2 Kánáníkɔ̀ 34 - Ɓǎsɔ́ɔ̀ Báɓòɔ̀

Jòsádyà mɔ̀à Júɖà-kã̀ǎɔ̀ kɛɛ jè

¹ Ti ɓɛ́ Jòsádyà dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ mɛ̀nɛ̌ìn-tã. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ ɓaɖa-bùè sè ɖò xwíníín.

² Jòsádyà nyu ma ɖɛ dè Bounɓoɔ̀ hwìɖǐiɛ. Ɔ ɖú ma ɔ ɓǎ nììn ɓǎ Dèɓéɛ̀ kpeɖe nɔ̀mɔ̀ kɔ̃in séín ɓěɔ̀ dyí. Ɔ se ma hwìè sɛ́ɖɛ́ìn dyíɔ̀ dyí sɔ̀ìn, ɓɛ́ ɔ ké ma ɖiaún mɔɔ kunuaún kpáìn.

Jòsádyà vɔ̃ kũùn-kpò ɓiè-ɓiè gbo

³ Ti ɓɛ́ Jòsádyà mɔ̀ ma gàa-dyù-gbɔ́ɔ́ ke ɖé ɔ ɓóɖó-wuɖuí-kɔ̃̀-zɔ̃̀ɔ̀ mɛ̀nɛ̌ìn-tã nììnɔ̀ xwíníín nyɛɛ, ɔ ɖú ma ɔ ɓǎ Dèɓéɛ̀ Gèɖèpɔ́ɔ̀ kíɖíí sí kpàǐ. Ké ɖé ɔ ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè sɔ̃́ nììnɔ̀ xwíníín nyɛɛ, ɔ zà ma kũùn-kpò ɓièìn-naín ɓě nìà ɖé toɖo ɓěɔ̀ dyaa kè Àséwàɖàà hwɔìn-ɖɛ̀ ɓěɔ̀ kè kũùn-kpò sɛ-sɛ ɓěɔ̀ ɔ kè kũùn-kpò mɛ-mɛ ɓěɔ̀ séín ɖé Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi nyɛ̀nɛ̀ɛ̀.

⁴ Ɔ nyɔ ɓěɔ̀ wáɖá ma Béò nììn sáa-kɔ̃-zàìn-gbàà ɓěɔ̀ ɓó ɔ dyéɖé waí. Ké ɔ wáɖá ma gbàà ɓě kɔ̃̀ kɔ̃ mɔ̀ nyɔ́ún-nɔ̀mɔ̀-ɖɛ̀ fɔ̃̀ìn-naín, ɓɛ́ wa nyànà ma ɓó Béòɛ̀ sáa-kɔ̃-zàìn-gbàà ɓěɔ̀ wáún dyiɛ. Ké ɔ wàìn ma Àséwàɖà nììn hwɔìn-ɖɛ̀ ɓěɔ̀ kè kũùn-kpò sɛ-sɛ ɓěɔ̀ ɔ kè kũùn-kpò mɛ-mɛ ɓěɔ̀ dyi, ké ɔ nyu ma wa pù-ɓóɖó mú, ké ɔ mɛ́nɛ́ìn pùɓóɖóɔ̀ nyɔ ɓě ɓɛ́ wa mɔ̀ ma kũùn-kpò ɓěɔ̀ gbo sáa-zà-nyɔ̀ ɓěɛɛ nììn xwɛ́-gmàà ɓěɔ̀ kɔ̃ dyi.

⁵ Ké ɔ fɔ̃̀ìn ma sáa-zà-nyɔ̀ ɓěɔ̀ kpá ɓě ɓó waà sáa-kɔ̃-zàìn-gbàà ɓěɔ̀ kɔ̃. Kǎà ɔ nyu ma Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ mú hwɔɔ.

⁶ Ké ɔ nyu ma ɖɛ dyúáɖòɔ̀ ɖé hwɔɖɔ ɓě kè hwùɖùǎ ɓě nì ma ɖé Mànásì-ɓòɖòɔ̀ kè Ífèɖèìn-ɓòɖòɔ̀ kè Símìɔ̀-ɓòɖòɔ̀ kɔ̃, dyɛ̀ìn Náfátàɖì-ɓòɖòɔ̀ kɔ̃ɛɛ mú.

⁷ Ɖé Éézùɖùɛ̀-ɓòɖòɔ̀ dà séín nyɛɛ, ɔ wáɖá ma sáa-kɔ̃-zàìn-gbàà ɓěɔ̀, ké ɔ nyu ma Àséwàɖàà hwɔìn-ɖɛ̀ ɓěɔ̀ kè kũùn-kpò tɔ̀ɔ̀ ɓěɔ̀ pù-ɓóɖó mú, ké ɔ wáɖá ma gbàà séín ɓě kɔ̃̀ kɔ̃ mɔ̀ nyɔ́ún-nɔ̀mɔ̀-ɖɛ̀ fɔ̃̀ìn-naín nyɛ. Ti ɓɛ́ ɔ ɖǎ ma ɖɛ ɓěɛ̀ nyuɛ hwɔɛɛ, ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.

Wa dyé gma-cèè-ɖɛ̀ɔ̀ da ɖe

⁸ Ɖé Jòsádyà nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè mɛ̀nɛ̌ìn-tã nììnɔ̀ xwíníín, ti ɓɛ́ ɔ ɖǎ ɓóɖóɔ̀ kè Gèɖèpɔ́ɔ̀ gbǒɔ̀ mú hwɔɛɛ, ɔ ɖoɓo ma Sáfàùn ɓɛ́ ɔ mɔ̀ ma Ázàɖíàà dyú-gàà kɛ kè Mààsédyà ɓɛ́ ɔ mɔ̀ ma Jùɖúsɛ̀ɖɛ̀ìn-hwɔ̀ɖɔ̀ɔ̀ wuɖuí-kɔ̃̀-nyɔ̀ɛ ɔ kè Jóàà ɓɛ́ ɔ mɔ̀ ma Jóàhàà dyú-gàà, ɓɛ́ ɔ mɔ̀ ma Júɖà-ɓòɖòɔ̀ céè-ɖɛ̀ céè-nyɔ̀ɛ, ɓɛ́ wa ké Bounɓo mɔ̀à ɔ Gèɖèpɔ́ɔ̀ kɛɛ gbǒɔ̀ xwa nɔ̀mɔ̀ìn ɖe.

⁹ Wa dyi ma ɖé Hìòkíà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛɛ gbo, ké wa nyí ma wíɖí ɓɛ́ nyɔ ɓěɔ̀ dyà ma ɖé Gèɖèpɔ́ɔ̀ gbǒɔ̀ múɛɛ ɔ xwa. Ɔ mɔ̀ wíɖí ɓɛ́ Ɖíìváà-nyɔ̀ ɓě mɔ̀à Gèɖèpɔ́ɔ̀ gbǒɔ̀ gbǒ-wɔ̃̀ɔ̀ dyí-gmɔ̀-nyɔ̀ ɓěɔ̀ kɛɛ kpɔ̃ ma Mànásì-nyɔ̀ ɓěɔ̀ kè Ífèɖèìn-nyɔ̀ ɓěɔ̀ kè Éézùɖùɛ̀-nyɔ̀ tɔ̀ɔ̀ ɓěɔ̀ kè Júɖà-nyɔ̀ ɓěɔ̀ kè Bɛ̃́címà-nyɔ̀ ɓěɔ̀ ɔ kè nyɔ ɓě cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ xwaún wɛ̃.

¹⁰ Ké Hìòkíà nyí ma wíɖíɔ̀ nyɔ ɓě ɓɛ́ wa ɖǎ gã, ɓɛ́ wa ké Bounɓoɔ̀ gbǒɔ̀ xwa-nɔ̀mɔ̀ìn-nyɔ̀ ɓěɔ̀ kɔ̃in-nyɔ̀ ɓě jǔɛɛ xwa. Ké wa pɛ́ɛ̀ìn ma wíɖíɔ̀ Bounɓoɔ̀ gbǒɔ̀ xwa-nɔ̀mɔ̀ìn-nyɔ̀ ɓěɔ̀.

¹¹ Ké wa nyí ma wíɖíɔ̀ ɖò ɖɛ-kɔ-nyɔ̀ ɓěɔ̀ kè poo-ɖɛ̀ po-nyɔ̀ ɓěɔ̀ xwa, ɓɛ́ wa ké sɔ́ɔ́ ɓě ɓɛ́ wa ɖǎ bũ̌in wa kĩ́ín nyɛ kè cu-pĩ̀à ɓě mɔ̀ ɖɛ-dyí-deìn-ɖɛ̀ kè pɛ̃́-nyɛ́nɛ́ín ɓěɛɛ dɔ̃ ɓó Gèɖèpɔ́ɔ̀ gbǒ ɓɛ́ Júɖà-kã̀ǎ ɓěɔ̀ ɖǎ dyi táà ké ɔ ɖǎ dyíin nyìnììn nyɛɛ xwa nɔ̀mɔ̀ìn jè.

¹² Kũ̀à-nyu-nyɔ̀ ɓěɔ̀ mɔ̀ ma hwòɖǒ-kɔ̃-dè-nyɔ̀ ɓě. Ké Ɖíìváà-nyɔ̀ ɓě mɔ̀ ma waà kɔ̃in-nyɔ̀ ɓěɛɛ kɛà kɛ̀. Wa mɔ̀ Jáhà kè Òbòdádyà ɓɛ́ wa mɔ̀ ma Mɛ̀wáɖáwìɖìɛ̀ xwíníín-dyù ɓě kɛ ɔ kè Zɛ́kɔ̀wáɖádyà kè Mɛ̀súɖàùn ɓɛ́ wa mɔ̀ ma Kóhà nììn xwíníín-dyù ɓěɛ. Wa mɔ̀ ma kũ̀àɔ̀ kɔ̃in-gmɔìn-nyɔ̀ ɓě. Ké Ɖíìváà-nyɔ̀ séín ɓě ɓɛ́ wa dyuò ma ɓaɖaa-ɖɛ̀ ɓaɖaa kɛɛ,

¹³ wa mɔ̀ ma ɖɛ-hwùɖǔ-nyɔ̀ ɓěɔ̀ kɔ̃in-nyɔ̀, ké wa mɔ̀ ma kũ̀à tɔ̀ɔ̀ ɓěɔ̀ nyɔ vɛ̀nɛ̀. Ké Ɖíìváà-nyɔ̀ ɓěɔ̀ ɖíɛ́ ɓě mɔ̀ ma céè-ɖɛ̀ céè-nyɔ̀ kè gɔ̌mànà-nyɔ̀ ɔ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě.

¹⁴ Ti ɓɛ́ gàa ɓě ɓɛ́ kã́áɔ̀ ɖoɓo ma kà kɛɛ nì ma wíɖí ɓɛ́ nyɔ ɓěɔ̀ dyà ma kà ɖé Bounɓoɔ̀ gbǒɔ̀ múɛɛ síɛ̌n nyɛɛ, Hìòkíà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyé ma ɖé céè-ɖɛ̀ kɔ̃̀ mú ɓɛ́ gma Bounɓoɔ̀ tòìn zɔ̃̌ɔ̀ kà Mózè múɛɛ céè ma kà kɛ.

¹⁵ Hwɛ̀ ké Hìòkíà cɛ̃ɛ ma Sáfàùn mɔ̀à kã́áɔ̀ céè-ɖɛ̀ céè-nyɔ̀ɔ̀ kɛɛ gbo, ké ɔ ɖá, “Ḿ ɖǎ Bounɓoɔ̀ gma-cèè-ɖɛ̀ɔ̀ ɖé ɔ gbǒɔ̀ mú dyé.” Ké ɔ nyí ma céè-ɖɛ̀ɔ̀ Sáfàùn xwa.

¹⁶ Ké Sáfàùn dyà ma céè-ɖɛ̀ɔ̀ kã́áɔ̀ gbo, ké ɔ cɛ̃ɛ ma kã́áɔ̀ gbo, ké ɔ ɖá, “Kũ̀à séín ɓě ɓɛ́ m̀ po ma nì gɔ̌mànà-nyɔ̀ ɓěɔ̀ xwaún dyiɛɛ, wa nìɛ̀ nyuɛń.

¹⁷ Wa ɖǎ wíɖí nì ma ɖé Bounɓoɔ̀ gbǒɔ̀ múɛɛ dyí ɖú, ké wa ɖǎa kũ̀àɔ̀ kɔ̃in-nyɔ̀ ɓěɔ̀ kè kũ̀à-nyu-nyɔ̀ ɓěɔ̀ xwa nyí.”

¹⁸ Ké Sáfàùn cɛ̃ɛ ma kã́áɔ̀ gbo ɖe, ké ɔ ɖá, “Hìòkíà mɔ̀à sáa-zà-nyɔ̀ vɛ̀nɛ̀ɔ̀ kɛɛ ɖǎ ḿ céè-ɖɛ̀ nìà kɛ nyío.” Ké Sáfàùn zà ma céè-ɖɛ̀ɔ̀ wuɖuún ɓó kã́áɔ̀ dyúa.

¹⁹ Ti ɓɛ́ kã́áɔ̀ wɔ̃́ ma gma-cèè-ɖɛ̀ɔ̀ wuɖuɔ̀ kɛɛ, púɛɛ, ɔ fáìn ma ɔ mìɔùn ɖɔún dyi ɖé wìì mú.

²⁰ Ké ɔ cɛ̃ɛ ma Hìòkíà kè Àhíkàùn mɔ̀ ma Sáfàùnɛ̀ dyú-gàà kɛ kè Ɛ́bɔ̀nɔ̀ mɔ̀ ma Mákàà dyú-gàà kɛ kè Sáfàùn mɔ̀à ɔ céè-ɖɛ̀ céè-nyɔ̀ɔ̀ kɛ ɔ kè Àsádyà mɔ̀ ma ɔ gbo-nì-nyɔ̀ kɛɛ gbo, ké ɔ ɖá,

²¹ “Ɓě mu, ɓɛ́ ɓě ké Bounɓoɔ̀ dyi diè ɓó ḿ kè nyɔ ɓě sè Éézùɖùɛ̀-ɓòɖòɔ̀ kè Júɖà-ɓòɖòɛ̀ kɔ̃ɛɛ bìì, ɓá ɖɛ ɓě céèà ɖé céè-ɖɛ̀ ɓɛ́ à ɖǎà dyéɛ múɛɛ jè dyí. À ɓǎ ɓě se ma Bounɓoɔ̀ wuɖuɔ̀ dyi kpɔ̃ jèɛɛ, Bounɓoɔ̀ ɖǎ à dyoɖoún kpáìn mìɔ cá. Wa se ɖɛ séín céèà nɔ̄ céè-ɖɛ̀ nìà kɛ múɛɛ nyu.”

²² Ké Hìòkíà kè nyɔ tɔ̀ɔ̀ ɓě ɓɛ́ kã́áɔ̀ ɖoɓo ma kɛɛ mu ma, ɓɛ́ wa ké ma kpáá-ɖɛ̀-cɛ̃-màà kɔ̃̀ nyɛ́nɛ́ mɔ̀ Húòɖà, ɓɛ́ ɔ mɔ̀ gàa ɖò kɔ̃̀ nyɛ́nɛ́ mɔ̀ Sáɖùùn kɛɛ gmàà kɛɛ gbo wùɖù. Sáɖùùn mɔ̀ ma Tóhàà dyú-gàà, ké Tóhà mɔ̀ ma Hásàɖà nììn dyú-gàà. Màaɔ̀ dyú-ɓǎɔ̀ mɔ̀ ma nyɔ ɓě nyuà ɖé Bounɓoɔ̀ gbǒɔ̀ mú kũ̀à kɛɛ mú-po-ɖɔ̀ ɓěɔ̀ dyí-gmɔ̀-nyɔ̀. Màaɔ̀ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ wáká wa po ma ɖieɛɛ mú. Kã́áɔ̀ gɔ̌mànà-nyɔ̀ ɓěɔ̀ mu ma ɖé ɔ gbo, ké wa zaìn ma waà hwòɖǒ-kpɔ̃-ɖɛ̀ ɓěɔ̀ ɔ gbo kɔ̃in.

²³ Ké màaɔ̀ cɛ̃ɛ ma wa gbo, ké ɔ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá ɓě mɛ cɛ̃ɛ nyɔ ɓɛ́ ɔ ɖoɓoà ɓě nɔ̄ ḿ gboɛɛ gbo, ɓɛ́ ɓě ké níiń,

²⁴ ‘Gmɔ̀ nɔ̄, Bounɓoɔ̀ ɖá ɔ mu pá nìà kɛ kè nyɔ ɓě cĩ́à dà kɛɛ gǎ kɔ̃ tòùn dyììn ɖé gboò-wùɖù séín ɓě céèà ɖé céè-ɖɛ̀ ɓɛ́ wa zàà wuɖuún ɖé mɔ̀ mɔ̀à Júɖà-kã̀ǎɔ̀ kɛ gboɛɛ mú.

²⁵ Ɔ muɛ náa nyuùn, sepóɛɖé wa ɖǎ ɔ jè dyi táà, ké wa nìǎ sáa zàǔn ɓó gèɖèpɔ́ɔ̀ kà kò ɖò ɓě bìì, ké wa ɖǎ ɔ dyoɖoún po dyììn ɖé kũùn-kpò ɓě ɓɛ́ waà sɔ̃ ɖǎ mɛ kɛɛ mú. Ɔ dyoɖoɔ̀ mu pá nìà kɛ kɔ̃ púèìn, ké nyɔ kéɛ ɓɔ́í poɛɛ ɖò se nìɛ̌ mu.’

²⁶ Ɓě cɛ̃ɛ Júɖà-kã̀ǎ mɔ̀ nyɔ ɖoɓoà ɓě ɓɛ́ ɓě kéà Bounɓoɔ̀ dyi dièɛɛ gbo, ɓɛ́ ɓě ké níiń, ‘Ɖɛ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ cɛ̃ ɓá wuɖu ɓɛ́ m̀ wɔ̃́à kɛɛ jè dyíɛɛ kɛà kɛ̀.

²⁷ Ɔ ɖá, “Ḿ ɖǎ nì wuɖuɔ̀ wɔ̃́, sepóɛɖé ti ɓɛ́ m̀ wɔ̃́ ma ɖɛ ɓɛ́ ḿ cɛ̃ ma kà ɓá pá nìà kɛ kè nyɔ ɓě cĩ́ɛ kɔ̃ɛɛ jè dyíɛɛ, nì hwòɖǒ zĩàìn ma gbo, ké m̀ dyà m̀ mìɔùn ɓíɖíi ɓó ḿ dyúa, ké m̀ fáìn ma m̀ mìɔùn ɖɔún dyi, ké m̀ vĩ̌ ma ɓó ḿ dyúa.

²⁸ Ɔ jèɛɛ, gmɔ̀ nɔ̄, ní muɛ nyuùn ɓɛ́ m̀ ké m̀ ɓǎ ɓě gbo mu, ké wa mu m̀ dyóɖóún zàùn ɖé gìɖìǐ mú. M̀ se mú-gbɔɔ̀-gbɔɔ̀ séín ní muà pá nìà kɛ kè nyɔ ɓě cĩ́à dà kɛɛ kɔ̃ dyàùn wɛ̃ɛ dyéɖéí dèɛ̌ mu.” ’ ” Ké wa kpa ma màaɔ̀ gɔ̃̌-jǔ-wùɖùɔ̀ kã́áɔ̀ gbo ɖe.

Jòsádyà ɖi wuɖu kà ɔ mu Bounɓoɔ̀ wuɖu nyuùn wɛ̃

²⁹ Ti ɓɛ́ Kã́á Jòsádyà wɔ̃́ ma kpáá-ɖɛ̀-cɛ̃-mààɔ̀ wuɖuɔ̀ kɛɛ, ɔ poìn ma Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ vɛ̀nɛ̀ séín ɓěɔ̀ dyí.

³⁰ Ké ɔ kè sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kè Jùɖúsɛ̀ɖɛ̀ìn-nyɔ̀ ɓěɔ̀ ɔ kè Júɖà-nyɔ̀ tɔ̀ɔ̀ ɓěɔ̀ mu ma ɖé Bounɓoɔ̀ gbǒɔ̀ mú. Dyú mɛ́nɛ́ɛ́ kè vɛ̀nɛ̀ poìn ma ɓó kã́áɔ̀ gbo dyí, ké ɔ zà ma dèè-wùɖù-cèè-ɖɛ̀ mɔ̀à gma-cèè-ɖɛ̀ ɓɛ́ wa dyé ma kà ɖé Bounɓoɔ̀ gbǒɔ̀ múɛɛ wuɖuún, ké wa séín wɔ̃́ɔ ma.

³¹ Kã́áɔ̀ nyànà ma ɓó ɔ páɔ̀ mú dyi, ké ɔ ɖi ma wuɖu ɓó Bounɓoɔ̀ dyúa. Wuɖu ɔ ɖià kɛɛ mɔ̀ kà ɔ mu Bounɓoɔ̀ kíɖíí síìn kóɖó-kóɖóɛ, kè kà ɔ mu ɔ gma séín ɓěɔ̀ dyi kpɔ̃ùn hwòɖǒɛ̀-ɖé-hwɛ̀-kà kɛ. Ɔ mɔ̀ kà ɔ mu ɖɛ séín ɓɛ́ dèè-wùɖù-cèè-ɖɛ̀ɔ̀ cɛ̃à kɛɛ nyuùn wɛ̃.

³² Ké ɔ nyuɛ ké Bɛ̃́címà-nyɔ̀ ɓěɔ̀ kè nyɔ tɔ̀ɔ̀ séín ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖi ma wuɖu ɓóɛ jè ɖekè. Ké nyɔ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nyu ma ɖɛ ɓɛ́ Gèɖèpɔ́ɔ̀ mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ dèè-wùɖùɔ̀ cɛ̃ ma kɛ.

³³ Ké Jòsádyà zà ma Gèɖèpɔ́ɔ̀ dyi-nyàìn-ɖɛ̀ séín ɓěɔ̀ ɖé Éézùɖùɛ̀-nyɔ̀ ɓěɔ̀ pá séín ɓěɔ̀ mú, ké ɔ nyuɛ ké nyɔ séín nì ma ɖé Éézùɖùɛ̀-ɓòɖòɔ̀ kɔ̃ɛɛ ɓiè ma Bounɓo mɔ̀à waà Gèɖèpɔ́ɔ̀ kɛ. Wa se ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kíɖíí sɔ̀ ɖé ɔ nììn fɛ̀ɛ̀-wè séínɔ̀ mú.