2 Kánáníkɔ̀ 35 - Ɓǎsɔ́ɔ̀ Báɓòɔ̀

Jòsádyà pa Zĩ̀ìn-Kɔ̃in-hwɔ̀ɔ̀

¹ Ké Jòsádyà pàìn ma Bounɓoɔ̀ Zĩ̀ìn-Kɔ̃in-hwɔ̀ɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ ɓaɖaa, wa ɖáɓá ma ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛ.

² Ɓó wéa ɓaɖaa, Jòsádyà po ma sáa-zà-nyɔ̀ ɓěɔ̀ páún, ké ɔ kùìn ma waà hwòɖǒ dyi ɓó kũ̀à ɓě ɓá Bounɓoɔ̀ gbǒɔ̀ dyíɛɛ jè.

³ Ké ɔ cɛ̃ɛ ma Ɖíìváà-nyɔ̀ ɓě ɓɛ́ wa mɔ̀ ma Éézùɖùɛ̀-nyɔ̀ séín ɓěɔ̀ ɖɛ-tɛ̀mɛ̀ìn-nyɔ̀, ɓɛ́ wa kpá ma wáká ɓó Bounɓoɔ̀ bììɛɛ gbo, ké ɔ ɖá, “Ɓě dyáìn gma-gbɔ̀ɖɔ̀ɔ̀ hwɛ̀ǐn-hwɛ̀ǐnɔ̀ ɖé gbǒ ɓɛ́ Sã́ɖómà mɔ̀à Dèɓéɛ̀ dyú-gàà, ɓɛ́ ɔ mɔ̀à Éézùɖùɛ̀-ɓòɖòɔ̀ kã́áɔ̀ kɛɛ po ma kà kɛɛ mú. Ɓě ɓɔ́ɔ kɔún dyi ɓéɖéɛ̀n kánáá pū ɖe. Ɓě nyuá kũ̀à ɓó Bounɓo mɔ̀à ɓěɛ̀ Gèɖèpɔ́ɔ̀ kɛ kè ɔ nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ bìì.

⁴ Ɓě dyéìn ɓě mìɔùn ti dyììn ɖé ɓěɛ̀ gbǒ-xwíníín ɓěɔ̀ mú, ɖé ɓěɛ̀ kpoo ɖò-ɖò ɓěɔ̀ mú, kà Dèɓé mɔ̀à Éézùɖùɛ̀-kã̀ǎɔ̀ kɛ kè ɔ dyú-gàà Sã́ɖómà nyuɛ ma páún poɛ kɛɛ mú.

⁵ Ɓě mɛ nyànà dyi ɖé gbǒ hwɛ̀ǐn-hwɛ̀ǐnɔ̀ kɔ̃̀pã́ùnɔ̀ kɔ̃, ɓɛ́ ɓě ké Éézùɖùɛ̀-nyɔ̀ ɓěɔ̀ gbǒ-xwíníín ɖò-ɖò ɓěɔ̀ gbo kpá.

⁶ Ké ɓě mɛ ɖáɓá ɓáɖáá-dyù ɓě ɓáà Zĩ̀ìn-Kɔ̃in-hwɔ̀ɔ̀ jè dyíɛ, ɓɛ́ ɓě ké ɓě mìɔùn wáká po, ɓɛ́ ɓě ké ɓáɖáá-dyù ɓěɔ̀ ti dyéìn ɓó ɓě ɖíí ɓěɔ̀ bìì, kà Bounɓoɔ̀ nyuɛ ma kà cɛ̃ɛ dyììn ɖé Mózè múɛ.”

⁷ Hwɛ̀ ké Jòsádyà tò ma nyúà-ɖɛ̀ ɓě ɓó nyɔ séín ɓěɔ̀ bìì, sɔ̀ìn ɖé ɔ nyúà-ɖɛ̀ ɓěɔ̀ hwìɛ̀. Wa mɔ̀ ma ɓáɖáá-dyù kè wiɖi-dyù táázĩ̀ìn kpáɖá-nyɔ ɓaɖa-bùè kè ɓìɖǐ ɓíɔ́ táázĩ̀ìn tã. Ɔ tò ma nyúà-ɖɛ̀ ɓěa ɓó nyɔ séín ɓěɔ̀ bìì, ɓó Zĩ̀ìn-Kɔ̃in-hwɔ̀ɔ̀ sáa-zàìn-ɖɛ̀ ɓě jè.

⁸ Ké ɔ gɔ̌mànà-nyɔ̀ vɛ̀nɛ̀ ɓěɔ̀ nyí ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɔ kè nyɔ tɔ̀ɔ̀ ɓěɔ̀ nyúà-ɖɛ̀ ɓě ɖé hwòɖǒ-wɔ̃́-wɔ̃́ mú, ɓó Zĩ̀ìn-Kɔ̃in-hwɔ̀ɔ̀ sáa-zàìn-ɖɛ̀ ɓě jè. Hìòkíà kè Zɛ́kɔ̀wáɖádyà ɔ kè Jɛ̀híò ɓɛ́ wa mɔ̀ ma nyɔ vɛ̀nɛ̀ ɖé Gèɖèpɔ́ɔ̀ gbǒɔ̀ múɛɛ nyí ma sáa-zà-nyɔ̀ ɓěɔ̀ nyúà-ɖɛ̀ ɓě ɓó Zĩ̀ìn-Kɔ̃in-hwɔ̀ɔ̀ sáa-zàìn-ɖɛ̀ ɓě jè. Wa tò ma ɓáɖáá-dyù kè wiɖi-dyù táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò ɔ kè ɓìɖǐ ɓíɔ́ hɔ̃dɛ̀ɖɛ̀ tã.

⁹ Ké ɓó kɔ̃in ɖeɛɛ, Kónàníà kè Sɛ̀mádyà kè waà ɖíí-gàà Nɛ̀fánìò kè Hàsáɓíà kè Jɛ̀dyíò ɔ kè Jòzáɓà ɓɛ́ wa mɔ̀ Ɖíìváà-nyɔ̀ ɓěɔ̀ nyɔ vɛ̀nɛ̀ kɛɛ nyí ma Ɖíìváà-nyɔ̀ ɓěɔ̀ ɓáɖáá-dyù kè wiɖi-dyù táázĩ̀ìn hm̀m̌ kè ɓìɖǐ ɓíɔ́ hɔ̃dɛ̀ɖɛ̀ hm̀m̌ ɓó Zĩ̀ìn-Kɔ̃in-hwɔ̀ɔ̀ sáa-zàìn-ɖɛ̀ ɓě jè.

¹⁰ Ti ɓɛ́ ɖɛ séín ɖǎ ma ti dyé ɓó Zĩ̀ìn-Kɔ̃in-hwɔ̀ɔ̀ jèɛɛ, sáa-zà-nyɔ̀ ɓěɔ̀ nyànà ma waà pá ɓěɔ̀ mú dyi, ké Ɖíìváà-nyɔ̀ ɓěɔ̀ ɓéɖé ma waà kpoo ɓěɔ̀ mú kpáuń kà kã́áɔ̀ nyuɛ ma kà cɛ̃ɛ kɛ.

¹¹ Ké Ɖíìváà-nyɔ̀ ɓěɔ̀ ɖáɓá ma ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛ, ké sáa-zà-nyɔ̀ ɓěɔ̀ mɛ́nɛ́ìn ma nyɔmɔɔ ɓɛ́ Ɖíìváà-nyɔ̀ ɓěɔ̀ nyí ma wa xwaa dyi. Ké Ɖíìváà-nyɔ̀ ɓěɔ̀ zà ma nyúà-ɖɛ̀-kù ɓěɔ̀ kúɖúù.

¹² Ké wa po ma ɓáɖáá-dyù ɓěɔ̀ cáná-dà wáká ɓó fɔ̃ɔ-sàǎ-zàìn-ɖɛ̀ ɓě jè, nìí ɓɛ́ wa ké wa geìn dyììn ɖé kà nyɔ ɓěɔ̀ gbǒ-xwíníín ɓěɔ̀ kpoo ɖò-ɖò ɓěɔ̀ nyu nìɛ̀ kɛɛ mú, ɓɛ́ wa ké ma Bounɓoɔ̀ gbo sáa zà kà ɔ jè nyuà céèɛ̀ ɖé Mózèɛ̀ céè-ɖɛ̀ɔ̀ múɛ. Ké wa nyu ma ɓìɖǐ ɓíɔ́ ɓěɔ̀ fɔ̃ɔ-sàǎ-zàìn-ɖɛ̀ mú ɖekè.

¹³ Ké Ɖíìváà-nyɔ̀ ɓěɔ̀ po ma ɓáɖáá-dyù ɓě ɓáà Zĩ̀ìn-Kɔ̃in-hwɔ̀ɔ̀ jè dyíɛɛ suaɖɛ̀ɔ̀ dyéɖé kà gmaɔ̀ nyuà cɛ̃ɛ kɛ. Ké wa pĩ̀ìn ma sáa-zàìn-ɖɛ̀ hwɛ̀ǐn-hwɛ̀ǐn ɓěɔ̀ jìà vɛ̀nɛ̀ ɓě kè jìà ɓéɖé ɖue-wɔ̃̀ ɓě ɔ kè jìà páá ɓě mú, ké wa kpaa ma nyɔ séín ɓěɔ̀ gbo wàɖà.

¹⁴ Sɔ̀ìn ɓóɛ gboɛɛ, wa pĩ ma wa mìɔùn nììn kè sáa-zà-nyɔ̀ ɓěɔ̀ nììn, sepóɛɖé sáa-zà-nyɔ̀ ɓě mɔ̀à Eɖóúnɛ̀ xwíníín-dyù ɓěɔ̀ kɛɛ gã̀ ma fɔ̃ɔ-sàǎ-zàìn-ɖɛ̀ ɓěɔ̀ kè sáa-zàìn-ɖɛ̀ tɔ̀ɔ̀ ɓěɔ̀ cánáɔ̀ fɔ̃uń dyi tee ké tíe kpɔ̃ ma. Ɔ jèɛɛ, Ɖíìváà-nyɔ̀ ɓěɔ̀ mɔ̀ nyɔ dyéìn ma wa mìɔùn nììnɔ̀ kè sáa-zà-nyɔ̀ ɓěɔ̀ nììnɔ̀ ti.

¹⁵ Ɓó tia ɓaɖaa, ɓeɖe-nyɔ̀ ɓě mɔ̀à Ásàfìɛ̀ dyú-gàà ɓěɔ̀ kɛɛ nì ma wa nììn pá ɓěɔ̀ mú kà Dèɓé kè Ásàfì kè Hémàùn ɔ kè Jɛ̀ɖúfùùn ɓɛ́ ɔ mɔ̀à kã́áɔ̀ kpáá-ɖɛ̀-dyé-nyɔ̀ɔ̀ kɛɛ nyuɛ zɔ̃̌ɔ̀ kà cɛ̃ɛ kɛ, ké Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ nì ma gmɔ-wɔ̃̀ ɖò-ɖò ɓěɔ̀ gbo. Wa se ɓéɖé wa ké ma waà kũ̀à-kpàɔ̀ dyí sɔ̀, sepóɛɖé waà ɖíí-gàà ɓě mɔ̀à Ɖíìváà-nyɔ̀ ɓěɔ̀ kɛɛ naɓaà ma wa nììn, ké wa kpaa wa gbo.

¹⁶ Kǎà wa nyu ma Bounɓoɔ̀ Zĩ̀ìn-Kɔ̃in-hwɔ̀ɔ̀ paa ɓó wéa ɓaɖa, ké kǎà wa nyu ma fɔ̃ɔ-sàǎ-zàìn-ɖɛ̀ ɓěɔ̀ nyuɛ ɓó Bounɓoɔ̀ sáa-kɔ̃-zàìn-gbààɔ̀ kɔ̃ dyììn ɖé kà Kã́á Jòsádyà nyuɛ ma kà cɛ̃ɛ kɛɛ mú.

¹⁷ Ɓó wé mɛ̀nɛ̌ìn-sɔ̃́ xwíníín nyɛɛ, Éézùɖùɛ̀-nyɔ̀ ɓě ɓɛ́ wa gã̀ ma ɓó dyiɛɛ pa ma Zĩ̀ìn-Kɔ̃in-hwɔ̀ɔ̀ kè Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀.

¹⁸ Wa séè ma Zĩ̀ìn-Kɔ̃in-hwɔ̀ ɓɛ́ ná dyaiɛɛ ɖé Éézùɖùɛ̀-ɓòɖòɔ̀ kɔ̃ pa ɖò sɔ̀ìn ɓó Sámíò mɔ̀à kpáá-ɖɛ̀-cɛ̃-nyɔ̀ɔ̀ kɛɛ nììn tiín. Éézùɖùɛ̀-kã̀ǎ ɓěɔ̀ ɖò séè Zĩ̀ìn-Kɔ̃in-hwɔ̀ ɓɛ́ náa pa ɖò kà Jòsádyà kè sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kè Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ ɔ kè Éézùɖùɛ̀-nyɔ̀ ɓěɔ̀ nyuɛ ma kà kɛ.

¹⁹ Wa pa ma Zĩ̀ìn-Kɔ̃in-hwɔ̀ nìà kɛ ɖé Jòsádyà nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè mɛ̀nɛ̌ìn-tã nììnɔ̀ xwíníín.

Jòsádyà nììn ɓóɖó-wuɖuí-kɔ̃̀-tìɔ̀ sèìn-naín jè

²⁰ Sɔ̀ìn ɓó ɖɛ séín ɓě ɓɛ́ Jòsádyà nyu ma ɓá Gèɖèpɔ́ɔ̀ gbǒɔ̀ xwa nɔ̀mɔ̀ìn jè dyíɛ gboɛɛ, Nɛ́kò ɓɛ́ ɔ mɔ̀ ma Íjè-ɓòɖòɔ̀ kã́á kɛɛ nì ma to gbo muɛń ɖé Kákɛ̀mì-hwɔ̀ɖɔ̀ɔ̀ mú, ɖé Dyùféɖétì-nìɔ̀ wĩín, ké Jòsádyà mu ma ɔ wɔ̃, ɓɛ́ ɔ ké ma ɔ ɓɔ́í po.

²¹ Kɛɛ Nɛ́kò ɖoɓo ma nyɔ ɖé Jòsádyà gbo, ké ɔ ɖá, “Júɖà-kã̀ǎ wè, ɖɛ́ kɔ̃̀ jè à kéà gbo vɔ̃ìn vɔ̃̀ìn nyɛ́? Ḿ se m̀ to kɔ̃ dyàǔn nì ɓó tiɛ̀ mú, ɔ sèìn nyɔ ɓɛ́ ḿ kèɔ̀ kè nì toɛ, ké Gèɖèpɔ́ɔ̀ ɖá ḿ mɛ nyuɛ wàɖà. Ɔ jèɛɛ, ɓɔ́ Gèɖèpɔ́ɔ̀ ɓɛ́ ɔ nìà ḿ gboɛ gbo vɔ̃ɔ, ɔ ní kɔ̃̀ ɖà m̀ mú gbɔɔ̀.”

²² Kɛɛ wɛ̃́ɛ́ kɛɛ, Jòsádyà se ma ɔ kíɖíí sɔ̀. Ɔ zà ma ɔ kã́á-ɖɔ̀ɔ̀ mú, ɓɛ́ ɔ ké ma ɔ mìɔ-kpo dyí zàìn, nìí ɓɛ́ ɔ ké Nɛ́kò gbo vɔ̃ wɛ̃́ɛ́ jè. Ɔ se ma wuɖu sɔ̀à ɖé Gèɖèpɔ́ɔ̀ gbo, ɓɛ́ ɔ wùɖùìn kà Nɛ́kò múɛɛ ɖùǔ gbo tò, kɛɛ ɔ kpa ma Nɛ́kò to kɔ̃ ɖé Mɛ̀gíɖò Bɔɔ-kpàɔ̀ kɔ̃.

²³ Ɖé toɔ̀ gboɛɛ, sé-po-nyɔ̀ ɓěɔ̀ pòìn ma Kã́á Jòsádyà. Ké Jòsádyà cɛ̃ɛ ma ɔ sójà ɓěɔ̀ gbo, ké ɔ ɖá, “Ɓě kpa ḿ ɖe, sepóɛɖé ḿ puà ní mìɔ.”

²⁴ Ké ɔ sójà ɓěɔ̀ zà ma ɔ ɖé hwíì-sǒɔ̀ mú, ké wa kpa ma ɔ ɖé ɔ hwíì-sǒ tɔ̀ɔ̀ mú, ké wa dyà ma ɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Ké ɔ mɛ́ ma, ké wa zà ma ɔ dyóɖóún ɖé ɔ ɓǎ ɓěɛ̀ kú-toɖoɔ̀ mú. Ké Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ séín ɓěɔ̀ vĩ̌ ma ɓó Jòsádyà jè.

²⁵ Ké Jɛ̀ɖèmádyà céè ma vĩ̌-wùɖù ɖò ɖekè ɓó Jòsádyà jè. Ké ɓeɖe-gàà séín ɓěɔ̀ kè ɓeɖe-màà séín ɓěɔ̀ ɖúó Jòsádyà jè cɛ̃iń dyí ɖé waà vĩ̌-wùɖùɔ̀ mú, dyɛ̀ìn ɓó zɛ̃̌ɛ̀ kɛ. Vĩ̌-wùɖùɔ̀ wɛ́ɖɛ́ mú nyu-nyu mɔ̀ǎ ma waà kpeɖe ɖé Éézùɖùɛ̀-ɓòɖòɔ̀ kɔ̃, ké wa céèɛ̀ ɖé vĩ̌-wùɖù-cèè-ɖɛ̀ɔ̀ mú.

²⁶ Ɖɛ nɔ̀mɔ̀ dyíin ɓě ɓɛ́ Jòsádyà nyu ma ɓá ɖɛ ɓě céè ɖé Bounɓoɔ̀ gmaɔ̀ múɛɛ jè dyíɛ

²⁷ kè ɖɛ tɔ̀ɔ̀ séín ɓɛ́ ɔ nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Éézùɖùɛ̀-kã̀ǎ ɓěɔ̀ kè Júɖà-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.