2 Kánáníkɔ̀ 33 - Ɓǎsɔ́ɔ̀ Báɓòɔ̀

Mànásì mɔ̀à Júɖà-kã̀ǎɔ̀ kɛɛ jè

¹ Ti ɓɛ́ Mànásì dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ ɓaɖa-bùè sè sɔ̃́. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sɔ̃́ ɓaɖa-bùè sè hm̀m̌ xwíníín.

² Mànásì nyu ma nàmàǔn Bounɓoɔ̀ bũ̌ mìɔ. Ɔ nyu ma Bounɓoɔ̀ dyi-nyàìn-kpèɖè ɓě ɓɛ́ ɓóɖó-dù ɓě ɓɛ́ Bounɓoɔ̀ nyuɛ zɔ̃̌ɔ̀ ɓɛ́ Éézùɖùɛ̀-nyɔ̀ ɓěɔ̀ dyi zɔ̃̌ɔ̀ kà wa ɓóɖóɔ̀ kɔ̃ dyi kúmúɛɛ nyu zɔ̃̌ɔ̀ kà kɛ.

³ Ɔ po ma kũùn-kpò ɓièìn-naín ɓě ɓɛ́ ɔ ɓǎ Hɛ́sèkádyà ɖǎ ma wáɖá ɖé toɖo ɓěɔ̀ dyaa ɖe. Ké ɔ po ma sáa-kɔ̃-zàìn-gbàà ɓě ɓó Béò bìì ɖekè. Ké ɔ nyànàìn cu-kpóɖó ɓě ɓɛ́ wa mɔ̀à gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓěɛɛ dyi. Ké ɔ taɓa ma dú hwuɖu, ké ɔ ɓiè ma dɛ̀nɛ̀-dyù séín nìà ɖé dyɔɔ̀ dyíɛ.

⁴ Ké ɔ po ma kũùn-kpò-gèɖèpɔ́ɔ̀ ɓěɔ̀ sáa-kɔ̃-zàìn-gbàà ɓě ɖé Bounɓoɔ̀ gbǒɔ̀ mú. Ɔ mɔ̀ dɛ̀ kɔ̃̀ jè Bounɓoɔ̀ cɛ̃ zɔ̃̌ɔ̀, ɓɛ́ ɔ dyi níiń, “Jùɖúsɛ̀ɖɛ̀ìn-hwɔ̀ɖɔ̀ɔ̀ mɔ̀ pá ɓɛ́ ḿ ɖǎ gã, ɓɛ́ nyɔǔn ké ɖé ḿ ɓièìn kánáá pū kɛ.”

⁵ Ké ɔ po ma sáa-kɔ̃-zàìn-gbàà ɓě ɓó dɛ̀nɛ̀-dyù ɓěɔ̀ bìì, ɖé Bounɓoɔ̀ gbǒɔ̀ kɔ̃̀pã́ùn sɔ̃́ɔ̀ kɔ̃.

⁶ Ké ɔ zàìn ma ɔ mìɔùn nììn dyú-gàà ɓě sáa ɖé nyɛ-ɓɔ́ɔ́ mú ɖé Hĩ́nɔ̀ Bɔɔ-kpàɔ̀ kɔ̃. Ké ɔ nyu ma hwĩɔ̀-ɖɛ̀. Ɔ po ma sɛ̀ɛ̀, ké ɔ pa ma wɔ, ké ɔ wùɖù ma gĩɔ-nyɔ̀ gbo. Ɔ nyu ma nàmàǔn Bounɓoɔ̀ bũ̌ mìɔ, ké ɔ nyuɛ ɓɛ́ Bounɓoɔ̀ ké dyoɖoún kpá mìɔ.

⁷ Ɔ ɖú ma kũùn-kpò ɓɛ́ ɔ sɛ ma kɛɛ dyí, ké ɔ dèɛ̀ ɖé Gèɖèpɔ́ɔ̀ gbǒɔ̀ mú. Ɔ mɔ̀ gbǒ kɔ̃̀ jè ɓɛ́ Gèɖèpɔ́ɔ̀ cɛ̃ zɔ̃̌ɔ̀ kà Dèɓé kè ɔ dyú-gàà Sã́ɖómà gbo, ɓɛ́ ɔ dyi níiń, “Nɔ̄ gbǒ nìà kɛ kè nɔ̄ Jùɖúsɛ̀ɖɛ̀ìn-hwɔ̀ɖɔ̀ ɓɛ́ ḿ ɖǎà gã ɖé Éézùɖùɛ̀ɛ̀ xwéɖé-dù séín ɓěɔ̀ hwìɛ̀ kɛɛ mú, ɖéɛ̀ nyɔǔn mu ḿ ɓièìn kánáá pūoɛ.

⁸ Ɔ jǔ ké Éézùɖùɛ̀-dyù ɓěɔ̀ dyi gma ɓě ɓɛ́ ḿ tò ma kà dyììn ɖé Mózè múɛɛ dyi kpɔ̃ kóɖó-kóɖó ní, ḿ seɛ nyuɛ́ mu, ɓɛ́ wa ké ɓóɖó ɓɛ́ ḿ nyíó zɔ̃̌ɔ̀ kà wa ɓǎ nììn ɓǎ ɓěɛɛ dyi táà, ɓɛ́ wa ké ɓóɖó gbo kpá ɖe.”

⁹ Mànásì zàìn ma Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ hwìǐ, ké wa nyu ma ɖɛ gbà kúɖúú ké wa zi ɓóɖó-dù ɓě ɓɛ́ Bounɓoɔ̀ nyuɛ zɔ̃̌ɔ̀ ɓɛ́ Éézùɖùɛ̀-nyɔ̀ ɓěɔ̀ dyi zɔ̃̌ɔ̀ kà wa mú gbɔɔ̀ kɛɛ dyí.

Mànásì dyà ɔ mìɔùn ɓíɖíi

¹⁰ Ɓó tia ɓaɖaa, Bounɓoɔ̀ wùɖù ma Mànásì kè ɔ nyɔ ɓěɔ̀ gbo, kɛɛ wa se ma ɔ wuɖuɔ̀ ɖùǔ gbo tò.

¹¹ Ɔ jèɛɛ, Bounɓoɔ̀ nyuɛ ké Àsíwíɖíà-kã̀ǎɔ̀ sójà-wuɖuí-kɔ̃̀-nyɔ̀ ɓě dyà ma ɔ to kɔ̃. Ké wa ɓá ma Mànásì xwɛ̃ɛ́ dyí, ké wa sã̀ìn ma ɔ dyɔ̀ɔ̌, ké wa kpa ma ɔ ɖé Báɓèɖɔ́ùn-hwɔ̀ɖɔ̀ɔ̀ mú.

¹² Ti ɓɛ́ fũ̀à-fṹá nìǎ ma ɔ nyuɛń nyɛɛ, púɛɛ, ɔ ɖú ma Bounɓo mɔ̀à ɔ Gèɖèpɔ́ɔ̀ kɛɛ ɓaà kpàǐ, ké ɔ dyà ma ɔ mìɔùn ɓíɖíi mìɔ ɓó ɔ ɓǎ nììn ɓǎ ɓěɛ̀ Gèɖèpɔ́ɔ̀ dyúa.

¹³ Ɔ ɓaà ma Gèɖèpɔ́ɔ̀, ké Gèɖèpɔ́ɔ̀ wɔ̃́ ma ɔ ɓaà-wùɖùɔ̀, ké Gèɖèpɔ́ɔ̀ dyà ɔ ɖé ɔ kã́á-ɓòɖòɔ̀ mú ɖe, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Púɛɛ, Mànásì dyuòɛ̀ ma dyí kà Bounɓoɔ̀ mɔ̀ Gèɖèpɔ́ɔ̀ kɛ.

¹⁴ Sɔ̀ìn ɓó ɖɛ ɓěɛ̀ gboɛɛ, Mànásì po ma gmɔ nìà ɖé Dèɓé ɓíɖí-hwɔ̀ɖɔ̀ɔ̀ gmɔɔ̀ ɖé píéɛɛ wáká wa wáɖá ma kɛɛ ɖe, ké ɔ nyuɛ ké ɔ tɔ̀mɔ̀ dya mìɔ. Ɔ síìn ma ɖé Gíhɔ̃̀-nì-dù nìà Kídɔ̀nɔ̀ Bɔɔ-kpàɔ̀ kɔ̃ɛɛ dyóɖó-dyi-kpáìn-naínɔ̀, ké ɔ mùìn ɖé Zimii-gmɔ̀-wɔ̃̀ɔ̀ gbo, ké ɔ zĩ̀ìn ɖé Ófɛ̀-tòɖòɔ̀ ɖei. Ké ɓó kɔ̃in ɖeɛɛ, ɔ po sójà-wuɖuí-kɔ̃̀-nyɔ̀ ɓě ɖé toún-pèɖèìn-hwɔ̀ɖɔ̀ séín ɓě nì ɖé Júɖà-ɓòɖòɔ̀ kɔ̃ɛɛ mú.

¹⁵ Ké ɔ zà ma ɓóɖó-dù kà kò ɖò ɓěɛ̀ gèɖèpɔ́ɔ̀ ɓěɔ̀ hwɔìn-ɖɛ̀ ɓěɔ̀ kè kũùn-kpòɔ̀ ɖé Bounɓoɔ̀ gbǒɔ̀ mú, ké ɔ zà ma sáa-kɔ̃-zàìn-gbàà séín ɓě ɓɛ́ ɔ po ma kà ɖé Bounɓoɔ̀ gbǒɔ̀ mú ɖé toɖoɔ̀ dya kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖé dyi, ké ɔ wáɖá wa xwáɖáún ɖé hwɔɖɔɔ̀ ɖeín.

¹⁶ Ké ɔ po ma Bounɓoɔ̀ sáa-kɔ̃-zàìn-gbààɔ̀ ɖe, ké ɔ nyùìn ma ɓó gbo-kpɔ̃ìn-sàǎ-zàìn-ɖɛ̀ ɓě kè zùo-po-sàǎ-zàìn-ɖɛ̀ ɓě. Ké ɔ po ma Júɖà-nyɔ̀ ɓěɔ̀ náún kóɖó-kóɖó, ɓɛ́ wa ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɓiè.

¹⁷ Kɛɛ wɛ̃́ɛ́ kɛɛ, nyɔ ɓěɔ̀ nì ma kũùn-kpò ɓièìn-naín ɓě nìà ɖé toɖo ɓěɔ̀ dyaa sáa zàǐn ke, kɛɛ ɔ mɔ̀ ma Bounɓo mɔ̀à waà Gèɖèpɔ́ɔ̀ kɛɛ bìì.

Mànásìɛ̀ wuɖuí-kɔ̃̀-kpèɔ̀ dúí-jɛ̀ɖɛ̀ìn-naín

¹⁸ Ɓaà-wùɖù ɓɛ́ Mànásì nyu ma ɖé ɔ Gèɖèpɔ́ɔ̀ gboɛ kè wuɖu ɓě ɓɛ́ kpáá-ɖɛ̀-dyé-nyɔ̀ ɓěɔ̀ cɛ̃ ma ɔ gbo ɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ nyɛ́nɛ́ɔ̀ múɛ ɔ kè ɔ nyuu-ɖɛ̀ tɔ̀ɔ̀ ɓěɔ̀, wa jè céè ɖé Júɖà-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

¹⁹ Ké ɓaà-wùɖù ɓɛ́ ɔ nyu ma kɛ, kè kà Gèɖèpɔ́ɔ̀ nyu ma ɔ ɓaà-wùɖùɔ̀ dyi kpɔ̃ɔ kɛ, kè nàmàǔn séín ɔ nyuɛ, kè ɔ Gèɖèpɔ́ɔ̀ dyi-táà-táàɔ̀, wa jè céè ɖé kpáá-ɖɛ̀-dyé-nyɔ̀ ɓěɔ̀ céè-ɖɛ̀ɔ̀ mú. Nàmàǔn ɓě ɓɛ́ ɔ nyu ma hwɛ̀ ɓɛ́ ɔ dyi ma kà ɔ mìɔùn ɓíɖíi dyà kɛɛ mɔ̀ kũùn-kpò ɓièìn-naín ɓě ɓɛ́ ɔ po ma kà ɖé toɖo ɓěɔ̀ dya, ɓɛ́ ɔ dyi ma kà Àséwàɖàà hwɔìn-ɖɛ̀ ɓěɔ̀ dyi nyànàìn nyɛ, ɔ kè kũùn-kpò ɓě ɓɛ́ ɔ nyu ma kɛ.

²⁰ Ké Mànásì mu ma ɔ ɓǎ ɓě gbo, ké wa zà ma ɔ dyóɖóún ɖé ɔ kã́á-gbòɔ̀ zɔ̃̌. Ké ɔ dyú-gàà kɔ̃̀ nyɛ́nɛ́ mɔ̀ Ámɔ̀ùn kɛɛ mɔ̀ ma kã́á ɓó ɔ bɛ̃̌ǐn.

Ámɔ̀ùn mɔ̀à Júɖà-kã̀ǎɔ̀ kɛɛ jè

²¹ Ti ɓɛ́ Ámɔ̀ùn dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ kpáɖá-nyɔ sè sɔ̃́. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ sɔ̃́ xwíníín.

²² Ámɔ̀ùn mɔ̀ùn nyu ma nàmàǔn Bounɓoɔ̀ bũ̌ mìɔ kà ɔ ɓǎ Mànásì nyuɛ ma kà kɛ. Ɔ zà ma sáa ɓó kũùn-kpò séín ɓě ɓɛ́ ɔ ɓǎ Mànásì nyu ma kà kɛɛ bìì, ké ɔ ɓiè wa.

²³ Ké ɔ se ma ɔ mìɔùn ɓíɖíi dyà ɓó Bounɓoɔ̀ dyúa kà ɔ ɓǎ Mànásì nyu ma kà ɔ mìɔùn ɓíɖíi dyàà kɛ. Ámɔ̀ùn nììn ɖɛ-gbà-nyu-nyuɔ̀ kpá ma kɔ̃ ɖe mìɔ.

²⁴ Wé ɖòɛ̀ ɓaɖaa, Ámɔ̀ùn nììn gɔ̌mànà-nyɔ̀ ɓěɔ̀ sɔ́ ma ɔ, ké wa ɖáɓáìn ɔ ɖé kã́á-gbòɔ̀ mú.

²⁵ Hwɛ̀ ké ɓóɖó-nyɔ̀ ɓěɔ̀ ɖáɓá ma nyɔ séín ɓě ɓɛ́ wa sɔ́ ma kà Kã́á Ámɔ̀ùn, ɓɛ́ wa dyià ɔ ɖáɓá kɛ. Ké wa nyu ma ɔ dyú-gàà kɔ̃̀ nyɛ́nɛ́ mɔ̀ Jòsádyà kɛɛ kã́á mú ɓó ɔ bɛ̃̌ǐn.