2 Kánáníkɔ̀ 31 - Ɓǎsɔ́ɔ̀ Báɓòɔ̀

Hɛ́sèkádyà po gma ɖìè ɖò ɓá kà nyɔ ké Gèɖèpɔ́ɔ̀ ɓièɛ̀ nyuɛ jè dyí

¹ Sɔ̀ìn ɓó ɖɛ ɓěɛ̀ gboɛɛ, nyɔ séín ɓě ɓɛ́ wa gã̀ ma ɓó dyíɛɛ mu ma ɖé Júɖà-hwɔ̀ɖɔ̀ séín ɓěɔ̀ mú, ké wa wàìn ma sɔ́ɔ́-kpò ɓě mɔ̀à kũùn-kpò-gèɖèpɔ́ɔ̀ ɓěɔ̀ hwɔìn-ɖɛ̀ kɛɛ dyi, ké wa ɖaɓa ma cu-kpóɖó ɓě mɔ̀à Àséwàɖà nììn hwɔìn-ɖɛ̀ ɓěɛ, ké wa wáɖá ma kũùn-kpò ɓièìn-naín ɓě nìà ɖé toɖo ɓěɔ̀ dya kɛ kè waà sáa-kɔ̃-zàìn-gbàà ɓěɔ̀. Wa nyu ma ɖɛ dyúáɖòɔ̀ ɖé Júɖà-ɓòɖòɔ̀ kè Bɛ̃́címà-ɓòɖòɔ̀ kè Ífèɖèìn-ɓòɖòɔ̀ ɔ kè Mànásì-ɓòɖòɔ̀ kɔ̃ dà séín. Hwɛ̀ ké nyɔ séín ɓěɔ̀ mu wa ɓíɖí-hwɔɖɔún kè waà kɔ̃̀ɔ̀-ɖɛ̀ ɓě gbo ɖe.

² Ti ɓɛ́ nyɔ ɓěɔ̀ ɖǎ ma wa ɓíɖí ɖe muɛɛ, Hɛ́sèkádyà ɓéɖé ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kpoo ɓě mú poɛń. Kà wa ɖò-ɖòɛ̀ kũ̀à nyu jĩ̀ɛ̀ kɛɛ kɔ̃̀ kpoo wa kpá mú. Sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ mɔ̀ ma fɔ̃ɔ-sàǎ-zàìn-ɖɛ̀ ɓěɔ̀ kè gbo-kpɔ̃ìn-sàǎ-zàìn-ɖɛ̀ ɓěɔ̀ nyu-nyɔ̀, ké wa mɔ̀ kũ̀à-nyu-nyɔ̀ ɖé Bounɓoɔ̀ gbǒɔ̀ mú, ké wa mɔ̀ Bounɓoɔ̀ zùo-po-nyɔ̀ kè ɔ ɓàìn-nyɔ̀ ɖé gbǒɔ̀ gmɔ-wɔ̃̀ ɓěɔ̀ gbo.

³ Ké kã́áɔ̀ tò ma ɔ nyúà-ɖɛ̀ ɓěɔ̀ ɖíɛ́ ɓě, ké wa nyuɛ ma fɔ̃ɔ-sàǎ-zàìn-ɖɛ̀ ɓě mú. Ɖò mɔ̀ fɔ̃ɔ-sàǎ-zàìn-ɖɛ̀ ɓó gànà-kṹún kè hwìo, ké ɖò mɔ̀ fɔ̃ɔ-sàǎ-zàìn-ɖɛ̀ ɓó Gèɖèpɔ́ɔ̀ fɔ̀-wè ɓěɔ̀ kè Dɛ̀nɛ̀-Ɖìè-Hwèɖè-hwɔ̀ ɓěɔ̀ ɔ kè hwɔ tɔ̀ɔ̀ ɓě kɔ̃̀ jè ɖǎ ma céè ɖé Bounɓoɔ̀ gma-cèè-ɖɛ̀ɔ̀ múɛɛ bìì.

⁴ Ké Hɛ́sèkádyà cɛ̃ɛ ma nyɔ ɓě cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo kóɖó-kóɖó, ɓɛ́ wa ké ɖɛ ɓě ɓɛ́ sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kɔ̃̀ wa ké dyéɛɛ wa nyí, nìí ɓɛ́ wa mɔ̀ùn ké Bounɓoɔ̀ gmaɔ̀ jè gbo gmɔ̀ kóɖó-kóɖó.

⁵ Ti ɓɛ́ wuɖuɔ̀ ɓeìn ma dyi nyɛ̀nɛ̀ɛ̀ kɛɛ, nyɔ ɓěɔ̀ tò ma ɖɛ ɓáún-ɓáún. Wa tò ma waà ɖii-ɖɛ̀ kĩ́ín-kĩ́ín mɔ̀à mɔɔ́ kè wã́ìn kè cáná kè ɖo-nì ɔ kè ɖɛ tɔ̀ɔ̀ séín ɓě sɔ̀ ɖé waà geɖe ɓěɔ̀ gboɛ. Ké wa dyà ma waà ɖɛ séín ɓěɔ̀ ɓàɖàìn-bùè ɓáún-ɓáún.

⁶ Ké Éézùɖùɛ̀-nyɔ̀ ɓěɔ̀ kè Júɖà-nyɔ̀ ɓěɔ̀ nyɔ ɓě cĩ́ ma ɖé Júɖà-hwɔ̀ɖɔ̀ tɔ̀ɔ̀ ɓěɔ̀ múɛɛ dyà ma wa nììn ɓìɖǐ kè ɓáɖáá ɓěɔ̀ ɓàɖàìn-bùè ɓěɔ̀ kè ɖɛ ɓě ɓɛ́ wa ɖǎ ma Bounɓo mɔ̀à waà Gèɖèpɔ́ɔ̀ kɛɛ xwáɖáún zàìn, ké wa ɖǎ ma wáká poɛɛ ɓàɖàìn-bùè ɓěɔ̀. Wa dyà wa, ké wa gbǒìn wa kòò ɓě dyí.

⁷ Wa ɖú ma ɖɛ ɓěɔ̀ kòò ɓěɔ̀ dyí gbǒìn kpàǐ ɖé dɛ̀nɛ̀ɔ̀ tã nììnɔ̀ xwíníín, ké wa hwɔ ma wa dyí gbǒɛ̀n ɖé dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ xwíníín.

⁸ Ti ɓɛ́ Hɛ́sèkádyà kè ɔ gɔ̌mànà-nyɔ̀ vɛ̀nɛ̀ ɓěɔ̀ dyi, ké wa dyé ma ɖɛ ɓěɔ̀ kòò ɓěɔ̀ kɛɛ, wa po ma Bounɓoɔ̀ kè ɔ nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ zùo.

⁹ Ké Hɛ́sèkádyà diè ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖɛ ɖíɛ́ ɓě dyi ɓá ɖɛ ɓěɔ̀ kòò ɓěɔ̀ jè dyí.

¹⁰ Ké Ázàwíɖíà mɔ̀à sáa-zà-nyɔ̀ vɛ̀nɛ̀ɔ̀, ɓɛ́ ɔ mɔ̀ Záɖòɛ̀ xwíníín-dyù ɓěɔ̀ ɖòɛɛ jǔ ma ɔ gɔ̃̌, ké ɔ ɖá, “Nyɔ ɓěɔ̀ ɖǎ ma nyíí-ɖɛ̀ ɓěɔ̀ ɖé Bounɓoɔ̀ gbǒɔ̀ mú dyàà dyí ɖúɛɛ, à ɖi ɖɛ, ké à ɖoɓo, ké ɖii-ɖɛ̀ ɓáún-ɓáún seìn dyi, sepóɛɖé Bounɓoɔ̀ po ɔ nyɔ ɓěɔ̀ mana kɔ̃. Ɔ jèɛɛ, ɖɛ jĩ̀ kàà sèà kɔ̃in nyɛ̀.”

¹¹ Hwɛ̀ ké Hɛ́sèkádyà cɛ̃ɛ ma wa gbo, ɓɛ́ wa ké ɖɛín-dyi-dèìn-naín ɓě ɖé Bounɓoɔ̀ gbǒɔ̀ mú nyu. Ké wa nyuɛ ma náa.

¹² Sɔ̀ìn ɓóɛ gboɛɛ, wa poá ma nyíí-ɖɛ̀ ɓěɔ̀ kè ɓàɖàìn-bùè ɓěɔ̀ ɔ kè ɖɛ ɓě kpá wáká ɓó Bounɓoɔ̀ bììɛɛ ɖé ɖɛín-dyi-dèìn-naín ɓěɔ̀ kánáá pū. Ké Kónàníà ɓɛ́ ɔ mɔ̀ ma Ɖíìváà-gàà ɖòɛɛ mɔ̀ ma ɖɛ ɓěɔ̀ jè gbo-gmɔ̀-nyɔ̀, ké ɔ ɖíí-gàà Símì mɔ̀ ma ɔ sɔ̃-xwíɖíi-dè-nyɔ̀.

¹³ Ké gàa ɓě ɓɛ́ wa mɔ̀ ma Kónàníà kè ɔ ɖíí-gàà Símì gbo-kpá-nyɔ̀ ɓě, ɓɛ́ Kã́á Hɛ́sèkádyà kè Ázàwíɖíà mɔ̀à nyɔ vɛ̀nɛ̀ɔ̀ ɖé Gèɖèpɔ́ɔ̀ gbǒɔ̀ múɛɛ gã ma kɛɛ, wa kɛà kɛ̀. Wa mɔ̀ Jɛ̀híò kè Ázàzíà kè Náhà kè Àsáhèò kè Jɛ̀wíɖímɔ̀ kè Jòzáɓà kè Ɛ́ɖìè kè Ìmàkíà kè Máhà ɔ kè Bɛ̀nádyà. Gàa ɓěa mɔ̀ ma ɖɛ ɓěɔ̀ kɔ̃in-gmɔìn-nyɔ̀ ɓě.

¹⁴ Ké Kówèɖè ɓɛ́ ɔ mɔ̀ ma Ímànà mɔ̀ Ɖíìváà-nyɔ̀ ɖò kɛɛ dyú-gàà, ké ɔ mɔ̀ ma Gèɖèpɔ́ɔ̀ gbǒɔ̀ gmɔ-wɔ̃̀ hwɔà ɖé dyóɖó-xwáɖáún-wóɖóìn-naínɔ̀ dyíɛ dyí-gmɔ̀-nyɔ̀ɛɛ kɔ̃̀ ma hwòɖǒ-wáɖáá-nyìǐ-ɖɛ̀ ɓě ɓɛ́ nyɔ ɓěɔ̀ dyà ma kà Gèɖèpɔ́ɔ̀ kɛɛ wuɖuí, ɓɛ́ ɔ ké wa sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ múin-geìn-nyɔ̀ jǔ.

¹⁵ Gàa ɓě ɓɛ́ wa kpá ma Kówèɖè gbo ɓó ti kè ti xwíníín, ɓɛ́ wa ké ɖɛ ɓěɔ̀ wa ɖíí ɓěɔ̀ gbo kpa ɖé sáa-zà-nyɔ̀ ɓěɔ̀ nììn hwɔɖɔ ɓěɔ̀ múɛɛ, wa kɛà kɛ̀. Wa mɔ̀ Ídɛ̃̀ìn kè Mĩ̀jámì kè Jésùà kè Sɛ̀mádyà kè Ámàwíɖíà ɔ kè Sɛ́kàníà. Wa geìn ma ɖɛ ɓěɔ̀ sáa-zà-nyɔ̀ ɓěɔ̀ nyɔ gmɔ̀ kè nyɔ sùà múin dyììn ɖé waà kpoo ɖò-ɖò ɓěɔ̀ mú.

¹⁶ Wa nyí ma ɖɛ ɓěɔ̀ gàa-dyù séín nì ɖé sáa-zà-gbò xwíníínɔ̀ mú, ɓɛ́ wa nyuá zɔ̃ kpáɖá-nyɔ ɓaɖa-bùè mɔɔ zi kɔ̃ɛ. Wa mɔ̀ nyɔ ɓě kɔ̃̀ nyɛ́nɛ́ céè ɓíɖíi, ké wa mu ɖé Bounɓoɔ̀ gbǒɔ̀ mú ɓó wé kè wé nììn kũ̀à ɓěɔ̀ nyu jè, dyììn ɖé kà waà kũ̀à nyu ɓɛ́ɛ ɖé waà kpoo ɓěɔ̀ múɛɛ mú kɛ.

¹⁷ Kà wa nyu ma sáa-zà-nyɔ̀ ɓěɔ̀ nyɛ́nɛ́ ɓíɖíi céèɛ̀ kɛɛ mɔ̀ dyììn ɖé wa ɖò-ɖòɛ̀ gbǒ-xwíníínɔ̀ mú, ké kà wa nyu ma Ɖíìváà-nyɔ̀ ɓě ɓɛ́ wa nyuá zɔ̃ kpáɖá-nyɔ mɔɔ zi kɔ̃ɛɛ nììn nyɛ́nɛ́ ɓíɖíi céèɛ̀ kɛɛ mɔ̀ dyììn ɖé kà wa nììn kũ̀à nyu ɓɛ́ɛ ɖé waà kpoo ɓěɔ̀ múɛɛ mú.

¹⁸ Sáa-zà-nyɔ̀ ɓěɔ̀ kè waà gmàà ɓě kè waà dyú-gàà ɓě ɔ kè waà dyú-màà ɓě, wa séín po ma nyɛ́nɛ́ ɓíɖíi, sepóɛɖé sáa-zà-nyɔ̀ ɓěɔ̀ kpɔ̃ ma ɓó wa mìɔùn mú hwɔ jè gboi kóɖó-kóɖó.

¹⁹ Ké ɓá sáa-zà-nyɔ̀ ɓě mɔ̀ Eɖóúnɛ̀ xwíníín-dyù-gàà ɓě, ɓɛ́ wa nì ɖé geɖe-pà ɓě nìà hwɔɖɔ ɓěɔ̀ ɖeiɛ kɔ̃ɛɛ jè dyíɛɛ, Hɛ́sèkádyà gã ma gàa ɖíɛ́ ɓě, ké ɔ síìn wa nyɛ́nɛ́ dɛ̀ǐn, ɓɛ́ wa mɔ̀ nyɔ ké gàa ɖò-ɖò séín ɖɛ múin geìn ɖé sáa-zà-nyɔ̀ ɓěɔ̀ hwìɛ̀, ɔ kè ɓɛ́ wa ké nyɔ séín ɖɛ múin geìn ɖé Ɖíìváà-nyɔ̀ ɓě ɓɛ́ wa kɔ̃̀ nyɛ́nɛ́ céè ɓíɖíiɛɛ hwìɛ̀.

²⁰ Kǎà Hɛ́sèkádyà nyuɛ ma ɖé Júɖà-ɓòɖòɔ̀ dà séín. Ɔ nyu ma ɖɛ nɔ̀mɔ̀ dyíin, ké ɔ sɛ́ɖɛ́ìn dyí, ké ɔ mɔ̀ jǎà-ɖɛ̀ ɖé Bounɓo mɔ̀à ɔ Gèɖèpɔ́ɔ̀ kɛɛ dyéɖéín nyɛ.

²¹ Ké kũ̀à séín ɓě ɓɛ́ ɔ kpa ma sɔ̃ún ɓá Gèɖèpɔ́ɔ̀ gbǒɔ̀ kũ̀à ɓě jè dyí, dyììn ɖé kà gmaɔ̀ nyuɛ cɛ̃ɛ kɛ kè ɖé ɔ Gèɖèpɔ́ɔ̀ kíɖíí sí-sí múɛɛ, ɔ nyu wa hwòɖǒɛ̀-ɖé-hwɛ̀-kà. Ɔ jèɛɛ, ɔ kũ̀à ɓěɔ̀ wóɖó mú.