2 Kánáníkɔ̀ 36 - Ɓǎsɔ́ɔ̀ Báɓòɔ̀

Jɛ̀hóàhà mɔ̀à Júɖà-kã̀ǎɔ̀ kɛɛ jè

¹ Ti ɓɛ́ Jòsádyà ɖǎ ma mɛ́ɛ, ɓóɖóɔ̀ nyɔ ɓěɔ̀ ɖú ma Jɛ̀hóàhà ɓɛ́ ɔ mɔ̀ ma Jòsádyàà dyú-gàà kɛɛ dyí, ké wa nyu ma ɔ kã́á mú ɓó ɔ ɓǎ bɛ̃̌ǐn, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

² Ti ɓɛ́ Jɛ̀hóàhà dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ kpáɖá-nyɔ sè tã. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó dɛ̀nɛ̀ tã xwíníín.

³ Ké Nɛ́kò mɔ̀à Íjè-kã̀ǎɔ̀ kɛɛ ɖu ma ɔ toún, ké ɔ zà ma ɔ zèèɔ̀ kɔ̃ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké ɔ po ma Júɖà-ɓòɖòɔ̀ tácì dya. Tácì-wìɖìɔ̀ mɔ̀ ma séɓàɖà kɔ̃̀ xwa-ku-ku mɔ̀ ma pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wɛ̃ kè góò kɔ̃̀ xwa-ku-ku mɔ̀ ma pṹá-dyèɖè kpáɖá-nyɔ tã ɓaɖa-bùè sè hm̀m̌ wɛ̃.

⁴ Ké Kã́á Nɛ́kò nyu ma Ɛ̀ɖìákĩ̀ìn ɓɛ́ ɔ mɔ̀ ma Jɛ̀hóàhàà ɖíí-gàà kɛɛ kã́á mú ɓó Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃in. Ké ɔ zĩàìn ma Ɛ̀ɖìákĩ̀ìn nyɛ́nɛ́ɔ̀ gbo, ké ɔ jǔìn ma ɔ Jɛ̀hódyàkĩ̀ìn-nyɛ̀nɛ̀. Kɛɛ ɔ ɖú ma ɔ ɖíí-gàà Jɛ̀hóàhà dyí, ké ɔ kpa ma ɔ ɖé Íjè-ɓòɖòɔ̀ kɔ̃.

Jɛ̀hódyàkĩ̀ìn mɔ̀à Júɖà-kã̀ǎɔ̀ kɛɛ jè

⁵ Ti ɓɛ́ Jɛ̀hódyàkĩ̀ìn dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ kpáɖá-nyɔ sè hm̀m̌. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ ɓaɖa-bùè sè ɖò xwíníín. Ɔ nyu ma nàmàǔn Bounɓo mɔ̀à ɔ Gèɖèpɔ́ɔ̀ kɛɛ bũ̌.

⁶ Wé ɖòɛ̀ ɓaɖaa, Nɛ̀ɓùkànɛ́zà mɔ̀à Báɓèɖɔ́ùn-ɓòɖòɔ̀ kã́áɔ̀ kɛɛ dyà ma ɔ to kɔ̃, ké ɔ sã̀ìn ma ɔ dyɔ̀ɔ̌, ké ɔ kpa ma ɔ ɖé Báɓèɖɔ́ùn-ɓòɖòɔ̀ kɔ̃.

⁷ Ké ɓó kɔ̃in ɖeɛɛ, ɔ kpa ma ɖɛ ɓě nì ma ɖé Bounɓoɔ̀ gbǒɔ̀ múɛɛ ɖíɛ́ ɓě, ké ɔ po wa ɖé ɔ kã́á-mú-cĩ́-gbòɔ̀ mú, ɖé Báɓèɖɔ́ùn-hwɔ̀ɖɔ̀ɔ̀ mú.

⁸ Gèɖèpɔ́ɔ̀ dyi-nyàìn-ɖɛ̀ ɓě ɓɛ́ Jɛ̀hódyàkĩ̀ìn nyuɛ kè ɖɛ gbà ɓě nì ɖé ɔ múɛ ɔ kè ɔ nyuu-ɖɛ̀ tɔ̀ɔ̀ séín ɓěɔ̀, wa jè céè ɖé Éézùɖùɛ̀-kã̀ǎ ɓěɔ̀ kè Júɖà-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú. Ké ɔ dyú-gàà kɔ̃̀ nyɛ́nɛ́ mɔ̀ Jɛ̀hódyàcĩ̀ìn kɛɛ mɔ̀ ma kã́á ɓó ɔ bɛ̃̌ǐn.

Jɛ̀hódyàcĩ̀ìn mɔ̀à Júɖà-kã̀ǎɔ̀ kɛɛ jè

⁹ Ti ɓɛ́ Jɛ̀hódyàcĩ̀ìn dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ ɓaɖa-bùè sè mɛ̀nɛ̌ìn-tã. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó dɛ̀nɛ̀ tã kè wé ɓaɖa-bùè xwíníín. Ɔ mɔ̀ùn nyu ma Bounɓoɔ̀ nàmàǔn bũ̌ ɖekè.

¹⁰ Ti ɓɛ́ sɔ̃̀ɔ̀-tìɔ̀ nìǎ ma dyi ziɛń ɖé zɔ̃ɔ̀ xwíníín nyɛɛ, Kã́á Nɛ̀ɓùkànɛ́zà ɖoɓo ma nyɔ, ké wa kpa ma Jɛ̀hódyàcĩ̀ìn kè ɖɛ kpa ɖɛ ɓě nì ma ɖé Bounɓoɔ̀ gbǒɔ̀ múɛ. Ké Nɛ̀ɓùkànɛ́zà nyu ma Zɛ̀ɖɛ̀kíà ɓɛ́ ɔ mɔ̀ ma Jɛ̀hódyàcĩ̀ìn ɓǎ ɖíí-gàà kɛɛ kã́á mú ɓó Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃in.

Zɛ̀ɖɛ̀kíà mɔ̀à Júɖà-kã̀ǎɔ̀ kɛɛ jè

¹¹ Ti ɓɛ́ Zɛ̀ɖɛ̀kíà dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ kpáɖá-nyɔ sè dyúáɖò. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ ɓaɖa-bùè sè ɖò xwíníín.

¹² Ɔ mɔ̀ùn nyu ma nàmàǔn Bounɓo mɔ̀à ɔ Gèɖèpɔ́ɔ̀ kɛɛ bũ̌ mìɔ. Ɔ se ma ɔ mìɔùn ɓíɖíi dyà ɓó Jɛ̀ɖèmádyà mɔ̀à kpáá-ɖɛ̀-cɛ̃-nyɔ̀ kɔ̃̀ mú ɓɛ́ Bounɓoɔ̀ wùɖùìn ma kà kɛɛ dyúa.

Jùɖúsɛ̀ɖɛ̀ìn-hwɔ̀ɖɔ̀ɔ̀ wáɖá jè

¹³ Ti ɖòɛ̀ ɓaɖaa, Zɛ̀ɖɛ̀kíà po ma Kã́á Nɛ̀ɓùkànɛ́zà mɔ̀ nyɔ nyuɛ ɓɛ́ ɔ dyi ma kà wuɖu ɖi ɓó Gèɖèpɔ́ɔ̀ dyúa kà ɔ mu ɔ wuɖu nyuùn wɛ̃ɛ kɛ́ɛ́ dyí. Ɔ kùmùìn ma ɔ dúɔ̀ kè ɔ hwòɖǒ-dyùàɔ̀, ké ɔ se mɔ́ ɓɛ́ ɔ ké ma ɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gbo gmɔ̀ìn.

¹⁴ Sáa-zà-nyɔ̀ vɛ̀nɛ̀ séín ɓěɔ̀ kè nyɔ vɛ̀nɛ̀ ɓěɔ̀ mɔ̀ùn pòìn ma Bounɓoɔ̀ kɔ̃ín gàná cá, ké wa sí ma Gèɖèpɔ́ɔ̀ dyi-nyàìn-ɖɛ̀ séín ɓě ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ nyu ma kà kɛɛ kíɖíí. Ké wa nyuɛ ma ké Bounɓoɔ̀ gbǒ ɓɛ́ ɔ ɖǎ ma kà mú-hwɛ̀-pà mú nyu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ se ma mú hwɛ̀ ɖe.

¹⁵ Ké Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gã̀ ma ɔ kpáá-ɖɛ̀-cɛ̃-nyɔ̀ ɓěɔ̀ wa gbo ɖoɓoɛń dyi tee cá, sepóɛɖé ɔ ɓéɖéìn ma ɔ nyɔ ɓěɔ̀ kè ɔ cĩ́-naínɔ̀ wìì kɔ̃.

¹⁶ Kɛɛ wa nì ma Gèɖèpɔ́ɔ̀ kpáá-ɖɛ̀-cɛ̃-nyɔ̀ ɓěɔ̀ dyɔ́ ɓaɖauń kánáá pū. Wa nì ma ɔ wuɖuɔ̀ dyií dyi poɛń, ké wa nì ma ɔ kpáá-ɖɛ̀-cɛ̃-nyɔ̀ ɓěɔ̀ kéɛ̀ǐn tee ké ɔ dyoɖoɔ̀ dyi ma wa mɔ̀à ɔ nyɔ ɓěɔ̀ kɛɛ kɔ̃ hwɛ̀, ké ɖɛ ké ma wa póìn ɖeɛɛ ɖò se nì.

¹⁷ Ɔ jèɛɛ, Bounɓoɔ̀ nyuɛ ké Báɓèɖɔ́ùn-nyɔ̀ ɓěɔ̀ kã́áɔ̀ dyà ma wa to kɔ̃. Ɔ ɖáɓá ma waà gàa-dyù gmɔ̀ ɓěɔ̀ gàsíà dyí ɖé gbǒ hwɛ̀ǐn-hwɛ̀ǐnɔ̀ mú. Ɔ se ma nyɔ gmɔ̀ mɔɔ nyɔ sùà ɖò wìǐn dyé. Bounɓoɔ̀ po ma wa séín ɔ xwaún dyi nyɛ̀nɛ̀ɛ̀.

¹⁸ Ké ɖɛ séín nì ma ɖé Gèɖèpɔ́ɔ̀ gbǒɔ̀ múɛɛ, ɔ nyɔ kpa ɖɛ kɛ kè nyɔ se ɖɛ kpa kɛ kè dyi-dè-ɖɛ̀ ɓě nì ɖé kã́áɔ̀ gbǒɔ̀ mú kè ɖé ɔ gɔ̌mànà-nyɔ̀ vɛ̀nɛ̀ ɓěɔ̀ nììn gbǒ ɓěɔ̀ múɛɛ, ɔ kpa ma wa séín ɖé Báɓèɖɔ́ùn-hwɔ̀ɖɔ̀ɔ̀ mú.

¹⁹ Ké ɔ sójà ɓěɔ̀ fɔ̃ ma Gèɖèpɔ́ɔ̀ gbǒɔ̀, ké wa wáɖá ma Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔɔ̀, ké wa fɔ̃ ma to-pèɖèìn-naín séín nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ. Ké wa gbɔɔ̀ ma ɖɛ kpa ɖɛ séín nì ma ɖéɛɛ mú.

²⁰ Ké nyɔ ɓě ɓɛ́ wa se ma gàsíà dyí ɖáɓáa, ɔ nyu ma wa toɛ̀-kpɔ̃-nyɔ̀ mú, ké ɔ kpa ma wa ɖé Báɓèɖɔ́ùn-ɓòɖòɔ̀ kɔ̃, ké wa mɔ̀ ma ɔ kè ɔ dyú-gàà ɓěɔ̀ gbo-nì-nyɔ̀ ɓě tee ké ɔ dyɛ̀ìn Pɔ́sìà-kã̀ǎ-ɓòɖòɔ̀ dúi-ku-ku.

²¹ Ɖɛ ɓěa mɔ̀ wuɖu ɓɛ́ Bounɓoɔ̀ cɛ̃ ma dyììn ɖé Jɛ̀ɖèmádyà múɛɛ jǎà-kpá-kpá, ɓɛ́ ɓóɖóɔ̀ ké ma ɔ nììn fɔ̀-zɔ̃̀ ɓěɔ̀ ɓéɖé. Ti séín ɓɛ́ ɓóɖóɔ̀ kpá ma kà fóɖóún wɛ̃ɛ, ɔ ɓéɖé ma fɔ̀-fɔ̀ tee ké ɔ zĩ̀ìn ma zɔ̃ kpáɖá-nyɔ tã ɓaɖa-bùè.

Sáwàɖà zà Éézùɖùɛ̀-nyɔ̀ ɓěɔ̀ wuɖu kɔ̃, ɓɛ́ wa ké wa ɓíɖí ɖe mu

²² Ɖé Sáwàɖà ɓɛ́ ɔ mɔ̀ ma Pɔ́sìà-ɓòɖòɔ̀ kã́á kɛɛ nììn ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ínɔ̀ múɛɛ, Bounɓoɔ̀ wùɖù ma Sáwàɖà hwòɖǒ-dyùà gbo. Ɔ jèɛɛ, Sáwàɖà po ma wuɖui ɖé ɔ kã́á-ɓòɖòɔ̀ dà séín, ké ɔ toìn ma céè-ɖɛ̀ dyi ɖekè. Ɖɛ ɓɛ́ Bounɓoɔ̀ cɛ̃ó zɔ̃̌ɔ̀ dyììn ɖé Jɛ̀ɖèmádyà múɛɛ nìǎ kà kpáuń wɛ̃̀. Sáwàɖà cɛ̃ɛ, ké ɔ ɖá,

²³ “Bounɓo mɔ̀à Gèɖèpɔ́ɔ̀ nìà ɖé dyɔún wɛ̃ɛ ɖǎ ḿ kã́á-ɓòɖò séín nì toɖo-kpàà kɔ̃ɛɛ nyí. Ké ɔ ɖǎa ḿ gbo cɛ̃, ɓɛ́ ḿ ké ɔ bìì gbǒ ɖò po ɖé Jùɖúsɛ̀ɖɛ̀ìn-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú. Ɔ jèɛɛ, ɓě séín mɔ̀à Bounɓo Gèɖèpɔ́ɔ̀ nyɔ ɓěɛɛ mɛ mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe ɓó kũ̀àɔ̀ jè. Gèɖèpɔ́ɔ̀ mɛ nì ɓó ɓě gbo.”