖɛ̀ ɓěɔ̀ wɔɔ̀ìn, ké mú-dèɖèìn-ɖɛ̀ vɛ̀nɛ̀ɔ̀ mɔ̀ ma sáa-zà-nyɔ̀ ɓěɔ̀ dèɖèìn-naín.

⁷ Ké ɔ nyu ma ɖáùnpò-kɔ̃-dè-ɖɛ̀ ɓaɖa-bùè ɓɛ́ wa mɔ̀ góò saá-saá kɛ kà Bounɓoɔ̀ nyuɛ ma kà cɛ̃ɛ kɛ, ké ɔ dè ma wa ɖé Gèɖèpɔ́ɔ̀ gbǒɔ̀ mú. Ɖáùnpò-kɔ̃-dè-ɖɛ̀ ɓěɔ̀ hm̀m̌ hwɔ ma ɖé gbǒɔ̀ wáká hwɔà hwɔɖɔɔ̀ zɔ̃̌in dyíɛɛ kɔ̃ dyí, ké hm̀m̌ tɔ̀ɔ̀ hwɔ ma ɖé xwía-wàkáɔ̀ kɔ̃ dyí.

⁸ Ké ɔ nyu ma téɓèɖè ɓaɖa-bùè ɖekè, ké ɔ dè ma wa ɖé Gèɖèpɔ́ɔ̀ gbǒɔ̀ mú. Hm̀m̌ hwɔ ɖé zɔ̃̌in-wàkáɔ̀ kɔ̃ dyí, ké hm̀m̌ tɔ̀ɔ̀ hwɔ ɖé xwía-wàkáɔ̀ kɔ̃ dyí. Ké ɔ nyu ma góò-gbòɖòò hɔ̃dɛ̀ɖɛ̀ ɖò.

⁹ Ké ɔ po ma kɔ̃̀pã́ùn sɔ̃́ ɖé gbǒɔ̀ ɖei. Dyúáɖò ɓíè ma dyí, ké ɔ tɔɔ ɓúá ma dyí. Ɔ tííwèɔ̀ mɔ̀ ma sáa-zà-nyɔ̀ ɓěɔ̀ nììn, ké ɔ vɛ̀nɛ̀ɔ̀ mɔ̀ ma nyɔ tɔ̀ɔ̀ ɓěɔ̀ nììn. Ké ɔ nyu ma kɔ̃̀pã́ùn ɓěɔ̀ wɔ̃ ɓěɔ̀ kĩ̀ǐn, ké ɔ po wa bàɖàsǐ bũ̌in.

¹⁰ Ké ɔ dè ma mú-dèɖèìn-ɖɛ̀ vɛ̀nɛ̀ɔ̀ ɖé gbǒɔ̀ gã nìà ɓó wáká hwɔà ɖé hwɔɖɔɔ̀ zɔ̃̌in dyíɛ kè wáká hwɔà ɖé dyóɖó-xwáɖáún-wóɖóìn-naínɔ̀ dyíɛɛ pṹa kɛɛ kɔ̃.

¹¹ Sɔ̀ìn ɓóɛ gboɛɛ, Sã́ɖómà cɛ̃ɛ ma Húwàɖàùn gbo ɖe, ké ɔ nyu ma jìà ɓě kè síɔ́ɓò ɓě ɔ kè gbòɖòò ɓě ɖekè. Ké ɔ hwɔ ma kũ̀à ɓě ɔ nyu ma kà ɓó Kã́á Sã́ɖómà bìì ɓá Gèɖèpɔ́ɔ̀ gbǒɔ̀ jè dyíɛɛ dyí.

¹² Ɖɛ ɓě ɔ nyu ma kà kɛɛ kɛà kɛ̀. Ɔ nyu ma cúè-ɓò sɔ̃́, ké ɔ nyu ma ɖɛ hwɔìn gbòɖòò sɔ̃́, ké wa nì ma ɖé cúè-ɓò ɓěɔ̀ dú-hwìɛ̀. Ké cɛ̃́ɛ̀ ɓáìn mú ɓě nì ma gbòɖòò ɓěɔ̀ bũ̌.

¹³ Ké ɖɛ hwɔìn pɔ́mɛ́gàɖànɛ̀ hɔ̃dɛ̀ɖɛ̀ hĩinyɛ nì ma ɖɛ hwɔìn gbòɖòò ɓěɔ̀ bũ̌in. Dɔ̃̀ǐn sɔ̃́ nì ma ɖɛ hwɔìn gbòɖòò ɓěɔ̀ dyúáɖò bũ̌in, ké kǎà ɔ nyu ma nìɛ̀ ɓá cúè-ɓò tɔ̀ɔ̀ nììn ɖɛ hwɔìn gbòɖòòɔ̀ dyí.

¹⁴ Ké ɔ nyu ma ɖɛ hwɔìn gbɔ̀ɖɔ̀ɔ̀ nì hwíì gbɔ ɓěɔ̀ kèɛ̀ mú-dèɖèìn-ɖɛ̀ ɓěɔ̀

¹⁵ kè mú-dèɖèìn-ɖɛ̀ vɛ̀nɛ̀ɔ̀ kè ɖɛ hwɔìn ɓìɖǐ ɓíɔ́ ɓaɖa-bùè sè sɔ̃́ ɓě ɓɛ́ ɔ dèà kɔ̃ɛ

¹⁶ kè jìà ɓěɔ̀ kè síɔ́ɓò ɓěɔ̀ ɔ kè tó-tàɓàìn-ɖɛ̀ ɓěɔ̀. Bounɓoɔ̀ gbǒɔ̀ mú-dè-ɖɛ̀ séín ɓɛ́ Húwàɖàùn nyu ma kà ɓó Kã́á Sã́ɖómà bììɛɛ mɔ̀ ma bàɖàsǐ fã-fã nyɛ̀nɛ̀ɛ̀.

¹⁷ Kã́áɔ̀ cɛ̃ɛ ma Húwàɖàùn gbo, ɓɛ́ ɔ ké ma mɛ-kpò dyí ɖú, ɓɛ́ ɔ ké ɖɛ ɓěɔ̀ hwɔìn-ɖɛ̀ mɛ, hwɛ̀ ɓɛ́ ɔ ké bàɖàsǐ ɖèìn, ɓɛ́ ɔ kéɛ ɖéɛ púè. Dɛ̀ ɓɛ́ ɔ kéɛ ma nyùìn nyɛɛ mɔ̀ ɖé Súkò-hwɔ̀ɖɔ̀ɔ̀ kè Zàwɛ́ɖɛ́fàùn-hwɔ̀ɖɔ̀ɔ̀ pṹa, ɖé Jɔ́nì-nìɔ̀ Bɔɔ-kpàɔ̀ kɔ̃.

¹⁸ Sã́ɖómà nyu ma ɖɛ ɓěa, ké wa zi ma dyí vòɛ̌n mìɔ cá, ké nyɔ ɖò se ma bàɖàsǐ jĩ̀ kà ɓɛ́ ɔ nyu ma kà ɖɛ ɓěa múɛɛ pṹá-dyèɖè dyí dyuòɛ̀ ɓɛ́ìn.

¹⁹ Ké Sã́ɖómà nyu ma góò-ɖɛ̀ ɖíɛ́ ɓě ɓó Gèɖèpɔ́ɔ̀-gbòɔ̀ bìì ɖekè. Ɖɛ ɓěɔ̀ mɔ̀ nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀ kè téɓèɖè ɓě kɔ̃̀ kɔ̃ ɓɛ́ bɛɖɛɛ̀ wa nyíà Gèɖèpɔ́ɔ̀ kɛɛ dèà dyiɛ

²⁰ ɔ kè ɖáùnpò-kɔ̃-dè-ɖɛ̀ ɓěɔ̀ kè wa nììn ɖáùnpò ɓěɔ̀. Wa mɔ̀ ɖáùnpò ɓě ɓɛ́ wa ké dyí kpɔ̃̀ìn ɓó Pá Hwɛ̀ Mú Mìɔɔ̀ dyúa kà Bounɓoɔ̀ nyuɛ ma kà cɛ̃ɛ kɛ.

²¹ Góò-ɖɛ̀ tɔ̀ɔ̀ ɓěɔ̀ mɔ̀ ɖɛ hwɔìn cu-bùè ɓěɔ̀ kè ɖáùnpò ɓěɔ̀ kè kpa-kpa-tã́ ɓěɔ̀

²² kè ɖáùnpò-mɔ́ìn-ɖɛ̀ ɓěɔ̀ kè gbòɖòò ɓěɔ̀ kè ɖɛ-fùù ɓě ɓá nyɔ́ún-nɔ̀mɔ̀-ɖɛ̀ fɔ̃ jè dyíɛ kè nyɛ-kɛ̀nɛ̀-mú-ɓéɖéìn-jìà ɓěɔ̀ ɔ kè hĩ́íjè ɓě ɓɛ́ wa nì ɓó Pá Hwɛ̀ Mú Mìɔɔ̀ gbǒ-kĩ̀ǐn ɓěɔ̀ dyií ɓá jèɛ kè Gèɖèpɔ́ɔ̀ gbǒ gànáɔ̀ píé gbǒ-wɔ̃̀ɔ̀ jèɛ. Gbǒɔ̀ xwíníín-ɖɛ̀ séín ɓěa mɔ̀ ma góò hwɛ̀ zɛ̀nɛ̌ǐn.