2 Kánáníkɔ̀ 32 - Ɓǎsɔ́ɔ̀ Báɓòɔ̀

Àsíwíɖíà-nyɔ̀ ɓěɔ̀ po Jùɖúsɛ̀ɖɛ̀ìn-hwɔ̀ɖɔ̀ɔ̀ fã̀àǔn

¹ Ti ɓɛ́ Hɛ́sèkádyà ɖǎ ma Bounɓoɔ̀ jǎà gbo nyu ɖé ɖɛ séín ɓěɛ̀ múɛɛ, Sánàkéwìɖì mɔ̀à Àsíwíɖíà-ɓòɖòɔ̀ kã́áɔ̀ kɛɛ dyà ma Júɖà-ɓòɖòɔ̀ to kɔ̃, ké ɔ gbǎìn ma toún-pèɖèìn-hwɔ̀ɖɔ̀ ɓěɔ̀ wɔ̃. Ɔ mɔ́ ɔ ké ma hwɔɖɔ ɓěa dyí ɖú.

² Ké ti ɓɛ́ Hɛ́sèkádyà dyéɛ ma kà Sánàkéwìɖì mɔ́ ma Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ poɛ dyiɛɛ,

³ púɛɛ, ɔ kè ɔ gɔ̌mànà-nyɔ̀ vɛ̀nɛ̀ ɓěɔ̀ kè ɔ sójà-wuɖuí-kɔ̃̀-nyɔ̀ ɓěɔ̀ sɔ́ɔ ma dyí, ɓɛ́ wa ké ma ní-dù ɓě nì ɖé hwɔɖɔɔ̀ ɖeín nyɛɛ ɓɔ́í po, ké wa nyuɛ ma náa.

⁴ Nyɔ ɓáún-ɓáún poìn ma dyí, ké wa po ma ní-dù séín nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ ɖeín nyɛɛ ɓɔ́í, sepóɛɖé wa ɖá, “À se mɔ́ Àsíwíɖíà-kã̀ǎɔ̀ dyi dyi ní ɔ ké ní pàɖǎ dyé.”

⁵ Ké Hɛ́sèkádyà kè ɔ nyɔ ɓěɔ̀ nyu ma kũ̀à gana-kà, ké wa po ma gmɔɔ̀ dɛ̀ séín ɓě wáɖá ma kɛɛ ɖe, ké ɔ po ma hwɔɖɔ-dyí-gmɔ̀ìn-gbò ɓě ɖéɛ kɔ̃in. Ké wa po ma gmɔ ɖò ɖe ɖé gmɔɔ̀ píé. Ké wa kùìn ma Míɖò-pà nìà ɖé Dèɓé ɓíɖí-hwɔ̀ɖɔ̀ɔ̀ múɛɛ dyi. Ké wa nyu ma toún-vɔ̃̀ìn-ɖɛ̀ ɓáún-ɓáún kè dyí-zĩ̀ìn-ɖɛ̀ kúɖúú.

⁶ Ké Hɛ́sèkádyà gã ma sójà-nàìn-nyɔ̀ ɓě, ɓɛ́ wa ké ma nyɔ ɓěɔ̀ kɔ̃in nì. Ké ɔ poìn ma nyɔ ɓěɔ̀ ɓó ɔ gbo dyí ɓó hwɔɖɔɔ̀ gmɔ-wɔ̃̀ɔ̀ gbo, ké ɔ cɛ̃ ma wa nyɔ-hwòɖǒǔn-kùìn-wùɖù gbo, ké ɔ ɖá,

⁷ “Ɓě mɛ ku dyi, ɓɛ́ ɓě ké hwòɖǒ ku. Ɓěǐn ɖá ɓɛ́ ɓě ké fɛ̃̀ìn, ɓɛ́ ɓěɛ̀ hwòɖǒ ké ɖé ɖei kpá ɓá Àsíwíɖíà-kã̀ǎɔ̀ kè ɔ sójà kúɖúú ɓěɔ̀ jè dyí, sepóɛɖé nyɔ mɔ̀ nyɔ nìà ɓó à gboɛɛ, ɔ kpé ɓúá dyí ké ɔ zi ɔ nììn kpéɔ̀ dyí.

⁸ Ɔ taɓa nyɔǔn-dyùɛ̀ sɔ̃-kpà hwìɖǐǐ, kɛɛ Bounɓo mɔ̀à à Gèɖèpɔ́ɔ̀ kɛɛ nì ɓó à gbo, ɓɛ́ ɔ ké à gbo kpá, ɓɛ́ ɔ ké à bìì vɔ̃.” Ké Hɛ́sèkádyà mɔ̀à Júɖà-kã̀ǎɔ̀ kɛɛ wuɖuɔ̀ po ma nyɔ ɓěɔ̀ hwòɖǒ kpéí.

⁹ Ti ɓɛ́ Sánàkéwìɖì mɔ̀à Àsíwíɖíà-kã̀ǎɔ̀ kɛ kè ɔ sójà séín ɓěɔ̀ ɖǎ ma Ɖákì-hwɔ̀ɖɔ̀ɔ̀ wɔ̃ gbǎìn nyɛɛ, ɔ ɖoɓo ma ɔ gɔ̌mànà-nyɔ̀ ɓěɔ̀ ɖíɛ́ ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ wĩín, ɖé Hɛ́sèkádyà mɔ̀à Júɖà-kã̀ǎɔ̀ kɛ kè Júɖà-nyɔ̀ séín ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo, ké ɔ ɖá,

¹⁰ “Ɖɛ mɔ̄ Sánàkéwìɖì mɔ̀à Àsíwíɖíà-kã̀ǎɔ̀ kɛɛ cɛ̃ɛ kɛà kɛ̀. Ɖɛ́ mɔ̀ ɖɛ ɓě dèà hwòɖǒ kɔ̃, nìí ɓɛ́ ɓě dyià ɖé Jùɖúsɛ̀ɖɛ̀ìn mɔ̀ hwɔɖɔ ɓɛ́ ḿ kè ní sójà ɓěɔ̀ ɖǎà wɔ̃ gbǎìn nyɛɛ mú nì ke kóɖó-kóɖóɛ́?

¹¹ Má, Hɛ́sèkádyà nì ɓě cáuń, nìí ɓɛ́ ɔ ké ɓě mɔ́ kè ní-ná-tò dyí ɖáɓá, ti ɓɛ́ ɔ cɛ̃ɛ ɓě gbo, ké ɔ ɖá, ‘Bounɓo mɔ̀à à Gèɖèpɔ́ɔ̀ kɛɛ mu à Àsíwíɖíà-kã̀ǎɔ̀ xwaún póìno’ kɛe?

¹² Má, Hɛ́sèkádyà nìà kɛ mɔ̀ nyɔ wáɖá ma kà Bounɓoɔ̀ ɓièìn-naín ɓě nìà ɖé toɖo ɓěɔ̀ dyaa kè ɔ sáa-kɔ̃-zàìn-gbàà ɓěɔ̀, ké ɔ cɛ̃ɛ ma kà ɓě kè Júɖà-nyɔ̀ tɔ̀ɔ̀ ɓěɔ̀ gbo, ké ɔ ɖá, ‘Ɓě mɛ ɓiè Bounɓoɔ̀ ɓó gbàà dyúáɖò dyúa, ɓɛ́ ɓě ké ɓó sáa zàìn’ nyɛe?

¹³ Ɓě séè ɖɛ ḿ kè ḿ ɓǎ nììn ɓǎ ɓěɔ̀ ɖǎ ɓóɖó-dù séín ɓěɔ̀ bũ̌ nyuɛɛ jè wɔ̃́ ɖòe? Ɓóɖó-dù ɓěa gèɖèpɔ́ɔ̀ ɓěɔ̀ póìn ma waà ɓóɖó ɓěɔ̀ sɔ̀ìn ɖé ḿ xwaúne?

¹⁴ Ɓóɖó-dù séín ɓě ɓɛ́ ḿ ɓǎ nììn ɓǎ ɓěɔ̀ gbɔɔ̀ ma kà mú hwɛ̀ ɓɛ́ mɔ́ún dyià ɓó dyí kɔɛɛ, waà nyɛ́ kɔ̃̀ nììn gèɖèpɔ́ɔ̀ ɖǎ ɔ ɓóɖóɔ̀ à xwaún póìn ɖò kɛ́? Kà ɔ nìà náa, nìí, xwɛ̌ ɓě nììn gèɖèpɔ́ɔ̀ ɓɛ́ìn ɓě ḿ xwaún póɛ̀n nyɛ́?

¹⁵ Ɔ jèɛɛ, Hɛ́sèkádyà mɛ ɓɔ́ ɓě cáa, ɓɛ́ ɔ ké ɓě hwìǐ zàìn ɖé ɖɛ nìà kɛ mú. Ɓěǐn ɖá ɓě ké ɔ wuɖuɔ̀ jǎà po, sepóɛɖé ɓóɖó-dù ɖò mɔɔ kã́á-ɓòɖò ɖòɛ̀ gèɖèpɔ́ɔ̀ ɖò séè ɔ nyɔ ɓěɔ̀ póìn ɖò sɔ̀ìn ɖé ḿ xwaún, mɔɔ sɔ̀ìn ɖé ḿ ɓǎ nììn ɓǎ ɓěɔ̀ xwaún. Nìí, xwɛ̌ ɓě nììn gèɖèpɔ́ɔ̀ ɓɛ́ìn ɓě ḿ xwaún póɛ̀n nyɛ́?”

¹⁶ Ké Sánàkéwìɖìɛ̀ gɔ̌mànà-nyɔ̀ ɓěɔ̀ cɛ̃ ma Bounɓo Gèɖèpɔ́ɔ̀ kè ɔ gbo-nì-nyɔ̀ Hɛ́sèkádyà ɖɛ gbà kúɖúú kɔ̃ún ɖe.

¹⁷ Ké ɔ se ɓó sèìn, kɛɛ ɔ céè ma Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ wuɖuún-ɖaɓa-cèè-ɖɛ̀, ké ɔ ɖá, “Kà ɓóɖó-dù ɓěɔ̀ gèɖèpɔ́ɔ̀ ɓěɔ̀ se ma kà waà nyɔ ɓěɔ̀ póɛ̀n ɓɛ́ìn sɔ̀ìn ɖé ḿ xwaún wɛ̃ɛ, kà dyúáɖòɔ̀ kǎà Hɛ́sèkádyà nììn Gèɖèpɔ́ɔ̀ se ɔ nyɔ ɓěɔ̀ póɛ̀n ɓɛ́ìn sɔ̀ìn ɖé ḿ xwaún.”

¹⁸ Ké Sánàkéwìɖìɛ̀ gɔ̌mànà-nyɔ̀ ɓěɔ̀ páná ma mú zoo ɖé Jùɖúsɛ̀ɖɛ̀ìn-nyɔ̀ ɓě nì ma ɖé gmɔɔ̀ kɔ̃ɛɛ gbo, ɖé Híìbúɖúù-wùɖù mú, ɓɛ́ ɔ ké wa fã̀à vɛ̀nɛ̀ mú po, nìí ɓɛ́ dyììn ɖéɛ múɛɛ, wa ké hwɔɖɔɔ̀ dyí ɖú.

¹⁹ Ké wa cɛ̃ Jùɖúsɛ̀ɖɛ̀ìn-hwɔ̀ɖɔ̀ɔ̀ Gèɖèpɔ́ɔ̀ jè kà wa cɛ̃à ɓóɖó-dù kà kò ɖò ɓěɛ̀ gèɖèpɔ́ɔ̀ ɓě mɔ̀à nyɔǔn-dyùɛ̀ sɔ̃ɔ̀ mɛɛ-ɖɛ̀ kɛɛ jèɛ.

²⁰ Ti ɓɛ́ Kã́á Hɛ́sèkádyà kè Àzédyà mɔ̀à kpáá-ɖɛ̀-cɛ̃-nyɔ̀, ɓɛ́ ɔ mɔ̀à Ámɔ̀zìɛ̀ dyú-gààɔ̀ kɛɛ wɔ̃́ ma wuɖu ɓěɛ̀ kɛɛ, wa ɓaà ma, ɓɛ́ Bounɓoɔ̀ ké wa gbo kpá.

²¹ Ké Bounɓoɔ̀ ɖoɓo ma ínjà ɖò, ké ɔ ɖáɓá ma gàa-zà-nyɔ̀ séín ɓě kè sójà-wuɖuí-kɔ̃̀-nyɔ̀ séín ɓě kè gɔ̌mànà-nyɔ̀ vɛ̀nɛ̀ séín ɓě nì ma ɖé Àsíwíɖíà-kã̀ǎɔ̀ jàɖàìn-hwɔ̀ɖɔ̀ɔ̀ múɛɛ ɖé dyi nyɛ̀nɛ̀ɛ̀. Ɔ jèɛɛ, Àsíwíɖíà-kã̀ǎɔ̀ kɔ́ìn ma ɖe, ké ɔ mu ma ɔ ɓíɖí-ɓòɖòɔ̀ kɔ̃ ɖe ɖé dɛ̃ mú. Wé ɖòɛ̀ ɓaɖaa, ɔ mu ma ɖé ɔ gèɖèpɔ́ɔ̀ gbǒɔ̀ mú, ké ɔ mìɔùn nììn xwíníín-zà-dyù-gàà ɓěɔ̀ ɖíɛ́ ɓě ɖáɓá ma ɔ gàsíà dyí.

²² Kǎà Bounɓoɔ̀ nyu ma Hɛ́sèkádyà kè nyɔ séín cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ póɛ̀n sɔ̀ìn ɖé Sánàkéwìɖì mɔ̀à Àsíwíɖíà-kã̀ǎɔ̀ kɛ kè waà mú-nyɛ́-nyɔ̀ séín ɓěɔ̀ xwaún. Púɛɛ, gìɖìǐ nì ma ɓó wa ɖei dà séín.

²³ Ké nyɔ ɓáún-ɓáún dyà ma Bounɓoɔ̀ nyíí-ɖɛ̀ ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa nyí ma Hɛ́sèkádyà mɔ̀à Júɖà-kã̀ǎɔ̀ kɛɛ ɖɛ kpa ɖɛ kúɖúú ɓě ɖekè. Ké sɔ̀ìn ɓó ké dyúa muɛɛ, Hɛ́sèkádyà ɓéɖé ma dya-dè-dè ɖé ɓóɖó-dù séín dyéɖéín.

Hɛ́sèkádyà wɛ́ jè kè ɔ mìɔùn dyí ɓúáìn jè

²⁴ Sɔ̀ìn ɓó ɖɛ ɓěɛ̀ gboɛɛ, Hɛ́sèkádyà wɛ́ ma ɓɛ́ ɔ ké mɛ́. Ké ɔ ɓaà ma Bounɓoɔ̀, ké Bounɓoɔ̀ jǔ ma ɔ ɓaà-wùɖùɔ̀ gɔ̃̌, ké ɔ tɛ̀mɛ̀ìn ma ɔ dyí-tɛ̀mɛ̀ìn-ɖɛ̀ ɖò dyí.

²⁵ Kɛɛ Hɛ́sèkádyà ɓúáìn ma ɔ mìɔùn dyí, ké ɔ se nɔ̀mɔ̀ dyíin jĩ̀ kà ɓɛ́ Bounɓoɔ̀ nyu ma ɔ dyíɛɛ jè hwòɖǒ gbo po. Ɔ jèɛɛ, Bounɓoɔ̀ dyoɖoɔ̀ dyi ma ɔ kè Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖò gànáɔ̀ kɔ̃.

²⁶ Kɛɛ púɛɛ, Hɛ́sèkádyà dyà ma ɔ mìɔùn ɓíɖíi ɓá ɔ mìɔùn dyí-ɓúáìn-ɓúáìnɔ̀ jè dyí. Ké Jùɖúsɛ̀ɖɛ̀ìn-nyɔ̀ ɓěɔ̀ dyà ma wa mìɔùn ɓíɖíi ɖekè. Ɖɛ nìà kɛ nyuɛ ké Bounɓoɔ̀ dyoɖoɔ̀ se wa kɔ̃ dyi ɖe ti ɓɛ́ Hɛ́sèkádyà nì ma toɖo kɔ̃ɛ.

Hɛ́sèkádyàà kɔ́mɔ́ kè ɔ dya-dè-dè

²⁷ Ɓó tia ɓaɖaa, Hɛ́sèkádyà ɓéɖé ma kɔ́mɔ́-ɖɛ̀ kúɖúú ɔ kè dya-dè-dè. Ké ɔ nyu ma ɖɛín-dyi-dèìn-naín ɓě ɓó ɔ séɓàɖà kè góò kè sɔ́ɔ́ kpa ɖɛ ɓě kè nyɔ́ún-nɔ̀mɔ̀-ɖɛ̀ ɓě kè dyí-zĩ̀ìn-ɖɛ̀ ɓě ɔ kè ɖɛ-fùù kpa ɖɛ ɓě jè.

²⁸ Ké ɔ nyu ma ɖɛín-dyi-dèìn-naín ɓě ɓó ɖii-ɖɛ̀ kè wã́ìn ɔ kè cáná jè. Ké ɔ po ma ɓìɖǐ-nì-naín ɓě kè ɓáɖáá-kòò ɓě.

²⁹ Ké ɔ dè ma hwɔɖɔ ɓě ɓó ɔ mìɔùn bìì, ké ɔ ɓéɖé ma ɓáɖáá kè wiɖi ɔ kè ɓìɖǐ kúɖúú, sepóɛɖé Gèɖèpɔ́ɔ̀ nyí ma ɔ kɔ́mɔ́-ɖɛ̀ kúɖúú.

³⁰ Hɛ́sèkádyà nìà kɛ mɔ̀ nyɔ kã zɔ̃̌ɔ̀ kà Gíhɔ̃̀-nìɔ̀ zĩ̀ìn-naínɔ̀, ké ɔ zàìn níɔ̀ dyí, ké ɔ kpàìn ɖéɛ Dèɓé ɓíɖí-hwɔ̀ɖɔ̀ɔ̀ dyóɖó-dyi-kpáìn-naínɔ̀ kɛ̀. Ké Hɛ́sèkádyàà sɔ̃ún-kpa-ɖɛ̀ séín wóɖó mú.

³¹ Ké ɓá kíá ɓě ɓɛ́ wa sɔ̀ ma ɖé Báɓèɖɔ́ùn-ɓòɖòɔ̀ wuɖuí-kɔ̃̀-nyɔ̀ ɓěɔ̀ gbo, ké wa dyi ma ɔ dyi dièɛ̌n ɓá dyí-tɛ̀mɛ̀ìn-ɖɛ̀ ɓɛ́ ɔ ɖǎ ɖé ɔ ɓóɖóɔ̀ kɔ̃ kpáa jè dyíɛɛ, Gèɖèpɔ́ɔ̀ táà ma ɔ dyi ɓó tia ɓaɖa, nìí ɓɛ́ ɔ ké ɔ mú dɔ̃̌, ɓɛ́ ɔ ké ɔ hwòɖǒɛ̀-gbɔ-po-ɖɛ̀ séín dyí dyuò.

Hɛ́sèkádyàà wuɖuí-kɔ̃̀-kpèɔ̀ dúí-jɛ̀ɖɛ̀ìn-naín

³² Ɖɛ nɔ̀mɔ̀ kɔ̃in ɓě ɓɛ́ Hɛ́sèkádyàà nyu ma kɛ kè ɔ nyuu-ɖɛ̀ tɔ̀ɔ̀ ɓěɔ̀, wa jè céè ɖé Àzédyà mɔ̀à kpáá-ɖɛ̀-cɛ̃-nyɔ̀, ɓɛ́ ɔ mɔ̀à Ámɔ̀zìɛ̀ dyú-gààɔ̀ kɛɛ dyí-tɛ̀mɛ̀ìn-ɖɛ̀-cèè-ɖɛ̀ɔ̀ mú kè ɖé Júɖà-kã̀ǎ ɓěɔ̀ kè Éézùɖùɛ̀-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

³³ Ké Hɛ́sèkádyà mu ma ɔ ɓǎ ɓě gbo, ké wa zà ma ɔ dyóɖóún ɖé Dèɓéɛ̀ xwíníín-dyù ɓěɔ̀ nììn kú-toɖoɔ̀ mú, ɖé toɖo ɖò dyéɖéí. Ké Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ nyu ma ɔ xwɛ́ jèɔ̀ nɔ̀mɔ̀ dyíin. Ké ɔ dyú-gàà kɔ̃̀ nyɛ́nɛ́ mɔ̀ Mànásì kɛɛ mɔ̀ ma kã́á ɓó ɔ bɛ̃̌ǐn.